مشكلة النوم عند ابنتي
 

السلام عليكم ..

أنا عندي بنت عمرها سنتين تقريبا ... الله يحفظها ويخليها .. البنت ما شاءالله شاطره وذكيه وتفهم ولله الحمد بسرعه .. بس فيها مشكله .. وأتوقع المشكله هذي موجوده فيها وفي غيرها من الأطفال ..

المشكله ان البنت من زمان وهي تنام بسريرها (داخل غرفتنا طبعا) .. بس لاحظت هاليومين انها تصحى كثير من النوم .. وتكون قلقانه أصلا وهي نايمه .. واذا صحت تطلب الحليب واذا خلصت من الحليب تطلب امها انها تشيلها وتحطها على حجرها وتنومها .. يعني كأن عمره 6 شهور !! .. المشكله البنت تغرق بالنوم على حجر امها بس مجرد ماتشيلها امها علشان ترجعها للسرير تصحى على طول وترفض انها ترجع للسرير .. وتحتاج وقت علشان تنام مره ثانيه لأنها تكون مو متطمنه.


أنا كأب أكون طبعا حريص على بنتي وزوجتي .. ولاحظت ان زوجتي تتعب .. وخصوصا انها تجلس ساعه كامله احيانا أو أكثر وهي تحاول تنوم البنت .. مع ان البنت نايمه اصلا !! .. حتى لاحظت في زوجتي آلام في الظهر من كثر الجلسه .. حتى المسكينه تتنكد بالنوم .. وكل وقتها تكون جالسه وماسكه البنت ..

أنا كلمت زوجتي وقلت لها البنت لازم تتعود تنام بسريرها .. وقالت والله حاولت بس البنت متضايقه .. المشكله البنت في هالعمر أكيد ماتقدر تشرح حالتها .. وأنا بطبيعة الحال أرجع للحل المنطقي وهو ان البنت لازم ترجع وتتعود على النوم بسريرها من نفسها علشان ترتاح وتريح أمها ..

ساعدوني الله يخليكم .. اذا عندكم نصايح لهالمشكله .. لأن الحين صارلها أكثر من 3 أسابيع وهي على هالحال ..

ملاحظه .. الحمدلله تعاملنا للبنت معامله هادئه .. باستخدام الأساليب التربويه الحديثه ... ونادرا ما نلجأ للتوبيخ .. نتكلم معها كثير علشان نحل مشاكلها اذا فيه مشاكل .. يعني البنت متعوده على انها تاخذ وتعطي معنا ولله الحمد .. وهذا بالتأكيد يريح البنت نفسيا .. بس ما أدري ايش القلق اللي يجيها وقت النوم!!

وشكرا

الله يعطيك ألف عافيه اختي حائزة الأمل على الرد والوصلات المفيده جدا.

الله يفرجها عليك ويوفقك بزوج صالح ان شاءالله :)