منتدى عالم الأسرة والمجتمع - ملف كامل عن البشرة(5)

http://www.almorattal.net/images/basmla.gif

http://bh2day.com/uploader/pic1/slam.gif

واليك مواضيعى السابقة لمن تريد الاطلاع عليها

(ملف كامل عن البشرة1)
(ملف كامل عن البشرة 2)
(ملف كامل عن البشرة3)
(ملف كامل عن البشرة4)

مين فينا مابتحلمش إنها تكون زي القمر دايما.. ولو سألت بنت إيه أول مشاكل هتقول لك الاسمرار وتغير لون البشرة والبقع الداكنة اللي بتظهر في الوش، أما عن أهم المشاكل فهي بلا منازع.. الهالات السوداء..

وطبعا شركات التجميل ما بتصدق وتبدأ تشتغل الإعلانات وتزن على دماغ البنات عن الكريمات والصابون والبادي لوشن اللي مالهمش مثيل واللي هيخلوا لونك زي التلج في كام أسبوع..

وانطلاقا من إيمانى بكل ما هو طبيعي فانا المرة دي واللي بعدها هقدم لكم حل المشاكل دي كلها بطريقة طبيعية جدا جدا..

لمعلوماتك

لازم تعرفي إن لون البشرة تمام زي بصمة الإيدين بالظبط يعني بيختلف من واحدة للتانية..

http://www.boswtol.com/shababeek/ima...h/kamar_03.jpg

يعني فيه ناس هتفضل بشرتهم دايما سمراء وناس هتفضل بشرتهم دايما بيضاء.. واللونين حلوين ولو مش مصدقاني روحي اتفرجي على الأجانب في شرم الشيخ والغردقة اللي هيموتوا علشان بقى لونهم قمحي أو برونزي زي المصريين.. ولو مش مصدقاني استرجعي المقولة اللي بتقول السمار نص الجمال..

طيب لو مافيش فايدة يبقى إيه هدفنا من العدد ده؟
هدفنا من العدد ده إننا نساعدك ترجعي للونك الطبيعي اللي فقدتيه في المصيف أو بسبب التعرض اليومي للشمس أو لو كنتِ محجبة فأكيد هتلاقي اختلاف بين لون البشرة قبل وبعد الإيشارب.

طيب يعني الوصفات الطبيعية دي بتاخد قد إيه، وهل ممكن استعمالها مع كريمات التفتيح؟
لازم تعرفي إن الطرق الطبيعية دي بتاخد وقت طويل عن المستحضرات التانية علشان كده لازم تصبري علشان النتيجة تبقى كويسة.

http://www.boswtol.com/shababeek/ima...h/kamar_02.jpg

اوعي تلجئي لكريمات التفتيح لأنها ببساطة بتحتوي على مادة الزئبق اللي بتدمر خلايا "الميلانين" اللي هي خلايا الصبغة الموجودة في الجسم، وتدميرها ده بيؤدي لحاجات جامدة جدا بدءا من الأمراض الجلدية وانتهاء بالمرض الوحش.. بعد الشر عليكم كلكم.

والمفاجأة اللي إنت ماتعرفيهاش بقى إن الكريمات دي بتوقف إنتاج الميلانين.. في بداية استخدام ‏ ‏الكريم يظهر لك إن البشرة اتفتحت فعلا لكن ‏لما البشرة بتتعرض لأشعة الشمس بيكون المفعول عكسي، فبيؤدي لزيادة الاسمرار وبالتالي ‏بتحطي الكريم تاني، ولما يخلص تشتريه.. ماسألتيش نفسك قبل كده لو الكريمات دي بتفتح فعلا من أول مرة الناس اللي بتستعملها مابتوقفهاش ليه؟

يعني خطوات التبييض دي كتير؟
هي الخطوات اللي انا مقدمهالك المرة دي كتير شوية علشان عايزكى توصلي للنتيجة بأحسن وأسرع شكل ممكن. ده بالإضافة إلى إنى عايزة ألملك الموضوع كله.

تقشير البشرة

ممكن أي واحدة فيكم تسألني إنتِ بتقول تقشير هو احنا هنفتح ولا هنقشر..

علشان توصلوا لتفتيح ناجح لازم قبلها يبقى فيه تقشير لخلايا الجسم الميتة والدهون والأتربة اللي موجودة على البشرة اللي بتخلي الجلد غامق ومالوش لون واحد.. وفيه كذا طريقة لتقشير البشرة وما عليكِ يا ستي إلا اختيار الطريقة اللي تناسبك.

صابونة التقشير والتفتيح

http://www.boswtol.com/shababeek/ima...h/kamar_05.jpg
الصابونة دي بتستخدم لغرضين؛ التقشير والتفتيح.. يعني هتضربي عصفورين بحجر واحد.

المقادير:

حزمة بقدونس.
ماء ورد.
نشا.
حليب بودرة كامل الدسم.
صابونة غار أو صابونة زيت زيتون (أو أي صابونة طبيعية ودول كلهم هتلاقيهم عند العطار).
ليف طبيعي (من عند العطار برضه).

الطريقة:

لكل نصف حزمة بقدونس حطي 2 فنجان قهوة ماء ورد والبقدونس حطيه كله بالعروق لأن الفايدة في الأوراق والعروق مش في الأوراق بس.. اخلطيهم في الخلاط ولو شايفة إنها مش بتتخلط كويس حطي شوية مية، بس صبيها شوية شوية لغاية ما تطرى، وبعدين تحطي الخلطة دي في حلة أو وعاء على النار، وبعدين تحطي نص معلقة النشا ونص معلقة لبن البودرة، وابشري الصابون والحلة على النار مع التقليب المستمر لغاية ما يدوب الصابون خالص.. هاتي بقى قوالب التلج اللي في الفريزر (فاضيين طبعا) وصبي فيهم الخليط وسيب شوية من الخليط في الحلة وسيبي قالبين فاضيين.. هاتي بقى الليف وقطعيه حتت صغيرة وحطيها على بقية الخليط اللي في الحلة واغرفيهم بالمعلقة في القالبين الفاضيين.

سيبيهم ساعة أو أكتر في الفريزر لغاية لما تلاقيهم جمدوا.. طلعيهم من القوالب وشيليهم للاستعمال واغسلي جسمك ووجهك كل يوم بالصابونة، وقبل كل وصفة ومع كل خلطة اديناهالك في الحلقات السابقة من ملفنا، أما بقى القالبين اللي حطيتِ عليهم الليف فاستعمليهم كمقشر لجسمك مع المية مرة في الأسبوع.

طريقة استخدام الصابون:

بلي جسمك بالمية واغسليه بالصابونة دي بطريقة دائرية بخفة لمدة 10 دقايق وبعدين اغسليه بالمية..

طيب لو الصابونة يعني مارضيتش تجمد أرميها؟

هاتي الصابون اللي عملتيه وسيحيه على النار وابشري عليه صابون الغار وارفعيه من النار وجمديه في القوالب تاني.. عموما لازم تعرفي إن رغوة الصابونة دي قليلة ومش كتير..

التقشير بزيت الزيتون

http://www.boswtol.com/shababeek/ima...h/kamar_06.jpg

المقادير:

فنجان قهوة زيت زيتون.
عصير نص ليمونة.
ملعقة كبيرة ملح.
نص فنجان سكر خشن (سكر عادي مش بودرة يعني).

الطريقة:

افركي جسمك بالمقادير السابقة 10 دقايق من أسفل لأعلى باتجاه دائري وبرفق، واغسلي جسمك بالصابونة اللي عملناها قبل كده واشطفي جسمك بالمية الدافية وبعدها مية باردة.

ماسك التقشير

والماسك ده بيستخدم لتقشير الجسم وإزالة الجلد الميت والتخلص من الخطوط البيضاء والدوالي كمان.. يعني بتاع كله..

المقادير:

http://www.boswtol.com/shababeek/ima...h/kamar_07.jpg

عصير نص ليمونة.
معلقتين زيت زيتون.
3 معالق زيت لوز.
معلقتين زبادي.

الطريقة:

اخلطي المكونات دي كلها وحطيها على المناطق اللي عاوزة تقشريها، ولو عاوزة ممكن تحطيها على الجسم كله بكميات أكتر مع المحافظة على نفس النسب.. حطيها على الجسم كله أو المناطق اللي عاوزة تقشيرها وبس لمدة ساعة أو ساعتين أو طول الليل، وبعدين افركي الجسم لغاية ما يطلع الجلد الميت على شكل خيوط رمادية.

ملاحظة:
لو الخلطة دي نشفت على جسمك قوي ومارضيتش تتقشر اخلطي نفس المقادير وحطيها مرة أخرى 15 دقيقة وافركيها.

الحمام المغربي

والحمام المغربي ده من أحسن الوسائل لتقشير وتنعيم البشرة وتخليصها من الأوساخ والأتربة والدهون العالقة بيها وانا جبت ليكم المرة دي وبقدمه ليكم وتفاصيله كلها هقول لكم عليها..

http://www.boswtol.com/shababeek/ima...h/kamar_09.jpg
الاسم: "الحمام المغربي"
الجنسية: "مغربي"
العمر: "لم يستدل عليه لأنه من زمان قوي بس تاريخه في مصر مش من بعيد، وازدادت شهرته في الآونة الأخيرة لسبب مجهول".

الفوايد

بعد الفحص والتمحيص طلع فعلاً فيه فوايد للحمام المغربي وأهم الفوايد دي:

1. تنظيف البشرة عن طريق إزالة الخلايا الميتة وخلافه.
2. بيساعد على فتح مسام البشرة وإزالة الخلايا الميتة وبالتالي بتتخلص من الحبوب والدهون فبتصبح البشرة في منتهى النعومة والرقة.
3. قد يساعد على تفتيح البشرة في حالة تكرار القيام به.

نصايح بتتقال قبل الحمام

1. ممنوع تقومي بالحمام وإنتِ جعانة أو صايمة، وده لأن الجسم بيفقد سوائل كتير بسبب البخار والحرارة العالية وبالتالي؛ علشان لا قدر الله ممكن تصابي بالهبوط لازم تاكلي قبل الحمام ولو حتى حاجة بسيطة.

2. ماتنسيش نفسك في الحمام والتزمي بالمدة المحددة لكل خطوة؛ لأن وجودك في البخار فترة طويلة ممكن يؤدي لا قدر الله للاختناق.. علشان كده بلاش تنسي نفسك ولو حسيتِ في أي لحظة إنك دايخة أو مخنوقة افتحي أي منفذ هوا بسرعة وبلاش تجني على نفسك لأن حياتك أهم من الحمام المغربي.

الطريقة

فيه طريقتين للحمام المغربي والاتنين ليهم نتايج مُرضية:

الطريقة رقم (1)

http://www.boswtol.com/shababeek/ima...h/kamar_08.jpg
المطلوب:
1. ماء ساخن جداً.
2. صابون للجسم (اللي عملناه قبل كده).
3. ليفة مغربي خشنة ودي برضه هتلاقيها عند العطار.
4. إسفنجة ناعمة، ممكن تلاقيها في الصيدلية أو السوبر ماركت وبرضه عند العطار.

الخطوات:
1. اقفلي أي منفذ للهواء في الحمام يعني تقفلي الباب والشباك وحتى الشفاط.
2. افتحي المية السخنة في البانيو على الآخر لغاية ما يبقى فيه بخار جامد في الحمام وبعدين سدي البانيو واملي نصه من المية السخنة.
3. جيبي طبق وامليه مية سخنة جداً وحطي فيه اللوفة الخشنة.
4. المطلوب في هذه المرحلة إنك تعرضي جسمك لأكبر قدر ممكن من البخار وده مش هيحتاج وقت أكتر من 5 دقائق بس.
5. بعد ما جسمك ياخد الكمية المحترمة من البخار تبدئي تحطي الصابون المغربي على جسمك ووجهك بس طبعاً تبعديه عن عينيكِ خالص.. المهم ازاي تحطي الصابون..؟ تجيبي الصابون وتبدئي تفركيه على جسمك.. تفركيه بس من غير دعك، يعني بالراحة.. بلاش تاخدك الحماسة قوي أحسن تحصل لك التهابات.
6. سيبي الصابون على جسمك حوالي 10 دقائق.
7. اشطفي جسمك بالمية السخنة وبعدين حطي كمية تانية من الصابون بنفس الطريقة السابقة وسيبيه برضه لمدة 10 دقائق.
8. ممكن تستفيدي بالفترة دي في إنك تنضفي الكعبين بالحجر الحفاف (موجود عند العطار).
9. بعد ما تعدي الـ10 دقائق اشطفي جسمك من الصابون برضه بمية سخنة.
10. امسكي اللوفة الخشنة وابدئي في دعك جسمك (من غير الوجه) بشكل دائري وهتكتشفي المفاجأة وهي إن الخلايا الميتة في الجسم بتتشال بمنتهى السهولة.
11. بالنسبة لتنضيف الوجه بتستخدمي الإسفنجة الناعمة وده عن طريق مسح البشرة بحركة دائرية من غير الدعك أو الضغط عليها لأن الضغط على البشرة بيؤدي لظهور التجاعيد بدري.
12. دلوقتي بقى اشطفي جسمك كويس بالمية، واغسلي شعرك طبعاً، بس أهم حاجة ممنوع منعاً باتاً استخدام أي نوع من العطور أو مستحضرات التجميل اللي فيها عناصر كيمياوية، ولكن يفضل إنك تستخدمي الزيوت والمستحضرات الطبيعية وأحسن حاجة واللي أنصحك بيها هي زيت اللوز وده لأنه بيفتح البشرة ويلمعها، وممكن كمان إنك تضيفي ماء الورد للمية اللي بتشطفي جسمك بيها.

الطريقة رقم (2)

في الطريقة دي بتقومي بنفس خطوات الطريقة الأولى باستخدام نفس الطلبات وكل حاجة، بس الفرق الوحيد هو إنك لما تيجي تشطفي جسمك آخر مرة خالص تشطفيه بمية باردة جداً، يعني بتستخدمي مية سخنة جداً طول الحمام، وفي الآخر تستخدمي مية باردة جداً والحكمة من كده هو إن المية السخنة والبخار بيساعدوا على فتح مسام البشرة والمية الباردة بتساعد على غلق المسام دي..

بس أنا مش بافضّل الطريقة دي، وده لأن الجسم الطبيعي بيكون تعب من البخار والمية السخنة، وبالتالي هيكون صعب على أي واحد إنه يستحمل المية الباردة دي، بس طبعاً ده رأيي الشخصي وكل واحد ومقدرته..

ده بقى بمنتهى البساطة الحمام المغربي.. أظن الموضوع سهل جداً وممكن يتعمل في البيت من غير تكاليف كتيرة ومشوار رايح ومشوار جاي، ولو عندك أي سؤال أو استفسار انا كالعادة في الخدمة ومنتظرة اسمع منك تجربتك مع الحمام المغربي..

دي كل حاجة عن التقشير واستنوى العدد الجاي علشان اكلمكم عن التفتيح خطوة خطوة..

http://www.mamarocks.com/trluv4.gif