|
استشارة عاجلة ( خطيبي ملتزم فهل يعني انه متزمت ؟ )
السلام عليكم ورحمة الله وبركاته انا عضوه جديده بالتسجيل ولكن لي مده اتابع منتدى المقبلين على الزواج (مجرد شفاحه=لقافه):d وانا سجلت عشان ابي استشيركم استشاره ضروريه بالنسبه لي كون فيه ناس متزوجين وعندهم خبره اكبر انا انخطبت لواحد (ملتزم) وعمره تقريبا 30 وانا 21 وظيفته تمام الحمدلله واخلاقه ان شالله كويسه بس المشكله في التزامه انا وحده احب الملتزين واقدرهم واتمنى واحد ملتزم عمري كله عشان نعاون بعضنا على الخير لكن لما جاء !!!!! مدري كيف حسيت انا ماراح نكون مبسوطين مع بعض لاني انا وحده صحيح الحمدلله اميل للالتزام بس مو كثير واحس ان (((بـــعـــض))) الملتزمين فيهم نوع من الشده واخاف مااقدر ارضيه واسمع كلامه كله خصوصا من ناحية اللبس والسفر الي اتوقع انو مستحيل بالنسبه له خاصه ان اهله مايسافرون والي سمعته عن شخصيته يثبت لي انو هو مثلهم بعد:29: واخاف يكون من النوع الجاد الي مافيه معاه مجال للرومانسيه !!!! واحس بعد انو كبير بيصير ثقيل وجاد كثير وانا اميل للهزل اكثر وهذا غير انه ساكن في المدينه الي انا ساكنه فيها بس كانت امنيتي ااخذ واحد يطلعني منها لاني مااحبها ابد ومو مبسوطه فيها ويرجعني المكان الي كنا ساكنين فيه والا مكان السكن مو مهم للسعاده في الزواج؟؟لاني كنت متاكده انو السكن بهالمدينه يعني زهق العمر كله وان السعاده في الرجعه لمدينتي القديمه فلما افكر بالتزامه بالتزامه وعمره ومكان السكن احس اني ماابيه وابي ارفض بس لما ارجع افكر بالدنيا كيف انها زايله وفانيه وماراح يبقى للواحد الا عمله الصالح احس انو باخذه بس عشان يعيني على الخير بس ماراح اكون مبسوطه معاه احيانا اقول بالعكس الي مستقيم عمره كله ويخاف ربي بيكون مع زوجته احسن لانو مايشوف غيرها ويخاف ربه من الحرام وغيره !!!! انا ااسفه اذا كان كلامي غبي وحوسه وضايق البعض بس من جد انا محتاااهره ومب قصدي ترى اسئ للملتزمين بالعكس!! انا وجهة نظري انو ممكن انا اغشه ياخذوني على اساس اني وحده مثله وراح اسمع كلامه وبعد كذا يصير اختلاف بينا فيكون احسن له لو كان ماخذ وحده مثله بالتزامه ماشالله ملاحظه: انا ابوي الحمدلله ملتزم وعشان كذا كنت ابغى واحد مثله لكن ابوي مو شديد الحمدلله وهذا الي اعرفه عن عايلتهم انهم شديدين شوي؟؟ ابغى من اهل الخبره يعطوني ارائهم لاني احيانا احس ان مخاوفي سخيفه واحيانا احس بالعكس ان الموضوع صعب جدا ياليت الي تعرف متزوجه من واحد ملتزم شدبيد شوي ومبسوطه تقولي عن تجربتها الله يخليكم لاتبخلوون علي بتوجيهاتكم لاني مالقيت غيركم استشيره البنات حولي كلهم يقولون ملتزم بتتوهقين ترى ومافي وناسه ولا سفر واهلي يقولون بالعكس هذا الي بتامنين على نفسك معاه لان اللي يخاف الله بيخافه فيك وماراح يظلمك وكل شوي انا اقتنع باراء جانب واترك الجانب الثاني وبعدين ارجع للجانب الي تركته :( اخاف ارفضه واندم خصوصا لما ااذتكر حديث سيد الخلق رسولنا محمد صلى الله عليه وسلم((من جائكم من ترضون دينه وخلقه فزوجووه الا تفعلوا تكن فتنة في الارض وفساد كبير)) واخاف اوافق عليه واندم اذا صار بينا اختلاف او ماانبسطت معاه شكرا مقدما لارائكم وتوجيهاتكم وابي دعوااااااااااااااااتكم لي بالتوفيق والهدايه اختكم |
احمدي ربك واشكريه ليلا نهارا وين احد يلقى لبنته او اخته ملتزم هالأيام وبعدين الملتزم يخاف الله يعني محد راح يخاف الله فيك مثله توكلي على الله ولا تفوتينها أنا اعتبرها فرصه على طبق من ذهب والله يوفقك
|
اذا جاءكم من ترضون دينه خلقه فزوجوه الا تفعلوا تكن فتنة في الارض وفساد كبير
يا اختي الدين لايكفي يجب عليك معرفة اخلاقه لكن والله ما راح يخاف عليكي زيه انا اعرف احد المشائخ والقراء المعروفين في جدة والله انه تقريبا كل ساعتين يكلم زوجته ويحبها حب شديييد وعلى فكرة ترى الملتزم الناس يدورونه وانتي ما تبغينه احد طلاب العلم عرض عليه 6 من الاباء بناتهم وبدون مهر |
واستخيري قبل كل شئ
|
اختي عسل ادعوا الله ان يكتب لك مافيه خير وصالح..اكثري من الاستخاره والدعاء.. . عزيزتي .. لا تحكمي على شخص سواء هذا او غيره من خلال اهله .. فكون اهله متشددين لا يعني بالضروره انه كذلك .. وهناك امثله كثيره في الحياه على هلنقطه.. المهم الدين والاخلاق من الاشياء الاساسيه في الخاطب ..ومع الاسف نادر ان تجديها الاثنان معا.. لكن وبدون الضغط عليك .. اذا رأيتي في الخاطب ما تجدينه مناسبا لك ..واذا صارت الشوفه الشرعيه وكان في ارتياح من الطرفين فهذا مؤشر جيد ..اما اذا لم يكن هناك قبول او ارتياح فاعيدي النظر وتقبلي تحيااااتي |
والله شوفي حبيبتي.......بعض الملتزمين تنصدمين فيهم بعد الزواج......لانك تلقين التزامهم مجرد صوره........والا هو انسان الله يستر.......اعرف ملتزمين بخلاء ولا يصرفون على زوجاتهم واهاليهم عناد......وغيرهم يرتشون ويشهدون زور.....ماقصدي اجرح بحد بس والله واقع مرير اللي قلته.......ونمامين وكذابين وحسوديين.......ما اقول كلهم ولكن شريحه لا باس بها منهم......لانهم اولا واخيرا بشر زيهم زي اللي مو ملتزمين.......واللي مو ملتزمين تلاقين فيهم ناس يلتزمون بعد الزواج....انا وزوجي بدينا نلتزم ولله الحمد......وحما اختي فك الالتزام تمااااااااااااااااااااااااااااااااااما بعد زواجه........وعمي خف التزامه بعد زواجه.........مو قاعده ملتزم او غيره........القاعده انك تصلين الاستخاره......وبعدها تقررين......استخييييييييييييييييييييييييييييييري استخييييييييييييييييييييييييييييري ثم استخييييييييييييييييييييري......اذا تبين الحل النهائي استخيري.........حتى لو سالتم لابد من الاستخاره.....
|
السلام عليكم ورحمه الله وبركاته
اتقى الله اتقى الله اتقى الله اذا الادمى ماتزم واخلاق احمدى الله فهى نعمه لك فى الدنيا والاخره لاكن هناك شى اذا انتى صليتى صلاه الاستخاره وقلبك مقبوض هاذا شى تانى ارفضى اما لو انه بس عشانه ملتزم فتقى الله فى نفسك وفى حياتك وفى هذا الرجال على فكره انى منى من الخبر متزوجه ومن المدينه المنوره اتمنى لك حياه سعيده شوفى نفسك وقررى انتى مو تخلى احد يقررلك لك فائق احترامى |
هناك مشكله ذكرتيها وهي انك تميلين للهزل وهو يميل للجد كثيرا .. واعتقد ما بيكون توافق بينكم في التفكير والتصرفات وحتى المواضيع التي تتناقشون فيها واذا قلتي شي يضحك يمكن ما يضحك طالما هو جاد!!! عموما الرجل يكون ملتزم وجاد افضل من كونه يميل للهزل والمرح ... والله اعلم .. استخيري افضل حل
|
الأخت الفاضله..
إن جائكم من ترضون دينه وخلقه....الحديث أركز على قضية الخلق..ومع ان الخلق جزء من الدين، لكن كان له ذكر مستقل! لأهميته أختي.. جميل ان يكون ملتزما وحريصا على دينه وهو الحد الفاصل في حياته القضية الا يصل الى التنطع والانغلاق والدوران في فلك سد الذرائع في كل صغيره وكبيره والحكم عليه انه شديد ولا لأ... مو بالسهوله هذي لأن كثير من الأزواج يكون شيء قبل الزواج ولكن يبان بعد الزواج.. وانا انصحك بأمرين 1- تعرفي على اسلوب تعامله مع أهله الاناث: الام - الاخت - العمه - الخاله.... لأن هذا سيعطيكي انطباع عن طريقة تعامله مع الانثى، هل برقه وحنان أم بشده وحزم.. وأحرّص على هذه النقطة، بتساعدك كثير في التفكير والتقييم 2- وهي الاهم.. الاستخارة حتى لو اكثر من مرة، والشعور بالتوكل على الله والالتجاء اليه. مع دعواتي لك بالزوج الملتزم الصالح الحنون الرقيق.. |
اختي وافقي والله مافيه احلى من الرجال الملتزم
اصلا الرجال الملتزمين يعاملون الزوجه احلى معامله انا كنت قبل لا اتزوج اقووول مستحيل اتزوج ملتزم بس بعد الزواج صحيح زوجي ماهو مقصر والله يخليه لي بس اشوووف عمي ملتزم وكيف يعامل زوجته مع انهم متزوجين من 25 سنه ماشاؤ الله عليهم تشوفينهم تقووولين معاريس وكمان صديقتي متزوجه من ملتزم ومبسوووطه ومتهنيه بحياتها نصيحتي لك لاتردينه صدقيني راح تندمين والله يوفقك |
| الساعة الآن 06:59 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©