منتدى عالم الأسرة والمجتمع - •·.·°¯`·.·•نيولوك طبيعي لشعرك•·.·°¯`·.·•(صور)

عملنا العدد ده مخصوص علشان تعرفي ازاي إنك تلوني شعرك بطريقة طبيعية وآمنة..

عايزة تعرفي ازاي؟

http://www.66n.com/pics/hosted/poq37...kml4jcuf8q.jpg

2 في 1

طبعا مافيش أحسن من الحنة اللي تقوم بالمهمة الخطيرة دي، وده لأن الحنة معروفة من زمان قوي إنها بتستخدم في تلوين الشعر، ده بالإضافة إلى إنها بتساعد في تغذية الشعر وعلاج مشاكل كتيييير قوي للشعر خاصة الشعر الدهني، وده لأن الحنة بتساعد على تخفيف نسبة الدهون الموجودة فيه ولإنها بتحتوي على مواد قابضة تقاوم زيادة إفراز الدهون.. الحنةكمان بتساعد في علاج قشر الشعر والتهاب فروة الرأس وبتساعد على التقليل من سقوط الشعر، بالإضافة إلى أنها بتحتوي على مواد مطهرة بتعمل على تنقية فروة الرأس من الميكروبات والطفيليات اللي ممكن إنها تصيب فروة الرأس..

وعلشان كده بنلاقيها من أحسن الحاجات الطبيعية اللي ممكن إنك تستخدميها في تغذية شعرك، ده بالإضافة إلى إنك تستخدميها للحصول على لون جميل مناسب لشعرك بعيدا عن أضرار الصبغة اللي احنا اتفقنا عليها..

يعني بكده يبقى إنت ضربتِ عصفورين بحجر واحد؛ عملتِ اللوك الجديد لشعرك وكمان استفدتِ من فوائد الحنة في علاج المشكلات اللي ممكن إنها تصيب شعرك..

يلاّ تعالي بقى نحضر للحنة مع بعض.

التحضير للحنة
http://www.66n.com/pics/hosted/t7xsq...ac8km3tzlc.jpg

فيه كام حاجة كده مهمة قوي لازم إنك تاخدي بالك منها وإنت بتحضري لعمل الحنة على شعرك وده علشان الحنة تجيب النتيجة اللي إنتِ عايزاها من غير تعب ومشاكل ممكن إنك تتعرضي ليها.. يلاّ عايزة تعرفي ازاي تعالي نحضر مع بعض في كام خطوة بسرعة.

http://www.66n.com/pics/hosted/i08eq...x10y8cyj67.jpg
1-ياريت إن شعرك يكون نظيف تماما ويستحسن إنك تغسلي شعرك كويس قبل استخدام الحنة وده علشان تتخلصي من أي تأثير للغبار والأتربة على شعرك وكمان للتخلص من أي تأثير للزيوت على شعرك علشان تطلع النتيجة اللي إنتِ عايزاها وتستفيد فروة شعرك وشعرك استفادة تامة من الحنة ويكتسب شعرك اللون اللي إنتِ عايزاه.

2- حاولي إنك ماتسبيش الحنة على شعرك أكتر من 4 إلى 6 ساعات وده طبعا علشان الحنة ماتنشفش على شعرك زيادة عن اللزوم وبالتالي تعرض شعرك إلى التقصف عند غسله.

3- علشان تضمني إنك هتحطي الحنة بطريقة متساوية ياريت إنك تقسمي شعرك إلى قسمين أو أربعة أقسام.

4- وإنتِ ب
تحطي الحنة ياريت إنك تحطيها من جذور فروة الرأس وصولا إلى الأطراف، كمان حطي الحنة على شعرك بمقدار ملعقتين في وسط رأسك وبعد كده دلكيها بأصابع يدك.

5- بعد كده ارفعي خصلة من شعرك بواسطة أصابع يدك الشمال وحطي فيها بواسطة المعلقة قليلاً من الحنة ودلكي بيها فروة رأسك، وبعد كده كملي على باقي الخصلات بنفس الطريقة لغاية ما تغطي الحنة منطقة الرأس كلها.

http://www.66n.com/pics/hosted/m59oz...tuaf55yjxa.jpg
6- سرحي شعرك باستخدام صوابع إيديكِ علشان تتأكدي إن الحنة غطت جميع جذور شعرك.

7- ممكن كمان إنك تميلي رأسك للأمام علشان تحطي الحنة على نهاية رأسك ودلكيها جيداً.

8- لفي شعرك على رأسك على شكل طاقية وتدلكي الشعر بيدك حتى يتشبع الشعر جيداً بالحنة.

9- غطي شعرك ببونيه للشعرك وسبيه لمدة ساعة حتى تتفاعل الحنة مع شعرك وبعد كده شيلي البونيه من على شعرك وده علشان تسمحي للهواء إنه ينشف الحنة اللي على شعرك.

http://www.66n.com/pics/hosted/pmr9s...ipdesdu090.jpg
10- اوعي تنسي إنك تحطي قطعة من القطن حول البونيه في المناطقة الآتية: جبهة رأسك من الأمام وخلف الأذنين وعلى منطقة الرقبة من الخلف حتى لا يتسرب سائل الحنة إلى الملابس أو إلى جلد الجسم ويغير لونه.

11- بعد كده سيبي الحنة المدة اللي إنتِ عايزاها بس خلي بالك إنها ماتزيدش عن 6 ساعات.

12- بعد مرور الوقت اللي إنتِ عايزه ممكن إنك تغسلي شعرك جيدا تحت ماء جاري مع تدليك لفروة الرأس جيدا للتخلص من جميع ذرات الحناء وبعد كده تغسليه.

13-ياريت وإنتِ بتغسلي شعرك من الحنة إنك ماتستخدميش الشامبو واكتفي فقط بغسله بالبلسم وتاني يوم ممكن إنك تغسليه بالشامبو وده علشان لون الحنة يثبت على شعرك.

14- استخدمي مشط ذا أسنان واسعة لتسريح شعرك علشان تتأكدي إن مافيش أي بقايا للحنة على شعرك.

15- لا تقومي بعمل حمام زيت لشعرك في نفس اليوم اللي عملتِ فيه الحنة لكن اتركيه لليوم الثاني وعلى فكرة من الضروري قوي لأصحاب الشعر الجاف إنهم يعملوا حمام الزيت تاني يوم، وعلى فكرة أفضل الزيوت المستخدمة في عمل حمام الزيت بعد الحنة هو زيت جوز الهند.

خلّي بالك

في شوية نقط مهمة قوي ياريت إنك تخلّي بالك منها وإنتِ بتعملي الحنة علشان تطلع النتيجة اللي إنت عايزاها في الآخر وهي:

1- خلّي بالك من المقادير... مقدار المية السخنة اللي هتستعمليها يجب إنه يكون مقدار مناسب يجعل خليط الحنة متماسك ومش سائل.

2- كمان خلّي بالك وإنتِ بتحطي الحنة على شعرك إنك ماتمسكيش الحنة بإيدك ياريت إنك تستخدمي جوانتي بلاستيك وده علشان لون إيدك مايتغيرش.

3-لو كان شعرك جاف ياريت إنك تقللي من كمية الخل اللي هتحطيها على الحنة يعني يكفي معلقة واحدة من الخل وتضيفي 3 معالق من زيت الذرة.

4- لو عايزة تثبتي لون الحنة على شعرك لفترة أطول ممكن إنك تغلي قشور البرتقال والليمون مع الماء الساخن المستخدم في العجن.

5- فيه مشكلة ممكن إنها تقابلك بعد ما تعملي الحنة وهي إن لون الحنة مش باين في شعرك وده ممكن يحصل لو لون شعرك غامق... بس ولا يهمك إنتِ ممكن تقومي بتفتيح شعرك باستخدام الليمون وده عن طريق إنك تشطفي شعرك بالليمون المركز وبعد كده تغسلي شعرك بالماء الفاتر.. وعندما يفتح.. استخدمي الحناء وهتشوفي النتيجة بنفسك..

بس خلّي بالك لو شعرك جاف ياريت إنك ما تعمليش عملية التفتيح دي.

حنة طبيعية بمفعول الصبغة

بعد ما حضرنا للحنة مع بعض تعالوا بقى نشوف ازاي الحنة الطبيعية ممكن إنها تعمل مفعول الصبغة بس من غير ما تؤذي شعرك ده غير إنها كمان هتساعد على جمال وتعومة شعرك..

طريقة التحضير
http://www.66n.com/pics/hosted/0v3po...ubdv6uo8m4.jpg
اخلطي كل المكونات مع بعضها ما عدا عصير الليمون وسيبها لمدة 3 ساعات في طبق بلاسيتك اللي فيه عجينة الحنة وده علشان المكونات دي كلها تتخمر مع بعضها البعض، بعد كده ضيفي عصير الليمون بعد كده حطيها على شعرك من ساعة إلى ثلاث ساعات على حسب درجة اللون اللي إنتِ عايزاه، يعني لو عايزاه أحمر ناري مثلا يبقى سيبيها 6 ساعات.

وخلي بالك إن طريقة التحضير ثابتة في كل مرة واللي بيختلف المكونات على حسب النتيجة اللي إنتِ عايزاها ودي بقى مكونات الحنة على حسب اللون اللي إنتِ عايزاه.

شعر أحمر

http://www.66n.com/pics/hosted/5w2wy...xjq00d7rn2.jpg

المكونات:

1- عشر ملاعق كبيرة حناء.
2- عصير ليمونة.
3-كوباية كركديه.
4- كوباية مية سخنة.
5- ثلاث ملاعق قشر الرمان المجفف.
6- كوباية من خل التفاح أو الخل العادي.

شعر أشقر

http://www.66n.com/pics/hosted/drpr1...kfkr4ms3vb.jpg

المكونات:

1- عشر ملاعق كبيرة حناء.
2- عصير ليمونتين.
3-ثلاث ملاعق كركم.
4- مقدار مناسب من الماء الساخن.
5- ملعقة كبيرة من خل التفاح أو الخل العادي.

شعر بني محمر

http://www.66n.com/pics/hosted/xuyoo...wofpl6vuqi.jpg

المكونات:

1-عشر ملاعق كبيرة حناء.
2- عصير ليمونة.
3- ثلاث ملاعق من خل التفاح أو الخل العادي.
4- ثلاث ملاعق قشور باذنجان مغلية.
5- مقدار مناسب من الماء الساخن.

لشعر بلون الشيوكولاتة
http://www.66n.com/pics/hosted/9gpdx...hxkkp1s04q.jpg

المكونات:

1- عشر ملاعق كبيرة حناء.
2- عصير ليمونة.
3- ثلاث ملاعق من خل التفاح أو الخل العادي.
4- ثلاث ملاعق من بودرة الكاكاو.
5- مقدار مناسب من الماء الساخن.

لشعر كستنائي

http://www.66n.com/pics/hosted/3gijw...4dh8cqllge.jpg

المكونات:

1- عشر ملاعق كبيرة حناء.
2- عصير ليمونة.
3- ثلاث ملاعق من خل التفاح أو الخل العادي.
4-كوب مغلي من البابونج.
5- مقدار مناسب من الماء الساخن.

للشعر النحاسي

http://www.66n.com/pics/hosted/zgfia...ie57jlh13m.jpg

المكونات:

1- عشر ملاعق كبيرة حناء.
2- عصير ليمونة.
3-زجاجة سفن أب صغيرة.
4- مقدار مناسب من الماء الساخن.

لشعر بلون دم الغزال

http://www.66n.com/pics/hosted/uqq0v...zk9mmobwev.jpg

المكونات:

1- 10 ملاعق كبيرة حناء.
2- عصير ليمونة.
3-كوبان من محلول دم الغزال عبارة عن (ملعقة كبيرة من بودرة دم الغزال في كل كوب ماء)
4- مقدار مناسب من الماء الساخن.
5- كوب من خل التفاح (أو الخل العادي).

لو شعرك فاتح وعايزة تغمقيه

http://www.66n.com/pics/hosted/eqieq...pwijxkjns4.jpg

المكونات:

1- نصف فنجان حنة حمراء.
2- نصف فنجان حنة سوداء.
3- فنجان من أوراق عشب البابونج مطحونة.
4- مية سخنة.

الطريقة:

اخلطي المكونات دي كلها مع بعضها وسييها نصف ساعة لغاية ما تتخمر وبعد كده حطيها على شعرك من ساعة إلى ثلاث ساعات أو أكتر على حسب درجة التفتيح اللي إنتِ عايزاها.