ضرب زوجي لاخي بسبب تطاوله علي وزعل ابي منه
 

السلام عليكم و رحمة الله

ما اعرف كيف أبدأ بس انا جيتكم هنا علشان تنصحوني و تحلون لي مشكلتي و إن شاء الله أستفيد منكم

مشكلتي إني أنا متزوجة من رجل طيب و حنون و يحبني و أحبه الحمدلله و قبل ما تقولون إنه عصبي إذا قلت لكم القصة لا أبدا زوجي مو عصبي و هو دايما يقول أنا ما اعصب إلا مرتين في السنة و لا أذكر شفته معصب او غضبان لكن عندي أخ صغير مراهق في المتوسطة تقدرو تقولو ما عنده مسؤولية و دلوع و أبوي ما يرد له طلب
أخوي متعود كل شي يوصل له و يسب و يشتم بدون إحترام يسبنا حنا يالاخوات الكبار و يقل أدبه على أبوي و أمي لكن هو آخر العنقود و دلوعهم اللي ما يزعلونه أبد

زوجي دايم يشتكي من أخوي و يقول إنه لا يمكن يطلع رجال و إن أهلك دلعوه و إنتي ربوكي نعم التربية و يلمح إن أهلي دلعوا أخوي محمد بعد ما تيسرت حالنا و صار يصرف آلاف الريالات في الشهر على ألعابه و على البلايستيشن و كل شهر بجوال جديد أما انا و أخواتي تربينا وقت الشدة على كلامه
و أحيانا ينتقد أخوي إن ما عنده أصدقاء حقيقيين و طول يومه يلعب


المهم اللي صار إن في يوم زوجي كان يتعشى عند أهلي و محمد شتمني و رفع صوته علي قام زوجي قال محمد يا شيخ الرجال المقدار لعمي صوتك لا ترفعه على أختك و أبوي وجهه تغير وقتها و أول يوم برمضان جاء زوجي يأخذني من بيت أهلي لقاني أشيل أغراض مع الشغاله و محمد جالس و انا ما شفت زوجي قلت يا محمد هذا ثقيل ساعدني شتمني و ----شاف الموقف زوجي قام ضرب أخوي كف و صار يشوته برجله حتى إنكسر سن أخوي الضعيف و إنصرع بالأرض انا خفت و ما تكلمت بس بالبيت زعلت عليه و المشكلة الأكبر إن ابوي درى و زعلان من زوجي و من يومين زوجي يتصل يعتذر منه و أبوي ما يرد عليه و أنا بعد زعلانه عليه حزني منظر أخوي يبكي
الضرب كان مبرح

الله يسعدكم إنصحوني



تم تعديل العنوان ليتناسب مع المضمون

رد: مشكلتي زوجي و أخي
 

بيض الله وجه زوجك نعم الرجل و نعم الزوج

ماشاء الله تبارك عليه الله يخليه لكي

رد: ضرب زوجي لاخي بسبب تطاوله علي وزعل ابي من
 

موقف صعب الصراحة لكن اخوك زودها انت متزوجة الان كيف يعاملك بهذه الطريقة وربما مستقبلا قدام اولادك . لم احبذ اسلوب الضرب خاصة داخل بيتكم والظاهر ان زوجك كان شايل عليه وانفجرمرة وحدة
دورك الان في اصلاح الامور اولا بالتحدث مع ابيك
ومستقبلا اختي لا تطيحي الميانة مع من هم اصغر سنا ولو كانو اخوانك ان كانو لا يعرفون حدودهم

رد: ضرب زوجي لاخي بسبب تطاوله علي وزعل ابي من
 

مهما قال لك اخوك وسبك وشتمك
وتدلع وتدلل زوجك ماله شغل
زوجك تطاول ع نسيبه وخال عياله وعيب كبير في حق العائله كلها الي صار
ترى كسر سنه
هذي فيها حقوق
والمصيبه شوته وكف يعني حقوق
وربي عيب عيب
ماله شغل فيه ماهو ولده ولا اخوه زوجك للاسف مايعرف السلوم صح

رد: ضرب زوجي لاخي بسبب تطاوله علي وزعل ابي من
 

عاد تبين الصدق ماينلام. زوجك
وزعله وكلامه على اخوك من حبه لكم ومن حبه وخوفه على اخوك
لو مايهمه كلن قال ايش عليا منهم يصطفلو
لكنه شايف غلط التربيه..

ماله داعي تزعلي فوق زوجك
لانه اصلا اخوك غلطان
زوجك غلط بتدخله بينك وبين اخوك
بس بالنهايه غلطه من قهره عليك
وشكله كلن كااااتم وبالع الكثير وانفجر مره

الحين يكفي زوجك زعل ابوك واهلك منه لا تصيري انتي وهم عليه
خاصه انه المشكله كلها لانه زعل عليك

حاولي تهدي الامور بينهم خلي الموضوع يهدا شوي كم يوم
وحاولي تكلمي امك تكلم ابوك تتوسط
ويروح زوجك لعند ابوك وياخذ له هديه ويستسمحه

اما اخوكً الله يهديه ضروري اهلك يربونه والا
تشوفون منه الويل لما يكبر

بالعاده الوحده تقول اخواني وعزوتي
لكن اعتقد بموقفك العكس زوجك عزوتك
الله يخليكم لبعض

رد: ضرب زوجي لاخي بسبب تطاوله علي وزعل ابي من
 

ماله حق يضربه بهالشكل غلطان زوجك لازم يىاضي الولد ويعوضه

رد: ضرب زوجي لاخي بسبب تطاوله علي وزعل ابي من
 

رد: ضرب زوجي لاخي بسبب تطاوله علي وزعل ابي من
 

ياأختي الحمل عليك كبير وثقيل حاولي تصلحي الامور وخلك مع زوجك ولاتعاندينه ولاتعادينه ابداً صج انه طق اخوك طق قوي ماينبغي له ذلك ممكن ينزره او يغلظ عليه بقوه بس يمد ايده ويكسر سنه هذا غلط ومادام صار الي صار الدور عليك اختي الان كبير حاولي تقربين وجهات النظر وتصيرين عون لزوجك لاتميلين كل الميل لاهلك وكذلك لاتخسرين زوجك هو رأس المال بعد الله مادام مرتاحه منه وتغلينه ويغليك

رد: ضرب زوجي لاخي بسبب تطاوله علي وزعل ابي من
 

أولا أختي زوجك هذا عملة نادرة تمسكي فيه بايدينك ورجولك والله لا يحرمكم من بعض ويديم المحبة بينكم

الي يقول أخطأ زوجك في ظربة لأخوك طيب ابوك يابنت الحلال لمن شاف اخوك يشتم فيك ويسبك قدام زوجك ليش ماتخذ موقف ووقف الولد عند حدودة يعني رجال زوجته تنسب قدام اهلها وزوجها من اخوها وابوك مايتكلم ؟ الله يجمل حاله يوم قل لأخوك لاعد تسب زوجتي واحترم نفسك وحشم ابوك

بخصوص الظرب ما ينلام ابد انتي زوجته ومايرضالك المهانة حتی لو من اخوك المراهق الرجال صبر وصبر ولا شاف نتيجة من اهلك تجاه اخوك الي اعتبره يميز بين الصح والخطأ باعتبار انه في المتوسط

لا احد يقول سلوم وما سلوم الي يعرف السلوم مايرضی رجل في ظيافتهم تنهان زوجته وهو يتفرج ولا حشمو الرجال ولا قدرو زوجته

مالك حق تزعلين علی زوجك الي يهمه كرامتك ومايرضالك الردی

حاولي بطريقتك تصلحين مابين ابوك وزوجك والله يعديها على خير

رد: ضرب زوجي لاخي بسبب تطاوله علي وزعل ابي من
 

زوج أخطئ بمد يده ..
وبأمانه أخوك تمادى كثير .. واللي صار راح يغير كثير من اسلوبه
حل المشكله يجب أن يكون الأن ولا يتأخر ..
الحل نسميه عندنا في قبيلة عتيبه (ملفى)
زوجك يأخذ معه كبير العائله ورجل حكيم ويروحون بالعشاء لأبوك وأخوك ويبشرونه بالحق ومايتبعه من مبلغ مالي وخلافه من الأحكام القبلية المعقوله ..
وينتهي الموضوع