|
طلاق بلاذنب ..
السلام عليكم ورحمة الله وبركاته ..
أعضاء المنتدى المميز .. حابه أعرض عليكم مشكلتي واتمننى من الله أن أجد الرد عندكم أو ع الاقل بعض الحلول .. أنا عمري 26 وكنت متزوجة من سنتين تقريبا .. اتزوجت زي اي بنت زواج تقليدي .. وفرحو فيا اهلي .. وبدات المشاكل تظهر من يوم الفرح .. من أمو .. زوجي (طليقي ) وحيد أمه وابوه انفصلو بعد ماحملت فيه امه بحكم من حماتها لمشاكل مااعرف اش هيا .. المهم انو حماتها حكمت على ولدها انو يطلقها وفعلا تم الطلاق . بدات المشاكل معانا من يوم الفرح زي ماقلت تدخلات امه في كل شيء بدايه من الفرح الى علاقتنا الخاصه :( زوجي كان شخص طيب القلب جدا ,, ولكن تربى بعيدا عن اي معالم للتربيه .. كان عايش لحالو يسافر يسهر محد داري عنو .. ابوه ف بلد تاني .. وامو مشغوله مع دوامها .. اتزوجت وسنتين وانا اتعزب واتحمل عشانو .. كانت تتدخل في كل شي دخلات - خرجات- سهرات- لبس - اهلي - في كلللللل شي ممكن تتخيلوه .. كانت تهزأني ع الطالعه والنازله كنت ساكنه معاها في نفس العمارة كانت تبغاني اطلعلها يوميا وازا ماطلعت لازم اتصل ع الاقل مرتين ف اليوم .. كانت حاطتلي مواعيد وانظمه لكل شي .. ف المقابل كنت اتلاشها اطلعلها متى مافضيت لاني امراءة عامله .. وكنت اتصل حسب مايجي ع بالي .. لاني الصراحة مااكنت احبها من اللي تسويه فيا مااحبها .. كانت تغتابني عند كل الناس .. حتى أخواتها وحريم اخواتهها وبناتهم ماتبغاني اختلط فيهم مكرهه كل الناس فيا .. وكل مااتعرف على احد منهم يقولولي والله انك حبوبه ليش خالتي تقول عنك كده .. وكانت هيا بنفسها تقلي انت مو الحرمة اللي اتمنيتها لولدي .. بالرغم من انو كنا انا وزوجي سعيدين مع بعض ونطنش كلامها .. كان يقلي طنشي اسمعي واسكتي .. والله كنت اتهزا بشكل ماتتخيلو لدرجة كانت تقلي زي مازوجتو الاولى انا قادرة ازوجو التانية .. وف المقابل ابتسم وابوس راسها واسكت وانزل بيتي ابكي او ابكي ف حضن امي .؟ المهم طبعا خلال السنتين هادي اتفاجات باشياء تانيه غير تدخلات الام .. في مرة من المرات دخل عليا زوجي بوضع غريب اول مرة ف حياتي اشوفو كان يترنح ويتلخبط ف الكلام .. لمن سالتو اشبك راح اكل لبانه (علك) وعصب عليا ونام .. استغربت وسكت وسار الشيطان يلعب ف عقلي .. وعدت الايام ورجع والدو لحياتو وكانت المصيبه الكبرى .. كان الاب يحضو على اشياء حرام ومن ضمنهها مرة قالولي احنا مسافرين علاج للاردن واتفاجات انو سافرو المغرب , وولقيت رسايل ف جوالو صور بنات هناك وابو راسلو هيا يقلو انو شبكها ( او زبطها واتعرف عليها ) فبيطمن ولدو gfg وانو متى حنسافر مرة تانيه .. وانو في حفله فيها قروب مغربي حتسير في المكان الفلاني ازا تبغا تجي معايا !!!!! \ وجات المرة التانيه وكزب عليا انو عندو دورة ف الشرقية واتفاجات انو ف البحرين . ولمن اتصلت عليه سمعت صوت بنت .. يقلي هادا ابويا يقلد صوت بنت وارسلي الاب رساله انو اعتذر يابنتي حسبتو يكلم أمه .. طبعا انا من السفرة الاولى ماني مرتاحة ومن السهرات الغريبة ماني مصدقة شي .. المهم اتكررت المشاكل فاضطريت ادخل الام . فقالتلي كلمتين ( الحرمة ماتربط رجال .. ولو ولدي يشرب خليه مالك دخل فيه انا لمن اسافر معاهم اخليهم يشربو اللي يبغو وانا اشرب برتقال )) فقلت ف نفسي مافي احد حينصفني ف دي العيله :( ووجات الطامة الكبرى .. اللي انطقني فيها ربي .. جا الاب ويبغا زوجي يسافر معاه كالعادة فقلتلو لا .. في اشياء اهم من السفر انا ابغا خلفة قالتلي امو الناس تصبر ب10 سنين ليه مستعجله .. قلتلها لانو انا ماني عايشة معاه هوا طول الوقت سفر وسهر واانا شغاله ف البيت .. المهم لميت اغراضي ورحت بيت اهلي .. وسافرو هما الاب رجع بلدو ووزوجي راح جدة . وسارت مشادة بيني وبينو خلتو يتصل ع بابا ويقلو انو هوا مرة من المرات واحد من اصحابه حطلو حشيش في الشاهي وبنتك تقول انو انا اشرب وووووووووو وانا ماابغاها بنتك قويه ومتحكمه . جا بابا واخدني من بيتي وحكاني .. انو ليش ماقلتيلي ... وانا سكت والله كلو عشان صورتو لاتتهز ف عين اهلي . وبعدها بكم يوم رجع واتصلت عليه ورحت لميت كل اغراضي لانو فاض بيا خلاص .. وبعدها بشهرين طلقني .. طلقة اولى .. انا ماانكر اني احبو لانو كان طيب في حياتو وعشرتو .. وماطلقني الا بضغط من امو وتسليط منها .. لانها كانت تقلي الحرمة ماتتربى الا بعد الطلقة الاولى . لانو هيا شايفة انو انا متحكمة وانا ربي عالم كنت ارفض سفراتو لانو انا اللي معاشرتو وشايفة وعارفة هوا ليه بيسافر .. وكنت احس ف كلللل شي فيه .. بس هيا تبغا ولدها يعيش حياتو ع قولتها .. gfg المهم انا الان ف العدة واحس اني اتطلقت وانا مالي ذنب .. ومتاكده انو حيرجعني عشان تذلني امو وعشان هوا يحبني هيا حتلعب لعبتها وتخلي زي ما طلقني يرجعني .. هل ارجع ..؟؟ احيانن احس انو انا ربي حطني في حياتو يمكن عشان اهديه .. لانو والله لو ماعندو ام واب كان اقدر احاول اقنعه واخليه يتعدل بس هوا شايف انهم يبغولوا السعادة وانا ابغا (طرطور ) يعني كلمتي اللي تمشي عجزت اوقف تفكير فيه .. مااعرف هوا ليه كن معايا حنون ازا كان بيخون ليه كان ينفذلي كل طلباتي ف مقابل اني اخليه يسافر لوحدو .؟ ساعدوني وادعولي :) |
رد : طلاق بلاذنب ..
والله أنا أشوف الوضع ما يطمن أبدا
والحمد لله إنك خرجت من هالجو المتعب بأقل خسائر ولله الحمد ومسألة الطلاق ما أشوفها مشكلة بدون أولاد بالعكس الحمد لله ما كان لك أولاد يربطونك بهالعيلة الله يغفر لنا ولهم ويهدينا ويهديهم خمر وبنات وسفر !!!! وش بقي ؟! أما وقد وقع الطلاق فهذا خير لك بإذن الله عوضك الله خيرا وحماك من كل مكروه |
رد : طلاق بلاذنب ..
خيرة و ربي يعوضك برجل احسن منه
|
رد : طلاق بلاذنب ..
خيرة و ربي يعوضك برجل احسن منه
|
رد : طلاق بلاذنب ..
اشتري راحتك حبيبتي
والله يكتب لك الي فيه خير |
رد : طلاق بلاذنب ..
ترى طليقك هذا ما عليه حسوفه
|
رد : طلاق بلاذنب ..
احمدي ربك
واياك ترجعيله ايش تستني ايدز وامراض جنسية ولا طلاق بعد ما تخلفي ولا تخلفي وامه تحرمك من اطفالك وتحرق قلبك ايش تبغي بولد ماما بعدين اتعود على الحرام انفذي بجلدك لاتضيعي شبابك وصحتك الله يعوضك بالزوج الصالح يارب |
رد : طلاق بلاذنب ..
اما سبب انه حنون وينفذ طلباتك
طبيعي الرجل الخائن يحس بتأنيب الضمير تجاه زوجته العفيفة ولذلك ينفذ طلباتها ليريح ضميره لانه عارف انه مسافر وراح يغضب ربه |
رد : طلاق بلاذنب ..
يا بختك
تم طلاقك ( و كثير غيرك معلقات ) ليس عندك اولاد (و كثير غيرك يتجرعن الذل ويتحملن العيش مع زوج في بيئة سيئة من اجل عيالهن ) تصدقي وتآمني بالله يااختي (على قولة المصريين) اني اكتشفت حاجة فيني في اعماقي وما يدريكي قد تكون في اعماقك انتي ايضاً! اكتشفت انه : انا مش مبسوط من وضعي الحالي ! نعم انا مش مبسوط. وبين كل فترة وفترة اتحاور مع نفسي كي اعرف ماهي العله؟! وماهو الخلل؟! وغالباً يكون الحوار على الشكل التالي : انا: سلامات، ماهي مشكلتك ؟ نفسي: تعبت من هذه الحياة واود التخلص من كل المحيطين فيني ( الوالدين - الاخوان - الزوجة - العيال ) . انا : طيب وبعدين ( باأخذ نفسي على قد عقلها :D ) نفسي : ابحث عن مجال عمل احبه وامارسه بلا قيود او مسؤوليات. انا : حلو ، وبعد كذا ماذا سوف تفعلين؟ نفسي: سأكونّ مبلغ مالي محترم . انا : تمام عليكي، يعجبوني الناس اللي يخططو صح، طيب وماذا بعد ذلك ؟ نفسي: ابحث عن زوجة. انا : نعم! طيب وماذا بعد ذلك؟ نفسي: نبدأ في انجاب الاطفال. انا: نعم يختي! طيب وماذا بعد ذلك؟ نفسي: ابدأ ابحث في النت عن نسبي ( والدي ووالدتي واخوتي) انا : ؟!؟!؟! ! طيب وماذا بعد ذلك ؟ نفسي : اكمل باقي امور الحياة ، من التوسع في التجارة والعلم والتدين. انا : طيب خلينا نراجع ماسبق ، انا فهمت مما سبق ، أن الامور التي تهمك في الحياة وشاغله تفكيرك هي كالتالي : (مجال العمل - زوجة - ابناء - والدين - الاخوة والاخوات ) صح؟ نفسي : صح عليك. انا : قد قالك احد قبلي انك غبية وتستهبلين؟ نفسي: ؟؟؟؟، سلامات وش فيك قلبت علي؟ انا: الان متوفر لديك اربعه (الزوجة - الابناء - الوالدين - الاخوة والاخوات) من الخمسه الامور التي تتمناها (بقي فقط مجال عمل تحبه)،تقومي ياذكية زمانك تتمني زوال الاربعه لأن ذنبها الوحيد انها توفرت لكي قبل توفر البند الأول!!!!!!! تريدين بند من اجل ايجاد اربعة بنود بعدها، ولما ربنا يسهلها عليكي ويرزقك بالاربعه بنود قبل البند الاول، تقوم تقولين : لا لا اريد، اريد ابدأ من الصفر!!!!!!!!! ياشيخة روحي الله ينتقم من شيطانك، كويس اني جاريتك في الكلام قبل لاتوديني في داهيه. ( انتهى الحوار ) طيب ماهي فائدة البربرة اعلاه؟! الفائدة : انه سبحان الله ، الواحد تأتيه امور لحد عنده باردة مبردة ومقشرة زي اللوز وما يعجبه! وبدلاً من ان يفرح ويحمد ربه، يقول : لا، انا زعلان؟!!!!!! طيب لماذا زعلان؟ الجواب : لأني لم اشعر بقيمتها! السؤال: طيب ماينفع انك تشعر بقيمتها من سماع تجارب الاخرين؟!! ((( السعيد من اتعظ بغيره ))) الخلاصة اختي : احتفلي واسجدي سجدة شكر لله على نعمة الطلاق وعدم الانجاب من هذه الاسرة غير المتماسكة بكره الجدة تقول لعيالك : عادي اسكروا واشربو وفلو ام السالفه (وقد لاتقول (انا لااعلم الغيب)). وياريت اختي تجري حوار مع نفسك وشوفي هل هي بنفس ذكاء نفسي ام افضل قليلاً! قال ايش، انا زعلانة!!! الحين عندي زوجة وابناء وعائلة وعمل ، وتبغيني اضحي بدا كله عشان الاقي عمل احبه!!!! وا عجبي انتي (يانفسي) زي اللي يقول : اضحي بالجنين والأم عشان الأب يعيش!!!!!! |
رد : طلاق بلاذنب ..
الحمدلله وضعك أفضل من كثير جدا من الأخوات المطلقات وحتى المتزوجات
فاحمدي الله بخصوص الرجعة أو الاستمرار بالطلاق أقترح عليك استشارة الأخت unlimited بشكل خاص وإعطائها تفاصيل أكثر وأوضح أسأل الله أن يسخر لك خيار خلقه وأن يسدد رأيك وأن يرزقك من واسع فضله |
| الساعة الآن 07:53 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©