|
مهر بنتـــــــــه ريـــال ..!
أقرأوا معي هذي القصة ..
تقدم ( سعود ) لخطبة ( ريم) .. هي رفضت في البداية بحجة إنها ودها تكمل دراستها ، لكن أمها وأبوها أقنعوها في الأخير ، لأن الولد أخلاق وإنسان مستقيم ووظيفتة محترمة ، ومن عائلة كبيرة والكل يمدح فيه ويتمناه لبنته... المهم جاء وشافوا بعض الشوفة الشرعية ، وأخذوا موعد من أبو ريم علشان يجي مع أبوه ، ويتفاهمون على باقي الأمور الروتينية... .. جاء الموعد المحدد .. وحضر سعود مع أبوه وأثنين من أعمامه ، ... ومعهم المهر ... قام أبو ريم وفتح علبة المهر ، وطبعا" كلها من فئة الـ (500ريال) ، طلب منهم ريال واحد فقط .. إستغربوا ..؟؟!! أعطوه الريال ، أخذه .. وقال هذا مهر بنتي .. رجّع الباقي إحنا نشتري رجّال...!!! عجز (سعود) وأهله يقنعون أبو ريم ، فاستسلموا واخذوا فلوسهم ومشوا ، مرت الأيام وقرب موعد الزواج ، وابو ريم عوض ريم المبلغ اللي رجعه وزيادة ، وجهزها أحسن جهاز ، وجهزت نفسها وجت ليلة العرس... أول مادخلت ريم على عريسها إستقبلها بمزحة وقال: (هلا ياأم ريـــــال !!!) البنت طاح وجهها ساعتها بس عدتها ..؟! صعبة تسوي مشكلة من أول ليلة... ومن ذاك اليوم وسعود ماتعدي ريم من عنده إلا يعايرها بالريال .. بعدين تطور الموضوع وصار يقارنها بكل شي بريال .. لين قال مرة: (تشوفين علبة البيبسي هذي؟! تراها تسواك ؟! كلكم بريال خخخخخ ؟!!!) وكمل ضحك وهي تغلي... بس ريم كانت كتومة ، ماتحب تشكي لأحد حتى أقرب الناس لها أمها...؟! ومرت الأيام وهو مايناديها إلا أم ريال أوعلبة البيبسي ؟! ... هو مايقصد يهينها بس المزح الثقيل الله يكفينا من شره .. المهم راحت لأمها مرة ، وأمها كانت ملاحظة عليها إنها متضايقة من شي ، فحلَّـفتها تقولها وش فيها... ؟! بعد محاولات كثيرة من الأم ، فضفضت لها ريم وهي تبكي ، وقالت لها الشي الوحيد اللي منكد عليها حياتها...؟! وطلبت من أمها إنها ما تجيب سيرة لأبوها... لكن الأم قالت: ( لا يابنـتي أبوك غلط ولازم يصلح غلطته وياما قلت له إن هذا يقلِّل من قدر بنتك مايرفعها ، لأن الناس الحين يقيّمون بعض بالفلوس بس ماسمعني... خليه يشوف وش سوى... ؟! إنتي يابنتي لك كرامة وإحنا مابعناك... ؟؟ تطمني وخلي الموضوع علي ..) وراحت طيران لزوجها وهي تغلي ، بتنفجر من القهر وحكت له السالفة... أبو ريم إنهبل من اللي سمعه ..؟! وحلف مااااتطلع ريم من البيت إلا راد لها إعتبارها... جاء سعود بيآخذ زوجته على العادة ، بس ريم ماطلعت طلع أبوها بدالها وسلم عليه ، وطلب منه ينادي أبوه وأعمامه يجون يتقهوون عنده ، وإنه بعد المغرب راح يكون في إنتظارهم .. الولد ماشك في شي ، راح ونفذ اللي قال عليه أبو ريم ، وجاب أبوه وأعمامه... إستقبلهم أبو ريم وجلّسهم في المجلس ، بدون ما يحسون بشي ، طلع أبو ريم من جيبه ريال ، ونادى ولده الصغير محمد وقال له: (محمد روح للبقالة وجب لي علبة بيبسي...؟!) الرجال إستغربو وضحكو فيما بينهم على تصرف أبو ريم ، أما سعود ماوصلته الرسالة لسه... جاب محمد البيبسي وحطه على الطاولة ، شوي قام وطلع ريال ثاني ، نادى محمد وإرسله يجيب له علبة بيبسي ثانية ، سعود بدا يوجعه قلبه... كنه شم ريحة تلميح...؟! جا البيبسي وحطه أبو ريم جنب الأول ، وسوى نفس الشي مرة ثالثة ، وجاب بيبسي ثالث وحطه مع الباقين ، وقــــــــــال : ( الله يحييكم ..الحين أقدر أقولكم ليه أنا مناديكم ، أنا أخذت منكم مهر بنتي ريال واحد ، بس ولدكم ما قدر هالشي وقعد يعايرها بعلبة البيبسي...؟! أنا الحين غيرت رأيي ، أنا بآخذ بنتي ، وإنتم خذو بدال ريالكم ثلاث علب بيبسي ، هذا قيمة مهركم؟) الرجال مايدرون وين يودون وجيههم من كلام ابو ريم ، تفاجأوا وفشلهم سعود بعمايله ، أما سعود الله أعلم بحالته شوي ويغمى عليه ، هو كان يتميلح وريم تبلع ، بس ما توقع إنها بتكبّر الموضوع...؟! أبو سعود قال: (والله مالي وجه أقول شي ، بس ليتك تمسحها بوجهي ، أما سعود أنا بتفاهم معه ، وبنتك على راسي من فوق ، ترجع بيتها معززة مكرمة ، وأضمن لك إنه ماراح يعيد اللي سواه) رد عليه أبو ريم : (كلامك على عيني وعلى راسي يابو سعود ، بس والله ماااااتطلع بنتي من بيتي إلا بثلااااااااث مئة ألف ريال مهر .. زيها زي غيرها ، أنا يوم رفضت أول مرة آخذ الفلوس ، توقعت أنها بتكبر بعينه ..؟! لكن مع الأسف حصل العكس ..؟! ) طبعا" الجماعة ما قدرو يقولون شي ، إلا إنهم شافوا هذا الشي من حقه وحق بنته ، وجمعوا المبلغ وقدموه للبنت .. وكذا ما عاااااد فيه شي يضايق ريم .. بس ( سعود ) ماعااااد له عين يحطها بوجه أبوها..... ( تزوجها بعلبة بيبسي ورجعها بأكثر من ربع مليون ..؟! ) منقوووووول |
جزاك الله كل خير على القصه الرائعه................
اختك ام لولو |
سبحان الله
تصدقين ان الوالد كان نفس تفكير ابو ريم يكره غلاء المهور وخانق اهلي لما تزوجت اختي وحددوا المهر مع ان هو المهر الشائع بين القبايل لكن والله يا اخواني الغلاء بالمهور انا اكثر من مؤيدينه هل تعلمون لماذا؟؟ لاسف احنا بزمان قلة من يقال عنهم رجال؟؟ قبل الرجال اذا كره شي من زوجته اخر شي يفكر فيه الطلاق ونادرا مايحدث الطلاق اما هالزمن قلة من هم رجال تخيلوا لو اصبح مهر البنات اقل من عشرين الف ريال والله البنات يصبحون لعبة بيد الرجال يتزوج اليوم ويطلق بكرة اعرف كثير من المتزوجات اوزواجهن لا يرغبون فيهم لكن لم يتمسكوا فيهن ولم يصبروا عليهن الا لغلاء المهور وعدم القدرة على الزواج |
شكرا يا اختي أم خالد على القصة الجميلة
لكن مع ألسف الزوج طلع واحد ما يقدر ويستغل الطيبة لكن هنا في أمريكا المسلمين يتساهلون كثيرا واعرف بنات ما أخذوا ولا شيء للمهر واعرف واحدة الله يجزيها ألف خير كان مهر أن يحفظ زوجها احدى سور القرأن الكريم وانه الأن شايلها فوق رأسه وأنا أيضا كان مهري قليل كم المعدل للمهر عندكم في الخليج (بالدولار)؟ |
ســــلام
مشكوره اختي على الموضوع وترى مهري مثل مهر ريم ابوي طلب ريال لاكن يوم سألت ام زوجي قالت لها اختي الكبيره (ريال وشيمة رجال) اعطوني 60 واعطو الوالده 20 وجدتي 5 هذا غير الذهب ومصاريف الزواج الثانيه لاكن الوالد كان معارض ومع اصرار عمي ابو زوجي وافق لاكن رفض ياخذ له شي |
خير الامور اوسطها
|
ام لولو
بارك الله فيك على المرور ليدي اهلا بك انا افضل ان يكون المؤخر كثير حتى يحسب الرجل الف حساب قبل ما يطلق اما المهر فغير مهم ان كان كثير ام قليل مشمشة عمري بارك الله فيك على مرورك متوسط المهر عندنا اللي في مجتمعي انا من30 الى 40 الف ريال وما اعرف كم يساوي بالدولار الدولار يساوي3ريالوزياده شوي نجلاء بارك الله فيكم باين عليكم عايله طيبه امي وينك والله اني كنت خايفه عليك وين الغيبات عسى ماشر وكيف ظهرك ان شاء الله احسن عالجتيه؟؟؟؟؟؟؟؟ اذا شفت اسمك افرح ما ادري ايش السبب احسن انك مثل اختي |
اقتباس:
كما يستطيع الرجل ان ينغص على المرأة حياتها ويكرهها عيشتها حتى يدفعها غصبا للتنازل عن مؤخرها مقابل الحصول على ورقة طلاقها .. الرابط الديني والروحي والوجداني أقوى بكثير من الرابط المادي ... |
تصدقون مهري كان أقل من مهر ريم.........وقصة زواجي كانت غريبة جدا ولا أحد سواها من قبل من معارفنا لكنهم حضروا الزواج رغم ذهولهم واستغرابهم.............مالكم بالطويله.
كل عروس تخطط يكون في زواجها شئ مميز وانا ومن دون ماأخطط صار زواجي كله مميز!<<<<<<<<<<<<<طولتها. كان يوم الملكة جاء ولد عمي (زوجي حاليا)وملك بس ماكان أحد من أهله معاه لانهم خطبوا وراحوا ولما كان زوجي جاي بزيارة عاديه قاله ابوي ايش رايك تملك الحين ....الرجال ما صدق وبعد كذا قال ابوي ايش رايك تخلي زواجك اليوم .....استغرب رفض بحجة انه ماجهز ولا سوى شئ حاولنا قال الوالد ما فيه انا اسوي كل شئ جاب الذبائح وشراء لي شوية ذهب وعزم الجيران اما العريس مسكين ميقدر يسوي شئ اتصل في اهله وما صدقوا قالوا له عالاقل خله بكره واحنا نحاول نجي المهم باركولنا بالتلفون ومن بعد يومين سافرنا عندهم وسوينا حفله صغير ة اقتصرت على الجيران والعائله............... وهذا احنا عايشين زي اللي تزوجوا بالملايين يمكن واحسن من بعضهم........ آسفه عالاطاله. |
اقتباس:
اوافقك على ذلك فالرجل اذا اراد ان يطلق فسيفعل ذلك ولكنه سيتعب كثيرا في الطلاق اذا كان المؤخر كثير لانه سيظطر ان ينغص عليها وهي ستعانده..................الخ وسيعيش في ازمه حتى ينتهي من هذا الطلاق لان المراه بالطبع لن تتنازل عن حقوقها بالسهوله وستكون هناك محاكم وتعب وتدخل الاهل.....................الخ اما من لا مؤخر لها فان الطلاق سهل جدا وانا لا اتكلم بالطبع عن اي رجل بل اتكلم عن اصحاب الانفس الدنيئه |
| الساعة الآن 08:55 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©