منتدى عالم الأسرة والمجتمع

بيني وبينك.. شوية كلام هنقوله ليكِ ولجمالك... نحكي ونتكلم عن كل اللي يهمك.. في كلمة أو كلمتين...

أي سؤال محيرك إجابته هتلاقيها.. معلومة ووصفة بسيطة.. بس الحقيقة تأثيراتها أكيدة..

المهم خليكِ معانا وخلي بالك كل الكلام هيكون بيني وبينك..

نصائح جمالية

الصيام وقلة التركيز والوخم:

الصيام في رمضان مش معناه إننا نقعد في مكاننا ونقضيها نوم وفرجة على التليفزيون، بالعكس الصيام الصح فرصة كويسة جداً إنك تخلي جسمك صاحي وفايق، ازاي؟

1. أول حاجة ممكن تخليكِ تصحي الصبح بالعافية ومش شايفة قدامك هي طبعاً السهر قدام التليفزيون طول الليل، لأن طبعاً ساعتها بتنامي متأخر ومش بتلحقي تاخدي كفايتك من النوم، وخصوصاً وإنك بتصحي تاني علشان خاطر السحور. علشان كده لازم تنظمي نومك يعني تحاولي تنامي بدري على قد ما تقدري علشان تقدري تقومي تتسحري وفي نفس الوقت تاخدي كفايتك من النوم.

2. تاني حاجة هي إنك تاكلي كل حاجة في السحور وتملي بطنك على أمل إنك بالشكل ده مش هتجوعي تاني يوم، وطبعاً ده غلط وده لأنك كده بتوجهي مجهود الجسم إلى إنه يهضم كم الأكل الفظيع اللي كلتيه، وطبعاً ده بيسبب لك إرهاق وخمول. علشان كده من المهم إنك تاكلي حاجات بسيطة بس مغذية، ويكون فيها العناصر المهمة للجسم زي النشويات والبروتينات.

3. تالت حاجة برضه هي إنك تتقلي في الفطار مرة واحدة، وده لإنك بكده بترهقي المعدة بشكل جامد وبرضه ده ممكن يسبب لك تخمة وإرهاق، علشان كده لازم تبدئي في الفطار واحدة واحدة يعني تبدئي بإنك تشربي حاجة أو تاخدي تمرة مثلاً وتقومي تصلي المغرب وترجعي تاكلي...

4. رابع حاجة إنك ماتتحركيش من مكانك خوفاً من إنك تتعبي وبحجة إنك صايمة –ده قبل الفطار- أو إنك بتتفرجي على التليفزيون -ده بعد الفطار- علشان كده لازم تقومي بتمرينات رياضية وتتحركي علشان تنشطي الدورة الدموية.

وللرياضة كلام تاني

كل العلماء اللي في الدنيا أكدوا إن الصيام مش بيمنع الرياضة، بالعكس مادام الصائم صحته كويسه يعني مش بيعاني لا قدر الله من أي مرض من الأمراض يبقى ممكن جداً إنه يمارس الرياضة وبكفاءة كمان..

- أبسط رياضة ممكن تعمليها هي المشي، وبافضل إن ده يحصل بعد الفطار ولمدة بسيطة يعني نص ساعة مثلاً.. وطبعاً ده بيساعد على الهضم.. وتنشيط الدورة الدموية.

- لو مش هينفع تنزلي فالحركة في البيت ممكن تعوض الخروج للمشي، بس بشرط إنك تقومي بأي نشاط ولو حتى الطبيخ أو غسل المواعين بس المهم يكون جسمك مشدود وإنت بتتحركي.

- صلاة التراويح في حد ذاتها رياضة مهمة جداً، يعني غير إنها بتيجي في ميعاد مناسب بعد الفطار وبتساعد على الهضم، ده كمان أثبت العلماء إن الصلاة في العموم بتقلل من احتمال الإصابة بالتهاب المفاصل مع تقدم السن ده غير إن الحركات اللي بنقوم بيها في الصلاة بتساعد على شد عضلات الجسم، وخصوصاً عضلات الجذع والفخذين والظهر، وده بيساعد على شد الجسم وتقويته.

- أي تمرين بسيط مع تنظيم الأكل يعني تظبيط الفطار والسحور، ممكن ينفعك جداً لو كنتِ مليانة ونفسك تخسي.

وصفات المرة دي تمارين

دي شوية تمارين خفيفة ممكن تعمليها في وقت الصيام ومش هتحتاج مجهود جامد بس، ده مايمنعش إنك لو لا قدر الله حسيتِ بتعب ييبقى تتوقفي فوراً عن التمرين:

http://www.boswtol.com/shababeek/ima...h/kamar_05.gif

- اقعدي على الأرض وضهرك مفرود وابدئي برفع رجلك الشمال ببطء لأعلى وبعدين كرري الموضوع مع الرجل اليمين، والتمرين ده بيساعد على شد عضلات الضهر والبطن.

http://www.boswtol.com/shababeek/ima...h/kamar_01.gif
-نامي على جنبك الأيمن وارفعي رجللك ببطء لأعلى، وكرري نفس الشيء مع الجنب الشمال، والتمرين ده بيساعد على شد عضلات الجذع والضهر والبطن.

http://www.boswtol.com/shababeek/ima...h/kamar_03.gif

-اقفي فاردة ضهرك وابدئي في شد جسمك لأعلى وكأنك بتقفي على أطراف صوابعك وبترجعي تاني على الأرض.. وده بيساعد على شد جميع عضلات الجسم.

http://www.boswtol.com/shababeek/ima...h/kamar_04.gif
-نامي على ضهرك وضمي رجليكِ وابدئي في رفعهم على قد ما تقدري لغاية منطقة الصدر، والتمرين ده بيساعد على شد عضلات الضهر والبطن

http://www.boswtol.com/shababeek/ima...h/kamar_02.gif

اقفي وضهرك مفرود، وشدي ذراعيكِ لفوق وانزلي بيهم وهم مفرودين ناحية اليمين، وبعدين ارجعي مكانك، وبعدين انزلي ناحية الشمال والتمرين ده يساعد على شد عضلات الجذع والضهر والبطن.

http://www.moveed.com/data/media/1/allah.jpg