|
ممكن هنوده المنتدى ..... تشتكي ..؟؟
لحظتها حسيت ودي اخفي وجهي بكومة رمل ماحد يشوفني .. اصرخ ماحد يسمعني ... وابكي ماحد يشفق علي ... اشوف هنا وهناك ادور وسيله .. ادور دور من مشهد محزن دراما جديده ... لكن برضو مافي وسط ماكنت اضحك بقوه حسيت ودي اصرخ بقوه ضحكتي الكل يسمعها لكن صرختي ابغاها يتيمه بس كيف ما ادري .؟؟ ياربي ساعدني .... قلبي ماعاد يقوى وين اروح وكأني ارمى انا بالعار ارمى .. بس ليه ؟؟ بس شلون ..؟؟! ماحد اعاتبه لكن اسأل شلون تصدمني هالكلمه ..؟؟ مو انا اللي اسافر .. وليه اتحمل ذنب انا ما ارتكبته !! بالغصب بالموت كتمت دموعي كبت صرخاتي وبس طلعت وركبت السيارة وشفت زوجي ياربي ... ليه انا اللي اتحمل ذنبك بين اهلي ..؟؟ يكلمني هند آسف تأخرت ... ارد وانا مخنوقه عادي ابشرك هاذي الكلمه من اختي اقوى ... شلون ما اسمعك لالا ولاشيئ ليه بالموت يطلع الكلام منك ..؟؟ يمكن من الاكل ايه اكيد مليتي بطنك يضحك وانا ابكي لاول مره احس ودي تروح لربعك من غير ما اقولك ليه .. ابغى اظل لحالي من غير كل البشر هذا كل ما كان وكل ماجرى على كلمه قالتها اختي لما كنت اضحك عليها واظهر عيوبها قالت ليه زوجك اربع وعشرين ساعه مقابلك هذا هو كل مابغى سافر وشاف من الحريم غيرك ... ادري ومعليه مليتو من احزاني لكن انتو اللي قلتو انكم بتحملوني مالي الا انتو بعد ربي .. وآآسفه اذا مليتو مني .. هند ... |
فضفضى يا هنوده واكتبى مابدا لك.. لا يردك الا الكيبورد.. اخوك انا معك.. :) |
اختى الكريمه : هند
اشكى واصرخى وتكلمى وفضضى براحتك لانك تشكين لاسرتك ونحن علينا سماعك والتخفيف عنك تحياتى |
بسم الله والحمدلله والصلاة والسلام على رسول الله اختي العزيزة هند نتحملك ونقرا ونشعر بك لا يهمك ولا يردك الا كيبوردك اعانك الله اختي واتمنى لك التوفيق في حياتك ولا بد من بعد الصبر الفرج باذن الله تعالى تحيتي القلبية لاختي العزيزة |
أفااااااااااااااا ياهنودة خلاص الحين انتِ من أصحاب العقول الكبيرة المفروض مايهزك مثل هذا الكلام
خليني احلل الموضوع معاكِ من البداية: أولاً : قلتي : كلمه قالتها اختي لما كنت اضحك عليها واظهر عيوبها ياأختي من دق الباب لقي الجواب مثل مايقولون وكما تدين تدان ......يعني أنتِ أغضبتي أختك بأسلوبك لذا هي تبغى تاخذ حقها منك لذا ..........ومرة ثانية لاتعايبين على أحد فمثل ماأنتِ زعلتي من كلامها أكيد هي زعلت من كلامك (عامل الناس بمثل ماتحب أن يعاملوك) الشيء الثاني وهو المهم في الموضوع: كلام أختك : قالت ليه زوجك اربع وعشرين ساعه مقابلك هذا هو كل مابغى سافر وشاف من الحريم غيرك ... والحمد لله ماحد مليء عينه من الحريم غيرك هنودة زوجك يحبك وبجنون والحمد لله بدأ يتغير كثير علشان خاطرك المفروض تفرحين أكثر وأكثر وماعليكِ من كلام الناس لإنك أنتِ الوحيدة إللى تعرفين مشاعره تجاهك أنا زوجي كثييييييير السفر لدرجة أن الحريم بعضهم إذا عرفوا انه مسافر يرمون عليّ كلام يقصدون إن زوجي لعوب أو شيء وأنا أتظاهر إني ماسمعت لأني عارفه زوجي ولله الحمد فليش ننكد على نفسنا بسبب كلام الغير لا تبينين لزوجك اللى صار ولا تخلين كل كلمة تسمعينها تأثر في نفسيتك نحو زوجك أنت أعرف الناس بمشاعره التي تملكينها أنتِ وحدك فأسعدي وأسعدي زوجك ومع الأيام سيترك كل مايغضبك حتى السفر مثل زوجي حالياً ولله الحمد. |
بسم الله الرحمن الرحيم
هند كيف لا نتحملك ؟ وكم انتى تحملتينا ؟ وشاركتينا وواسيتينا ومسحت دموعا وبكيت معنا وبكيتى علينا وكنتى معنا ولنا نعم الأخت هند قولى ما شئت ،،،،،،،،،، نحن اهلك وبك ومعك فضفضى اصرخى ابكى لكن لا تخرجى عن بيتك ولا عن حضن زوجك واسمعى كلام العقل كلام أختنا الكريمة أم جمانة فكلامها يكفى ويشفى سندعو لك الله ان يفرج عنك وانت قومى وصلى وتوسلى لله أن يزيح عنك همك وغمك سادعو لك فى صلاة الفجر إن شاء الله ربنا ييسر عليكى إن بعد العسر يسرا تحياتى سمير |
انا معك .... واخي الفاضل احمد شويبر واختي الغاليه تقوى الله شكرا لكم لاني لما بكيت كنت بحاجه بعد لمن يسمعني على الاقل ولما كتبت في منتداي القيم ارتحت قليلا ولما قرات ردودكم ارتحت اكثر جزاكم ربي جنات النعيم .. |
اختي الغاليه ام جمانه (أفااااااااااااااا ياهنودة خلاص الحين انتِ من أصحاب العقول الكبيرة المفروض مايهزك مثل هذا الكلام ) انا داريه ياعمري لكن انا مسغربه من نفسي ليه هالكلمه اخذتها بقلبي مو بعقلي ..؟؟ عادتا اعامل كل البشر بالعقل عشان ما احمل على احد .... (((أولاً : قلتي : كلمه قالتها اختي لما كنت اضحك عليها واظهر عيوبها ياأختي من دق الباب لقي الجواب مثل مايقولون وكما تدين تدان ......يعني أنتِ أغضبتي أختك بأسلوبك لذا هي تبغى تاخذ حقها منك لذا ..........ومرة ثانية لاتعايبين على أحد فمثل ماأنتِ زعلتي من كلامها أكيد هي زعلت من كلامك (عامل الناس بمثل ماتحب أن يعاملوك)))) تصدقين كنت متوقعه انتي تقولين لي هالكلام عامل الناس بمثل ما تحب ان يعاملوك انا ادري وبيني وبين خواتي كل شيئ عادي لو يرموني بكلام كبر الحصى وبقسوة صخر عادي وكم مره ومرات ما اهتم لاني انا كذلك بعد معهم وبالامس مثل كذا لكن تعدى حدود المزح ليدخل في نطاق الازواج ( زوج اختي مايسافر الا معها ) ووالله ما احسدها اصلا لما رجعت للشقه اقول الله لا يغير زوجها عليها وتذوق مر من يسافر زوجها بدونها ولا حتى حملت في خاطري عليها بشي بس اني مستغربه فعلا من نفسي ليه هالكلام مثل حجر تساقط علي ... برضو ما ادري ؟؟ (((الشيء الثاني وهو المهم في الموضوع: كلام أختك : قالت ليه زوجك اربع وعشرين ساعه مقابلك هذا هو كل مابغى سافر وشاف من الحريم غيرك ... والحمد لله ماحد مليء عينه من الحريم غيرك هنودة زوجك يحبك وبجنون والحمد لله بدأ يتغير كثير علشان خاطرك المفروض تفرحين أكثر وأكثر وماعليكِ من كلام الناس لإنك أنتِ الوحيدة إللى تعرفين مشاعره تجاهك)))) ممكن لاني في هالحظه جلست اقارن زوجي بزوجها وانا مو متعوده اقارن او لانها صدمتني وماعرفت ارد وحسيت الكلمه قويه علي مع اني اعرف قدر الحب اللي يحبني زوجي والحمد لله لكن احيانا الشيطان يسويه دور اعاذنا الله منه شكرا لك اختي ام جمانه ..... |
اخي الكريم منتي سمير شكرا شكرا لهذه الاطلاله اسعدتني وازاحت هم من قلبي شكرا للمشاركه وانا تعمدت اذكر هذا الموقف في المنتدى لاني داريه اذا ماقلته وفضفضت راح اقوله لزوجي ( وهنا بتصير الطامه الكبرى ) 00000000000000000000000 جزاكم ربي خير الجزاء اختكم هنوده .... |
والله يا هنوده ما اقدر ارد عليك ؟؟؟ لان طبعك فيه كثير من طبعي
فسامحيني يا حياتي والي تبين قولي وفضفضي والله ما ملينا منك لانك فعلا اخت غاليه |
| الساعة الآن 03:12 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©