لا تقولوا لي اتركيه!!!
 

السلام عليكم


ما ابي أطول عليكم فبقول لكم السالفة بإختصار

أنا مخطوبة صار لي سنة أحب خطيبي وأحس أنه خطيبي يحبني بس المشكلة أنى شكاكة وغيورة جدا وكل هذا له سبب حيث بعد خطوبتنا بثلاثة أشهر تقريبا أكتشفت أنه زوجي يكلم بنت غيري في التلفون وكانت هالبنت تطرش له مسجات حب ولما واجهته كذب وقال أنتي شكاكة وأنه صبي موا بنت وأنا متفق معاه اذا عنده مسجات حلوة يطرشها لي عشان ادزها لج بس للعلم ماصدقته ولسبب واحد أني أتصلت على الرقم قبل لا أواجهه في الموضوع واللى رد على بنت من جذي وانا معاه اتصلت على نفس الرقم و لما ردت هالبنت عقبها أعترف وقال لي هذى مجرد زميلة كانت معاى في الشغل اللى كنت أشتغل فيه من سنتين المهم وقال بيتركها وبيقطع علاقته فيها بس من فترة قصيرة قال لي انا كنت ابي اتركها بس كنت أمهد للموضوع ما يصير أتركها فجأه جذي والصراحة أنا بين الشك والتصديق بس بعد عشان ما أعذب نفسي حاولي أقنع نفسي بصدق كلامه (بس هالسالفة عدت على خير) ...

بس اللى صار من يومين كنت معاه بالليل وكانت الساعة وحدة ونص تقريبا ورن تلفونة من شاف الاسم حسيت ملامحة تغيرت (على الرغم من أنه اذا يكذب ما يبين عليه) إلا يقول واحد من ربعه مسوي له مس كول الا اقول له رد عليه قام وأتصل حتى سمعني صوت التلفون وهو يرن وبعدين سكر الخط المهم انا الموضوع ما قنعني ومن الصبح رحت أشوف تلفونة في المكالمات التى لم يرد عليها لكنة مسح الرقم من الليل ورحت للمكالمات الصادرة وكان فيه رقم الشخص اللى اتصل عليه عشان يفهمني انه رد على المس كول اللى جاه (المهم اللى فهمته من هالحركة انه جاه مس كول من شخص واللى أتوقعه تكون بنت وهو عمل مس كول لشخص ثاني عشان يوهمني انه نفس الشخص اللى سوى له مس كول لأنة لو كان صج صبي مثل ما يقول ليش بيمسح رقمه في المكامات التى لم يرد عليها وبيخلي الرقم في المكالمات الصادرة؟؟)

المهم انا طبيعتى مرحه وعلى طول امزح معاه وجذي بس لما شفته تلفونة تغيرت عليه وقمت ما اعطيه وجه عدل وارد عليه على حد السؤال وكل حين يسألني وش فيج بس ارد عليه ما فيني شئ ووصلني بيتنا لأني مخطوبة وعادتا اذا ما أشوفه لازم في الليل يتصل وأمس ما أتصل فلما أنا أتصلت عليه مارد أتصلت مرتين ما رد على يعني يبي يسوي روحه اهو الزعلان ويبي يتهمني اني غيورة؟؟

المهم اللحين ابي حل محتارة أتصل فيه أو أحقره مثل ما أهو حاقرني وثانية هو الغلطان موا أنا وغير هذا أبي أفهمة أني ما أسمح له يكلم غيري أو يتعرف على غيري وانا موجودة خصوصا وأني موا مقصرة معاه بشئ بتاتا وهو بنفسه يعترف بهالشئ؟؟؟

مسامحة يمكن أفكاري طلعت ملخبطة بس من القهر اللى فيني موا عارفة أنظم افكاري ...

أبي رأيكم ساعدوني...

:30: اختي انتو توكم في بداية الطريق وواضح انه خطيبك يتسلى مع وحده ثانيه وحاولي انك لاتستعجلي في اتخاذ اي قرار واستخيري

انا رأي لازم الصراحه والمواجهة ولازم تتفاهمي معاه وتقولي له بمعرفتك على علاقته خصوصا اذا انت متاكدة من وجود علاقة مع غيرك زي ما قلتي
لانكم لسة في بداية الطريق وحتفضل هذه الشكوك دايما تساورك لذا لازم المصارحه .....وعليكي بالاستخارة
والله يوفق بينكم ويختاراللي فيه الخير لك

مرحبا
أخي ولد المسيله
أدري يمكن يتسلى أو حتى يمكن يحبها بس شلون أبعده عنها واللى يقهرني يقول يحبني واللى يحب ما يخون واللّه وش رايكم؟؟


أختي gigi78

واجهته بمعرفتي بعلاقته بأخرى ووبعد فترة جاء وقال لي أنه تركها بس الخوف أنه للحين ما تركها شلون أتاكد من هالشئ ما أدري؟

طنشيــه.. وإزعلي منه....

وإذا سألت شفيك... قوليله تبي نتكلم بصراحه؟؟ أكيد راح يقولك إي طبعا...

قوليله شوف أنا وحده رح أكون متفهمه معاك لأبعد حد... وفي كل شي... ولا تعطيه مجال يتكلم ولا كلمه طول ما إنتي قاعده تقولين له هالكلام...
وقوليله: شوف أنا أدري إنك تحبني .. وأنا أحبك ومتمسكه فيك... بس موضوع إنك تكلم غيري هذا ما أسمح فيه ولا بأي حال.. وإنت لو كنت قبل خطوبتنا تكلم بنت أو بنات.. أنا ما رح أسألك عنهم.... بس الحين إنت خطبت.. وصار إسمك مرتبط فيني.. وبالتالي إنت مالك حق إنك تكلم أي وحده... والمشكله اللي صارت المره اللي فاتت أنا مشيتها لأني أدري إنك تحبني وإنك رح تخلي هالخرابيط...
بس إني ألاحظ إنك لازلت تكلم حد.. هذا شي ما أسمح فيه أبدا... وأنا أعرف إن مخك كبير.. وهذي خرابيط تسويها لتضييع الوقت.. (أنت بذلك تعطيه مبرر عشان يرتاح وبتفتحيله طريق معك).. فإذا إنت لقيت نفسك فاضي .. إرفع السماعه وكلمني.. (المقصود إنه يفرغ شحنة الحب والتسليه معاك مو مع غريبه)..
وقوليله أنا ما أبي أسمع أي كلمه منك عن الموضوع.. إن شاء الله أكون أنا غلطانه بتوقعاتي وأنا ما رح أكره هالشي... بس صدقني إذا حسيت لمجرد لحظات إنك مستمر في هالشي.. ترى بيكون لي تصرف ثاني..
ولا تسمعي منه أي كلام عن الموضوع وسكري الموضوع فورا وغيريه..

وعزيزتي أنا بنصحك إنك تتدلعي على خطيبك بالتلفون ولا تكلميه عن مواضيع نسائيه بحته... وشوفي شو إهتماماته وأقبلي عليها وحدثيه عنها (سيارات.. تربيه طيور.. سياسه... إلخ)... حتى يحس إنك مليناه بالمواضيع وحتى يتلهف إنه يكلمك عشان يشاركك إهتماماته..

الله يوفقك ويسعدك ويطمن بالك...

الله يكون بعونك

حلي هذي المشكله قبل الزواج لانك ماراح تكونين مرتاحه ابدا وانتي شاكه بشي

بتضلين دايم تشكين فيه

صارحيه واطلعي منه بالمفيد
والوعود انه مابيرجع لكذا مره ثانيه هذي لاتعتبرينها حل لان هذي الانواع توعد وتخلف ولكن تاكدي منه بكل الطرق قبل الزواج انه ترك هذي المسخره

وعليك بالدعاء والله يسهل امورك

تسلمين dand00n

كلامك جدا منطقي بس ادعي لي بالتوفيق ومشكورة ...

توقعت القى ردود أكثر من جذي؟؟؟

مثل ما قالوا الاخوان
لازم المصارحه من جديد
ولازم تلقون حل لهشي
؟؟
قبل لا تبدون حياة زوجيه

اختي انتي بصراحه انسانه غريبه يعني تحبينه ومادام انك تحبينه وعرفتي مشكلته قبل ماتتزوجي فلازم الحل
وبعدين نصيحتي لك احقريه كم يووم عشان يعرف انه الغلطان والرجال مايحب الي تحقره فبكيذا بيتاكد انه هو الغلطان
وبيعتذر ونصيحتي لك انه لو مااعتدل تتركيه طبعا هذا رائي وارجو انك ماتزعلي عشان مصلحتك والله وعشان مايصير فيكي مثل ماصاار فيني ارجوو منكي عدم الازعاج من رائي ..اختك كيدتهم