مشكلتي مع زوجي المتكبر
 

السلام عليكم ورحمة الله وبركاته

انا عضوة جديدة في المنتدى وأريد المشورة في مشكلة بيني وبين زوجي قد يراها البعض تافهه ولكنها أشغلت تفكيري

زوجي ماشاء الله إنسان له مكانه في المجتمع ومنصبه عالي واسم معروف الحمد لله متأكدة من محبته لي وانا ايضا احبه لكن مشكلتي انه متكبر ومتغطرس ومتعالي ليس علي بالعكس طلباتي أوامر ويبحث عن رضاي وسعادتي ولكنه متكبر على الناس

أسلوبه مع الجميع حتى مع اخواني يستفزني فيه الكثير من التعالي والفوقيه
يحب ان يمدح نفسه كثيرا ويرفع من شأنه وشأن كل ما يملكه وينزل من قدر الناس وشأنهم
حتى في الشوارع وهو يقود السيارة يظهر تعاليه على الناس اخاف احيانا ان يثير شخص مريض نفسي فيحصل مالا يحمد عقباه
كل شي خاص فيه هو الاجمل والأفضل حتى مع اخواني لما يقابلهم احنا جونا أفضل من جوكم وحياتنا أحسن من حياتكم و فلوسنا اكثر من فلوسكم صراحة في البدايه كنّا نعطيه على جوه لكن اشعر ان اخواني ضاقوا ذرعا منه مع انه طيب ومتعاون ولو احتاجوا شي ما يقصر لكن تعاليه يخرب عليه كل شي

حصلت مشكلة قبل ايام بينه وبين اخي وكلهم كانوا غلطانين اخي مستهتر وزوجي متكبر زوجي طلب من اخي امر واخي تهاون فقصر في تنفيذ طلبات زوجي زوجي زعل وأهانه في مجلس كان فيه رجال

المهم انا اللي وقعت في النص بين نارين اخي يسبني ويسب زوجي من جهه ولا يتقبل مني اي كلمة وزوجي يسب اخي عندي من الجهة الاخرى انا تضايقت جدا وكرهت زوجي واخي ولي يومين معتزلتهم ولا أبغى اشوف احد فيهم

جاء زوجي عندي البارح واعتذر مني وقال انا أسف أني زعلتك وراح أسوي اللي يرضيك تبغيني اعزم اهلك واذبح لهم علشان ارضيك ؟؟ لكن انا بصراحة اشعر ان زوجي طاح من عيني لان اهلي اذا جاءوا لمنطقتي يصير متكهرب و مو طبيعي ويختلق المشاكل مع ان روحتنا لاهلي اكثر بمليون مره من جيتهم لي

موضوعي مخربط بس اشعر أني مشتته أتمنى أعاقب زوجي علشان يخفف من الكبر اللي فيه مع أني اعلم انها طبيعه ما راح تتغير واخاف ربي يعاقبنا بسببه

رد: مشكلتي مع زوجي المتكبر
 

رد: مشكلتي مع زوجي المتكبر
 

الكبر عاده غير حميده ولا تحمد عقباها في الدنيا والاخره .. ذكريه براي الدين في المتكبر وشو عقابه في الاخره لعل الله يصلحهه ويهديه ..
بعد فتره راح الناس تنفر منه .. لان الشخص المتكبر الناس تتحاشى الحديث والجلوس معاه .. استغرب كيف انسان يقول لاخر فلوسي اكثر من فلوسك !!! النعمه زواله .. .. والقصص فيها كثيره ..

موضوع اخوك وزوجك ما اشوف انه لك علاقه ... اكتفي بالنصح فقط لاغير .. المشكله بينهم مو معك انتي ف ليش تعاقبينه ؟؟ خصوصا انه اعتذر لك .. اغتنمي فرصة الاعتذار بالحديث عن موضوع الكبر والغرور اللي فيه لانه يمكن مب حاسه بنفسه ويقول ها الكلام بعفويه ..

رد: مشكلتي مع زوجي المتكبر
 

زوجك ممتاز معك.. الحمدلله
هذا اهم شي

علاقته باهلك واخوانك شي ثاني
شايفه الزيت والماء
مهما حاولتي تخلطيهم مايمتزجوا
في ناس كذا مافي بينهم انسجام نهائي
مايكرهون بعض.. بس ماينسجون مع بعض
وزوجك واضح يجامل زياره اهلك عشانك
والا هو بداخله ماله نفس ابدا

زوجك معدنه طيب
وما اشوف بتصرفاته كبر وغرور
يمكن فكرته: واما بنعمة ربك فحدث
واحتمال بشخصيته يحب الاستعراض "الهياط"
بس الناس البسيطة ترمي تهم الغرور عالناجح
اعتزازه بوضعه وامكاناته حلو
وهو يمكن انتقادي وصريح شوي
ويمكن اخوانك يغارون من نجاحاته ومايبينون لك
لكن انتي بلا شعور سمعتي تعليق منهم وتأثرتي


بالنهاية لا تشغلي نفسك بتعامله مع الناس
محد كامل يا اختي
واهم شي روعته معك ما شاء الله
حافظي عليه هذا كنز
الله يهنيكم

رد: مشكلتي مع زوجي المتكبر
 

كلمه فقط (لايدخل الجنه من في قلبه مثقال ذرة من الكبر)

رد: مشكلتي مع زوجي المتكبر
 

فلوسنا أكثر من فلوسكم!!
الظاهر زوجك حديث نعمة أو يعاني من عقدة النقص
اللي يهايط ولايضرب حساب لكلامه إذا فيه تجريح أو إستهزاء بظروف الناس
محد يحبه والكل يتجنبه
ذكري زوجك بهالحديث هذي فرصة جت عندك تعلمينه يترك هالطبع الشين
لو مانصحتيه معناته ماتحبينه كذا الناس بينفرون منه
رواه الإمام مسلم في صحيحه من حديث عبد الله بن مسعود رضي الله عنه عَنْ النَّبِيِّ صَلَّى اللَّهُ عَلَيْهِ وَسَلَّمَ قَالَ:
(( لا يَدْخُلُ الْجَنَّةَ مَنْ كَانَ فِي قَلْبِهِ مِثْقَالُ ذَرَّةٍ مِنْ كِبْرٍ، قَالَ رَجُلٌ: إِنَّ الرَّجُلَ يُحِبُّ أَنْ يَكُونَ ثَوْبُهُ حَسَنًا، وَنَعْلُهُ حَسَنَةً، قَالَ: إِنَّ اللَّهَ جَمِيلٌ يُحِبُّ الْجَمَالَ، الْكِبْرُ بَطَرُ الْحَقِّ، وَغَمْطُ النَّاسِ))

رد: مشكلتي مع زوجي المتكبر
 

طيب ليش ماتصير العلاقة بينه وبين اهلك رسمية ،، وقللو الاحتكاك بين زوجك واهلك ،، ومثل مايقولون خلك بعيد حبك يزيد ،، مو شرط ينسجمون مع بعض ،،

رد: مشكلتي مع زوجي المتكبر
 

شيلي ايدج من الموضوع

وقولي حق زوجج الموضوع بينك وبين اخوي انا مالي شغل

رد: مشكلتي مع زوجي المتكبر
 

أشكركم شكرًا جزيلا على تفاعلكم مع موضوعي

كفيتوا ووفيتوا فعلا زوجي فيه كمية من الهياط وهياطه مو ضارني بالعكس ولا كان يضر حتى اهلي بالعكس كانوا اخواني يحبون يجاملونه ويرفعون فيه علشان ينبسط بس كأن العيار زاد حبتين في الاونه الاخيرة

من ناحية كلمة فلوسنا اكثر من فلوسكم هو ما قالها صريحة بس بعض قطاته وتلميحاته تدل على كذا

وهو أبدا ما يكره اخواني بالعكس ينبسط معاهم جدا و كل فترة هو اللي يشجعني علشان نروح لهم بس الظاهر انه طيح ميانه معاهم لدرجة صار ياخذ راحته على الاخر

الله يهديه ويهدي اخواني ويألف بين قلوبهم