|
زوجي وفاتورة الجوال
السلام عليكم ...
ماعرف من وين ابتدي ... مشكلتي ممكن لها حل وانا مو عارفه اوصل للحل فأبغى مساعدتكم .. زوجي له يومين مايكلمني ولا حتى يرسل لي رساله ( نعم او لا) تخيلو ان سبب تافه الا وهو (فاتورة الجوال) ماخفي عليكم زوجي يشتغل بشركه وراتبه 5500 وجاينا عيد وزواج اخوي وضغط مادي ونهاية الشهر وأصدرت فاتورتي 400 وصار يعصب علي ويقولي كلام انتي غبيه وماتفهمين انا محدد لك 150 بالشهر نت ومكالمات ووووكلام الخ هذا من 3 ايام .. طيب اذا ماعندك لاتقول ذالكلام الي مال امه داعي قل ماعندي وخلاص ... هو كبر الموضوع وصار ينام برا البييت وزعلان مني واذا راسلته واتس يقولي انقلعي لاتكلميني ؟ الحين اهله اذا شافوني بيقولون وين زوجك ؟ وش اقولهم ؟ وابوه يحب يستقعد ويعرف مشاكلنا ويحب يساعد بس بعض احيان يوقف مع ولده حتى وهو غلطان طبيعي لاني بنت ناس مو واقف معي ضد ولده ... وغير كذا اليوم جمعتنامع اهله في مزرعتهم وبروح مع اهله..طيب وشدعوه كل هذا بس 400 خلاص ادفعها عنك قال عشان تعايريني فيها وسكتتت قلت له لو بعايرك كان منزمان عايررتك فواتير دفعتهم عنك وانت عارف ماحب اعاير احد قال ادري جاتني ايام انا الي اسدد فاتوره رغم اني ادرس وهذا نهاية سنه لي ... ابي افهم يستدعي ان يزعل ويطلع من للبيت وينام برا ؟ ملاحظه ( هو مايطلعني ولا نتمشى حتى ولده عمره 4 سنين يستغرب اذا راح مكان خايفه يكون انطوائي ... ومومدحاً لنفسي مااصرف ولاااخذ مصروف تعودت اذا احتجت شي اقوله ويعطيني وهو عارف يقولي انتي م تصرفين قد الي اصرفه انا ) اسفه عل الاطاله ابغى حل ؟ |
رد: زوجي وفاتورة الجوال
مرحباً أختي
سأقول رأيي والله أعلم طالما زوجك محدد لك مبلغ للجوال فالمفروض ماتتجاوزيه .. ولو حصل وتجاوزتيه حتى ولو بدون ما تنتبهي .. فعندما عاتبك زوجك وزعل .. الصحيح أن تكوني لينة معه .. مو تعتبري الموضوع تافه ولا كأنه هامك وتدخلي معاه في مهاترات .. أنا أدفع من جيبيي وتعايرني وأعايرك . لا يا أختي المفروض تكسبيه وتهدي الوضع وتقولي أنا آسفة وأوعدك ما عاد أكررها وخلاص خلي الجوال مفصول بس إلا زعلك وتحسسيه إنك خايفة على فلوسه بس ما تدري كيف طلعت الفاتورة كده . أما بالنسبة لزعله فأراه طبيعي لأنه أنقهر منك .. ويعتبر أنك ماتحافظي على الفلوس وأنك خسرتيه .. أما بالنسبة لخروجه من البيت فهو مبالغ فيه .. بس أعتقد أنه فيه شئ في نفسه تجاهك وجات هذه الزعلة فرصة للتنفيس عن الغيظ الذي في قلبه .. وربما تسأليني وتقولي أنا ما سويت له شئ وما أشوف إن فيه في نفسه شئ تجاهي .. فأقول لكِ من أحد الأمثلة : أنه ربما له فترة عن العلاقة معك أو هناك شئ لا يعجبه من تصرفاتك أو غير ذلك من الأمور .. وهذا ما يجعل شئ في نفسه جعله فرصة للتعبير عن زعله بالخروج .. والله أعلم عموماً المسألة بسيطة إن شاء الله .. وحاولي أن ترسلي له رسالة إعتذار عن الفاتورة وأنك لن تعيديها مرة أخرى وأنك إشتقتي له وخايفه عليه وترغبي بالتطمن عليه أعانك الله |
رد: زوجي وفاتورة الجوال
شكرا اخي الرسمي على ردك . هو فعلا انا تجاوزت الحدالمسموح بس مواول مره كذا يطلع من البيت اذا زعل طلع من البيت وظل كذاا ؟ وهو كويس معي وعارف انو ان الي عندي ضغط بين اوفق دراسه والحياتنا بس دائما هذا فعله اذا زعل طلع من البيت
الله يعين |
رد: زوجي وفاتورة الجوال
معليش مو اذا هو محدد لك نت ومكالمات يفصل الجوال عند الحد الإئتماني انا بصراحه مااعرف
وهل الباقة تبع ال150 فعلا تكفي وانتي زدتي عن الحد بانصالات او ماشابه لان اشوف كذا الشحن بيكون اوفر عليك اشحني بالشهر مع عرض نت وتوفري عن نفسك انتي لازم تعرفي الغلط من وين استخدامك او الباقات هذي غالية فعلا فدوري بديل ارخص لانه ممكن عدتي خالحركة اكثر من مرة وطفش من عدم إحساسك بالمسؤولية حاليا المفروض انك تحاولي تلطفي الجو معاه وتعالجي سبب المشكلة وهو ليش تطلع الفاتورة كذا مو انه خلاص بدفعها انا وتسكتيه ولما تتصالحوا تفاهمي معاه عن الخروج من المنزل وانك ماتقبلي انه يطلع برى البيت حتى لو تزاعلتوا او تخاصمتوا الهجر مايكون الا في اموور شديدة ومفروض محد منكم يطلع من الغرفة طالكا زعل عادي والله ييسر امرك |
رد: زوجي وفاتورة الجوال
استخدمي بطاقة سوا
وفيه خدمة ب 55 ريال لمدة شهر مكالمات مجانية اعتقد 600 دقيقة داخل STC وفيها نت مجاني اثنين جيجا أما المكالمات خارج STC بثمنها كالعادة يمكنك تحويل جوالك لسوا بتقتصدي بهالطريقة، أختي حولته بعد أن كانت فواتيرها تيجي عالية لو افترضنا انك استهلكتي هالاتصالات والنت خلال عشرة أيام، ثم شحنتي مرة أخرى، ثم مرة ثالثة في الشهر الواحد، فتكون جميع تكاليفك بالشهر 165 ريال المهم أقتصدي ترى راتب زوجك مو كثير والحياة ضغوطات ومتطلبات، وقفتك معه وتقديرك له بنفس طيبة وراضية ستنعكس ايجاباً عليك وعلى زوجك وعلى مستقبلك وعلى حياتك الزوجية بشكل عام. وفقكِ الله وأغناكم من واسع فضله. ربما يكون مفهوم زعل زوجك، لأنك كلفته فقط فاتورتك مايعادل 10% من راتبه، وهذا يعتبر شيء كبير. |
رد: زوجي وفاتورة الجوال
اولا .. فيه مليون برنامج وبرنامج يغنوونك عن المكالمات اللي بفلووس حمليها
ثانيا .. اذا دخل الفقر من باب خرج الحب من الشباك .. يعني لا تلومينه اذا عصب... مفتقر اكيد بيزعل ثالثا .. انا ضد ان المرأه ما تطلب اطلبي لو يقول لك لا. فقط حتىيعرف انك محتاجه ومتجمله لانه بيجي يووم ويغتني... ولاهووب ذاكر صبرك لو حب ينكر الا اذا كلن فيه خير. وانتي ابخص برجلك اطلبيه بس لا تسببين مشاكل |
| الساعة الآن 11:11 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©