|
لا أفهمه ...
السلام عليكم ورحمة الله وبركاته
انا فتاة ابلغ من العمر 24 سنه عقد قراني على رجل منذ 5 شهور زواجنا بعد شهر ان شاء الله والمشكله لحد الان مو عارفه شخصية زوجي مو عارفه كيف اتعامل معاه انا احسه انه شخص غريب الاطوار يعني مثلا جتني فتره وايد اتصل فيه كل فتره احيانا ما يرد عليه لما اقوله وينك ماترد عليه اقعد ازعل يقولي اكون مشغول مو شراتج بطاليه في البيت فصرت اقلل تلفوناتي له ما اتصل الا في يوم مره فقعد يعاتبني ما صرتي تتصليلي شرات قبل كل حزه حتى لو ما ارد عليج 0000يزعل بعد نحن ان شاء الله بعد الزواج نسكن بيت بروحنا لما كنت اساله عن البيت شو لون الغرفه شو اشتريت الاثاث يقولي ليش تسالين احسه يضايق وصرت ما اسئله بعدين هو يعاتبني يقولي ما اشوفج تسالين مو مااشوفج مهتمه بيتج يعني انا مافهمتله شو الي يعجبه شو الي ما يعجبه في بدايه الملجه قلتله احسن لو قرب الزواج هو ما وافق قال لا خليها في موعده بعدين هو قعد يقولي خل نقرب الزواج انا ما وافقت لين الحين يقولي خل نقرب نخليه في سبعه انه ندمان ما قربه من البدايه بس انا مو موافقه قلت خلها في موعده يقعد يعاتبني انتي عيبتنج حياة عزوبيه ما تبين نكون بيت واحد ويضايق معني ما اعترضت لما هو رفض في بدايه من غير احسه شخصيته مختلفه مع شخصيتي هو انسان جدي شويه انا مرحه لما اقعد اسولف معاه او امزح يقولي اكبري شويه او احسه طفران من سوالفي او احيانا يقولي شو تبين كلها سوالف انتي احيانا يسكت احسه مو مهتم عنبوا انا ما قلت شيء هم مو حلو واحد كله جد بس لو هو يسولف او يتكلم في اي موضوع لو هو ما يهمني انا احاول قد ما اقدر احسسه اني مهتمه يزعل لادني شيء يعني لما يتصل شوفني نايمه الصبح او سهرانه فليل او بقوله بطلع بروح مكان فلاني يزعل يضايق يبان من كلامه يقولي انتي متي بتعرفين انج الحين انسانه متزوجه مو عازبه يعني باجر مسوليه معني طلعاتي عشان الزهبه والعرس مو عشان اروح اتفسح دايما اقوله يوم بكون عندك لك الحق تضايق على طلعاتي ونومي مو الحين ما يعجبه كلامي ماعرف شو الغلط في كلامي يمكن هو يضايق انا مادري من غير لما يعصب يعق كلام يجرح واحد حتى احيانا تشاجرنا على سالفه قالي من قال اني احبج انا عصبت سكرت تلفون في ويه صح اني ندمت على هل الفعل بس والله من القهر في قلبي تم ما يكلمني ثلاث اسابيع لين اعتذرت بس هو هم غلط يوم نتشاجر يعق على كلام يعور سابقا كنت ادافع فيه عن نفسي بس بعدين حسيت اسلوبي ما يجيب الا المشاكل فصرت اسمع واسكت وانجرح من الداخل احيانا احس يبي يلغي شخصيتي نهائيا لما اقعد ادافع عن عمري ولا افهمه يقولي لا تتفلسفين لما اقوله انته شكلك تبي وحده تقولك هي ولا بدون اي مناقشه يقولي هي حتى اخواتي دايم يقوليلي ليش انتي جيء زوجج لاغي شخصيتج كل يوم يعايرني بالغير شفتي زوجت فلان شفتي زوجت علان حتى حسيت انه ما يبغيني كم مره عصبت قلتله ما تبغيني قول هذوا مهرك برجعلك ياها يرد يقولي لازم ما تقولين جيء لا تخلين شيطان يدخل بينا بس والله تصرفاته تجبرني اقول هل الكلام صح احيانا احسه انه في كلامه عقلانيه انسان رزين يكبر في عيني ساعات احسه يقول كلام غريب مره اتصلت قلتله وين كنت قالي في القهوه قلتله مع مين قالي مع بنات يضحك اقوله من جد تم يضحك يقول هي يقعد يضحك اتنفرفز هو ما يقولي بس اذا جبنا سيرت بنات يقولي هي كنت مع بنات لما اعصب يقولي بس حبيت اشوف ردج فعلج او اشوفج تغارين ولا لا والله تميت خايفه اقول صح يمكن جيء قصده بس ساعات اقول يمكن صدج مع بنات اقعد اقول لو كان مع بنات مستحيل بقول لزوجته انا مع بنات بس ماعرف ليش اقعد اشك اخاف انه مال بنات معني الصراحه ما شفت عليه شي بس الغريب من هذا كله لما ياتي لزيارتي البيت احسه انسان مخالف عن الي اكلمه في تلفون حتى احس مو زوجي الي كلمني في تلفون :rolleyes: يكون حنون ما يخلى كلمه حلوه ما يقولي ياها يسمعني يناقشيني بكل هدوء ياخذ يعطي وياي لما اقوله انته غير عن الي في تلفون يقولي عشان في بيتكم بس احترام للموجدين لما اقعد اعاتبه ماعنده غير هل الاسباب احسن عشان تفهمين الريال او يقولي لازم تعرفين شو مسوليه او يقول ليش لين الحين مافهمتي طبيعتي شلون يقول احسن اذا ما تفاهمنا الحين ما عمرنا بنتفاهم مشكله لما احيانا اكلمه احسه مضايق اقوله شو فيك احيكلي انا زوجتك يقولي لما نصير بيت واحد كيف بنفهم بعض هو ما يحكيلي عن همومه الي يقهر لما اقوله انته طيب يقولي لا انا شرير ماعمره مدح عمره جدامي كله يقول انا اناني انا عنيد انا عصبي حتى استغرب في واحد يخوف زوجته منه جيء والله مو عارفه كيف اتفاهم وياه ماعرفه الغلط فيني والا فيه انا والله يخفانه اقول نحن في الملجه جيء كيف بعدين يوم بنكون بيت واحد صدق خيافانه هل هذي مشاكل شيء طبيعي ولا غلط فينا كل ما نقترب يوم عن موعد العرس اخاف زياده هل هذا شيء طبيعي اتمني تفسرولي توضحولي والسموحه اني طولت بس حبيت اذكر مواقف اكثر عشان تفهمولي شو نوع من راييايل زوجي اخاف العيب فيني وانا مو حاسه ما اقول انه حياتي وياه كلها مر بالعكس فيه اوقات حلو للعلم فقط انا ما وافقت عليه الا بعد صلاة استخاره وافقت قلت اذا فيه الخير الله يسهل الامور معني ما صليتها الا مره وحده بعدين وافقت الله يوفق ;) الجميع |
سلام عليكم
ما ادري ليش حسيت من كلامج ،، انه ريلج يحب يغيظج ،،، وباين انسان صعب جدا ،،،متناقض نفس ما قلتي ،،، الله اعلم اذا بيتغير بعد ما بتعيشون في بيت واحد ولا بيزيد من تناقضه وعصبيته ،،، في بعض الناس اذا اتبعتي معهم اسلوب معين يتغيرون للاحسن ،،، وانتي بعدج ما اتخذتي اسلوب عشان تغيرين زوجج ،،، اتمنى من الخوات والاخوان يفيدونج ان شاء الله ،، لان ما عندي الخبرة الكافية ،،،وما اقدر انصحج بشي غير اني ابا اقولج لازم توقفين في ويهه ،، واتردين على اهاناته لج ،، اذا اهانج لا سمح الله ،، وذكرتي انه احيانا يعق كلام جارح وانتي صرتي تسكتين ،، لازم ما تسكتين ، حتى اذا اتضاربتو ،، حاولي اتقوليله بهدوء وبارق الكلمات ،، وباسلوب ناعم ،،، انه كلامه جرحج ،، واتفمينه ان لج شخصية ،،، وحسسيه بحبج ،، وامدحيه قدر ما تقدرين ،، والله يوفقج ان شاء الله ،،، |
اتركيه ودوريلك على حد ثاني هذا الانسان صعب وما بقدر حد وشو يعني اذا عمرك 24 ما راح تعنسي خلاص اتكلي على الله وسيبيه وروحي في طريقك
|
شكل خطيبك إنه من النوع الي يحب المزح الثقيــــــــــــــــل
بس ماأنصحك إنك تتركيه يمكن ينصلح حاله بعد إتمام ازواج الله يهديه |
مرحبا أختي
والله من الكلام اللي قلتيه يبين أن زوجك متناقض ;) ، لكن حبيت أخبرك أن مدة 5 شهور ومن خلال مكالمات هاتفية :27: لا يمكن الحكم على الرجل نهائيا، خصوصا إن في رجال واجد ما يقولوا الكلام اللي في بالهم، لكن يقولوا عكسه :25: ومن حيث الاخوان اللي نصحوك تتركيه فانا مو معاهم، بالعكس انصحك تتفاهمي مع زوجك وتصارحيه باللي يدور ببالك، وتسأليه عن السبب في التناقض في كلامه وإن شاء الله يبعد عنكم الشيطان ويكمل لكم بخير :14: |
اختي بحور الصمت اول شي الي بقولة الحين مجرد رأي شخصي فقط
شوفي انا ما اقدر احكم مين الي غلطان لان الوصف من طرف واحد في هذي الامور دايما يكون ناقص بس يعني اتوقع ان زوجك يحب انه يثقل احنا بيننا الشباب الي مرته ثرثارة لا تزعلي ما اقصدك ينصحون بالثقل لانه يخلي المشاعر مهتاجة على قولهم يعني يعيش مرته في عذاب عشان اذا لان تشوفه فيين وكذا يتحكم فيها او انه يكون شخصية في التلفون وشخصية اخرى لما راح تعيشين معه لاني اعرف واحد اسلوبة مع مرته نفس القصة بالزبط لانه يحب يتمهزء في التلفون كثير ويغيظ حرمته بس اذا لقها يتغير اسلوبة حتى مع الشباب كذا في التلفون حتى الواحد لو ماله خلق يستفزه ولين يعصبه ولما يلقاه يختلف نهائياُ لدرجة ان طبقة الصوت تختلف عن طبقة الصوت الي يكلمنا في بالتلفون وفي مرة قريت في مجلة عن انه ممكن يكون الانسان له شخصية في التلفون او الانترنت او المراسلة وفي الواقع شخصية ثانية وممكن هذا الشي يسبب له انفصام في الشخصية طبعاً في حالات انفصام كثير موجودة سببه الانترنت لانه الواحد يتقمص شخصية ويعيش فيها فترة طويلة يعيني تصل لست (6) ساعات او اكثر يومياً وبشكل مباشر لانه يتعامل مع الناس بهذي الشخصية فتصير موجودة في داخل كانه شخص اخر وهذا الشي يسبب انفصام والتلفلون نفس القصه المعلومه هذي اليوم قاريها :d خلينا نتفلسف |
من خلال الموضوع الذي قمتي بكتابته أجد أنك تحبين ذكر التفاصيل والغوص في دقائق الأمور والحياة الزوجية بحاجة لأن نتغاضى عن الزلات والهفوات
أنصحك بأن تصارحي زوجك بكل ما يدور في خاطرك خلال هذه الفترة بالذات وتذكرين بالضبط الأشياء التي تضايقك منه حتى تستقيم أموركم , ومن كلامك يبدو أن الزوج متناقض فعلاً ومزاجي ولكن هذا الشيء ليس نهاية العالم . |
اقتباس:
كلام جميل |
تحملي تتركين زوجك، انتي في نعمه وحافظي عليها، والله يسامح اللي خبروك ان لازم تنفصلين
واجهيه بالحقيقه وصارحيه لكن باسلوب حلو، مو بصراخ،اذا اهانك بيني له انكي مو راضيه على هالشيء علشان ما يعاودها مرة ثانيه ترى في شباب مثل زوجك، متناقضين بس والله يحبون زوجاتهم من قلبهم اللي اقدر انصحك ان لازم تسمعين كلامه، اذا سمعتي كلامه لانه زوجك مو لانه يبي يلغي شخصيتك، يعني سوي اللي يرضيه وتحسينه صح ويناسبك طبعا ابشرك مدام هو احسن ما يكون معاك لما يزورك يعني في امل انه يتغير للأفضل بالنسبه انه يكلم بنات ترى ما في صبي يقول حق بنت ترى كلمت بنات، هو يمزح ويبي يشوفك شان تغارين لا تهدمين حياتك وادعي لي بان يرزقني الله زوج صالح ومبروك مقدما |
اقتباس:
مشكوره اختي على النصيحه مشكلتي مش عارفه شو الاسلوب لازم اتخذه او الي ينفع وياه عشان استخدمه عشان جيء طلبت مشورتكم جزاك الله خير |
| الساعة الآن 08:40 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©