|
الوالده... وطلبها الغريب
السلام عليكم ورحمة الله وبركاته
كل عام وانتم بخير... بعد غياب طويل... حاب استشيركم بموضوع :) بندش بالموضوع من غير مقدمات :26::26: الوالده الله يطول بعمرها لنا من اسبوع اتصلت وقالت بغيتك بموضوع ,, طلبت منها تاجيله لاني عندي بعض المشاغل... أصرت وقالت اذا ما مريت اليوم مب راضيه عليك ولا بغيت أشوفك:25::25: حزتها حسيت انه في مصيبه لانه بطبعها أغيب عنها بالايام ما تسال عن هوى عن داري المهم سرت لها ويلست وياها بعد موشحه عريضه منها وعن البر وعن رضا الوالدين :o:o قالت بغيتك تيب حرمتك الثانيه وتسكنها ويانا (( هلت المصيبه على راسي )) ؟؟؟؟؟؟؟؟؟؟؟؟؟ حاولت أكون هادي وسالتها حق شنو تبغينها تسكن وياكم ؟؟ وزوجتي الاولى شنو وضعها ؟؟ وشلون بغيتيني أتفاهم وياها وبشنو أقنعها ؟؟؟ ردت ... أنا كبرت بسن ومريضه وبغيت من يداريني , وأنتوا كل واحد فيكم لاهي بحياته ,, انا وأبوك ناكل ونيلس بالبيت العود بروحنا .. زوجتي الاولى عندكم وبنتي 24 ساعه وياكم .. حزتها ردت بنبره وصوتها خرم اذوني (( أي حرمه تتكلم عنها 24 ساعه بدارها ,, ما تنزل الا اذا طلبنا منها ,, ولا تدري عنا بالاياام ,,, ودومها مريضه المهم أنها غسلت شراعها )) بيني وبين نفسي قلت فرصه وعذر عشان أطلعها من البيت وافتك من حنتها.. قلت لها مب مشكله انا باخذ لجين وردها بيتها وزوجتي الثانيه اذا طاعت (( 90% متاكد أنها موافقه)) بسكنها عندكم.. قالت لا :( بغيت تحرمنا من عيالك وأمهم مب قد المسؤليه ,, زوجتك الاولى تم عندنا ,,, ولكن زوجتك ثانيه تبني لها هني عدالنا تظل قريب منا ... يا جماعه حزتها ما عرفت أرد عليها أو أجادلها وبيني وبينكم حسيتها مليان صوب حرمتي الاولى المهم ثاني يوم علمت الوالد بالموضوع وناقشه المشكله انه طلع رايه من رايها وتم يقول لجين بنت اخوي وهذا بيتها ,, لكن احن بسن نحتاج من يدارينا .... طلبت منها تاجل الموضوع ولا تجيب طاريه لاحد لانه حرمتي تعبانه هالفتره من يومها وانا أفكر ومب عارف شلون أرضيها من غير ما أزعلها وتاخذ على خاطرها مني ,, يا جماعه شلون اقنعها تشل هالفكره من راسها ,,, لانها بتحطني بعوار راس أنا بغنى عنه |
رد : الوالده... وطلبها الغريب
حتى لو جبت الثانيه بتظل في دارها درءا للمشاكل
شكله الوالده زعلانه من زوجتك الاولى او مليانه منها وتبغى تكسر راسها باحضار زوجتك الثانيه في وسط البيت ختى تحصل الحريقه وفخار يكسر ببعض جهز نفسك لمشاكل مالها اول ولا اخر وحدث العاقل بما يعقل زوجتين تحطهم ببيت واحد ايش النتيجه؟ يمكن الوالده الله يحفظها تظن انه بحضور الزوجه الثانيه للبيت رح يحصل تنافس في مداراة والاهتمام بالجد والجده بدافع الغيره والتنافس على حب الجدين لكن هذا مارح يحصل كل وحده رح تسكر على نفسها الباب وتعيش بمملكتها وبعالمها استخير وشوف ايش اللي ترتاحله |
رد : الوالده... وطلبها الغريب
ينقل الى القسم الانسب
قسم العلاقات الاسرية والاجتماعية |
رد : الوالده... وطلبها الغريب
ابو خليفه عوداً حميداً
طمنا عن لجين والبنوته ان شاءالله بخيير استخر الله |
رد : الوالده... وطلبها الغريب
بس اسأل أمك وأبوك .. هم يضمنون الزوجة الثانية راح تداريهم وتجلس معهم طول الوقت ؟؟ إن كانت زوجتك الثانية من النوع اللي مالها نفس طويل مع الكبار .. راح تجلس يوم يومين ثلاثة وبالأخير راح تظل بغرفتها .. |
رد : الوالده... وطلبها الغريب
حمدلله ع السلامة بو خليفة
ما اقول غير الله ييسر امرك |
رد : الوالده... وطلبها الغريب
عشان توضح الصوره لاني احس انكم فهمتوا انها بغتها تسكن وياهم ... هي طلبت مني ابني لها عدالهم بمعنى تكون جريبه منهم وتكون دش وتطلع بسهوله عندهم ,,, وانا ادري أنه الوالده نوعاً ما مب شايله هم زوجتي الاولى لانها تدري بطبعها ,, للعلم زوجتي الثانيه تزور أهلي بين فتره وفتره ,, بعض الزيارات تمر بسلام ,, ولكن الاغلب الاولى ما تنزل بذات اذا درت انه ثانيه تحت ... علاقة الوالده بزوجتي الاولى بالفتره الاخيره تعتبر متوتره لابعد حد ,, |
رد : الوالده... وطلبها الغريب
اقتباس:
هي حاليا بالمستفى من قبل العيد وسبب مشاكل الضغط والحمل |
رد : الوالده... وطلبها الغريب
اقتباس:
ما تشوف انه ظلم أن تكون زوجتك الثانية ببيت مستقل ولجين بجناح محكومة بنزلتها وطلعتها وحريتها مقيدة .. حتى لو كانت هي ما تحب تطلع كثير من جناحها لكن المرات القليلة اللي ممكن تنزل فيهم بتكون مو براحتها وممكن الصدام مع زوجتك الثانية بنسبة 80% وانت تعرف تماما شنو يعني البيت المستقل للجين وكم نفسها فيه ... وما دام انها تم بجناحها ومالها تأثير أو وجود بحياة والديك ربي يحفظهم معناها ما فرقت سواء هي ببيتها أو بيتهم . واذا على العيال تقدر أن تخصص لهم كل يوم ساعتين مثل فرض الصلاة حق لهم يرحوا العيال مع مربيتهم والخادمة ياخذهم السواق ويشوفونهم ويشبعوا منهم ولو تحب أنت او لجين يروحوا معاهم يكون حلو . لجين يا أخ بوخليفة مريضة ... مريضة ضغط يوصلها للمستشفى كثير أحيان .. مو مرض خفيف ... أي احد عنده أحد مريض ضغط أو سكر يراعوا مرضه وما يقولون له اخبار مزعجة وما يوتروا أعصابه ويراعوا نفسيته ... وفوق مرضها حملت مرتين ورا بعض وهي والده قيصريه ... غير وفاة أبوها اللي يا دوب مرعليها سنة .. غير وضعها مع أمها .. وتقول انها من قبل العيد بالمستشفى بسبب الضغط ..يعني سمعت او شافت شي رفع ضغطها وقهرها مدري !!! انت يهمك أنه أم عيالك تعيش الى أن يكبروا وتربيهم هي وللا لأ ؟؟ أعرفك ما شاء الله عند دبلوماسي وتقدر تقنع الوالدة بالي تبيه ... باقي تكون النية موجوده . الله يوفقكم ويهديكم ويشفيها ويقومها سالمة حبيبة قلبي وتجيب لك خليفة :) ... سلم لي عليها لو سمحت .. صدق مشتاقة لها حيل |
رد : الوالده... وطلبها الغريب
اقتباس:
|
| الساعة الآن 02:58 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©