منتدى عالم الأسرة والمجتمع

دلوقت خلاص قمت بالدعوة والضيف قِبلها جه الدور على الوجبات وترتيب السفرة أما ترتيب السفرة فالموضوع ده هاكلمكم عنه دلوقت:

المفرش

http://www.boswtol.com/shababeek/ima...th/mafrash.jpg

أول شيء بيتم وضعه على السفرة هو المفرش وبالتالي فهو من الحاجات الأساسية ولازم تهتمي بيه جداً... إزاي؟؟

1. يجب تبديل مفارش السفرة غير النظيفة بأخرى نظيفة قبل العزومة.

2. لو كنت خايفة على السفرة من سخونة الأطباق أو ما شابه ذلك ممكن يتم وضع مفرش بلاستيك تحت المفرش الأساسي بشرط إنه ميبانش.

3. طول المفرش مش مفروض ينزل من على جوانب السفرة بأكثر من 30سم.

4. حاولي يكون لون المفرش ملائم لألوان غرفة السفرة ككل وكمان مع لون فوط السفرة.

الأطباق

http://www.boswtol.com/shababeek/images/11th/plates.jpg

بدأنا ندخل في الجد شوية خلّي بالك...

1.ممنوع منعاً باتاً وضع طبقين مسطحين فوق بعضهما البعض إلا لو كان الطبق اللي تحت موضوع كنوع من الزينة وفي الحالة دي يفضل أن يكون ذهبي أو فضي أو حتى صيني ولكن في حالة لو كان صيني يفضل أن يكون لونه مقارب للون مفرش السفرة.

2.طبعاً بما إننا في رمضان فكلنا بنهتم بطبق الشوربة وبنقدمها في كل عزومة.. وعلى فكرة فيه معلومة لا يعرفها الكثير منا وهي إن فيه نوعين من الأطباق للشوربة وده لإن فيه نوعين من الشوربة أولاً الشوربة الساخنة ودي بتوضع في طبق غويط على طبق مسطح. ثانياً الشوربة الباردة أو المركزة ودي بتتقدم في سلطانية صغيرة مش طبق وبيوضع تحتها برضة طبق بس صغير في حجم السلطانية.

3. على شمال الطبق الأساسي لفوق شوية بيتم وضع طبق للعيش.

الشوكة

http://www.boswtol.com/shababeek/images/11th/fork.jpg

في البداية لازم تعرفي إن فيه أربعة أنواع من الشوك:-
(موضحين من شمال الصورة إلى يمينها):

1. شوكة الكوكتيل: ودي بتستخدم في أكل فواكة البحر والمخللات والفاكهة.

2. شوكة السلطة: بتستخدم في تناول السلطة والفطائر والمعجنات.

3. شوكة السمك: من اسمها نفهم على طول إنها لأكل الأسماك بأنواعها.

4. شوكة العشاء: لتناول باقي الأصناف ماعدا السمك.

الملاعق
http://www.boswtol.com/shababeek/images/11th/spoons.jpg

برضه فيه أربعة أنواع من الملاعق:-
(موضحين من شمال الصورة إلى يمينها):

1.ملعقة الشوربة: تسخدم في شرب الشوربة سواء الباردة أو الساخنة ومع الصوص كمان.

2.ملعقة الحلو: لأكل الحلو والفاكهة.

3.ملعقة المشروبات: لأكل الحلو أو الآيس كريم من الأكواب الطويلة.

4.ملعقة الشاي: لتقليب الشاي والمشروبات الساخنة.

السكاكين

http://www.boswtol.com/shababeek/images/11th/knives.jpg

فيه أربعة أنواع من السكاكين:-
(موضحين من شمال الصورة إلى يمينها):

1. سكينة الإستيك: تستخدم لتقطيع اللحوم.

2. سكينة السمك: تستخدم للسمك.

3. سكينة الزبد: لتقطيع الزبد والجبنة.

4. سكينة العشاء: لتناول باقي الأصناف ماعدا السمك.

ازاي بيتم ترتيب الأدوات على السفرة

رغم إن ترتيب السفرة ليه قواعد ورغم إن القواعد دي سهلة للغاية ولكن بتأثر بشكل جامد على نجاح العزومة علشان كده خدي بالك كويس قوي من اللي جاي:

1. طرف السكاكين والملاعق والشوك مش مفروض يبعد عن طرف السفرة بأكثر من 2سم.

2. الترتيب بيتم من عند الطبق على اليمين بتكون السكاكين وبعدين الملاعق وعلى الشمال بتكون الشوك.

3. عند ترتيب الشوك أو الملاعق أو السكاكين بيتم وضع الأداة اللي بتستخدم في البداية في أقصى يمين الأدوات الأخرى يعني لو هنبدأ بالشربة بيتم وضع ملعقة الشوربة في أقصى يمين باقي الأدوات بحيث تكون الأقرب من متناول اليد.

4. الشوكة بتكون أسنانها متجهة لأسفل أو لأعلى... الوضعين مقبولين ونفس الكلام بالنسبة للملاعق.

5. بالنسبة للسكينة بيكون طرفها الحاد في اتجاه الطبق.

6. الأدوات الخاصة بالحلو بيتم ترتيبها أعلى الطبق بالترتيب الآتي: أعلى الطبق مباشرة السكينة وبعدين الشوكة وفي الآخر الملعقة وبيكون مقبض السكينة في اتجاه اليمين وبعدين مقبض الشوكة في اتجاه الشمال وفي النهاية مقبض الشوكة في اتجاه اليمين.

7. بالنسبة لترتيب الأكواب فبيكون أعلى الطبق في اتجاه اليمين وبما إننا في رمضان فعادة بيكون على السفرة كوبين واحد للمياه وده اللي بيكون قريب من الطبق وكوب للعصير وبتكون كوباية المياه أكبر من كوباية العصير

دلوقت احنا انتهينا من خطوات ترتيب السفرة والأدوات عليها بس طبعاً ده مش آخر المطاف أشوفكم المرة الجاية مع فن جديد اسمه "فن التوزيع"