|
كيف أتخلص من العصبية ؟
السلام عليكم
كتمت كثير وأحس كل المشاكل سببها واحد بس اكابر وأقول لا وانا أضحك ع نفسي لكن جد جد آبغى مساعده الوضع ما يحتمل والعصبيه كل يوم تزيد فيني .. أحياناً أتمنى أبكي بس عشان أرتاح آبغى شخص حكيم عندو استعداد يساعدني ويوجهني آبغى أكتب إنو المشكلة انتهت انتهت خلاااص آبغاها تنتهي من حياتي حاسه نفسي مخنوقه بكتبها شوي تم تعديل العنوان |
رد : آبغى شخص حكيم عندو استعداد يساعدني
وعليكم السلام ورحمة الله وبركاته ..
مرحباً أختي الكريمة ، ستجدي من يُساعدك وتفضلي اكتبي ماتُريدي قوله .. فرج الله همك .. |
رد : كيف أتخلص من العصبية ؟
شكرا سقيا
خلاص اشعر بضعف الان و ندم السبب معاملة ابوي معايا وقسوته كان الدور ع امي والان انا واختي وزوجته الثانيه واولادها يسمعهم العسل انا اتردد دايم في طرح المشكلة والسبب اخاف يوقف هذا الكلام امام الله ويعاقبني ابي فيه او يقول انتي فاهمه غلط مع انو كل شيء واضح والمعاملة واضحه لكن اتذكر بر الوالدين مطلوب لدخول الجنة ف اشعر بالرغبه بالبكاء كلام كثير في داخلي مكتوم بكرا ان شاء الله بحاول اكتب لكني اخاف لأني ما قد تكلمت ك |
رد : كيف أتخلص من العصبية ؟
السلام عليكم ورحمة الله وبركاته ..
ياحبيبة قلبي ماأجملكِ ، لا تخافي فنيتكِ حل المشكلة .. ماشاء الله عليك أنت تكتبين بأدب ورقي .. الله يحميك .. بإنتظارك وخذي نفس عميق مع تكرار كلمة لا إله إلا الله ، ودعواتي ترافقكِ يا جميلة القلب .. |
رد : كيف أتخلص من العصبية ؟
حأكتب لكن طلب خاااص لما آلقى حل
ابغاه يتحذف حذف نهااائي مالي صلاحيه بشوفته __ ابوي متزوج ثنتين الاولى امي والثانيه خالتي ابوي عمره 55 امي 48 خالتي 36 انا جامعية سبب زواجه/ الله اعلم تزوج زمااان وهو شباب وعمري 6 سنوات امي عاشت معاه تقول الآن وهي في العمر هذا: - سبحان الله ابوكم ما كان كذا عصبي ! - كيف يعني من يومنا يمه وهو عصبي ؟ - لا اتذكر مره جاء من المسجد ب(جزمته) وانتم بكرامه مو حقته حق شخص ثاني وبعدها تغير صار عصبي ! - معقوله يعني سحر او شيء زي كذا يمكن ؟ - وكمان كل عيون الحريم عليه وهو شباب يعني كان وسيم ! - يمكن ابوي تعرض لعسن او حسد او سحر الله اعلم لكن ابوي امام المسجد وملتحي ويخاف الله ويقرأ القرآن ولله الحمد ويحثنا ع الصلاة طيب فين المشكلة ؟ المشكلة عصبيه أبي وقسوته علينا احنا بس زوجته واولاده يسمعهم العسل واحنا يهاوش ويسب ويدعي وأخص بالذكر أنا وأخوي آللي بالثانوي اكثر شخصين يهزئنا ولا يخفى عليكم لو اقولكم في اليوم مرتين او مره لكنه والله يشهد إنه كل يوووم !!! كيف يهزئكم ؟ لما يطلب أي شيء يطلبه بصوت عالي+ كم كلمه تسم البدن وتهزئ وأحيانا شوي ويمد يده لكنه يرجع لصوابه < وهذا اللي حسيته إن أبوي لما يعصب بدون عقل ثم يرجع كيف اكتشفت ؟ بعد ما يسكت يناظرني نفسه يحضني ويعتذر لكن انا صامته + اسمع تهزيئه للأخير وأخرج طيب وبعدين ؟ بعدين نجلس جلسه غداء او عشاء يحاول يطلف الجو لأن ملامح وجهي اتغيرت مو خلاص كل يوم يهاوش فين النهاية؟ ابغى النهاية وارتاح في البداية كنت ارد عليه زي مثلا يهزئني ان فلان ما صحي اقوله صحيته بس خلاص مو راضي فيرجع ويهزئني من جديد واسكت لكن الآن لي اكثر من سنتين صامته ولا ارد عليه احتراما له ولسنه وفوق هذا هو ابوي وهالشيء واجب طيب ع ايش يهزئك ؟ اي شيء تتوقعه في البيت يهزئني انا بحكم اني الكبيرة من البنات فقط قدامي اخوان مثال ؟ ابسط واتفه مثال الريموت اذا ضاع طبعا ما راح اقولكم ايش يقول لكن صار وانتهى لو السفره ما اتحصرت بدري يهاوش لو اختي ما احد جابها بدري يهاوشني بالاول يدخل البيت ويسمعني الكلام جيبوا فلان تسمعين يا بنت اكون مشغولة او ما انتبه يدور علي بالبيت تسمعين ولا لا يا ويلك لو تأخروا عليها ؟ طيب ليش ما يهزأ اي شخص غيري بالبيت ؟ هل انا اخذت مكان الوالده ؟ الوالدة لأنها ضعيفه شخصيا ومديته طناش وهالشيء حلو بأمي وانا بحكم تواجدي اكثر شيء يفرغ طاقته فيني او في اختي اللي اصغر مني بسنة المشكلة ليست هنا !! المشكلة إنه يدخل بيتنا يهاوش ومعصب ويخج لبيت خالتي مبسوط يدخل عليهم وانا اسمعهم لأن الشقق بجنب بعض " يا هلا يا هلا بحبيبي " " حمودي يا روحي " " ويغني لهم وكلام زي العسل" هذا عند الباب كيف في البيت ؟ كل الناس تحس بعصبية ابوي علينا وينقصون من قدرنا والسبب معاملته لنا احنا كلنا كبار فيه متزوجين وفيه متخرجين بالعامي احنا مثقفين والبيت كله دراسه وايش صار ولله الحمد احيانا اشكر رب انه عوضني باخوان وام الطف بكثير من ابي واحيانا اقول هذا ابوي ليش احنا غير عن الناس ؟ للأسف امي وانا واخواتي واخواني مالنا قدر عند الناس ينظرون لنا لنا نظرة دونيه لأنها ايضا يعصب علينا قدامهم زي مثلا لو تأخرنا بالقهوة او ما جينا نسلم ع الضيوف للأسف الشديد جدددا احس نفسي زي الآلة تشتغل وتمثل ع الناس الابتسامات والضحكات ومن داخل ربي يعلم للاسف الشديد امي ما حست انه زوجها وحبيبها وروحها وتمثل علينا بقول : حبيبي لا احد يزعل منه ! وانا اسمع صوت البكاء في كلماتها للأسف الشديد اخواني يتحاشون عزيمه اخويائهم والسبب ابوي وصوته ويطلعون برا للاسف ما اقدر اعزم احد من صحباتي لأن بيتنا مو حلو زي بيت خالتي مرتب وبويات وحركات للاسف امي تعتذر من زيارة جاراتها والسبب ما عندنا غرفة ضيوف مرتبه للاسف ابوي يجيب لخالتي كل شيء من فلوسه ويقول لأمي بالحرف الواحد خلي عيالك يجيبون لك انا ريال واحد ما ادفع واخواني ما يقصرون لكنهم عندهم اولاد وديون مو ملائكه للأسف الشديد اني بنت وعمري صغير واكتب كللام ما يتكتب او ينقال للأسف الشديد ان ابوي ماله قلبين واحد لنا وواحد لخالتي قلب واحد وكله لخالتيي وعيالها للاسف الشديد يا خاله انك ما تدرين وش يصير فينا ع بالك مبسوطين واحنا اكثر من 20 سنة نسمع كلام وهواش وانتي تسمعين العسل للأسف الشديد اني اطلب مساعده في موضوع مستحيل يتغير احنا نقابل عصبيته بالصمت عشان ما يعصب اكثر ونقابل ضحكاته بالمجامله ونقابل اسائته بالإحسان احنا بارين فيه ونوفر له كل شيء ومستحيل نزعل منه او نكرهه احنا نحبه لكن ما نحب اسلوبه انا احبك يا ابي هذا مجرد عتاب سامحني |
رد : كيف أتخلص من العصبية ؟
السلام عليكم ورحمة الله وبركاته ..
بالنسبة لطلبك الخاص بإمكانكِ تتفاهمي مع الإدارة بهذا الأمر .. أتعلمين ياحبيبتي آلمني حال والدك عندما قلت هو حنون وضمك ذات مرة ، واعلم بأنك تتألمين من تصرفاته .. لكن الغريب في عندما أتى إلى المسجد بحذاء آخر لكن أسأل الله أن يكفيكم كل مكروه ، اللهم آميين .. فيه خير كبيير ولله الحمد .. هل جربتِ أن تتحدثي معه ،تصارحيه بما يفعله من أجلكم ؟ هل دوماً معكم هكذا ؟ وأريد أن أخبرك بأمر سواء كانت تصرفاته من مرض روحي او غيره ، سورة البقرة في البيت وآيات الرقية دوم .. حتى الأكل الذي تفعله الوالدة الله يحفظها الحبيبة تقرأ عليه وتكسب الأجر في ذلك .. |
رد : كيف أتخلص من العصبية ؟
انا سبق وكتبت اكثر من موضوع
اني كرهت الناس وسيرة الزواج انا ما اكره شيء ابي كرهني بكل شيء مو بمعنى كره شديد لكن من شدة ضغط ابوي علي خلاص ما عاد لي نفس لشيء حتى لما اخذت جوال كت يصيدني وانا عليه ما اجلس عليه كثير لكن يقدر الله اني لما اجلي عليه يدخل علي ويهزئني تهزيييئ موطبيعي انا اتجنب ايش يقول لأنه يوجعني كثير زي مثلا والله بكرا اذا ما شفتك طالعت لك مع واحد من الاجهزة هاذي استهدي بالله يا ابوي الطف الجو يزيييييد يالله قلبي يعورني ويجرح اكثر والله وانا اكتب قلبي وجعني مواقف اخرى: تعبت وانا اوديك واجيبك خلاص لمتى وبالنهاية بتقعدين بالبيت احسن لك من يدري افصلي وريحنا اعوذبالله اشغلتونا تخيلي كل يوم تسمعين زي كذا والله بعض المواقف تزيدني ايمان وقوة بالله واشكر الله ع ان ابوي كذا لأنني اصبح قريبه من الله اكثر واحيانا ابتعد وأتألم المصيبه بعد فترة صادني ع الجوال< رحمتك يالله وحلف يمين وقال والله اذا ما كرهتك فيه اذا ما هليتك تعزفينه (بمعنى تكرهينه كره شديد) اقسم بالله بعد فترة مسكت الجوال ونظفته وجبت حجرة كبيرة وكسرته كسرررته من قلب وابكي بكااااء شديد طبعا حاولت اطلع اخواتي من الغرفه لكن رفضوا ويشوفوني وانا اكسره ودمعت عيونهم يدرون ان كل هذا بسبب ابوي وانظف كل حاجه واكنس المكان واخرج ما كأن شيء صار انا انسانه اذا انفجرت انفجر ع اكثر شيء كان مضايقني عليه ابوي يعني خلاص اكرهه كره شديد ومن بعد ما كسرته ما اشتريت جوال وعلى هاذي الحاله اذا فقدت شيء احبه ما ارجع اشتريه او استخدمه مره ثانيه سبحان الله مو بيده لكن شيء بالنفس عافته وانتهى آللي بعدو ؟ ومواااقف كثييييره توجع القلب المشكلة إن التهزئ علي انا اكثر شيء واحيانا يقول لي لو يجيني اي رجال يخطبك بوافق ع طول وجع خل نفتك منكم لا تنعسون علينا سلامات يا ابي ؟ عمري 21 سنة ليش كل هالعنف ضدي بالاسلوب والقول باقي الفعل فقط وانا والله ويشهد الله ان ما همني الزواج لكني اقول ايوا احسن اي احد خليني افتك من المشاكل واحيانا اكره الزواج واحلف يمين اني ما حأتزوج اخاف يكون عسل بعدين يقلب علي شفتو لو قلب علي اقسم بالله وجلالته لأطلب طلاق واعيش لوحدي طول عمري اقضي الباقي من عمري لوحدي واحقق امنياتي ولا استقبل اي رجل بعدو حأقفل ع نفسي واتعرف ع مهاراتي وقدراتي واختلط بالناس اللي يحبو نفس الاشياء اللي احبها انا اي شخص اكتشف انو معقد حأتركه بدون ما اقوله او حتى ارسله رساله حأتركها لو كانت صديقة او زوج او مديرة حأتركها تكتب مليون الف رسالة تنتظر رجوعي والله لن ارجع لأي شخص قهرني او خذلني او حتى اكتشفت فيه شيء ما عجبني هل انا معقدة ؟ هل طلبت اشياء خيالية ؟ هل انا مريضه ؟ انا استحق ما اريده وما أريده سأسعى له حتى لو خسرت العالم. |
رد : كيف أتخلص من العصبية ؟
لا ما ضمني احسه يحاول يضمني لكن كبريائه يمنعه
ونا اساس ما ابغى احد يضمني __ ما جربت اصارحه 20 سنة وهو اسلوبه كذا عصبي وكلامه قاسي حفاظا ع صحته نداريه __ نشغل قرآن الحمدلله لكن طبعه كذا __ واشكرك يا سقيا ع كلامك الجميل تخصصي ادب وبلاغه عشان كذا احب اكتب بالفصحى اشعر بالتعبير بشكل اوضح __ جزاء الله كل من يمر من هنا ومن يدعو لي ولأهلي بالصبر وجزاء الله السنين الباقيه بالرحمه والموده اللهم الطف بحالنا وحال جميع المسلمين |
رد : كيف أتخلص من العصبية ؟
السلام عليكم ورحمة الله وبركاته ..
الشكرلله ياحبيبتي ؛ سأقول لكٍ من تجربة عشتها مع والداتي الله يحفظها كانت تصرفاتها أشد مما يفعله والدك بكِ حاولت الكثير لإصلاح العلاقة لكن سبحان الله ما غيرها إلا الدعاء الدعاء الدعاء .. كانت بعيدة عني جداً الآن هي صارت تتقرب مني أشد من أخواتي وتقول لي أنت صديقتي .. ادعي بقيام الليل إذا يصعب عليك مواجهته ، ابكي بسجادتك وقولي ياالله أنت تعلم حالي وفضفضي له وسترين مايسر قلبكِ لا تستعجلين .. هو يحبكِ والله واعلم يعيش تحت ضغط رُبما لأنه متزوج بثانية .. الأمر الثاني ، أنتِ لست مريضة ولا معقدة ولست خيالية .. والذي تُريديه اسعي لتحقيقه سواء كان من تطوير مهاراتك وووإلخ ولا تقفي بسبب معاملتكِ له .. الظروف الصعبة تُعلم الإنسان بأن يواصل على تحقيق ما يصبو إليه بعد الإستعانة بالله .. الحمدلله لديكِ إخوة يشعرون بكِ وأم قلبها حنون عليكم وتتحمل لأجلكم ، وعندما تشعرين بأنك ستفقدين أعصابك اذهبي توضأي فوراً وصلي ركعتين وستجدين الهم لاشيء يذكر .. فرج الله همك ورده رداً جميل ويقر عينكم بعودته .. لكِ الدعوات تترا ياجميلة القلب .. |
رد : كيف أتخلص من العصبية ؟
أقترح عليك تفتحين موضوع بقسم ساعدني
وتطلبين مساعدة الفاضلة أنليميتد.. ماراح تقصر معاك ان شاء الله الا بسالك.. ليش ما ترسلين الحكي هذا بعد التنقيح برسالة له؟ يمكن هو ما يدري بمعاناتكم والمكم لأنكم ساكتين.. يمكن الفرق ان اخوانك وأمهم يطالبون ويتكلمون هو المفروض يكون اقرب الناس وسندك وعزوتك بعد ربي.. مافي ولا مرة احد تكلم منكم؟ ولا حتى أمك لمحت تلميح؟ |
| الساعة الآن 11:56 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©