أهلي وأهله ..ساعدوني الله يسهل لكم يارب..
 

السلام عليكم ورحمة الله وبركاته،،
أخواني واخواتي هذي اول مره اكتب لكم عن مشكلتي وأتمنى أن توجهوني للصواب..
أنا متزوجه من أكثر من 9 سنوات ولدي 3 أطفال في بداية زواجي حدثت مشاكل كبيره نتيجة لاختلاف الطباع بيني وبين زوجي .. وكان يطلب مني الذهاب لأهلي وارفض ثم يضطرني للذهاب ولا أعود إلا بعد كم اسبوع ولم يتغير الحال..
وبعد 7 سنوات حدثت مشكله كبيره وقام بالاتصال على اهلي وعندها قرروا عدم رجوعي له لأنه ببساطه انسان غير ناضج ولا يقدر الحياة الزوجية وكان يضربني حتى وانا حامل ولا يشعر بالأسف و يطلع في عيوب ماهي في والكل عارفني بالإضافه لأنه ما دياته أكثر من ممتازه ولكنه لا يصرف علي لأني موظفة ..
بعد هذه المشكله عافته نفسي ووافقت على كلام اهلي أني ما أرجع له وانه ما يستاهلني .. ولما حس اني حأضيع منه عمل المستحيييييل ودخل وساطات .. وكنت رافضه واخوي والوالد رافضين إلا بشروط ووافق على الشروط ورجعت لبيتي بعد 4 شهور وبالفعل تغير الحاااااااال صار افضل في التعامل وما يمد ايده ويقدر كلامي لكن ..
ظل الجرح اللي بين اهله واهلي والأسوأ ان امه تدخلت ايام المشكله الأخيره وقالت عني كلام ما ينقال وفيها طعن وجرحتني انا وامي.. مع العلم ان فيه كم وحده من اهله يتصلوا علي ويقولوا انهم عارفين اني مظلومه لأن امه كانت تطلع عني كلام اني مغروره وابغاه يسفرني ويصرف علي آلاف وهدايا وهذا غير صحيح ابداً ابداً.. والكل عارف اني سافرت ايام عز اهلي افضل سفرات وما كنت افكر اسافر مع زوجي لأنه بخيل ولما نسافر ما يصرف وتصير كل المصاريف علي ... فقررت ما اسافر معاه واقعد ببلدي اكرم لي ولعيالي..
المهم..صار خلاف بين زوجي واهلي من غير ما اعرف قبل مشكلتي الأخيره ومن بعدها اهلي مو طايقينه وهو مو طايقهم..
وأهله لما عرفوا كبروا الموضوع وما يخلوه يدخل بيت اهلي ابداً ...
الحين هو طيب معاي وتحسن في اشياء كثير إلا في الماديات ما زالت ايده ماسكه لكني والحمدلله احسن بكثير من اول.. لكن ما يكلم اهلي ولا يزورهم حتى بالأعياد ما يتصل على الوالد إلا متأخر ولو مرضت الوالده ما يزورها ولا يكلمها.. واللي اشوفه ان اهلي يجيبوا سيرته بالطيب ولو قلت لهم تعبان يوصوني عليه ولو فيه مناسبه عند اهله باركوا لهم ومثل كذا..
الموضوع له الحين أكثر من ثلاث سنوات وانا كل مالها المشكله تزيد الأسبوع الجاي اهله "أخوانه واخواته" مسويين زواره لولدهم المتزوج وكل واحد يعزم طرفه إلا انا مو راضي يعزم اهلي .. فقررت ما أحضر لأني استحملت نقص على اهلي كثير إلا كذا .. وتخيلوا لو رحت الكل بيسألني وين اهلك شقول ما انعزموا..صعبه على نفسي اروح وانا اللي عازمه واهلي ما يحضروا..
والحين زوجي ما يكلمني بسبب هالشيء .. شسوي حاولت اوسط اشخاص يصالحوهم لكن امه واخوانه واقفين معاه وكل فترة يفكرونه علشان ما يروح لهم ويقول انه سأل شيخ وأيده انه يقاطعهم!! عيالي يسألوني ليش بابا ما يزور بيت جدو زي الثانيين ما الاقي رد بس هم حاسين ان فيه شيء غلط نفسيتي تعبانه جدا جدا وعلى طول راسي يوجعني من التفكير ..سامحوني ان طولت عليكم وعلى اسلوبي اذا كان غير واضح..
لكن رجاءً أفيدوني أفادكم الله وسهل لكم اموركم يااااااارب..

انا رأيى تسمعى كلام زوجك و اتركى الأيام تداوى الجروح و ماتكلمى زوجك فى هذا الموضوع حتى لا تنكدى على نفسك و عليه يكفى انه يعلم ما تريدين لقد طلقت زوجى بسبب مشاكل مثل هذه و أهلك يهمهم راحتك و مستقبل اولادك ولا يهمهم يحضروا حفلة مثل هذه , و نعم اذا سألوكى الناس قولى لم ينعزموا فهذا عيب فى حق زوجك مو فى حق أهلك و وفقكم الله لما فيه الخير

أخي الفاضل جزاك الله خير على ردك الكريم..

صدقوني انا ما حطيت مشكلتي هنا إلا علشان اسمع اطراف اخرى والمتعارف عليه ان الرجل تفكيره مختلف عن المرأة فنظرتي للموضوع عاطفيه واحس ان كرامتي عند اهله اقل من زوجات اخوانه..لكن لي 3 سنوات وانا اتغاضى وما في حل معقوله الزمن كفيل أتمنى يكون كلامك صحيح شاكره ومقدره لك تجاوبك معي..
ومازلت بانتظار الآراء الكريمه

بصراحة اختي هذا النوع من المشاكل من الصعب انه ينحل بسهولة وخاصة اذا تدخل اهل زوجك بس اقولك اصبري ولا تكلميه حاليا على هالموضوع اما بالنسبة لأهله فمن الفضل انتي في حالك وهما في حالهم لأنهم حاقدين وخلي هو يروح يزورهم ما عليك منهم
وديري بالك على بيتك وعلى عيالك والله يصبرك

اسمعي كلام زوجك لان الله بحاسبك على طاعة زوجك واصبري وان شاء الله الا ما تنحل المشكله عليك بالدعاء

شنو هذا الكلام يا جماعه اي زوج هذا و اي حساب ؟؟؟ رب العالمين يحاسب الرجل و الزوجه و لا يحق لزوجها ابدا ابدا انه يقطع الرحم او انها ما تكلم اهلها ...الرجل يروح و يرجع لكن الاهل !!!! يا جماعه ما اعتقد هذا حل للموضوع ... اختي 7 سنوات ذل و اهله معاه شنو هل الاهل !! يبون يخربون بيت ولدهم ؟؟؟ اختي اجسلي معه و كلميه و قولي له لين متى شايل اب خاطرك على اهلي بالنهايه كل شيء انحل و لا تسود قلبك و كوني منطقيه معاه و من دون عصبيه و قولي له اهلك لهم راي و كرامه و اهلي لا !! و رفضي انج تروحين و قولي له الكل راح يسالني عن اهلي شنو اقول مو معزومين خليه يحس بالغلطه مهما يكون اهله يعني اهلج و قولي له الاولاد يسالون يقولون ليش ما تجي شنو اقول زعلان من جدو !! اختي كوني واضحه اذا ما يسوي على شانج على شان اهلج او اولادج و قولي له اذا ما حطيت اعتبار حق اهلي انا ما احط حق اهلك و اذا تازم الموضوع روحي بيت اهلج و مثل اليوم الي رجع فيه و تغير راح يرجع و يتغير اذا شاري اختي كرامه الانسان فوق كل شيء .... حبيبتي اهله وايد مكبرين الموضوع و احس عيب عليهم بعد كل هذي السنوات غير انها تكلمت عنج ... اختي اشتري عمرج احسن و هذا راي اختي
اختج بني

أنا مع حبيبتي بني.... رأيها سليم...

كلمي زوجك... وحاوريه ... وقوليله إنه موقفك جدا محرج... إذا أحد سألك عن أهلك شو بيكون ردك؟؟ وحنني قلبه.. وتعالي له باللين واللطف والمصارحه..
و حاولي ما تطلعي من الجلسه إلا وهو مكلم أهلك وعازمهم..
وقوليله إنه أهلك دايما يسألون عليه... ويوصونك إنك تديري بالك عليه.. عشان يحس إنهم مهتمين فيه وإنهم شاريينه بعد..
ولازم ياخذ قرار إنه بيكلمهم خلال جلسة المصارحه... عشان ما يكلم أهله ويغيرون له رايه بعد ما يكون إقتنع في خلال جلستكم..

ولكن أختلف مع أختي بني إنك تروحين بيت أهلك وتكبرين الموضوع..

يعني إذا صمم ورفض إنك تعزميهم.. وكنتي قد لجأتي لكل طرق التحايل والحب وال الإستعطاف... عندئذ قوليله إنك ما رح تروحي العزومه لأن كرامة أهلك من كرامتك.. وإنك ما تبين تبينين للناس إن زوجك مو طيب مع أهلك.. إذا قلتيله هالشي يمكن يلين قلبه.. وكمان قوليله إنك قاعده تعاملين أهله زين.. وإن على الأقل تبين نفس المعامله منه لأهلك...

وما في مانع إنك لما تتخذي قرار عدم الذهاب للعزومه تبكي أمامه من التأثر والزعل و عسى الله يحنن قلبه ويكلم أهلك... :)

طمنينا أختي شو بيصير معك....

الله يوفقك.. ويهديك إنت و زوجك للي فيه الخير ..

اختي دندون
انا ما اكبر الموضوع و لكن اذا قال لها روحي بيت اهلك كما يفعل دائما لا تقعد بالبيت هذا الي قصدته مو قصدي تقوله يا تعزمهم يا اروح خخخخ
شكرا على الملاحظه حبيبتي
اختج بني

معناها إني فهمت هذه النقطه غلط.. لا تواخذيني حبيبتي بني..

تحياتي:d