ليش القساوه؟!! أرجو المساعده
 

السلام عليكم..

أنا من متابعي مواضيع عالم الحياة الزوجيه. وشفت كذا مره مشكله يطرحها أي شخص ومايقصر الكل في مساعدة طارح الموضوع. وأنا هنا علشان أكتب لكم مشكله عندي لعل الله يفرجها علي وأجد الحل.من الله ثم من مساعدتكم لي :(

أنا صارلي متزوج أكثر من 3 سنين. زوجتي خلوقه وطيبه وعاطفيه وكل شي فيها زين.

في بداية زواجنا ماكانت زوجتي تعبر عن حبها لي وتبينه لي بالشكل اللي أنا أبغاه . مادري ليش هل هو تخوف في بداية الحياة والا شي ثاني. هي تحسنت شوي بعد 3 أو 4 شهور من زواجنا وأنا كنت معطيها كل حب وهي معترفه بهالشي. بعد 9 شهور تقريبا من زواجنا حصل حمل .. وزوجتي ذاك الوقت ماوصلت للدرجه اللي أنا أبغاها من الحب. يعني حتى كلمت حبيبي أنا اللي عودتها شوي شوي انها تقولها بس تنسى أحيانا. وأقول لها أنا ابغى كل تعاملنا بالبيت على أساس الحب. وكل كلامنا بأسلوب حب. المهم يوم حملت مثل ماتعرفون يحصل لمعظم النساء الا وهو الوحام. كان وحامها شديد جداً بالفتره اللي كنت ابي اتطمن ان حياتنا استقرت على أساس الحب. لكن وحامها وقل معرفه منّي أنا بالأمور هذي جعل المشاكل تدخل في بيتنا. يعني أنا ماكنت ادري ان الوحام ممكن يخلي زوجتي ماتبتسم لي مثلاً اذا جيت تعبان من الدوام. وماكنت اعرف ان زوجتي ممكن تعصب علي ونفسيتها تتعب بسبب الوحام. فكانت ردت فعل خاطئه منّي عليها (وهذي أول غيمه سوداء :( )

فترة الحمل تغيرت علاقتنا ببعض. أنا ضغطت عليها لأني حسيت انها أصلاً تزوجتني وهي ماتحبني وهي أصلا مو بيدها. يعني وحام وأثر عليها. بهاذيك الفتره كانت تبين انها متعلقه بأهلها أكثر منّي. بمعنى انه أي موضوع يجي من أهلها تنبسط عليه. وأي موضوع منّي أنا يكون عادي عندها. المهم كنت أخطي عليها وقت ماتكون خارجه عن السيطره على نفسها بسبب الوحام بعدين اتأسف مع باقة ورد!

بعد الولاده والأربعين يوم اللي عاشتها عند أهلها حسيت بالغلطات وحسيت انه طووول فترة الحمل كنت ضاغط عليها. بعد هي مارجعت للبيت كانت حالتنا حلوه وعلاقتنا حلوه. بس بما ان حياتنا تغيرت وجتنا طفله والحمدلله حسيت ان زوجتي مهتمه بالبنت وأنا صدت عنّي شوي. انقهرت من الشي هذا لأني رجل غيووووووور جدا اجدا جدا وهذا اللي متعبني أكثر. والله حتى بنتي أغار منها لما زوجتي تمسكها وتبوسها. أحس انه مافي مكان لي في قلب زوجتي. جت ردت فعل مادري كيف اوصف لكم. صرت عصبي وتغيرت حالتي. زوجتي كانت تنتظر بس إني ارجع لحالتي الطبيعيه علشان تبدا تقدم لي حب مثل ما أبغى ولا أكرر غلطاتي (وخصوصا بعد ما أوعدها). لكن للأسف أغلط عليها كثير.

بنتي أحبها كثير كثير كثير .. والله لايحرمني لا من بنتي ولا من زوجتي. لكن كنت حاب ان زوجتي تعطيني حب وتطمنّي. المشكله انها هي كانت تنتظر اني ألين عليها وهذا شي منطقي وصحيح منها. بس مجرد ما تبرد الأمور شوي ونرجع حلوين بس فتره بسيطه ترجع حالتنا سيئه مره ثانيه بسبب أشياء تافهه أكتشف بالأخير اني انا الغلطان فيها. بس بعد ايش؟! بعد ماتنهار أعصاب زوجتي. :(

أنا مليت استغفرالله من نفسي ومليت من حالتي. أحس اني ماأقدر أسيطر على شي. وزوجتي متحمله المسكينه. مع انها انهارت اعصابها كذا مره بسبتي. وهي ملت من الوعود اللي أقول لها. لأني أوعدها ان امورنا تتصلح بس ما أدري الا بعد كم يوم ارجع لسوء التفاهم اللي تشتكي زوجتي منه وتنهار أعصاب زوجتي.

أبي اعوض كل شي لزوجتي. زوجتي حاليا جسد بدون روح. أنا السبب باللي حصل لزوجتي. ويعلم الله ان راسي شاب من كثر ما أفكر فيها وأفكر وشلون أعوض لها كل شي. بس أحس ان الأمور صعبه علي. ابي اصيح يمكن أرتاح بس ما أقدر. زوجتي صارت كئيبه. والغيوم السود صارت كثيره بالبيت. مافيه جو سعاده أبداً مع انه كل شي بيدي وبيد زوجتي. صارت زوجتي تمل من كلامي لها. صارت تكره اني أتقرب منها. صارت تكره حتى صوتي :(

زوجتي متحمله علشان عيون بنتي أكيد .. وأنا ماكنت أبغى الأمور توصل لهالدرجه. بس أحس اني ابغى مفاتيح للحياة السعيده تمحي كل شي صار بالماضي وتزيل الغيوم السود اللي في بيتنا.

أتمنى منكم المساعده وارجو انكم فهمتوا مشكلتي مع اني احس اني ماشرحتها زين. بس هذا اللي أقدر عليه.

زوجتي ظلمتها أشد الظلم .. وقسيت عليها .. وأنا تعبت من نفسي :(

اللهم افرجها علينا يارب العالمين

أختي سيدرا .. شكراً على اهتمامك وردك.
وأنا والله أشعر بالذنب واستغفرالله على كل شي سببته لزوجتي. شكرا على ردك ونقاطك الجميله وان شاءالله راح اعمل بها جاهداً.

أختي دهن العود.. مشكوره ايضاً على ردك وماقصرتي. بس أنا بقولك شي. أنا العب بنتي كثير وموسع صدري عليها وأصلاً أحس اني اضيف بالبيت جو حلو لما نلعب أنا وبنتي. حتى زوجتي كثير تضحك علينا أحيانا. بالنسبه لأهلها أو غير أهلها. أنا قلت لك انسان غيور وقلت لها الشي هذا. تقوم مثلاً تمدح أخوها بشي أنا مسوي نفس الشي هذا بس ماتمدحني. وهذا يغيضني أكثر.

بالنسبه للهديه أنا من محبي باقات الورد والهدايا لزوجتي .. بس بالفتره الأخيره مع كثرة المشاكل والأخطاء بعدين اشتري لها باقة ورد أو هديه صارت تكرهها منّي ..

البارح زادت الغيوم السوداء سواد .. كنت من كثر ما أفكر بالحاله منهد حيلي من يوم قمت .. بس مابينت شي .. وزوجتي قالت لي ليش ماتنام؟ .. قلت والله مافيني نوم .. كررت علي مرتين أو 3 مرات نفس السؤال قلت والله مافيني نوم .. بالأخير كنا طالعين واحنا راجعين للبيت حسيت اني مشتاق لجلسه معها .. وقلت لها تسوي شاهي علشان نجلس. بعد ماوصلنا البيت سوت الشاهي وكانت مسويه لشخص واحد. حطته عندي وراحت قالت بشتغل بالمطبخ .. مع اننا متفقين اننا نجلس مع بعض! أنا استغربت وزادت حالتي سوء .. فا قلت لها تعالي أنا أبغى الشاهي معك مو لحالي ... قالت مو مشتهيه وخصوصا انك مو رايق وصوتك مرتخي .. فقلت ليش صوتي ماعليك من صوتي .. أنا ابغى جلسه معك! ! (ماقلت لكم اني قاسي معها) .. فعلاً كلمتها بقساوه شوي .. هي انا متأكد انها تبي الرجل اللي يكلمها بطريقه جذابه .. بس مادري ليش انعدمت الأشياء هذي فيني وأنا والله أحبها .. طبعا هي صاحت ورحمتها وحاولت أتقرب واتأسف .. بس أحس انها مأيسه .. واذا قلت لها اللي في قلبي أنا احبك وأبغى حياتنا تتعدل تنقهر من كلمة أحبك ..

بالعربي صارت زوجتي تكره كلمة أحبك .. تكره الورد منّي .. تكره الهدايا منّي .. وكل هذا بسبب قساوتي عليها :(

اللهم افرجها يارب

شكراً أختي الهنوف ..

والله وصيتك حلوه .. وكلامك رائع .. بس أحس ان زوجتي ماتتقبل منّي أي شي .. وبالنسبه للبنت مافي حل الا انها تنام علشان اتفرغ للكلام والصراحه معها .. لأن مافي احد بالمدينه من أهلي أو أهلها ...

لكن مشكوره على كلامك .. وأنا لازم اتصلح من داخلي علشان زوجتي تلاحظ تغيير كبير فيني .. وأتمنى ان حالنا يتصلح. يارب :(

أختي الهنوف..

شكراً على حرصك وردك. أنا حالياً بالدوام وما أقدر أطلع. لكن ان شاءالله اذا طلعت بروح وأحاول أغير جو البيت. ادعوا لي :(

الأخ الكريم ارجو ان تقبل نصيحتي بصدر رحب

انا احس بانك تعني مشكلة في التحكم بمشاعر الغضب والحب اي انك تحب زوجتك كثيرا وفي نفس الوقت تغضب منها كثيرا لذا فاني انصحك باستشارة طبيب نفسي وصدقني لقد جربت ذلك شخصيا فانا تقريبا اعاني من حبي الشديد لزوجي وفي نفس لوقت العصبية الشديدة لكن بعد ان توجهت لطبيب تخلصت من قدر كبير من العصبية واصبحت قادره على تفهم الموقف في وقته وليس فيما بعد وهو مايحدث معي سابقا ويحدث لك الان وبذلك يزيد شعورك بالذنب مما يزيد من عصبيتك لو حدث موقف مشابهه لمعرفتك بما ستحس به لاحقا من تأنيب الضمير