|
خطيبي عصبي ولا أعرف كيف أتعامل معه :(
السلام عليكم ....
خطيبي عصبي وايد وانا ماعرف اشلون أتعامل معاه وعنده مبدأ (الرجال كلمته ماشيه) ولما أقوله لا تسوي جذي وسو جذي يقولي انا رجال !! لا تمشين كلمتج علي بس بنفس الوقت ياخذ رايي ويشاورني بوايد شغلات قبل لا يسويها بحياته اليوميه بس مادري سالفة انا رجال باطه جبدي ... وزيادة على هذا عصبي لأبعد الحدوود ويقول أسلوبج ينرفزني بس يمكن صح أسلوبي ينرفزه .. والله جماعة الخير أحبه وودي أكلمه بالطريقه الي اهو يبيها أو انه ما يعصب ويصرخ .. تخيلووو ساعات يصرخ من كثر العصبية وعلى أسباب تافهه .. بس فهموني اشلون أتعامل معاه واشلون أكلمه أبيه هادي وراضي عني ما ودي أضايقه وأخليه بهالحاله انا مادري انا غلطانه ولا لا أنا طبعي أبيه معاي طول الوفت بس اهوا يقول اذا تزوجنا ما راح اخليج بس الحين قدري ... أتمنى تساعدوني ..... |
عزيزتي b6o6a قد يكون خطيبك يمر بضغوط انتي لا تعلمين عنها لذلك تجدينه عصبي ويتنرفز وانا ما اعرف كيفية اسلوبك في الكلام معه عشان احكم اذا صح او لا ,,, اذا عصب اساليه وش اللي مضايقه وبهدوء وبكلمتين حلوه والله ليكون معاك مثل الطفل ويحكيلك عن اللي فيه ,,, واذا اخذ رايك بشي وشاورك لا تعارضينه او تحاولين ان رايك اللي يمشي لا سايريه لكن اذا كان لك وجهة نظر صحيحه وتبغين توصلينها اثناء حديثكم قوليله انا معاك ومعاك حق لكن ياحبيبي ياعمري يابعد كل هالدنيا .............. وقوليه رايك شوفي كيف راح يقتنع بدون عصبيه وبدون ما يتنرفز ويايدك على رايك ,,,,,,, اثناء المكالمه امزحي معه حاولي انه ما تنتهي مكالمتك معاه الا وهو يضحك قوليله انك ما ترتاحين الا اذا سمعتيه يضحك وراضي عنك والله ليحطك على راسه ويقدرك بشكل ما تتخيلينه ... وراح تلاقين الاستجابه منه وراح تشوفين اتصالاته تزيد وشوقه لك يزيد ....
اقول اذا ما نفع هالاسلوب مافي الا هذا الاسلوب >>>>>>>>> :29: امزح معك حبيبتي تعوذي من ابليس وتاكدي ان الشيطان حريص انه يخرب فلا تخلينه يتغلب عليك .... اسال الله لك وله التوفيق ,,, والله يسعدكم ويهنيكم ببعض ولا يفرقكم عن بعض .. |
هلا وسهلا حبيبتى .. الف مبرووووك عليكى الملكه وعقبال ربي يكملها عليكم بالسعاده والهنا ويجمعكم ربي ببيت واحد وتتهنو مع بعض وتعيشو أحلى حياة يارب ... حبيبتى اولأ اتعلمى كيف تمصي غضبو" صح ماعندى تجارب لأنى لسه مانى مخطوبه " بس عيونى عارفا شو لمن يعصب عليكى لاتتكلمي ولا تردى علي اسكتى وأسمعى وانسي شي اسمو كراااااااااامه لأن مافي كرامه بين الزوجين اوكى وصدقينى راح يهدأ ولمن يهدأ راح يراجع نفسو ويشوف حالو ان غلطان وبكدا راح تكبري في عينو .. وحاجة تانيه عيونى اعرفي ان مارح يعصب على زوجتو حبيبتو غير لمن يكون مضااايق اعرفي سبب ضيقو هل بسب ضغووط في العمل ام لاقدر الله ديون ام مشاكل مع مدير الشغل ومن ها الكلام فأنتى راح يجى دورك لمى وانتى ساكته ولاتتكلمى بس أشعري انك قريبه منه وانصحك بقرائة موضوع أمكم [ CODE]http://www.66n.com/forums/showthread.php?t=69241[/CODE] , واعذريني على الاطاله حبيبتى أختكم بتول |
مشكورين خواتي ان شاء الله راح أحاول أسوي الي قلتوه ...
بس الرابط الي حطيتيه ما يتبطل يا بتول:) |
وبالنسبة لأسلوبي معاه اذا بغيت شي أبيه يصير بنفس الوقت ولا أزعل عليه !!
واذا كنا متفقين على موعد معين مثلا الساعه 7 دق قالي 8 أتنرفززززززززززززززززززززززززززز وأنقهررررررررررررررررررررررر مو اعرف أتحكم بأعصابي ... يعني باختصاااااار أنا أبيه بس حقي وما يتأخر علي :( ولما يعصب انا أتكلم ببرود (مو متعمده) واهوا يزيد .... ودي أغير طبعي لاني ماني متعوده على جذي كله اهلي يلبونلي طلباتي وتعودت كلشي جاهز واهوا الي كلاها |
اختى العزيزة لو عرفنا فترة الخطوبة لها كم من الزمن , وكذلك هل العصبية الفيه خطيبك من اول يوم فى الخطوبة والله لاحظتيها ظهرت عليه قريب ؟ ممكن اعضاء المنتدى يفيدوكى اكثر .
ولكى تحياتى ابوعمار |
لا اهوا قبل كان هادي وايد وانا كنت أستحي منه بس لما صار فتره وقمت اخذ واعطي معاه واقوله أبي ومابي وأزعل وأعصب اهني بدت العصبية .... صارلنا سنة وزيادة واهوا يدرس ولما يخلص دراسته هالسنه ان شاء الله اخر سنه له نتزوج..
|
خطيبك نفس زوجي شراره واحيانا اقوله شغله عاديه كلش يقولي نرفزتيني او اسئله سؤال يقولي يؤالك غبي وينرفز ويظل باقي اليوم كله معصب ومتنرفز
اختي انا خذيت دوره في امتصاص الغضب وايضا اخي اشترالي كتاب اسمه (كيف تحولين الزوج الغاضب الى محب عاشق) والله فادني كثيرا وحتى الدوره فادتني انصحك بقراءة الكتاب والمحاضر في الدوره كان يقولنا (عين العقل ان تتغافلي) لانك اذا انتي حساسه واهو عصبي ماراح تنتهي مشاكلكم خليه يعصب وتعالي بعد دقيقه كلميه كنه ماصار شي وهو راح يرد لطبيعته اقرئي الكتاب واذا عندكم دورات في ديرتكم حضريها لانها مفيده جدا جدا |
إي والله كلامج صحيح اهوا لما يعصب يقووولي خلااااااااااااااااص انا راح اظل متضايق طوول اليوم وانتي خربتي اليوم وسويتيه خايس وانا كنت مستانس :( ولما بتأسف منه يقول لا تكلميني الحين لاني ما راح أرد عليج عدل وراح أقول كلام ما يعجبج كلميني وقت ثاني .... صح الحساسية الي فينا اهيا أساس المشكله بس هم ودي اهوا يراعي هالشي .... الله كرييييم
|
اختي كانك تتكلمين عن زوجي :)
شوفي .. كل مايقولك خلاص انا تنرفزت وانتي خربتي الطلعه ومن هالكلام ردي عليه بحزم وبقوه .. قوليله (شوف انتا مو ياهل ولازم تسوي كنترول على اعصابك ولو كل مشكله صغيره وسخيفه وتافهه مثل هذي بنوقف عندها ترى حياتنا ماراح تمشي ولا راح نستمر مع بعض .. كبر عقلك ولاتوقف على اشياء سخيفه ولا تخرب علينا احلا ايام عمرنا)) راح يخاف لان راح يحس ان صج ماعنده سالفه لما عصب انا دايمن ارد عليه هكذا فا يرضى بعد فتره قصيره لان راح يفكر بكلامك ويحس ان ماعنده سالفه الله يوفقكم :) |
| الساعة الآن 04:38 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©