|
أرغب بالزواج حتى أنسى طليقي
السلام عليكم ورحمة الله وبركاته
اعتبرو موضوعي هذا مجرد فضفضه لأَنِي أنسانه مااحب ابين ضعفي وانكساري لأحد وبما انكم مجهولين اخذ راحتي بالفضفضه سواء كنت على حق او خطأ انا وبدون مقدمات هالشهرين بدأت افكر ودي اتزوج عشان انسى طليقي للأسف وبعد كل اللي سواه فيني اعشقه عشق ودائما يجي فبالي واعامله بأفضل معامله بخصوص ولده ولو انه مايستاهل بس ارحمه للأسف وأحن عليه وأمنيتي ارجع له ولكن حسبي الله على من كان السبب وانا الان تقريبا بكمل سنه ولا احد جا وخطبني والحمدلله من فضل الله مواصفاتي زينه وموظفه وصغيره ماشاءالله تبارك الله بس استغرب انه معقوله ولا واحد ادري الرزق بيد الله وكل شي قسمه ونصيب ونعم بالله بس ربي قال اعملو بالأسباب بس ماادري وش اسوي انا اتمنى أحط كل مشاعري وأخلاصي اللي وهبتها لأنسان ماقدرها لزوجي المستقبلي ومهما كان انا انثى ولي مشاعر واحاسيس واتمنى واحد يحبني ويهتم فيني ولكن ابيه بالحلال وأحيانا اقول يمكن عشان عندي ولد الله يحفظه ويخليه لي محد يفكر يخطبني مع انه والله لويجيني واحد فيه كل المواصفات الزينه وشرطه انه مايبي ولدي راح ارفضه اكيد لأَنِي مستحيل ومهما كنت محتاجه لرجل بحياتي ماراح أفرط بولدي لو ايش يصير وانا من داخلي اتمنى يجيني مطلق والا أرمل ومعه عياله صغار واربيهم مع ولدي لأَنِي أحس مثل ماراح أعامل عياله بيعامل ولدي مثلهم فأحس بيكون ارحم وأحن من واحد ماتزوج او ماعنده عيال وامي الله يخليها لي ويطول بعمرها دائما اذا فتحت معها موضوع الزواج بالمزح تقول وش تبين بالعرس عندك ولدك ربيه لين يكبر وذيك الساعه لاحقه ماودها ابد اني اتزوج او اجيب هالطاري طيب انا احتاج وخاصه اني انظلمت للأسف بطلاقي واسأل الله العلي العظيم بأن يرزقني انا وكل وحده تبي الستر والعفاف بالزوج الصالح التقي النقي إللي يخاف الله فينا تم تعديل العنوان ليتناسب مع المضمون |
رد: مجرد فضفضه
انتي مثلي تفكرين بالعرس والزواج ومافي خطاب
الله يلطف بحالك وحالي ويرزقنا من حيث لا نحتسب لا تتكلمين مع امك عن الزواج وانتظري نصيبك ايش بيدك تعملي مو بيدك شيء او كلمي خطابه تشوفلك عريس |
رد: مجرد فضفضه
الله يرزقك بالزوج اللي يعوضك عن كل اللي فات
بس اختي ام الغالي ابي اتكلم معك بصراحه ويشهد الله اني اتكلم وكأني اتكلم مع اختي شوفي اولا انتي قبل تفكرين بالزواج يلزمك كم حاجه تشتغلين عليها عشان تعيشين بسعاده اولا لازم انك تتخلصين من عقدة المظلوميه اللي معيشه نفسك فيها انسي الماضي بكل تفاصيله لاني ملاحظ انك معيشه نفسك باطار المظلومه من طلاقك الى الحين اختي كلنا مرينا بظروف يمكن اخس من ظروفك وكلنا عانينا من الظلم والقهر اللي تحسين فيه ولكن الحمدلله قدرنا نتخلص من هالاحساس عشان نقدر نوقف على رجولنا مره ثانيه ونقدر نكمل الحياة بشكل افضل ونعتبر اللي مضى لنا هو درس لنا تعلمنا منه وهذا اللي المفروض تسوينه انتي اما انك تبين تتزوجين بس عشان تنسين طليقك انا اقولك من الحين لو جاك احسن رجال وانتي على وضعك هذا ماراح تنجح حياتك اختي لازم تحطين ببالك ان الرجال اللي انتي تفكرين فيه ليل ونهار نساك خلاص ويمكن انتي ماتجين على باله ابدا هو عايش حياته مبسوط وانتي جالسه تاكلين بنفسك على الفاضي ثانيا لازم تعرفين ان الحياة ماهي زوج وبس احس انك رابطه حياتك كلها بزوج واولاد وبس حاولي تطلعين من هالجو غيري نمط حياتك اشتركي بنادي رياضي او اي شي تسلين نفسك فيه اطلعي على المجتمع تمشي اطلعي لاتجلسين حاطه يدك على خدك بانتظار انه يمكن يحن ويرجعك خلاص حطي ببالك انه ماراح يرجع والمفروض تقنعين نفسك انه حتى لو رجع ماراح توافقين عليه انسيه وصدقيني الدنيا مليانه رجال يمعنى الكلمه اللي الواحد يبكي عليه ويجلس على ذكراه هذا الانسان الوفي الطاهر النقي الواضح الحنون السند على العموم اتمنى لك السعاده والتوفيق ولكن احسني الظن بالله وتأكدي ان الله ابعد طليقك عنك لانه فيه خير لك بعده وراح يعوضك ربي الله ينسيك الدنيا كلها عليك الحين تركزين على ولدك الله يصلحه ويخليه والنصيب ان شاءالله جاي ماتدرين يمكن هالايام القريبه توكلي على الله وماخاب من توكل عليه |
رد: مجرد فضفضه
اقتباس:
لي زميل له يمكن اكثر من سنتين وهو يدور على زوجه والى الحين ماحصل مع انه ماشاءالله ماناقصه شي مدري بس احس ان فيه غلط |
رد: مجرد فضفضه
اقتباس:
لأن فعلا هذي الحقيقه اللي انا مو راضيه اصدقها اشكرك على كلامك |
رد: مجرد فضفضه
اقتباس:
بس على الاقل الشاب فرصته اكثر من النت يقدر يتزوج بأي عمر موضوع العمر ما يخوف مثل ما هو مخيف بالنسبه للبنت انا عمري 27 وخايفه البنت توصل الثلاثين راحت عليها الشباب يبحثو عن الصغار اللي اقل من ثلاثين |
رد: أرغب بالزواج حتى أنسى طليقي
انا من رأيي بأن مستحيل في رجل يدور عشان يتزوج
ومو لاقي بنت الحلال طيب اذا صحيح اجل وين هالبنات اللي مالين البيوت؟!! ممكن إللي صعب يحصل تكون مواصفاته فوق حدود المعقول |
رد: أرغب بالزواج حتى أنسى طليقي
الله يوفقك
|
رد: مجرد فضفضه
اقتباس:
انا تركت بنات امهات 23 و24 وخطبت وحده عمرها 37 اختي كل واحد وله نظرته فيه اللي يبي صغار وفيه اللي يبي الكبيره الناضجه واعرف واحد عمره 43 تقريبا واخذ وحده عمرها 45 اتركي عنك اللي يقولك القطار يفوتك وهالكلام نصيبك راح تاخذيه هذا الاكيد |
رد: أرغب بالزواج حتى أنسى طليقي
اقتباس:
وبعدين طريقة الزواج يعني لازم الاهل يكون يعرفونها او بينهم قرابه طيب اذا الرجال مايبي من الاقارب مثلي كيف يعرف البيوت عندهم اللي تناسبه والا لا |
| الساعة الآن 07:42 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©