|
أختي المطلقة ترفض الزواج تماما
السلام عليكم ورحمة الله حبيت اعرض عليكم هذا الموضوع اللي متعبني لاني احب اختي واتمنى لها السعاده الموضوع ان اختي تزوجت مريض نفسي ( عرفنا بعد الزواج انه ياخذ حبوب نفسيه ) + كان على علاقه مع اكثر من بنت ( اختي كشفته بعد الزواج ) + اللي عرفته منها انه يمشي على راي ابوة على العمياني والاهم انه كان يمد يده (ضرب قوي ) و هي تصرف على نفسها من الفلوس اللي شايلينها لها للزمن .. اختي انسانه واعيه وصبوره وضحكتها ماتفارقها والاهم ان هذا الانسان كان اول علاقه لها .. السبب اللي خلاها تتحمل طليقها هو خوفها على امي من كلام الناس وماخبرتنا بشي الا بعد الطلاق .. بعد فترة من زواجها امي توفت وحصل بينها وبين طليقها مشكله والسبب الورث !!! :21: كبرت السالفه واهله تدخلوا ووصلت لضرب مبرح بعدها خبرت اهله بالبنات وعلاقته معاهم والصرف واشياء ثانيه واهله وقفوا في صفه وانه شاب والمفروض تتحمله وكلام كثير هي رجعت البيت وحصل الطلاق :29: بعد الطلاق طليقها صار يشوه سمعتها بين الناس على انها (فلتانه ومالها احد يلمها) .. بعد اسبوعين من الطلاق تزوج هو .. اما اختي تغيرت 100% صارت متحمله مسؤوليه نفسها ( توظفت) وقطعت علاقتها مع كل صاحباتها وماصارت تختلط بالناس ابد وابتعدت عننا .. صارت ماتتحمل وتخاف من الصوت العالي .. ماتثق في احد ابدا و كرهت الرجال كلهم .. من طلاقها ( قبل 3 سنوات ) لهذا اليوم جاها خطاب كثير اغلبهم شباب ماتزوجوا وهي رافضه الفكره تماما .. اذا جاها عزابي قالت مابي واحد ماتزوج ويصير يعايرني .. واذا جاها متزوج قالت مابي معدد .. واذا جاها مطلق قالت مابي اكون الحرمة اللي يعاند طليقته فيها .. مارح اجبرها على الزواج بس اخاف عليها خاصه ان كلنا متزوجين.. اختي صارت قايمة بدور الرجال في حياتها ومن كلامها عرفت انها تفكر تربي اطفال من الميتم وماعاد تبي تتزوج ابدا .. وفاة امي وطلاقها اثروا عليها لدرجة كبيره .. ودي اساعدها بس مااعرف كيف .. ساعدوني |
رد : أختي المطلقة ترفض الزواج تماما
شكلها تعقدت
من الرجال ما تلام اللي شافته صعب تتحمله الله يعوضها خير منه |
رد : أختي المطلقة ترفض الزواج تماما
الله يكتبلها الخير
اجلس معها خليها تفضفض وتطالع كل الوج الي بداخلها بعدها اقنعها باهمية الزواج وان الي صار معها ما بصير بين كل الازواج في كثير رجال فيهم خير وحرام ترفض الخاطبين بدون سبب على الاقل تستخير بس هي تطلب من رب العالمين الخير وان شاء الله الله بيرزقها الزوج الصالح |
رد : أختي المطلقة ترفض الزواج تماما
استشر أخصائي نفسي ولا تتخبط كثيرا
وجزاك الله خير على احساسك بأختك الله يجعل مساعيك في موازين حسناتك |
رد : أختي المطلقة ترفض الزواج تماما
ماتنلام بس لازم ماتضيع هالفرص خليها تدخل الموقع وحنا بنساعدها كلنا مرينا بالطلاق ومرارته
|
رد : أختي المطلقة ترفض الزواج تماما
هلا بك ..
لازم لما تجلسي معاها .. تبددي كل الافكار الي بعقلها من انه الرجال في هالزمن كلهم حقون مشاكل .. وماعاد فيه الزين .. والانسانه تعيش لنفسها وبس .. وهذا قدري ونصيبي وماراح اتزوج واربي اولاد من الميتم .. هذه الاشياء كلها انتي اذا جلستي معاها .. قولي لها دائما .. ترا صوتك يوصل لعقلها الباطن .. ان طليقك المفترض مايسرق منك جمال حياتك .. شوفي كيف الاجنبيات او النساء القويات .. تعيش حياتها ومايهمها طليقها خلاص انتهى بالنسبه لها .. لكن ما اضيع فرحة عمري وزهرة شبابي عشانه .. قولي لها مهما الانسان ربى ايتام مافيه زي الولد الي من لحمك ودمك ! وذكريها انه ماضاع شيء من العمر انا اتعجب من الرجال او النساء الي الواحد فيهم يوصل 30 او 35 او حتى 40 ويفكر ان الحياه انتهت او خلصت اجمل سنين العمر .. ما اعرف كم عمر اختك لكن اعتقد صغيره بالعمر .. انا باقولك نصيحه واحده تفيدك كثير .. دائما اذا تكلمتي لا تعتقدي ان الانسان الاخر مايسمعك او مايستوعب كلامك .. مهما ظهرت لك من علامات الطناش او المكابره او العناد .. تأكدي ان صوتك يوصل للعقل وتاكدي ان اختك تتمنى الي يقويها ويحس فيها .. جد والله زي ماقالت ( مكلومه ) احساسك فيها شيء عظيييييييييم .. الله يوفقك عليه ويرزقك كل ماتتمني اي والله .. نصيحتي لك تكلمي مع اختك باستمرار صوتك يوصل لاعماقها تأكدي من هالشيء .. وتاخد القوه من كلامك .. احيانا الانسان يكون في موقف يحس ان الدنيا ضباب وتايه وضايع ومو عارف شيء .. لكن يسمع صوت يرشده او يشوف يد تنمد له .. وهذا شيء كبير وكلنا في حاجته في وقت من الاوقات .. الله يوفق اختك ويوفقكم جميعا .. |
رد : أختي المطلقة ترفض الزواج تماما
جزاكم الله خير لكل اللي ردوا علي .. الله لايحرمكم الاجر والعافيه
اتكلم مع اختي وتفضفضلي بحكم ان مالها اخوات .. هي عندها مشكله مع الزواج بحد ذاته انه اذا على الاطفال فيه اطفال كثير محتاجين بيوت واهل ( تربينا ايتام الاب من الطفوله وقبل كم سنه توفت امي) وفي كل الحالات الرجال مالهم امان ومجرد ( وجع راس) واذا ذكرتها انه مافيه افضل من الحب مع الزوج والاهتمام او الاطفال اللي تنجبهم تقول *امي ربتنا وحدها والحمدلله * اذكرها ان احنا اخوانها متزوجين وزوجاتنا مرتاحين والحمدلله مابيننا مشاكل بس احسها مقفله قلبها (ماتثق في احد وماعندها استعداد تضحي لاي انسان غريب) اخاف اتركها ويفوت الزمن وتلومني او تلوم نفسها ** عمرها 24 سنه ** |
رد : أختي المطلقة ترفض الزواج تماما
مثل ماتوقعت صغيرهـ ..
شوفي خيتي لا تقلقي انا رأيي انها مسألة وقت .. قريب بتحس بالوحده وبتشوف ان العمر لسى قدامها .. وبتوصل من نفسها لمرحلة اتزان .. لكن زي ماذكر الكل هنا هي ماتنلام وتعرضت لصدمـه في عمر صغير .. بس راح توعى وتعرف ان الحياه جميييييييله .. وهي ماجربت نقطه من الحياه .. |
رد : أختي المطلقة ترفض الزواج تماما
جزاك الله خير على حرصك على أختك
انا عنيت مثلها وكنت افكر نفس تفكيرها ... وكنت وأثقه أن ربي راح يعوضني خير في اي شئ زواج او غير الان لي ما يقارب السنه متزوجه من رجل معدد معها 2 وانا الثالثه لكن لا يهمني ذالك الله المسخر العباد التوفيق من الله مو من عند الشاب ولا المعدد ولا المطلق لزم تناقش كل فكره مع اختك على حده وتفككه له دقني اختك تعاني ومحتاجه تفضفض ولا تزعل منها إذا أنفعلت عليك |
رد : أختي المطلقة ترفض الزواج تماما
الموضوع مرتبط بايمان الانسان بالقضاء والقدر الزواج غير مسؤول عن امثال هذا الرجل فهؤلاء الرجال لا يمثلون الا انفسهم.دائما بعد الليل ياتي النهار وماحدث لها هو الليل فالتتفائل وتنتظر النهار.من منا لم يعاني ولكن الحياة تستمر .ولا نقف عند حدث ترك بصمة سوداء في قلوبنا.فالحياة فيها الابيض والاسود.اختك تحتاج لمعالج نفسي لكي تتخطى ماحدث.
|
| الساعة الآن 10:17 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©