ياهل دبي وينكم ............. ابغاكم ضروري
 

هلا فيكم يا اخواني ويا خواتي .............


انا باذن الله عندكم يوم الاربعاء القادم بجلس بدبي يومين ......................

بس المهم ابغي منكم تسوون لي جدول بالاماكن السياحية بدبي حتى الامارات القريبة منها

ابغي الف الاماكن الحلوة .................. تكفون لا تخلون اختكم ...

وابغي اعرف الاسواق الحلوة هناك ............. ويقال ان هناك سوق شعبي وارخيص مرة ( والله انا ودي بالعطورات والمكياج والملابس ) ياليت تدلوني علية

وابغي اعرف عن الاماكن الترفيهية والمدين الثلجية والقريه العالمية ............... وين بالضبط واوقاتهم ..................


ابي اعرف عن فنادق حلوة لكن بسعر معقول


ودي تعطوني اسماء مشاغل ( صالونات للشعر ) لكن ابغاة محترم ...... وكيف اسعارهم ( ودي املس شعري واصبغة صيغة حلوة بس ابغى ناس ثقة وفاهمين )


تحياتي لكم ...............



انا بانتظار ردودكم

أنا لست من دبي ولكن أرجو أن أستطيع مساعدتك..
الأماكن الرائعة في دبي:
ميراكاتو ( الجميرة), دبي سيتي سنتر, مدينة الجميرة, برج العرب, حديقة الحيوانات بدبي, قناة القصباء بالشارقة, بحيرة خالد بالشارقة, حديقة الخور بدبي, أبراج الإمارات بدبي, الإمارات مول بدبي, جبل حفيت ( بالعين) ولكنه يبعد حوالي 140 كيلومتر عن دبي, سوق نايف بدبي الذي تسألين عنه والذي يحوي العطور والملابس وبأسعار رخيصة جدا في قلب دبي.
هذا إللي أقدر أساعدك به وزرت هالأمكان وأفضلها عن أماكن كثيرة

تبغين تسيرين واسوين كل هذه الأماكن في يومين دبي والأمارات الثانية يبغيلها كم شهر دبي بروحها يبغيلها شهر علشان تلفين جميع معالمها

أختي الحبيبه ..

بالنسبه للأسواق .. فانتي بامكانج اتمرين على أكثر من مركز للتسوق وكل واحد بتشوفينه احلى من الثاني ..
خلينا في دبي .. بامكانج اتسيرين سيتي سنتر دبي وبتشوفين فيه أشياء واحد حلوه وبتعجبج انشاء الله .. ويمكن ايضيع يومج كله وانتي في السيتي .. وبعد عندج مركز التنين جميل جدا .. و مثل ما قالج اخونا سوق نايف ستجدين فيه كل شيء يخص الكبار والصغار من ملابس وعطورات وحقائب وغيرها وبأرخص الاسعار على الاطلاق بس ترى المحلات اكثيره وريلج بتتعب ف تعالي الصبح أحسن عشان الزحمه فيه من الخاطر ..وعندج الكثير من المراكز الكبيره والصغيره كذلك ..مثل مركز القبائل ومركز عكاظ ومركز مرشد و..و ... و... وهناك الكثير ستجدينه في موضوع أحد أخواننا الكرام عن دبي ...

http://www.66n.com/forums/showthread.php?t=61388


وبامكانج التنزه في عده حدائق جميله وهادئه .. مثل حديقه الصفا و ومشرف وخور دبي و زعبيل و دبي لاند .. والحديقه المائيه .. وغييييييييرها الكثير .. اركبي أي تكسي وخليه ايوديج على هالاماكن عشان ما اتضيعين في الطريج

والله صج ما بتلحقين اتسوين شي في يومين .. ليش ما جيتي على بدايه الاجازه ..



وبالنسبه للصالونات بامكانج اتسيرين .. صالون رافال في الرقه حلو وموثوق منه ..وصالون لندا خليفه المعروفه.. وبعد في صالون سبا تابع لباريس جاليري بس اشوي غالي .. بس راقي وعلى أصول .. وعندج اسباثيرا .. من أرقى مراكز التجميل وعلى مستوى ..

وهناااااك الكثير من الصالونات في دبي والي بكل تأكيد بتعجبج وتقريبا أغلبها على مستوى ..

والفنادق والله ما أقدر أحددلج فندق معين .. بس معروووووف انه كل كل كل فنادق دبي راااااااقيه بمعنى الكلمه ..
واذا تبين فندق أسعاره معقوله وحلو .. خذي في الشارجه احسن .. عندج الفنادق الي على بحيره خالد .. جميله وهادئه وراقيه ومنها تباتين ومنها تتمشين على البحر بالليل .. وبامكانج اتمرين على مدينه القصباء بتمشيتج فهي على امتداد البحيره وخذيها مشي ...


وأتمنالج رحله موفقه باذن الله وحياج الله في الامارات ..

حلو والله