|
ارجوكم ساعدوني
السلام عليكم ورحمه الله وبركاته
ارجو من اصحاب الخبره مساعدتي والنصح لي مشكلتي صارت قبل اسبوع وهي اني رحت مع اخوي لسوق علشان اغير ملابس ولدي وزوجي راح لاهله مع بنته وقلت له اذاخلصت من السوق ابي اروح لاهلك ولما خلصت وانا رايحه لهم دق على وقال ارجعي للبيت وقلت ليه قال بس ولما رجعت جاء وكان معصب ومعه بنته ولا تكلم وبنتي قالت ان جدتها تهاوشه مع ابوما وقالت له حرمتك وحرمتك وبعدين قال اسمعي كت مافيه بنطلون مافيه ونقاب مافيه قلت كل الي تبي موافقه عليه الا النقاب انا اغطيه ولا قد فتحته وبعدين لي خمس سنوات البسه ليه توك تتكلم قال علشان محد يعيرني فيك وقال اذا مانفذتي الي ابيه روحي بيت اهلك وتركته وكلمت اخته الكبيره وقالت احنا قلنا له اول شي شف حرمتك بعدين تكلم وقلت لها انا وش تخلني بينكم قالت علشان نوقفه عند حده يوقفونه عند حده ويخربون بيتي والله ماادري وش اسوي وتعبت من التفكير والى الحين ماكلم وبعدين مايوديني لسوق الا في السنه حسنه ويدرون اني رايحه مع اخوي يبونه يوديهم وانا المسوؤل عني مايوديني ارجوكم افيدوني |
ياليت احد يرد ولو بكلمه انالي اسبوع في بيت اهلي انصحوني وكم مره رحت للمستشفى وحطو على مغذي
|
اختي بحر الصمت
تبين الصراحه......المراة مالها الا زوجها....والمراة ماتخلي الناس يتشمتون بزوجها والسبب الزوجه انا انصحك ارجعي لزوجك واحفظي بنتك وبيت اهلك ونقابك ماراح ينفعونك بعدين وهذا زوجك واظن انه له حق الطاعة عليك انا اقول دقي عليه وكلميه وطيبي خاطرة واسمعي كلامه والله راح يرزقك ان شاء الله "عذرا منك..ولكن إن شاء الله تكتب هكذا وليس إنشاء..هنالك فرق كبير" مراقب عام ميما |
كلها امور تقدرين باذن اللة تستغنين عنها بس زوجك وعيالك هم الاهم
عشان كذا روحى وسوى اللى يبية وصدقينى شوى ويحس هو انة شاد عليك وفى نفس الوقت راح تكبرين فى عينة مررررررة بس وضحى لة ان كلامة اوامر بس عنادى هل المرة عشان الكلمة ما جات منه(مو كلمتك ) بس برضوا راح اسمعهاااااااا وهو بعده راح يتندم ويحس انة ضعيف وكلمتين تغيرة بس اهم شى زوجك |
طيعي زوجك خصوصا انه ما طلب منك أمر تعجزين انك تسويه...
لو قالك البس قفازات و شراب أسود وألبسي عبات راس وما تطلعين من البيت الا لبيت أهلك أو بيت أهلي... ومن بيت أهلك إلى البيت على طول وما تستخدمين تلفون.. وينسحب الجوال من عندك... ولا أحد يزورك.. ذاك الوقت إيش راح تسوين؟؟؟؟ الطلب اللي طلبه منك ماهو تعجيزي!!! إشتري راحتك وإرجعي لأبو عيالك... |
اشكر الجميع على ردودهم ..........ووين البقيه تراى ابي المشوره
q8 ........انت صادق الزوجه مالها الا بيتها بس لو انه تعامل معاي بطريقه ثانيه ماهو بس عناد ويسمع كلمتين وينفذ والنقاب لي فيه خمس سنولت وكنا متفقين عليه بنت بنت حواء......اختي انا يوم اخذا كان شخص عادي ولكن من سنتين التزم وصار كل شي عنده لا مافيه شي اسمه اقنعها والدين يسر مهو عسر وفيه اشياء كثيره استغنيت عنها بس كل شي مندون اقناع wisam.......انا في الاصل عباتي على الراس ولكن الحين يبدا في النقاب وبكره في الشراب والقفازات وبعدين انا ناعندي مانع بس بشوي شوي مهوب يكرهني بالدين وبعدين موضوع النقاب منتهين منه لنا خمس سنوات الله يجزاكم خير وعلى فكره لى خمس سنوات متزوجه وبيتي كبير وعندي طفلين ولا عندي خدامه ويقول ماتدخل الخدامه للبيت وانا حي انا احبه ولا اقدر استغني عنه بس فيه اشياء كثيره تخليني ازعل عليه والسوق مايوديني الا بالحسره والا مع اهلي طيب اذا هو ملتزم مايعرف انه مسوؤل عني وهو الملزوم انهيوديني ويجيبني ارجو من الجميع ان يعطيني رايه وشكرا |
الله يعينك وتعدي هالازمة
|
أرجعي له وراضيه ترا مالك الا هو واذا مو علشانه علشان اعياله ,,,
بس هم المفروض الاهل مايدخلون في مثل هاذي المسائل ,,, ويكون لغة الحوار هي المفروضه بين الزوج والزوجه ,, أنا بالنسبه لي ارفض اي تدخلات من هاذا النوع ولي حرية القرار ,, بعد التفاهم بالطيب والاقناع ,, واذا ماقتنعت ,,, هاذيك الساعه لي طرقي الاخرى ,, بالتوفيق ان شاء الله |
أختي الكريمة أهل زوجك لم يتدخلوا بينكم ولكن من الطبيعي أن تكوني أنت من ضمن حوارهم ولتكوني صادقة مع نفسك ضعي نفسك في مكانهم يأتي زوجك ويأمرهم بشئ وزوجته والتي يفترض أن تطيعه هي أولا ليست على ما يريده من أخواته
وبالنسبة لقولك الآخر عنهن أعتقد أن زوجك مسؤول عنهن كما هو مسؤول عنك فلا تكوني ظالمة أنت لديك زوج وأخوة وهن لديهن أخ فقط |
بسم الله الرحمن الرحيم والحمد لله رب العالمين والصلاة والسلام على المبعوث رحمة للعالمين الأخت الفاضلة : بحر الصمت السلام عليكم ورحمة الله جزاك الله خيرا لطرح هذه القضية وإن كانت سهلة لكنها تبين أن المشكلات تتكرر والتاريخ يعيد نفسه وأقول موضوعك شغلني كيف لم توفقِ للحل بسرعة و أحتاج لوقت لتوضيح بعض الأمور هل تصبري ؟ أولا : أنت مثل ابنتي المتزوجة من سنتين تقريبا و أنصحها ببعض الأمور المهمة والتي لا يمكن الاستغناء عنها وقد عرفت من خلال سؤالك أنك تنقصك هذه الأمور فإذا أردت التوسع وصبرت ذكرت لك بعض النصائح وإذا أردت الحل السريع فقد نصحك بعض الأحباب وأضيف نصيحة سريعة وهي شعرت من سؤالك أنك تحبين نشر السعادة وإرضاء الزوج ولم تتنازلِ عن أمر طلبه منك وهنا الخطأ لا بد أن تقدمي التنازل لتجاوز الأزمة ثم يمر الوقت وتتحسن الأمور وتعود السعادة ترفرف على البيوت وإذا أحببت التوسع في بعض الأمور فسابدأ معك فهل نفسك طويل لمعرفة هذه الأمور وهي: الأمر الأول لا بد من معرفة أن الحياة كلها مصاعب وفيها مشكلات وعقبات ، وهذه المشكلات لها فوائد هل للمشاكل فوائد ، نعم، للأمة وللأفراد فالشعوب التي تنشأ في ظل الاحتلال والمقاومة والبعد عن الترف ومتع الحياة الدنيا تراها صامدة في وجه الصعوبات، وتستطيع التغلب على المعوقات. أما أنت كزوجة قد تتخيلي الحياة دون عقبات فإذا أردت حياة هنيئة تماما فهذا حلم . وعلى مستوى الأفراد هل للمشكلات فوائد؟ نعم والمشاكل تجعل للحياة طعما وروعة خصوصا إذا خرج منها الإنسان منتصرا ، يشعر بالفخر وحل المشكلات تزيده قوة وصلابة . لا تخلو أسرة مهما كانت سعيدة من المشكلات ، وغالباً ما تتكرر نفس المشكلة عند الكثير من الأسر . فقد تحدث مشكلة في أسرة ما لكنها تنتهي بعد ساعات ويعود الصفاء إلى جو البيت ، وتحدث نفس المشكلة في أسرة أخرى فتستمر شهور ونتنتهي بالطلاق أو بحلول مأساوية ، نتساءل ما الأسباب قد تكون الفروق الفردية من مستوى التعليم أو الثقافة أو المستوى المادي أو الحب ، أو القدرة على مواجهة الصعاب . لكن هناك سببا رئيسياً يجعل بعض الناس عنده القدرة على مواجهة المشكلات والتغلب عليها ألا وهو قرب الشخص من الله فالاستقامة على دين الله تعطي الأنسان قوة يواجه بها جميع المشكلات وليس فقط المشاكل الزوجية فقراءة القرآن والمحافظة على الأذكار تبعد الشيطان الذي هو سبب أغلب المصائب إن لم يكن كلها . فليتفكر كل من لديه مشكلة مدى استقامته على دين الله وليبادر بالاستغفار والتوبة والطاعة والدعاء ، والمحافظة على الصلوات ، وزيادة جرعة الإيمان ، والتقرب إلى الله تعالى بسائر الطاعات ، والبعد عن المعاصي والله الموفق وشكرا. والله تعالى أعلم . كان هذا الأمر الأول هل أستمر أنتظر الجواب لذكر بقية الأمور وشكرا أخوكم المحب الناصح أبو همام |
| الساعة الآن 07:14 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©