|
زوجي همه الوحيد اخواته وطلباتهم
السلام عليكم ورحمة الله
انا اول مره اشارك ومادري سؤالي في مكانه الصحيح..بأقول مشكلتي وارجوكم اعطوني حل لاني تعبت وفكرت اهرب من البيت اكثر من مره انا متزوجه من 7 سنوات وعندي ولدين عندي اخوات كثار وزوجونا صغار ولسا ندرس بس عشان نخفف طبعا كنا عايشين بجحيم ببيت اهلي لا من امي ولا من ابوي.. تزوجت بس عشان اتخلص من حياة اهلي وللاسف زوجي همه الوحيد اخواته وطلباتهم لدرجة تقصيره علي وعلى اولادي بسببهم يعني اسبوعيا او كل اسبوعين يسافر ثلاث ايام عشان اخواته يغيرون جو مع العلم ان بعضهم متزوجات احيانا اروح معاهم بس اهون بعدها من الاهانات اللي اشوفها من زوجي بحقي وحق اولادي عشان اخواته بس يسبني ويلعني قدامهم واذا غلط في حق وحده منهم حتى لو مو غلطان يرجع يهين ويذل فيني بالساعات بس عشان يثبت لاخته انه ماراح يهينها قدامي نروح السوق يعطي اخواته فلوس وهم عندهم مكافأت الجامعه وانا مايعطيني شي يقول مفلس انتي تصبرين علي مو زي اخواتي هذا غير طلباتهم اللي ماتخلص من اكل مطاعم وملابس وكلها ثمنها غالي وانا بس عايشه عالتوفير يقول ماعندي شي وانا لي حق اكثر منهم هذا غير الذل اللي يجيني من اخواته من معاملته لي حتى لو يبغون غرض مني يتصلون بأخوهم يستأذنون منه ويدخلون بيتي وياخذون والغرض يخصني انا...وصلت لدرجه انه رايحين انا وياه مشوار بعيد وتتصل اخته تبي اكل من المطعم واصرت عليه ورجعني البيت عشان اكلها ...حاولت اكلمه يعدل ويوقف اخواته عند حدهم يقول هذي حياتنا مو عاجبتك بكيفك..واللي يتعبني اكثر انه مدرس وعنده وظيفتين غير التدريس ومتزوج وعنده اولاد ومو راضيين يخلونه يتفرغ لي ولاولادي..وعنده اثنين اخوانه متزوجين واحد مدرس والثاني مهندس وربي بس قاعدين ببيوتهم واذا طلعو طلعو مع زوجاتهم ...طيب وانا وحياتي الجحيم .. كل ماشكيت لاهلي قالو حافظي على بيتك واصبري وعندك اولاد بس خلاص طفح الكيل والله العظيم تعبت ابي اعيش مثل البنات ادري طولت عليكم ... ارجوووكم اعطوني حل تعباااانه تم تعديل العنوان ليتناسب مع الطرح |
رد : تكفوون اعطوني حل
بالنسبة للاهتمام والتمشيات والمصاريف
صادقي اخواته خليكي قريبة منهم اكثر منه .. اتفقي معهم عالطلعات ويصير هو المتطفل عليكم عشان يوديكم كلميهم كثير .. عطيهم اكثر مما تعطينه .. وحاولي يصير من كل قلبك و حاولي تستمتعين بوقتك معهم وتخلينهن يحبونك .. صدقيني من الغيرة بيلاحظ انهم مستغلينه وماخذين شي بزيادة .. وبيبعد عشان يبعدك عنهم بالنسبة للاهانات لازم تاخذين موقف وتكلمينه بهدوء انه شي مرفوض .. ولو يبي يصير له ولعائلته احترام قدام الناس ويبغى عياله يكبرون بجو صحي لازم يحترم امهم والله يصلح احوالك ويسخر لك زوجك |
رد : زوجي همه الوحيد اخواته وطلباتهم
مشكلتك ليست في أخواته .. مشكلتك الحقيقية مع زوجك
الذي لم تكسبيه حتى الآن ولا تجيدين التصرف معه.. |
رد : زوجي همه الوحيد اخواته وطلباتهم
انا لو منك راح اضبط علاقتي مع خواته
واي شيئ ابيه بخليه عن طريقهم دام يسمع كلامهم |
رد : زوجي همه الوحيد اخواته وطلباتهم
لا تزبطي علاقتك بأخواته
بالعكس قللي علاقتك فيهم و احصريها في الواجب و لا تسكتي ع الاهانه و اللي زي زوجك سلاحك معاه اطفاله لانه بيكون اكيد معلق فيهم فدايما تكلمي بإسمهم و الله يوفقك حبيبتي |
رد : زوجي همه الوحيد اخواته وطلباتهم
بالنسبة لتحليلي البسيط
هو انسان خدوم و عاطفي و منفتح لذلك ما عنده خصوصية العلاقه بينك و بينه بس بالعكس يخدم الكل و اللي مثل كذا مُستغل يا عزيزتي للأسف سواء من اصدقاء او اهل لك كل الحق في انك تتنفذ طلباتك لكن اطلبيها في الوقت المناسب و انفصلي انتي عن عائلته الا في المناسبات و الضرورات بكذا يعرف انه عنده بيت ثاني و يحس انه له التزامات معاك منفصله عن اهله و ربي يوفقك حبيبتي في حياتك شوية صبر و تعرفي كيف مخة يمشي لكن الاهانة لا تفوتيها ابدا مستحيل ترضين بسهولة و لا تكوني سببها كذلك !! اتمنى لك التوفيق و السعاده |
رد : زوجي همه الوحيد اخواته وطلباتهم
اقتباس:
أؤيد كلام اختي الكريمةعاشقة القهوة |
رد : زوجي همه الوحيد اخواته وطلباتهم
تسلموووون ربي يعطيكم ماتتمنون جميعا بس اللي يقولون زبطي علاقتك في اخواته انا بحياتي ماأذيتهم وبالعكس دايما اشتري لهم اللي يبون وافاجئهم واحيانا انا اكلم اخوهم عشان يطلعو معانا بس دايما تجي في وجهي الشغلات اللي اشتريها مايشكروني عليها بالعكس ينتقدون مع اني مو ملزومه فيهم واذا طلعنا سوا نطلع ونرجع وهو يسبني قدامهم وهم يستانسو جدا لدرجه ان الكبيره تطالع فيه نظره احتقار وتضحك وهو يشرشح فيني توصل المواصيل انه حتى بالمطعم ينسى نفسه ويحط الاكل كله قدامهم وربي ان احيانا ادخل واخرج ماكلت شي لاني مافي شي قدامي ومايلاحظ نهائي خصوصا اذا الطاوله كبيره والله العظيم صرت اطلبه اي شي عن طريق رساله جوال حتى لو جالسين مع بعض لان طلباتي دوم مرفوضه قدامهم..وحده من اخواته تلاحظ اللي قاعد يصير ودايم تحاول تتصرف عشان ماتحسسني بالاهانه بس الباقيين لا ...كرهت الطلعات معاهم ....واللي يقول انفصلي عن اهله بس في المناسبات انا اغلب اشغالي مايقضيها لي الا ابوه ولو مو ابوه كان عشت ارمله واولادي ايتام وهو مشغول بوظائفه واخواته....حاولت اكلمه مليون مره يضبط معاي يوم وبعدها يرجع وكثرت المشاكل خصوصا عشان سفر اخواته وربي اللحين كملت سنه وست شهور وحده من اخواته وهي تسافر اسبوعيا معاه انا قررت اروح معاه بس تعبت جدا من السفر وعندي ولدين اشقياء جدا وهو مايساعدني خصوصا قدامهم توصل المواصيل انه مره يروح يشيل عن اخته بنتها الوحيده من الدرج وانا امشي جنبها ولدي الصغير شايلته ومعاي شنطه اغراضه وولدي الكبير ماسكته بيدي ويادوب يمشي مو الحق يمسك عني واحد من الاولاد واخته تمسك بنتها....اعذروني عالاطاله وربي مخنوقه واحس كل شي مسدود قدامي لا منه ولا من اخواته ولا من اهلي
|
رد : زوجي همه الوحيد اخواته وطلباتهم
استعيني بالصبر والصلاة
أكثري من الصدقة والإستغفار أوصيك ب الدعاء الدعاء الدعاء وتحري أوقات اﻹجابة |
رد : زوجي همه الوحيد اخواته وطلباتهم
اختي الغاليه
انتي السبب نعم ليش عمك يقضي اغراضكم قولي له ما قصرت يا عمي بس ابغاك تكلم ولدك جزاك الله عننا خير !! و انتي انفصلي انفصال تااام عن اخواته الافي المناسبات لا مطاعم و لا غيرة اذا انتي ما سألتي و لا طالبتي كلهم بيعتقدون انك مبسوطة ؟؟ حقك طالبي فيه و لا تتنازلي زوجك مسؤول عنك و عن اولاده و رققي قلبه ناحية اولاده اشعريه بحجم حاجتهم له مثل ما قلت لك زوجك طيب بس مُستغل |
| الساعة الآن 09:06 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©