|
محتاره في مشكلتي وانشغال زوجي الدائم عني
السلام عليكم ورحمة الله وبركاته
هذي اول مشاركه لي بالمنتدى اتمنى اني احصل نصيحه من الاخوات الحكيمات جزاهم الله خير انا متزوجه تقريبا لي سنه عمري 22 عندي بنوته الله يحفضها لي زوجي من خارج العائله زوجي دكتور الحمدلله انسان مثقف وحنون متفهم عمره مارفع صوته علي وعمره مارد لي طلب لدرجة احيانا استحي من كرمه معاي بس عنده مشكله انه دايم مشغول شغله اخذه مني ومن بنتي لدرجة اني انا قاعده اربي بنتي لوحدي قلت له يعطينا من وقته وان حنا محتاجين له بس يقول اصبري علي انا الحين مشغول بس بعوضك ان شاء الله يحاول يعوض غيابه عنا بالفلوس لدرجة اني تعودت اني العب بالفلوس وصرت مسرفه انا ماعندي مشكله مع شغله بس احيانا اكون في اشد حاجتي له بس مايكون موجود مثلا في حملي عانيت لوحدي وماكان معاي خصوصا واني كنت تعبانه في حملي بس كان مشغول انا طالبه ودراستي في مدينه وشغل زوجي في مدينه ثانيه في هالسنه الاولى من زواجنا احس جلست عند اهلي اكثر من جلوسي عنده احيانا افكر اني اأجل دراستي واروح عنده على الاقل نكون بداية حياتنا قريبين من بعض بس مامعاي وقت لانه بيروح يكمل دراسته في الخارج وبروح معاه يعني يبي لي اكمل دراستي بسرعه هالبعد اللي بينا اثر على حياتنا يعني حياتي انا وياه فيها حدود بينا لدرجة فيه اشياء كثيره ما اعرفها عنه وفيه اشياء كثيره مايعرفها عني هو مايفضفض لي ولا يقول عن المشاكل اللي يمر فيها وهالشيء انعكس علي صرت ما اقوله شي عن حياتي وانا بعيده عنه مكالماتنا بس اذا احد احتاج شي من الثاني يتصل عليه او اذا هو يبي يسأل عن بنته يتصل علي يجلس اسبوعين واحيانا توصل لثلاثه مازارني ولا شاف بنته بس بالمكالمات في بداية زواجنا كنت خجوله مره ماكنت اقوله كلمات الحب مثل حبيبي واحبك وغيرها بس هو يقولها بعدها حاولت اعدل من نفسي واتغلب على خجلي بس حسيت بصعوبه كبيره اني اقولها كذا فجأه فحاولت اني ابدا من الصفر وصرت في البدايه اقولها بالرسائل بس الى الحين مو قادره اقولها مباشره ادري اني مقصره وبقوه معاه بس مشكلتي انه مايشجعني على اي بدايه هو مايطلب مني اي شي مثلا اني اقول له حبيبي او غيره او يطلب اني البس له شي معين ولا يقول لي هالشي ما اعجبني لاتلبسينه او البسي هالشي معجبني مع اني الحمدلله اهتم بشكلي كثير ودايم استقبله اذا رجع من دوامه باحلى شكل احرص دايم اني ارضيه من ناحية شكلي ونظافتي ونظافة البيت والطبخ خصوصا اني ماكنت اطبخ عند اهلي ولا اشتغل بس تعلمت الطبخ عشانه وانضف بيتي كله لوحدي ماضغطت عليه يجيب شغاله لانه مايحب الخدم ومع هذا وعدني انه يجيب شغاله لاني متعوده في بيت اهلي خدم وعارف اني اتعب كثير في بيتي بس مايبدي رايه في اي شي عشان كذا الى الحين مافهمت شخصيته انا مو عارفه كيف ابدا بدايه صحيحه وكيف اعدل حياتي انا الحين تو طلعت من الاربعين وعارفه اني اذا ماغيرت بحياتي في اول لقاء بينا في الفتره اللي بتجي بيكون صعب اني اغيرها بعدين الشي الثاني اللي مو قادره اغيره انا بصراحه خجوله معاه بالفراش وحاولت كذا مره اتغلب على خجلي بس ماقدرت ابدا والمشكله اللي متعبتني بقوه ان اهله بعد مو متقبليني مثل ماقلت لكم هو مو من عائلتي واهله ماكان يبوني يبونه ياخذ من بناتهم لانه بصراحه عريس مايتفوت وهالشي خلاهم يجنون لما تزوج من خارج عائلتهم ويحاولون قد مايقدرون انهم يصرفونه عني ويبونه ياخذ وحده من بناتهم حتى لو كانت الثانيه مو عارفه بصراحه احل اي مشكله تعبت بقوه لدرجة اني احيانا صرت حتى اهرب من التفكير بحياتي ساعدوني الله يسعدكم محتاجه مساعدتكم باقرب فرصه لاني قريب بروح لزوجي تم تعديل العنوان ليتناسب مع مضمون الموضوع |
رد : محتاره في مشكلتي مع زوجي ؟؟؟؟
مبروك حبيبتي البنوته
والموضوع جدا سهل فقط يبغى لك وقت المسالة مسالة وقت لاااكثر مع الوقت ومع الحياة راح تتقربون لبعض اكثر وانتي تقولين تربين بنتك لحالك توك ياروحي مطلعه الاربعين بس لما البنت تكبر شوي بيصير غصب عنه يجي عشانها لانها راح تستقبله وتركض له وتناديه وتبكي عليه اما بالنسبه لحيائك عنه من خلال كلامك اشوف انه طبيعي لانه انتم بعيدين عن بعض بس لما تكونين معاه وتتشاركون كل شي راح يتغيير الامر بس لما ترجعي ويجلس معاكم كم يوم قولي له تصدق البنت احسها تمييز اصواتنا انه انت ابوها قولي له يااحبيبي البنت تشبه لك كثييير خليه يساعدك لما تبكي مثلا خليه مثلا يساعدك بعمل الرضعه اذا هو طبعا متقبل انه يساعد فقط قولي له عشان تتقرب من البنوته انا كنت اخلي زوجي يساعدني عشان يتقرب من ولده وبالفعل ولدي شديد التعلق باابوه اكثري الحديث معاه وان كنتي بعيده عنه ارسلي له مسج كل صباح وكل مساء الصباح .. صباح الورد المساء .. مساء الورد وحاولي تبدعين بمسجاتك حببيبه فيك خليه يتعلق فيك اساليه كيفك اليوم وش اكلت كيف سويت حتى لو بعيد اتصلي اسهري معاه حاولي تتواصلين معاه باستمرار ارسلي صور بنتك باستمرار حاولي ترسلين شغلات تشوقه لك شوفي زوجك وش يخليه يشتاق لك خليك قريبه منه بقولك وحده قالت لي شغله سوتها مع زوجها لما سافرت وجننته حطت بكل درج تسريحه ورقه ومكتوب فيها شغله حلوه او عبارة شوق وبكل طاوله ومع ملابسه وبالمطبخ وكان لما يشوف الورقه يدق مباشرة عليها مشتاق لها وميت شوق عليها تقول ماتحمل قطع شغله وسافر لي ورحنا لبلد ثاني عشان متقطع شوق لي حبيبتي هوني عليك وعسى الله يسهل لك وسخركم لبعض |
رد : محتاره في مشكلتي مع زوجي ؟؟؟؟
لا اعلم اذا كانت الحياة بين الزوجين تدار بالرسميات ان تكون لها نكهة ما
اذا الحياة الزوجية لم يكن فيها مزح وشقاوة ومضاربة مين يشحن جواله اول وقرص وشد شعر وخنق واذية وسرقة شوكلاتات بعض احسها ماهي حياه ان شاء الله بكره النهار بنتكم حتكبر شويتين وعلميها انو يوم هيا تساعد ابوها في المضاربه عليكي ويوم تساعدك في الهجوم على ابوها ويوم انتي وابوها عليها ( بس كله يكون مزح من غير حقد ) ودمتم في حفظ الرحمن |
رد : محتاره في مشكلتي مع زوجي ؟؟؟؟
ملكة الاحساس الله يسعدك ويبارك فيك يارب
انا حاولت كثير اني اكلمه واسولف معاه عالجوال لانه الوسيله الوحيده بحكم بعدنا عن بعض بس كانه يتهرب يقول عندي شغل او يقول يالله توصين على شي وينهي المكالمه لحد ما طفشت قلت له سولف معاي عطني من وقتك لو على الجوال مو كفايه بعدك عني عالاقل ابي اشاركك لو شي بسيط حتى لو انا بعيده عنك قال والله انا مو قصدي شي بس انا ما احب اسولف عالجوال وبعدين وش تبيني اقولك يومي مر مثل اي يوم من المستشفى للبيت ومن البيت للمستشفى قلت له طيب فضفض لي قولي اذا عندك مشاكل انا زوجتك يعني شريكة حياتك ابي اشاركك في كل شي قال ماعندي مشاكل وانا ما احب اتشكى مع اني عارفه ان عنده مشكله بس هو ماقال لي اي شي عنها بالعربي منغلق على نفسه حاط حوله حدود مايبي اي احد يتعداها ومن ناحية بنتي ما اقدر اخليه يساعدني فيها لانه اساسا مايزورنا الا من فتره لفتره ومايطول طبعا ومع هذا مايقول خلاص تعالي معاي طفشت وانا جالس لوحدي ما ادري هي مراعاه لي ولدراستي او انه عارف انه مقصر بوقته معنا ومايبي يطالبني بشي او انه مايحبني ومو مشتاق لي بصراحه ما ادري وش سالفته الشي الثاني انا اهله جننوني ماخلو ولا عيب الا حطوه فيني يمشون عند العالم ويحكون فيني مع انهم للحين ماشافوني طبعا امه وجدته اللي شافوني بس جماعته مابعد شافوني ومع هذا حطو كل عيوب الدنيا فيني لدرجة انهم جاو في بيتنا لما كنت بالاربعين وسبو امي في بيتها انا طبعا تعذرت لي امي اني رايحه لموعد واني مو بالبيت لاني مالي خلق اقابلهم طبعا انا كنت ساكته على كل اساءاتهم لان زوجي مشغول ومو فاضي للمشاكل ومابي اخذه بذنب اهله خصوصا اني ماشفت منه الا كل خير بس الا هنا وخلاص توصل انهم يجون لبيتنا ويسبون امي في بيتها ماعاد اقدر اسكت طبعا ماراح اخرب حياتي عشانهم بس باقول لزوجي كل شي جاني منهم يوقفهم عند حدهم طبعا زوجي عارف انهم راعين مشاكل لدرجة انه حذرني منهم بداية زواجنا |
رد : محتاره في مشكلتي مع زوجي ؟؟؟؟
everything
مشكوره عالرد الله يسعدك اكيد الرسميه بين الازواج اسوء شي اسألي مجرب لدرجة اني احس ان حنا اصدقاء مو ازواج حتى الاصدقاء تكون بينهم ميانه اكثر من اللي بينا بس انا وش يصبرني الى ان تكبر بنتي وتساعدني على كسر الرسميه والروتين انا ابي اغير حياتي من الحين واعيش حياه حقيقيه مع زوجي |
رد : محتاره في مشكلتي مع زوجي ؟؟؟؟
اختي انتي غلطانه ومفروض امك نبهتك
اهل زوجك جايينك ومعبرينك بالاربعين وانتي ماطلعتي لهم معليش انتي غلطانه مهما كان اطلعي لهم وعبريهم واحترميهم اختي وازني امورك امسكي العصاء من النص |
رد : محتاره في مشكلتي مع زوجي ؟؟؟؟
ملكة الاحساس اشكرك على اهتمامك بمشكلتي وتفاعلك معي
من ناحية اني غلطانه لاني ماطلعت عليهم بالعكس اتوقع هذا افضل شي للتعامل معاهم لاني لو طلعت عليهم يمكن بتصير مشاكل مثل ماقلت لك هم مو مخليني في حالي ابد وانا مابعد قابلتهم لو قابلتهم يمكن فعلا يحصلون اي شي يسببون منه مشكله طبعا انا احكيلك عن اهله مو قصدي امه وخواته ابد لان امه اعاملها مثل ما احب انه يعامل امي اكلمها واسلم عليها واعزمها على بيتي واحترمها مره وكانت تسبب مشاكل قبل بس لما ماحصلت مني اي شي تكرهه كفت خيرها وشرها اما خالاته وبنات خالاته وبنات عمه هذولاء اللي فعلا مسببين لي مشاكل مالها اول ولا تالي امه جاتني قبل هي وخواته واستقبلتها وجزاها الله خير بالعكس احس اسلوبها لان اكثر بعد ماشافت حفيدتها واحسها تعلقت فيها انا لو عارفه ان نيتهم فعلا تقدير لي كان ماترددت ولا لحضه اني استقبلهم واقدرهم بالعكس انا اتمنى تنتهي هالمشاكل بس انا عارفه ان نيتهم مو صافيه لانهم كان يبونه لبناتهم وزعلانين عليه للحين وانا كنت تعبانه ومو رايقه للمشاكل |
رد : محتاره في مشكلتي وانشغال زوجي الدائم عني
ليش مافيه تفاعل الله يسامحكم مامعاي وقت ابي حل سريع ساعدوني بسرعه الله يسعدكم
|
رد : محتاره في مشكلتي وانشغال زوجي الدائم عني
السلام عليكم
انتي ايمتى بتتخرجي وكان في تواصل بينكم ايام الخطبة ولا زوجك هيك من زمان |
رد : محتاره في مشكلتي وانشغال زوجي الدائم عني
انا يبقى لي سنه واتخرج وقت الخطبه كان فيه تواصل بس رسائل لان زواجي تم بسرعه
تواصلنا كان وقت الخطبه تقريبا اسبوعين بس |
| الساعة الآن 11:20 PM. |
Powered by vBulletin® Version 3.8.7
Copyright ©2000 - 2024, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©