منتدى عالم الأسرة والمجتمع

وداعا للتشققات في رمضان

أنا عارفة إن فيه منكم أكيد هيقول على العنوان ده أهو كلام، وخصوصا في رمضان لأن الصيام طول اليوم بينتج عنه التشققات لأن اللي محتاج له الجسم لمعالجة التشققات دي هو المية فمنين هتكوني صايمة ومنين وداعا للتشققات..

بس عايزة أقول ليكِ إنك لازم تعرفي إن ده مش إعلان عن منتج جديد بنعلن عنه، لأ دي الجملة اللي هتقوليها بعد قراية الموضوع ده..

بس قبل ما تعرفي ازاي هتعالجي التشققات دي لازم نقولك هي ليه أصلا بتحصل وإيه أهم المناطق المعرضة للتشقق والجفاف.. ونبدأ بالشفايف.

تشقق الشفاه

http://www.boswtol.com/shababeek/ima...h/kamar_02.jpg

لازم تعرفي إن الشفاه مافيهاش غدد زيتية علشان كده بتجف وبتتشقق بمنتهى السهولة وخصوصا لما الجو بيبقى برد.

وبيزود كمان التشقق إنك كل شوية تطلعي لسانك وتلحسي بيه شفايفك.

يبقى الحل إنك تبعدي خالص عن لحس شفايفك وكمان تحاولي ترطبيها من وقت للتاني بزبدة كاكاو من ماركة كويسة، ولو خارجة في يوم برد قوي تحطي على شفايفك طبقة كثيفة من الفازلين اللي بيعمل زي العازل بالنسبة لشفايفك.

وتحاولي كمان تشربي كميات كتيرة من المية والعصاير من الفطار ولغاية السحور وخصوصا المية.

تشقق جلد اليدين

http://www.boswtol.com/shababeek/ima...h/kamar_03.jpg

فيه كمان ناس بيحصل ليها نوع من التشققات في إيديها وهي وإن كانت نسبتها قليلة لكن بتحصل، وده بيكون نتيجة برضه لعدم شرب المية وكمان نتيجة لبرودة الجو.

ده بالإضافة لاستخدام صابون أو كريمات من ماركات مش كويسة.

الحل بيكون إنك تبعدي شوية عن المية وعن كل حاجة زي غسيل المواعين والهدوم وكده يعني، ولو لازم تعملي الحاجات دي البسي جوانتي وده هتلاقيه في أي حتة وسعره رخيص جدا.

جفاف جلد الكوع

http://www.boswtol.com/shababeek/ima...h/kamar_04.jpg

وأغلب الناس مش البنات بس بتعاني من تشقق الكوعين وده بيكون عن طريق جفاف جلد الكوعين، وبتتكون حاجة زي قشرة سميكة عليهم، وكمان بتبقى خشنة وساعات لون الجلد نفسه بيتغير.

يبقى الحل برضه إنك ماتسنديش بكوعك على المكتب أو الديسك أو أي حاجة جامدة تحتك بالكوع.

تشقق الكعبين

http://www.boswtol.com/shababeek/ima...h/kamar_01.jpg

اغلب التشققات اللي بتظهر في الكعبين ناتجة عن الاحتكاك برضه زيها زي الكوعين بس الاحتكاك هنا بيكون مختلف، يعني المشي على السجاد والموكيت اللي بيؤدي إن الكعبين يفقدوا رطوبتهم فبينشفوا..

بس هتقولي لي الاحتكاك نبعد عنه ازاي؟ أنا بقى أقولك لازم تلبسي شرابات من خامة كويسة وماتمشيش حافية، ولما تيجي تعملي باديكير ماتستخدميش الموس لأنه بيزود من الجلد الخشن وكمان استعملي الكريمات المناسبة اللي بتحافظ على ليونة الجلد.

وصفات المرة دي

قبل ما أبدأ في الوصفات لازم أقول ليكم إن فيه حاجات عامة لازم تعمليها علشان تحمي جلدك من التشقق..

زي مثلا....

1. إنك تستخدمي زيت الأطفال والكريمات المرطبة بعد أخذ الحمام خصوصا لما يكون جسمك مبلول أو لسه مابقاش جاف خالص.

وبالطريقة دي جلدك هيحتفظ بالمية ومش هيجف بسرعة.

2. استخدمي المرطبات من الكريمات التي تحتوي على اللانولين وخصوصا للإيدين والكوعين.

3. لازم تشربي مية بكميات كبيرة جدا حوالي من 6 إلى 8 أكواب للحفاظ على رطوبة الجلد.

4. لازم مية الحمام تكون دافية ومش سخنة لأن المية السخنة بتساهم في جفاف البشرة.

وصفة لتشقق الشفاه
http://www.boswtol.com/shababeek/ima...h/kamar_05.jpg

1. حطي شوية فازلين على شفتك ودلكيها بفرشة أسنان قديمة، وماتقلقيش لأنها مش هتجرح شفتك لأن الفرشة القديمة هتكون ناعمة.

2. هاتي كبسولات فيتامينE من الصيدلية وفرغي محتويات الكبسولة على شفتك.

3. فيه كمان حاجة تعمليها قبل ما تنامي وهي إنك تدلكي شفتيك بزيت الزيتون أو السمسم والاتنين دول عند العطار.

وصفة لتشقق القدمين

http://www.boswtol.com/shababeek/ima...h/kamar_06.jpg

انقعي رجليكِ يوميا لمدة أسبوع في مية دافية محطوط عليها معلقة ملح صغيرة وبعدين تنشفيهم كويس قوي وتدهنيهم قبل النوم بالخلطة دي:

المقادير:
كميات متساوية من الجلسرين وعصير ليمون وزيت الخروع.

الطريقة
اخلطيهم ببعض كويس وادهني بيهم رجليكِ وبعدين البسي شراب والصبح اغسلي رجليكِ بمية دافية وصابون وحطي أي كريم عادي بعد كده، واستمري في العملية دي لغاية ما يروح التشقق خالص من رجليكِ.

وصفة لنعومة الكوعين وكمان الإيدين
http://www.boswtol.com/shababeek/ima...h/kamar_08.jpg

تدلكي كل يوم إيديكِ وكوعك بزيت اللانولين والجلسرين بعد ما تخلطيهم كويس قوي ولمنع استمرار تشقق الكوع دلكي المنطقة دي بالليمون يوميا.

http://www.moveed.com/data/media/1/allah.jpg