مشكلتي محتاجة دعواتكم الصادقة معاي بأن الله يفك كربتي
 

اخواني واخواتي اعضاء المنتدى .

محتاجة مساعدتكم بأدعية تفك ازمتي ومصيبتي ويا ليت اللي يقرا موضوعي يدعيلي .

فأنا بعد اقل من ثلاث اسابيع من زواجي عدت لبيت اهلي بعد ان اكتشفت بأن زوجي لا يهمه إلا السهر والخروج وكل ما كلمته يقول كان يقول بأنه كان يعيش هكذا وليس مستعد ان يتغير وانا علي الاحتمال، تخيلوا خلال اليوم أراه اقل من ساعة اتكلم معه فيها وباقي الوقت وراء اسهمه واعماله التجارية كما يقول لي ثم سهره لما بعد الثانية فجرا وانا قاعده اترياه في البيت من ثالث يوم وهو على هذه الحالة .

حتى زواجه مني كان بسبب المال هولا يهتم سوى بالمال فقط وهو بخيل جدا لأقصى درجة متوقعة حتى عشاء اول ليلة كان من كافتيريا ساندويجات ، وثاني يوم لم يطلب الغذاء لي متعللا بشبعه والعشاء كان في كافتيريا في مركز لا يقدم سوى ساندويجات ، ومن اول ساعة ونحن في السيارة يقول لي بأنه لا يوجد لديه المال ويسألني عن راتبي وفي اليوم الثاني كل شوي ويقول لي انا ما عندي فلوس ببيع سيارتي كررها اكثر من عشر مرات وانا متأكدة انه يقول جيه عشان اعرض عليه اشتريله سيارة وانا مطنشة الموضوع واقوله ما عليه عندنا السيارة الصغيرة بتكفينا وعلى الساعة عشر طلب مني اشتريله سيارة ب 300.000 ويقولي بس يوم قلتله انا ما عندي ربع المبلغ قالي لا انا امزح بس مع اني متأكدة انه مب مزح هذا وانا ما كملت معاه 24 ساعة

وبعدين لا صرف على البيت ولا شيء وكل اكلي ييبونه اهله لي ويوم طلبت يجهزلي المطبخ ما رضى وفي يوم كلموه اهله على ما اعتقد لان جا من عند اهله قالي قومي بنشتري وياج اغراض البيت استانست طبعا وبعد ما جهزت قالي بس تراج انت بتدفعي انا ما عندي فلوس اعتبريهم سلف قلتله مب مشكله انا وانت ما في فرق بينا بس بعد ما اشتريت الأغراض تفاجأت انه يتكلم عن ربيعه ويقولي تصدقين وايد مرتاح مرته تصرف عليه وعلى البيت وهو مرتاح لا وشاريتله سيارة قلتله هذا مب ريال ولا كيف يخلي مرته تصرف عليه الانسانه تساعد زوجها يوم يكون محتاج بس انها تصرف عليه لا والمفروض هو ما يقبل بجيه . وبعدين صار يتعمد يتكلم مع ربعه جدامي واسمعه يقولهم شفتوا فلان مرته اشترتله سيارة طبعا تعرفوا المقصود بهذا .

لم اصارحه بأني متأكدة انه ماخذني عشان فلوس ولا يعرف احد من اهلي بهذه المشكلة الكل يعرف بأني تركته بسبب سهره عدم اهتمامه بي ولكن الجميع لم يعرف باقي المشكلة والجزء المهم منها .

هذا وهو ما طلعني برع البيت محبوسة فيه ، ما عنده وقت يطلعني على قولته ،حتى علاقة زوجية ما كانت بينا يعني طول الثلاث اسابيع يمكن اقل من اربع مرات ولا حياة مثل المتزوجين يعني اخوان عايشين في البيت اساسا انا ما كنت اشوفه إلا نادرا .

المهم يوم طلبت منه اطلع حسيت عمري مخنوقة من البيت اترجاه يطلعني يقولي انا مشغول ، تخانقت معاه ورحت ولملمت اغراضي وهو طلع، يوم رجع الفجر شافني مجمعة اغراضي وطلبت منه يوصلني بيت اهلي ، وخبرت اهله بسالفة اني ما قادرة اتحمل طلعاته وما قادرة اتحمل هذي العيشة .

المهم وصلني البيت بعدين اتصل يعتذر كلمته عادي ، بعدها رجعت واتصلت فيه وقالي انه مشغول .
ومن يومها ما اتصل ولا سأل والي اسمعه من بعض الناس اللي توسطوا انه يبا يطلقني المشكلة انه صارلي ست شهور على هذه الحالة ومن يومين مكلمني رجال مدخل في الموضوع وقالي بيطلق وهو من اول ما تركني عند اهلي وهو يقول بيطلق وانا قاعدة اتريا بس شكله خلاص بيطلق وانا على ما اعتقد انه قاعد يتريا صندوق الزواج.

هذه قصتي بدون التفاصيل الأخرى التي حدثت .
قلت يمكن يستفيد منها اعضاء المنتدى
والغلطة الكبيرة عندنا ممنوع الوحدة تكلم زوجها قبل الزواج حتى في الملجة فأنا نصيحتي للكل اذا حد عنده هذا التقليد لازم تصر على حقها في مكالمة زوجها أكيد في اشياء وايد بتكتشفها ، وانا متأكدة اني لو كنت كلمته من قبل كنت اكتشفت كل شيء ترى انا في اول 24 ساعة اكتشفت كل شيء عن زوجي بس الله أراد هذا الشيء يمكن ابتلاء منه سبحانه وتعالى و اختبارلي على صبري .

اتمنى من الجميع يدعيلي ويكتبلي دعاء يفك كربتي .والي تذكر مصيبتي في صلاته يدعيلي بأن الله يفكها عني

وشكرا يمكن طولت عليكم بس قلت اقولكم مشكلتي.

اختي العزيزه ربي يفرج همك ويعوضك بكل الخير
باذن الله راح ندعي لك
ولا تحزني

أختي أبغض الحلال إلى الله الطلاق،،
ولكنه في بعض الاحيان يكون الحل الوحيد!!!
أرجو أن تستخدمي موانع الحمل حتى تتضح لك الصورة مع هذا الزوج ،



أسأل الله أن يفرج عنك كربتك.

اختي الكريمة اسأل الله ان يفرّج همـّكِ ويكشف غمـّكِ.
لو طلقكِ فلا تأسفي عليه ابدا ، اعذريني اختي على صراحتي ولكنني لست اجد فيما كتبته عنه اي صفة من صفات الرجولة ، المرأة تعشق زوجها ان وجدته يتصف بصفات الرجولة والاصالة والشهامة فأين هو منها ؟ انتِ اكتشفتِ معدنه مبكرا وهو يعلم انكِ كشفتِ اوراقه وانكِ ذكية لا يستطيع التلاعب معكِ لذلك قرر الطلاق .

اختي نحن كبشر لا نعلم اين هو الخير لذلك نلجأ بالدعاء الى الله العلي القدير ان يختار لنا الخير في كل امر قدّره لنا .

اختى الكريمه

لا يسعنى غير ان ادعوا الله العلى القدير بان يفرج همك وحزنك وما الم بك

ولا تحزنى اختى واكثرى من الاستغفار والدعاء لله تعالى فهو حسبك ونعم الوكيل

أسأل الله أن يفرج عنك كربتك

صادق دعائي اليكي اختي
ان الله يفرج عنك كربتك
وينولك مبتغاك

ولاتحزني على مافات لاانه مقدر ومكتوب .

الله يفرج كربتك ويعوضك خيرا منه .

مرحبا أختى


أنا بصراااااااااحه بموت من القهر ......؟؟؟؟ بعد يتريا صندوق الزواااااااج .....؟؟؟؟ حبيبتي السالف بطول لو يلس يتريا الصندوق أبوي بتمر سنين وهو يتريا ...............؟؟؟ لا تربطين الموضوع بصندوق الزواااج خلي أهلك يتدخلون بسرعه و خبريهم على الحقيقه عن كل شي أحسن لك علشان لا يرمسون عليك عقب و يقولون ليش طلبت الطلاق؟؟؟ علشان يفهمون ليش الوحده لازم تشوف الريال و ترمس معاه ايام الملكه..................

عافان الله بخل هالكثر ...........................؟؟؟؟

حسبي الله عليه عينه على الراتب....؟؟؟



الله يفرج همك باسرع وقت

أضن لو تعطيه فلوووووووووووس بيطلق على طووووووووووووول



أختك همسات الامارات