![]() |
تهميش زوجي لوجودي معه بالغربه
السلام عليكم
ابغى افضفض ولا حصيبني جلطة من رفعة الضغط للاسف اعيش ضغط نفسسسسي رهيب اليوم تعرضت لموقف من زوجي طبعا دايم تحصل مواقف لكن اطنش بمزاجي لكن احس هذا خلاص قصم ظهري وابغاكم تشورون علي لاني احس اني مشوشة انا مغتربة مع زوجي ووتعرفون بالغرب القتل سهل لحد الان اللي سمعت عنهم 3 انقتلو بمنطقتنا وخاصة الفترة الحالية فيه مظاهرات و العنصرية بين الجنس الاسود والابيض وزوجي يسهر بالويكند للفجر او قريب الفجر يقول انه يسهر مع اصحابه بنفس المجمع حقنا طبعا ايام الاسبوع يجي بدري شوي 1 او 12 عشان الدوام مو عشان سواد عيوني المهم سكت عنه وقلت بكيفه طالما مو بعيد عني وماعلي خوف ان شاء الله المهم اليوم قمت 6 الصبح مالقيته قلت ممكن بيتأخر شوي اصبري واجلس احط اسباب عشان ما اتوتر لكن جات الساعة 7 ونص اتصل عليه مايرد ارسل للواتس استلم الرسالة .. يعني الجوال شغال جلست لين 9 وانا اتصل بعدين اتقفل جواله انا لما اتقفل كل سيناريوهات المصايب قدامي دورت بالسكن عليه عند المسبح عند بيت صاحبه مالقيته ماني عارفة ايش اسوي اول مرة اتعرض لموقف كذا اتصلت ع جارتي اللي زوجها يسهر معاه سألت عن زوجها قالت موفيه ولا يرد علي قمت اتخبط ماني داريه ايش اسوي لو اتصلت ع الشرطة لازم يكون 24 ساعة ع اختفاءه ولو اتصلت وطلع مافيه شيء ايش بيفكني منهم قمت ادور واراسال زميلاتي ابغى رقم الملحقية بكلمهم يعطوني ولما وصلني الرقم بتصل يديني ترجف مدري ايش اقول كل شوي اقول اصبري ساعة يمكن يدخل عليك طيب مافيه شيء المهم ما ستنيت شوية الا جارتي تكلمني تقول ترى طلعت موقع زوجي بمنطقة تبعد 15 دقيقة عنا يعني قريب وذحين بكلم جارنا الثالث يروح للموقع ! لما راح لقى انه مجمع سكني و مأمن ما يقدر يدخل الا اذا يعرف احد المهم لكم ان تتخيلون كيف عشت التوتر كنت اقول لنفسي لو بيت صاحبه كان كلمني واعطاني خبر اكيد ان فيه مصيبة حاصلتله وجلست ع نار بعدين ارسلي انا طيب مافيني شيء نمت عند صاحبي !!!!!!! ليه نمت ليه ما بغلتني ليه تفجعني قام قالي جوالي طفى شحنه قلت جوالك كان مفتوح واستلم رسالتي ليه مارديت لو اتقفل ليه ما شحنته شوية بالسيارة وترسلي انك بتتأخر قال اقول ارقدي بس ارقدي ولما جا عدت اكرر عليه ليه ما ارسلت قال يعني تبغيني اطلع استنى بالسيارة عشان ارسلك !!! يقولها باستهزاء !! حسيت بالوحدة بالغربة انا لوحدي هنا لا ام ولا اخ ولا احد استند عليه الا هو فقمت قلتله رجعني السعودية ما حجلس احجزلي ولا اكلم اهلي قام قالي لو رحتي اعرفي ان ورقتك بتوصل معاك ! قلت عادي انا صبرت واخرتها ايش ! تنام برى بدون احم ولا دستور و طز فيا اهتميت قلقت انحرق كله واحد انا والجدار سوا اطلع ادور زي المجنونة وانت ولا ع بالك واتصلت على اهلي وبلغتهم اني خلاص برجع ما ابغى اجلس و بلغتهم بنومته برى وبالرعب اللي عشته وبردة فعله وانه اصلا مو شايف انه غلطان .. ولما حاولو يكلمونه اهلي مارد عليهم لين سمعني اقول لاخويا بكيفه ما يبغى يكلمكم شيء راجعله فقام كلمه وقاله هي مكبرة الموضوع وانت عارف الحريم كيف يكبرونها وماسار شيء قام قله اخويا المهم لو تبغى ترجع السعودية خليها ترجع ونتفاهم بعدين لا تمنعها تم تعديل العنوان ليتناسب مع المضمون |
رد : هل تصرفي صحيح؟؟
طبعا انا للان محسنة النية انه بيت زميله !!
لكن عجزت افهم ليش ليش ليش مارد ليش ما بلغني ليش السهر لهذا الوقت ليش النوم برى البيت |
رد : هل تصرفي صحيح؟؟
زوجك من أول زواجكم وهو مستهتر وما عنده احساس بالمسؤولية .... يمكن العمر له دور بالموضوع
هل تصرفك صحيح ؟؟؟ يعتمد اذا تصرفك ممكن يكون له تأثر على زوجك فيتغير أو لأ ... هو بالتأكيد بحاجة لوقفة جادة . هل أهلك أو أهله لهم تأثر عليه ؟؟ ممكن يحسب لهم حساب ؟ أنتو مسافرين لدراسة ؟ ومن منكم اللي يدرس؟ |
رد : هل تصرفي صحيح؟؟
طبعا رده فعله بعد البرود هذا
قالي ما توقعت ضعيفة لهدرجة ( وما فهمت قصده ) وانا قمت خرجت الشنط وجلست احط ملابسي نفسي اشقق نفسي واطير للسعودية نسيت اصلا ان الرجعة مو حجز مقعد وانتهينا يبغالها اجراءات عشان ارجع لكن بين عيوني شيء واحد ان للرجعة للسعودية هي الحل ! ان اللي ضحيت عشانه وجالسة اتحمل عشانه شخص ما يستاهل ولا هو حاسس فيا لكن واذا رجعت للسعودية ايش النهاية مدري ودي اقرص زوجي قرصة يفوق منها لكن الاكيد لو رجعت حخسر دراستي الا اذا بأجل وارجع لكن رجعتي مو اكيده |
رد : هل تصرفي صحيح؟؟
اقتباس:
اول مرة ادخل اهلي بالموضوع فمدري اذا حيتأثر ويحسبلهم حساب لكن لما شفته مرتبك ولا يبغى يرد ويجلس يسمع لمكالمتي و مرة جا بياخد الجوال من يدي بس صديته و يقولي صدمتيني لما بلغتي اهلك وايوه مسافرين دراسة وكلنا ندرس لكن انا المبتعثة الاساسية وهو مرافق يعني مرتبط فيا |
رد : هل تصرفي صحيح؟؟
السلام عليكم ,,
أسأل الله أن يربط على قلبك ,, استهدي بالله ,, هو يتحمل الخطأ ( التأخر عن المعتاد بدون إخبارك ) , وأنت ردة فعلك بعد علمك بسلامته مبالغ فيها , وكان يمكن لك أن تكون أكثر اتزانا , و غالب الرجال سيشعرون بنفس الشعور , بأننا لسنا أطفالا ليقلق علينا أحد , و تبريرات الرجولة المعتادة :) لذلك الموقف لا يستدعي أن ترجعي لبلدك , ولا يستدعي أن يتدخل أهلك , اجلسي مع زوجك وبيني له شعورك تجاه الموقف وأن الوضع العام للبلد مخيف وأثر على نفسيتي , وتفاهمي معه بالحسنى , وإن كان يرى أنه على حق , كوني أعقل منه :) الشعور بالمسؤولية قيمة مهمة بدأنا نفقدها في شبابنا وفتياتنا , وهي ليست بالضرورة خبرة التعامل مع الجنس الآخر , بل أصبح علما يُدرس وتطبيقات عملية , وتجارب حياتية , لذلك يجب عليكم ترتيب الأولويات في حياتكم لأنها ستساعدكم على تحمل المسؤولية وبالتأكيد فإن أول الأولويات الحفاظ على بيت الزوجية فيما يرضي الله عز وجل ,, أنا علقت على هالموقف فقط , ولكن يبدو من تعبيرك أن هناك تراكمات سابقة تكبر في نفسك شيئا فشيئا , لا أدري , ولكن ربما , أعانك الله |
رد : هل تصرفي صحيح؟؟
تصرفك صحيح انك هزيتيه ودخلتي اهلك بالموضوع..واضحه شخصيته انه مستهتر وماعنده احساس بالمسئوليه
|
رد : تهميش زوجي لوجودي معه بالغربه
لأنه ماجرب القلق والرعب اللي عشتيه
عشان كذه الاخ بارد الله يعينك اختي وبعدين اتطمني ماجلس عند بنات الفكرة كلها انه جاءته النومة وبعدها قال لو مشيت الان يمكن يصير لي حادث انتي اللي عملتيه معه تمام وراح يخليه يحسب لك حساب بالمستقبل ولكن هذا لا يمنع اني اقولك انك كنتي معاه اوفر بزيادة احنا كده سبحان الله لما نتطمن نقلب الدنيا الاب يكون قلقان على ابنه ومستعد يدفع اللي وراه واللي قدامه عشان يتطمن على ولده واول مايرجع ابنه بدل مايشكر الله ويري ابنه كيف انه قلقان منه يقوم بتهزيئه وشتمه ورفع صوته والولد يقول في خاطره ( ياريتني مارجعت) اذكر وانا بالثانوي تأخرت انا وابن ابن عمي على والدينا لأننا ضعنا في الطريق المهم تأخرنا ساعتين وبحثنا عن هاتف ارضي (ماكان فيه جوالات) واتصل كل واحد على ابيه هو ابوه هزأه وشتمه وانا ابي قال طيب لما رجعنا هو ابوه شرشحه وسحب منه الكمببوتر والمصروف والامتيازات وانا قال لي ابي حط مفتاح السيارة فوق الطاولة، وسألني سؤال محزن : يرضيك ان ابن اخي (ابو الولد) يقول لي ابعد ابنك عن ابني لأنه خربّه! واحنا عارفين مين اللي يخرب الثاني!. لأنهم هم اغنياء والولد فيه طيش حبتين. انا نمت وانا فخور بوالدي وحسن تصرفه وكلي تحمل للمسؤولية وماأتأخرت عليه بعد كذا . وقريبي نام كاره ومتنمرد على ابوه، وكمل عصيانه لابوه الى ان توفى الاب. فحلو جداً انك تشكري ربك ان زوجك رجع بالسلامة بأن تريه مقدار الألم الذي سببه لك بأن تكوني حزينة مكسورة الخاطر عشان بعد كذا يقول لاصحابه لخطة خليني اطمن المسكينة اللي في البيت بدل مايقول يووووه خليني اسكت الشرطي اللي عندي في البيت او يقول طنشها ماوراها الا النكد |
رد : هل تصرفي صحيح؟؟
اقتباس:
انا خايفة حتى على نفسي اذا مو زوجي ينام جمبي بالليل واطمن استئمن مع مين ؟ لكن هوا باله وسيع وما همه .. يقولي ماعليك شر :( ايوه فيه تراكمات واحاول اتعايش لكن بكل مرة اقول انا اوكي و اقدر استمر يجي موقف تطلع سلبياته والمواقف اللي جرحني فيها واللي كنت احاول اني اتناساها واكبر عقلي لدرجة يقولي انتي ما تنسنين قلبك اسود انا ما انسى لانه مواقف متكررة وتأمل بشيء ويصدمني الواقع ! حتى احيانا اقول ياشيخة عيشي حياتك وطنشي لكن تجيني فترات ازعل ع حالي معقول هذي هي الحياة الزوجية ! |
رد : هل تصرفي صحيح؟؟
اقتباس:
اتمنى اوصل لنتيجة مرضية |
الساعة الآن 04:35 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©