|
نفسيتي متعـَبة
السلام عليكم و رحمة الله و بركاته شرحت لكم من قبل نظرة أهلي بتأخير عقد القران و ذلك حتى لا يكون هناك لنا أي فرصة أني أكلم خطيبي أو أن يزورني ، لا أعرف لماذا و ما هي وجهة نظر أهلي و لكني أعتقد بأن المسألة كلها غيرة علي من خطيبي !!!!!!!!!!!!!!!!!! علما بأن أهلي كان عادي عندهم ، يعني على أيام أمي و أبوي كانوا كل يوم يتكلمون في التلفون >>> بعد الملكة طبعا و كان ابوي يزور أمي و يجيب لها الهدايا و يقعدون مع بعض و حتى اخوي لما ملك كان يزور زوجته و يكلمها .. بس لما صار على دوري صار حرام و عقدو الموضوع كثييييييير كأني أول وحدة في العالم تتزوج أنا أحس بنقص و أحس و كأن أهلي مو واثقين فيني و ما يبغون لي الوناسة يعني كبروا و نسوا كيف كانت مشاعرهم أيام الملكة و المشكلة الكبيرة هي أني ما أقدر أعبر عن شعوري لأني أستحي أفتح هالموضوع ، بس كل يوم أقعد أبكي لوحدي و محد يدري عني .. كتبت لأمي رسالة عبرت لها عن حزني و شرحت لها وجهة نظري ، كل اللي سوته أنها ساهمت في تمديد فترة الملكة إلى شهر فقط ، مع منع الزيارات بشكل كامل .. ما اعرف ليش أهلي مو مهتمين فيني ، المفروض أنا ألقى حد يتكلم عني و يدافع عني ، بس كل اللي اشوفه بأنهم يشددون أكثر و أكثر و أنا مو متخيلة بأنه باقي أقل من ثلاثة شهور على عرسي و أنا إلى اليوم ما اعرف الشخص اللي راح يتزوجني !!!!!!!!!!!!!!!!!!!!! ساعدوني كيف أحل مشكلتي و أريح نفسي .. أنفال |
الله يتمم لك الزواج على خير و يسعدك يارب
شيلي وساوس الشيطان من راسك كلها كم يوم وتكونين عند صاحب النصيب و قدامكم العمر كله الله يسعدكم ويتمم لكم على خير اذا انحرمنا من شي مو معناه نهايه العالم و انك ناقصك شي بالعكس فكري بالايجابيات و اتركي اي شي يعكر صفو الايام الجايه |
آمين
أختي أم أثير لو كان فيها ايجابيات ما كانوا سعوا لأن يلتقون على ايامهم قبل أكثر من 25 سنة و ليش الولد عادي و لما جاء على دوري صار حرام ؟؟؟؟ أختي صدقيني قهر و ظلم لما تشوفين جيلهم و هم قدامى يجترون ذكريات أيام الملكة و أنا اللي صارت الناس متفتحة على ايامي انحرم منها .. أختي أم أثير .. أمي و أبي على خلاف كبير .. و والدي يجدنا وسيلة لإيذاء والدتي و والدتي تحاول ارضاء والدي بتقبل هذا الأذى لنا و مشاركته على أمل أن تحصل على رضاه و هيهات .. أنا فقط ضحية لمشاكلهم لكن موضوعي هذا أبدا مو قادرة افهمه !!!!!! |
انت مو ضحيه ولا شي
تخيلي نفسك ما مخطوبه و ما حتتزوجي و تشوفي مشاكل الوالد و الوالده و ياذيكم الوالد من اجل اذيه الوالده كيف كانت حياتك حبيبتي المنتدى مليان بقصص الاخوات الي يطلبون العفه و الزواج حبيبتي احمدي الله انه جائك زوج صالح و سيتم زفافك بعد كم شهر و غيرك محروم حبيبتي ناس كثير بين ملكتهم و زواجهم اسبوعين و يا دوب يشوفها على قد اصابع اليد الواحده ناس ثانين ينخطبو على الصوره و يروحو لبلد الزوج ويزوجو هناك لاملكه ولا شي اتعوذي بالله من الشيطان بعدين الله يهديلكم الوالد و الوالده كل هالالم و همه يذكرو ايام الملكه لعد لو ماكان في ايام ملكه يذكروها الله يصلح احوالهم ويسعدهم اللهم امين |
نعم انا اقول أحيانا بأني راح افتك من هالمشاكل
لكن محد يدري عن الجاي هل هو أفضل و الا أسوأ بس أنا متفائلة جدا و أتوقع بأني راح أكون سعيدة .. لكن ليش أقارن نفسي بناس ملكو و بعد اسبوعين تزوجوا و ناس ما شافوا بعض .. ليش ما تكون المقارنة مع حد قريب و هم أقرب لي من الغريب .. على فكرة ترى امي و ابوي كانوا من اسعد ما يكون بس لما تزوج والدي الثانية عملت له سحر و انتي ادرى بالسحر اللي يعملونه ليفرقوا به بين المرء و زوجه لذلك كان لهم ذكريات جميلة في بداية زواجهم يعني مو كل حياتهم كانت قحط ، بس على حظنا نحن ما لحقنا إلا على سنوات القحط .. الله يعوظنا خير من اللي راح .. و يهدي والداي و يصلح احوالهم |
اخواني
اعطوني حل الله يبارك فيكم |
حاولي ولاتيأسين ، واستخدمي جميع أساليبك ..
وإذا شفتي مافي أمل ، حاولي معهم على الأقل قبل شهر من الزواج .. أو قولي : مكالمة وحدة بس ، عشان أرتاح .. بصراحة أنا معك في أهمية التواصل قبل الزواج وبعد العقد .. لكن لاإفراط ولاتفريط .. وفقك الله وحقق مبتغاك.. |
أختي زرقة البحر
كيف أحاول جزاك الله خير أنا كتبت رسالة و حسيت بأن ماء وجهي نشف .. للمعلومية بأنها رضت أن تتقدم الملكة شهر قبل الزواج لكنها رافضة بأن استقبله في البيت .. و أفكر أحطهم أمام الأمر الواقع و أستقبله من دون رضاهم خصوصا و أن والدي نادر الوجود في البيت يعني ما بيلاحظ و أمي بقنعها بعدين أنا مو حابة هالأسلوب لأنه بيطلعني جريئة جدا و هذا مو من طبعي لكن قسوة أهلي و ظلمهم هي اللي تخليني أطلع من طوري و أخاف اسوي هالحركة انفضح عند كل الناس لأن أمي من النوع اللي تثق في خالاتي جدا و تعطيهم اخباري و كل زلاتي .. و بكرة يجون يعايروني في هذا الموضوع .. و هذا من تجربه أنا ما أتبلى على أمي ودي أكلم أخوي لأني أثق بأنه ما راح يفضحني على أساس يتكلم من دون ما يجيب سيرتي بأن هذي رغبتي ، بس أستحي ما اعرف كيف أفاتحه ... اللي مضايقني في الموضوع بأن أهلي ناسين تماما بأن لي نفس حالي من حالهم ، و ناسين أيضا بأني أستحي أطالب بهذي الأمور و غافلين عن تلميحاتي و عن عيوني المتورمة من كثر الصياح لازم اكسر حاجز الحياء حتى يفهمون ، و إذا كسرت هالحاجز بيقولون شوفو اللي ما تستحي ،، و حلات البنت بحياءها يعني يحطوني وسط الماء ويقولون لي إياك إياك أن تبتلي !!! |
خلاص قررت أكلم أمي بعد العيد
و يقولون اللي يقولونه خلاص ما عاد يهمني أحد أطلع جريئة أطلع بطيخة المهم نفسيتي ما تتدهور زيادة و خلاص ما في مجاملات بعد اليوم |
انفال
كيف علاقتك مع اخوكي؟ اذا كانت علاقه كويسه حاولي تقنعيه ...تعرفي كيف؟ خوفيه،، قوليله انه فترة الملكه فرصه عشان تتعرفي عالشخص الي قدامك ممكن تلاحظي فيه عيوب وبيكون وقتها في خط رجعه سهل لكن لو اكتشفتي العيوب بعد الزواج رح يكون خلاص طاح الفاس بالراس..حزنيه ،،قوليله كيف اهون عليك تدخلني على واحد ماعمري حكيت معه ولا قعدت معاه والمطلوب مني في ذيك الليله البي كل طلبات الزوج اللي انا اساسا ما عرفه.. هو بيتفهمك اكيد لانه مر بنفس تجربتك ورح يتخيل لو انه انحرم من انه يكلم زوجته او يشوفها..اذا اقتنع هو رح يكلم امك وصدقيني الاخوان الذكور دايما لهم كلمه مسموعه عند الام والاب.. اذا ما كان اخوك متفهم عاد الشكوى لله مالك الا تحاول مع امك اقنعيها مبدئيا انه تشوفيه عالاقل مرتين بالشهر اليتيم حق ملكتك والمكالمات التلفونيه تكون مسموح بيها على طول وحاولي معاها باللين اصحك تعصبي ولا تهددي او تعملي شي من وراهم او غصب عنهم لانه مو حلوه بحقك قدام زوجك لما يشوفك كسرتي كلام اهلك واتحديتيهم ولما تجي تكلمي امك حاولي معاها بنفس اسلوب اخوكي اللي قلتلك فوق عنه ... الله يسهل امرك وطمنينا بعدين:) |
| الساعة الآن 11:00 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©