|
ندمانة على كل قرار اتخذته في حياتي
السلام عليكم ورحمة الله وبركاته
بغيت افضفض وارتاح احس محد حاس فيني الكل يقولي تسرعتي المهم هالشي بدا عندي من كم يوم بصراحه صار لي نقل على اداره جديده مع مدير جديد وانا كنت في بدايه اشهر الحمل وفي الحمل التعب عندي يكون بزياده و اذا بذلت مجهود شوي زايد اتم تعبانه طول اليوم و الواحام عندي فضيع وكل يومين لازم اجازة مرضيه لان مناعتي تستوي تحت الصفر .. و الدكاتره ما يعطوني ادويه ابدا .. لازم اجازه و على هالحال لين ما اولد .. المهم وزوجي بعد هالفتره موب موجود لان في دوره عسكريه لمده 9 شهور وهاي اول مره يروح عني .. يعني انا الام والابو للاطفال .. اي شي يصير لازم انا اكون موجوده .. المهم ها المدير كلمته .. اول حوار بينا كان يباني امسك مهام وظيفه زياده .. غير اني اكون ملزومه بالحضور اول الصبح اتابع الغياب و الحضور عنده .. المهم انا كنت بوافق بس صليت استخاره و انجلب حالي للرفض القاطع بسبه الحمل و المسؤوليه في البيت حسيت ما ابا مسؤوليه حاليا فالدوام لان لازم ابدا من الصفر حسيت بتعب و بينعفس حالي المهم طلبت الاعفاء .. بس الان بعد شهرين من الرفض ندمانه .. لان صارلي اجهاض وخذت اجازه طبيه طويله .. المهم حسيت اني تسرعت بالرفض لان كنت بكون مسؤوله .. هالشي وااايد مازمني جدا غير ان فتح علي باب اني اقارن كل قراراتي المصيريه انها غلط *اختيار زوجي حسيت اتسرعت باني تزوجت .. لو قبلت بشخص ثاني كان متقدملي بنفس الوقت كان احسن .. *اختيار التخصص انا ما احب المحاسبه بس دشيتها لانها مطلوبه .. بس الواقع اني لازم ادش تخصص اخر كنت احبه واميله ومبدعه فيه الي هو الفنون الجميله .. * رفض النقل وقمت اكره الدوام و الشغل الي يبني و احتقر نفسي وايد * حتى اختيار الشقه الي انا فيها .. كرهتها شقتي احس اني مخنوقه منها *اختيار الخدامه حتى الخدامه تميت افكر ان غلط اني اخترت هالجنسيه لانهم سيئين جدا *حتى سيارتي .. قلت ان غلط خذتها لو ماخذه سياره اصغر و قرضها اقل جان احسن احس كل قراراتي غلط وهالشي مارقني احس خسرت كل شي مع ان والله قبل لا يصير موضوع النقل كنت اشوف نفسي انسانه عقلانيه و افكر صح بس حاليا احس اني فاشله في الاختيار مع اني والله صليت الاستخاره مثل ماهي مذكوره بالكتب و السنه ونمت احلى نوما وكنت طبيعيه .. بس حسيت بان الموضوع متعب مع ظروفي الاجتماعيه الحاليه .. بس ماعرف ليش ندمت وبديت اندم على كل قراراتي نعم ماخاب من استخار بس ماعرف هالشعور الخايس الي يني احينه شو سبته مع اني استغفر وااايد لما تيلي هالهاجس بس حتى عقب ما اخلص استغفار ممكن اوعى بليل من غير سبب يي الموضوع بالي .. ويتم هاجس اني حطمت مستقبلي بالرفض .. وايد زعلانه على عمري .. لان كنت اشوف نفسي برستيج وشخصيه .. بس حاليا احس نفسي انسانه فاشله ما تعرف تفكر و الكل الي عرف بموضوع النقل يقولي خسرتي فرصه .. وهالشي خلاني احس بان قراراتي غلط كلها .. |
رد: ندمانة على كل قرار اتخذته في حياتي
كم لك من أجهضتي؟؟
يعني كل اللي صار لك بس ألحين انتبهتي من أجهضتي إنه اختياراتك كلها غلط؟؟ اللي صار صار توكلي على الله واحمديه إنتي في حال أفضل من غيرك،يعني لو كنتي وافقتي عالعرض وتعبتي بالوظيفة وإنتي حامل وبعدها أجهضتي بتقولي يا ليتني ما قبلت خسرت جنيني بسبب الوظيفة، كل أمرك في خير لكن إنتي صرتي حساسة بزيادة بسبب الضغوط والظروف اللي جاتك بغياب زوجك |
رد: ندمانة على كل قرار اتخذته في حياتي
معلش طولي بالك
قولي الحمد لله على نعمه الصحه والعافيه واﻻمن واﻻمان ﻻزم تعرفي كل اختيارات رب العالمين النا خير حتى لو في نظرك كلها سيئة بس سؤال هل بتتنقسي طبيعي او على اﻻجهزة ادا طبيعي هاي لحالها اكبر نعمه دايما اطلعي للي اقل منك وقولي الحمد لله الله يعوضك بافضل من اللي راح بكره ان شاءالله راح ترجعي تحملي وتولدي بالسﻻمه بكره ان شاءالله راح تﻻقي وظيفه مريحه بكره ان شاءالله راح ي يرجع زوجك من السفر بالسﻻمه وتنبسطي ﻻ تعيني الشيطان عليك وﻻ تحكي حظي سيئ كلها اختيارات رب العالمين واكيد فيها حكمه علشان تصيري اقوى من اﻻول فرج همك امين |
رد: ندمانة على كل قرار اتخذته في حياتي
انتي بس تعبانه من الضغط اللي عانيتيه الفترة الماضية
عطي نفسك فرصة تسترجعي قواك و اللي جاب الفرصة الضايعة يجيب غيرها بالنسبه للوظيفة ممكن تشتركي في ووركشوبات للرسم بجانب وظيفة المحاسبة اخيرا، نصيحة قوي اعصابك شوي كيف تقدري تتحملي مسؤولية قسم، احيانا اخطاؤ الحسابات ممكن تودي الشركات وراء الشمس الله يعوض علييك |
رد: ندمانة على كل قرار اتخذته في حياتي
حبيبتى مادام أنك صليتِ صلاة استخارة .. فقرارك صائب بإذن الله حتى و إن ظهر لك عكس ذلك
اطمئنى حبيبتى و لا تشيلين هموم الدنيا كلها على راسك وواظبى على الاستغفار |
رد: ندمانة على كل قرار اتخذته في حياتي
وعليكم السلام ورحمة الله وبركاته هل ثقتك بنفسك ضعيفة جداً ؟ |
رد: ندمانة على كل قرار اتخذته في حياتي
يا ساتر !!! كلامك فيه كمية تشاؤم مو طبيعية.. أحس بطاقة سلبية انتقلت لي وأنا أقرأ ! يمكن الهرمونات عندك شوي ضاربة :) يعني قعدتي تطالعي في كل شي في حياتك وحولتيه من نعمة لنقمة ! تفكيرك بهذا الشكل ماراح يوصلك مكان! بالعكس زي المنحدر كل مالها حياتك حتصير للأسوأ صلي على النبي واستهدي بالله واحمدي الله على النعم المحيطة بك كوني قوية وواثقة من نفسك وواجهي الصعوبات اللي تقابلك بقلب قوي |
رد: ندمانة على كل قرار اتخذته في حياتي
ارضي بما قسمه الله لك
وَعَسَىٰ أَن تَكْرَهُوا شَيْئًا وَهُوَ خَيْرٌ لَّكُمْ ۖ وَعَسَىٰ أَن تُحِبُّوا شَيْئًا وَهُوَ شَرٌّ لَّكُمْ ۗ وَاللَّهُ يَعْلَمُ وَأَنتُمْ لَا تَعْلَمُونَ (216)البقرة القناعة كنز لايفنى انظري لمن هو دون منك من في المحاكم ووالمستشفيات واهل الحروب |
رد: ندمانة على كل قرار اتخذته في حياتي
احمدي الله على نعمه العظيمه
انظري بمن اقل منك في امور الدنيا لكي لاتزدري نعم ربك وانظري لمن اعلى منك في الاعمال الصالحه اكثري من الاستغفار |
رد: ندمانة على كل قرار اتخذته في حياتي
امورك ف السليم الحمد لله
نبدأ من اول قرار دراستك الحمد لله انك اخدتي شهادة ف مجال ناجح وتفوقتي فيها بدليل طلب الادارة بترقيتك القرار الثاني زواجك /الحمد لله ان زوجك على خلق ودين وتذكري ان الله زوجك ف السما قبل الارض فهو نصيبك وانجابك الاطفال اكبر نعمة ،، الشقة غيري الاثاث ورتبي اللي ماهو مرتب بتحبيها افتحي النوافذ وبخريها ،، الشغالة كلها فترة وتروح ف حال سبيلها والسيارة ممكن تسوي تنازل عنها وتاخدي اصغر او الموضوع كله فترة وماشي والاجازة اي وحدة مكانك كانت راح تاخد اجازة لامور الحمل والاجهاض بامر الله لا اعتراض عليه الحين فكري بنفسك وارتاحي نفسيا وجسديا واصلا انتي محتاجة هالاجازة حتى مايكون عندك ضغط ف البيت والعمل وقتك كله لاطفالك |
| الساعة الآن 10:41 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©