|
زوجي يخونني .. انا مو زعلانه بس ابغى ارتاح
السلام عليكم جميعا
صراحه ما أدري كيف أبدأ مشكلتي مكرره كثير وكثير يعانون منها والحل مفقود بس صراحه عندما أشتركت في المنتدى وقرأت الكثير من المشاكل والحلول والأراء رغم إني متزوجه لي 22 سنه ولي أربع من الأبناء وجدت الراحه فيما قرأت وبدأت بالبحث عن الحلقات المفقوده إلى الأن ما عرفتو إيش المشكله (الخيانه الزوجيه):11: أنا زوجي خائن نعم اقولها بكل برود مدمن غزل أعرف من زمان ولاكن ما عمري عرفته إني أعرف أشوف محادثاته في الماسنجر من غير ما يعرف الغريب أنو مو صغير بالعمر عمره 45سنه ولاكن تصرفاته ولد 20 سنه أيش أقلكم ما أعرف أعبر عموما أنا تابعت المنتدى لي شهر واليوم قررت أكتب لكم ليش أستفدت منه صراحه بدات أبحث عن الصفات الي قرأتها في المواضيع ماهي فيني رغم أهميتها مثل الروتين لفت نظري كثير من المواضيع التي تنفر الزوج الى أمراه اخرى سببها الملل والروتين فبدأت أغير من أسلوبي من لبسي منديكور غرفتي من عطوري حتى شراشف السرير غيرتها بالوان ثانيه ------ أما بالنسبه للجنس كل موضوع في المنتدى أقرأه أكون أعرفه ومطبقته وزياده وبشهادت زوجي من نظافه من كل شي ما تتوقعوا وهذا الي مجنني لي زوجي يخونني وهو مبسوط وراضي جدا عن كل ما فيني أنا موكله أمري على الله وصابره وأنا راضيهبحكم الله بس إحساسي مجروح وكل ما أطنش وأنسى وأبدأ أكن ما شفت شي ولا سمعت شي أكتشف غرامياته في الجوال أو النت أو يتحجج بدوره في العمل ويسافر دبي وما أدراك ما دبي بس أبغى أعرف شى واحد ليش الزوج يخون زوجته وهو يحبها وما ناقصه شي ابدا وبأعترافه ليس لي بل لأهله وأهلي الله يخليكم أحد يبرد على قلبي ويعطيني سبب مقنع عشان أقدر أكمل حياتي معاه تم حذف التفاصيل الزائدة + تم تعديل العنوان |
يا برودك يا تناتن.....
تعرفي من زمان إنه يخونك.. وهو ما يعرف إنك تعرفين؟؟؟؟؟؟؟؟ قولي له أنا عارفة من زمان عن سوالفك... خليه ينحرج... بس لا تعملين مشكلة.... أعتقد بعد هالسنين قلبك قسى...وما عدتي تهتمين.... والله بروحي ماني عارفة كيف أنصحك... لأني بصراحة منصدمة........... كيف قدرتي إنك تطنشين للموضوع... وتطوف سوالفه بهالسهولة....؟؟؟ ( لو زوجي يقرا موضوعك كان قال لي ياليتك مثلها.....!!!!!!!! ) |
بالعكس ياأخت بحرينيه ولكن لو علمته أوحس إني أعرف شي بتصير المساله
على عينك يا تاجر وأنا ما أبغي اخرب بيتي ولا عندي أسنعداد أترك عيالي فهو واحد من حلين يا إما استمر معاه بكرامتي وأني ما أدري عن شي أو أطلع وأطلق وأهدم بيتي بعد ما أصارحه إني داريه ومستحيل أعرفه أني داريه وساكته وما عندي ردة فعل أفرضي إني دريته أني داريه وأصر وما همه أيش أسوي هذي ألخطوه ما تصير إلا لما أكون ابفى أبيعه وأبيع عيالي وبيتي وأنا إلى الأن شاريه وأملي في الله كبير أنو الله يهديه وأدعي باليل والله وأصلي وإن شاء الله الله ماحينساني |
والله إنك عاطيته وجه زيادة عن اللزوم المفروض إنك تحطي حد للسالفة وأنا بعتقد إنه بيعرف إنك دارية عنه وعاجبيته السالفة أحس إني ابي أنجلط وأنا قاعدة أكتب الله يكون بعونك |
اقتباس:
أسمحي لي عزيزتي ...ولكن.... أنا لو أعرف إن زوجي يخوني وأسكت.... ما أعتقد إن عندي كرامة.... |
عزيزتي انا بجاوبك عن سؤالك ..
تقولين ليه زوجي يخونني؟؟ فيه بعض الرجال يبتليهم رب العالمين يعني عيونهم زايغة ومايملاها الا التراب يعني مايقدر يكتفي بامرأة وحدة واعتقد زوجك منهم.. لكن حطي عشر خطوط تحت كلمة أعتقد .. بس بصراحة اذا كنتي حاولتي تحلين الموضوع بكافة الطرق الممكنة من غير مايصير فيه اصطدام بينك وبين زوجك ومانفع مالك الا انك تواجهينه يمكن يستحي على حاله وحطي تحت كلمة يستحي عشر خطوط لأنه مو أكيد انه اذا استحى يبطل هالتصرفات يعني يمكن يتركها فترة وبعدين يرجع زي أول ... ووالله انا مااحاول أعقدلك الامور لكن أنا أعطيك احتمالات يمكن تصير ويمكن لا .... على العمووم عليكي بالدعاء وخاصة في الليل صلي ركعتين وادعيله من قلبك ان ربي يهديه وان شاء الله ربي يهديه ويجعلك ملكة على قلبه ومايشوف أحلى منك بنساء العالم كله .. قولي ااامين واعذريني على الاطالة .. |
أشكر لك تفاعلك يا عشق عبادي وسلامتك من الجلطه
بس حبيت اقولك أنو لو كان داري إني عارفه ماكان يطفي جواله من يدخل البيت ولا كان يرتبك من أدخل عليه الغرفه وهو علمسنجر ويغير الصفحه بسرعه على الأسهم وأنا مطلعته فوق فوق ودايمن أقوله قدام أهلي وأهله أنه أخر شي أفكر فيه هو أنه يخونني أوأنه يتزوج علي والأخت بحرينيه ولكن أشكرلك تفهمك لموضوعي بس صدقيني ألي أيده في المويه مو مثل الي ايده في النار أنا أعرف خيانة زوجي ولأنه عندي كرامه +خوف على عيالي وبيتي ساكته بس سكوتي مو علفاضي أنا قاعده أشتغل على أني أصلح من حال زوجي وأدور على ألثغرات ألي سبب هاذي المشكله وهذا سبب دخولي في المنتدى وأستنجادي بكم لعلي أجد عند أحد ما يريحني بنصيحه أو فكره تائه عني ودائمن ألي بره المشكله يكون له رأي لايخطر على بال صاحب المشكله |
ربنا يكملك بعقلك يا اخت تناتن
عندك حق اللى ايده فى الميه مش زى اللى ايده فى النار صدقت المثل ده عن تجربه عليكى بالدعاء و الصدقه و ربنا يقويكى و يصبرك اختك فى الله ام محمد ارجوكم لا تنسونى من دعائكم بظهر الغيب فانا فى اشد الحاجه اليه |
والله يا تناتن إنك جبارة
الله يهديه ويفتح عيونه على شان يشوفك زين |
حبيبتي حبيت اضيف انه مو كل ما يسوي زوجك هو نتيجة تقصير او ثغرة زي ماسميتيها زي اللي اتربينا عليه اي رجال زاغت عينه او عرف وحدة على حرمته كان النقص منهااو ما قدمت له كل اللي يبغاه لانه هذه فكرة جدا خاطئة فمو كل نقص يعزى للمرأة في رجال وانا اشك انهم رجال او عرفوا معنى الرجولة الزوجة ايش ماسوتلهم هو برضوا مايكفيه وكأن المراة خلقت في الدنيا لإرضاؤه لا لعبادة الله
ويااختي الزميلات ما قالولك اخربي بيتك اللي هو مو مسؤليتك بس يعني زوجك قبل ما خانك ليه مافكر زيك في البيت والاولاد واعلمي اذا كان الوضع معكوس ماكان سكتلك وما كان اتنازل ولو بعقلة من كرامته فمثلا اطلبي منه تخرجوا خرجة رومانسية بدون الاولاد وافتحي معاه الموضوع لكن بدون خصام وحاولي في كلامك معاه ما تركزي على شي قد ماتركزي على انه هذا الموضوع قدايش جرحلك مشاعرك وكيف هو هانت عليه كل هذه العشرة ودائما خلي شعارك مع زوجك خاصة الصراحة والمواجهة عشان ماتوصلي بعد كدة لطريق مسدود وعشان يحس بنص المسؤلية وبالنسبة للصورة اللي رسمتيها له قدام اهلك فاتمنى تكون بدافع حبك له مو زي ما فهمت من كلامك خوف من الشماتة عالعموم حفظي عليها واصقليها قد ما تقدري وخاصة قدام اولاده |
| الساعة الآن 09:44 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©