زعل ام الزوج
 

السلام عليكم ورحمة الله و بركاته

عندي سؤال .. أتمنى تجاوبون علي بصراحة

لو زعلت منج ام زوجج .. لاي سبب
سواء موقف صار او بدون سبب او موقف تذكرينه

و سألتيها عن شيء .. وما ردت ولا حتى طالعتج مع تأكدج انها سمعت
و تكرر الموقف باوقات مختلفة

هل راح تكلمينها؟؟
هل راح تسألينها عن أي شيء ؟؟

علما انه العلاقة صار لها شهور رسمية .. رغم سكني معاهم
لكن انها مااترد علي !!!

رد: زعل ام الزوج
 

لا ما باكرر السؤال
وبتعامل معاها طبيعي وبتكلم حتى لو ما ردت
😊 مردها بيحكها لسانها وما بتقدر تسكت... يعني ما تعرفين الحريم ؟
واذا آنه غلطانة بعتذر منها

رد: زعل ام الزوج
 

اول موقفين زعلت فيهم تعاملت معاها عااادي و سولفت
وطاح الحطب
رغم انه الموقفين ابدااا ما يستاهلو

بعدها خلاااص وصل حدي
نحن في بيت واحد .. ومل ما صار شي اتم اراضي واطبطب
خصوصا انه العلاقة اخر فترة متوترة من الصوبين

رد: زعل ام الزوج
 

مو القصد تراضين
تكلمي عادي كأن شيئا لم يكن...

شتسوين النسوان الكبار جذي.. يبون مداراة

رد: زعل ام الزوج
 

شخصيا ... ما قمت اسووولف ابدااا
ليش اسولف مع شخص بالاساس ما يرد علي

اللي قاهرني .. فترة ابدا شوي اسولف او اتصرف عادي و الوضع عادي
مرة وحده اكلمها ما ترد
الموقف يعوووور وخصوصا لو حد من اهل البيت موجود

رد: زعل ام الزوج
 

على حسب الموقف يا آميره ، اذا انا الغلطانه بعتذر وبحاول ارضيها لين ترضى

لكن لو شي بسيط بكلمها مره بالعقل واخليها تفكر بكلامي بعد كذا وتَحكِم ضميرها
اني زي بنتها وهي زي امي ورضاها عندي زي رضا الوالده ، ولا يهون علي زعلها
ان كان زعلتها بشي اعتذر وحقها علي ، واتمنى تعاملني زي بنتها بالخطاء والصواب

الدنيا ماتستاهل والله زعل وشيلة نفوس وتوتر
سوي الي عليگ لله والباقي على ربي عارف ومطلع ع القلوب بيعطي كل واحد عقد نيته

رد: زعل ام الزوج
 

رااائحة البخور

كلامج لو باقي طيب نفس بالقلب .. والله قلبي مليان و بصراحة حاسة بكره تجاهها .
و مع هذا قلبي معورني على الحال اللي وصلنا لها .

لما أهدا ممكن اقول لكم المواقف الاخيرة اللي صارت .

رد: زعل ام الزوج
 

هذا معناه عتاب ...

هي شايله عليك .....وانت لما تكليمها وهي تحاول تعدي ........لكن لما تاخذي راحتك وكانه شي لم يكن وهي في قلبها شايله ...اكيييد راح يخرج العتااااب وتصدك

يعني بلسان حال الذي يقول لك عين ..بعد اللي عملتيه

عذار لكن اريد ان اوضح بها

دائما نحنا نعاتب الشخص العزيز علينا ....
واذا لم يكن مهما وغير عزيز لم نهتم

رد: زعل ام الزوج
 

وطريقة التصرف ...
على حسب السبب اذا هي تزعل هكذا لسبب جدا عادي ،، او بسبب تاثير بنتاها او تكون هي الغلطانه

هنا انصحك ان لا تفعلي شي من محاوله وغيره ...عادي ادخلي سلمي ردت السلام او لم ترد ...وافعل الواجب وكوني رسميه

لانها يمكن تبحث عن سبب للخلاف لمجرد الخلاف

اما اذا كان هناك فعلا سبب فحاولي معها

رد: زعل ام الزوج
 

مااحسه عتب
هذا طبعها .. و صار اكثر من مرة
واصلا ماعدت اعرف شو اللي مزعلها بالضبط .
بس معاملتي برسمية و سكوتي فالبيت حسيته مضايقنها
والسكوت افضل لي لانه يخليهم يسكتون .. ووامنع التدخلات والتعليقات الجااارحة والاسلوب المستفز .

غير اني لو صلحت الوضع .. بكرة بنتها تتكلم معاها بشي و اشوفها انجلبت علي .. فليش اتعب نفسي . وخصوووصا اني حاستنها شاله بقلبها علي من بعد ما رحت لبيت اهلي بسبب مشاكلي مع ولدها ومعاهم .