منتدى عالم الأسرة والمجتمع

بيني وبينك.. شوية كلام هنقوله ليكِ ولجمالك... نحكي ونتكلم عن كل اللي يهمك.. في كلمة أو كلمتين...

أي سؤال محيرك إجابته هتلاقيها.. معلومة ووصفة بسيطة.. بس الحقيقة تأثيراتها أكيدة..

المهم خليكِ معانا وخلي بالك كل الكلام هيكون بيني وبينك..

العناية بالأظافر في الصيام
http://www.boswtol.com/shababeek/ima...h/kamar_02.jpg
طبعاً في رمضان العزايم بتزيد وغسل الأطباق والطبيخ بيزيد.. وطبعاً ده بيأثر على جمال الأظافر، ده إلى جانب الصيام اللي برضه ليه تأثيره:

- اطبخي زي ما إنت عايزة واغسلي الصحون بمزاج بس المهم ماتنسيش تلبسي "قفاز جلد" وإنت بتعملي ده كله علشان تحمي أظافرك وإيديكِ عموماً من المواد الكيماوية الموجودة في المساحيق والسخونة اللي طالعة من البوتاجاز.

- اهتمي بقص أظافرك جداً واديها وقتها، يعني بلاش تقصيها وإنت مستعجلة علشان يطلع شكلها متساوي.

- قص الجلد اللي حوالين الأظافر عادة سيئة جداً وده لإنك كده بتدي فرصة لنمو الفطريات حواليها علشان كده من الأفضل إنك تحطي إيدك في حمام مياه ساخنة وبعدين تغسلي إيدك جامد بليفة خشنة.

- حاولي تهتمي زيادة بالكريمات المرطبة على الأظافر وخصوصاً قبل ما تنامي.. حطي الكريم ودلكي إيديكِ كويس وركزي على الأظافر نفسها والمنطقة اللي حواليها كمان.

- اهتمي جداً بتشيف إيديكِ بعد الوضوء وده علشان تحافظي على قوة الأظافر بعيداً عن التقصف.

- ولو عايزة أظافر قوية يبقى لازم تهتمي بالأغذية اللي فيها بروتينات زي البيض مثلاً وكمان اللي فيها معادن زي الكبدة.. ده غير الفيتامينات طبعاً المتوفرة في الخضار.

وصفات المرة دي
شوية وصفات بتساعد على تقوية الأظافر والعناية بيها، تعالي نشوف:

http://www.boswtol.com/shababeek/ima...h/kamar_03.jpg

1. كريم لتغذية اليدين والأظافر

المكونات:
- صفار بيضة واحدة.
- ملعقة صغيرة من زيت عباد الشمس.

الطريقة:اخلطي المكونات كويس لغاية ما يعملوا عجينة ودلكي بيها الإيدين والأظافر كويس، وبعدين أشطفيها بالمياه.

والخلطة دي بتساعد على تغذية بشرة اليدين والأظافر والحفاظ على رطوبتهم.

2. خلطة لتقوية وجمال الأظافر:

المكونات:
ثلاث ملاعق صغيرة زيت زيتون.
ثلاث ملاعق صغيرة من خل التفاح.
صفار بيضة واحدة.

الطريقة:
اخلطي المكونات وشيلي الخليط في زجاجة. واستخدميه بصفة متكررة ككريم للأظافر.

3. خلطة لتغذية الأظافر:

المكونات:
- صفار بيضة واحدة.
- 4 ملاعق صغيرة من ملح الطعام.
- 4 ملاعق صغيرة من زيت الخروع.
- ملعقة صغيرة من العسل الأبيض.

الطريقة:
اخلطي المكونات وشيلي الخليط في زجاجة واستخدميه بمعدل مرتين إلى ثلاث مرات أسبوعيا على الأقل ويفضل قبل النوم..
http://www.boswtol.com/shababeek/ima...h/kamar_01.jpg
ادهني أظافرك والجلد المحيط بيها بعصير الليمون وزيت الزيتون الصافي مرتين في اليوم لمدة عشرة أيام، مع مراعاة غسل الأيدي بعد مرور ساعتين من دهانها بالماء الفاتر.

بس كده.. اتكلمنا المرة دي عن ازاي تهتمي بأظافرك في رمضان..

أهم حاجة تهتمي كويس بالغذاء اللي بتتناوليه، يعني مش كفاية الوصفات، لازم تاكلي حاجات مفيدة وصحية تزيد من جمالك..
وكل سنة وإنت طيبة..