|
رساله الى كل ام وكل اب
انا احس اني تعبانه ونفسي اي احد يسمعني
لاني وبصراحه مابي اشكي همي لأمي او خواتي انا اكبر خواتي والمدلله ودلوعه ابوها وكل طلباتي مجابه ... وكبرت ولا كنت افكر مجرد تفكير بالزواج لاني في بيت اهلي ملكه.. وطبعا امي الله يحفظها ويهديها ما كانت تخليني ادخل المطبخ معودتنا ان المطبخ شي مقرف لدرجه اني لما اجي من المدرسه متعلمه طبخه ابي اطبخا واطبقها ترفض وبشده ولا حتى ترتيب امور البيت والا غسيل والا كوي او حتى ولا تتفاجؤون تقشير وتقطيع الفواكه وطبعا لما وصلت 16 سنه بداو الخطابين وانا كنت ارفض نهائيا ولما كملت 18 سنه جاني عريس من قبل صديق ابوي وشفت ابوي مهتم بالموضوع وسال عن اخلاقه وكل شي تمام ومهندس وشاب مثقف واخلاقه عاليه انا فكرت اني لما اتزوج راح اعيش عيشه حلوة وكلها حب ورومانسيه وطلباتي اوامر ودلع واني لما اتزوج راح اكبر بنظر امي وابوي وافقت طبعا ............ أمي جلست تبكي تقول لابوي حرام عليك لاتبعد بنتي عني..... وللعلم امي وابوي بصراحه مافهموني وش الزواج وش هالحياه الجديده اللي تنتظرني ولا اي شي ولا حتى اقلها عن العلاقه الخاصه مع اني كنت جاهله فيها ليش؟؟ لانهم يعاملوني مثل معامله الاطفال وخصوصا اخواتي واخوي كلهم اطفال اصغر مني وتمت الخطبه ......والخبر الادهي والامر اللي كان بنظري هو أمي وبعد شهر من الخطبه طلعت حامل انا جتني خيبه امل تحطمت وابوي انبسط وكذلك امي وكل البيت فرحانين وبالذات ابوي لانه قال فرصه عشان العروس تتعلم الطبخ طبعا يقصدني وانا كنت بالاساس تفكيري مشوش ومتوترة وخايفه من الزواج ومتردده ومن اوووول امي مكرهتنا بالمطبخ قمت اعصب واصارخ وابكي تركوني على راحتي وتزوجت وهنا بدت المشكله هنا تحطمت كل امالي زوجي يعاملني زي اخوه او صديقه دايم جالس بالبيت بخيل غير لبق مايدلعني مايمدحني ماهو رومانسي ابدا ابدا دايم الاستهزاء فيني وانا مهمله في بيتي ماعرف اطبخ وطبخي شين وترتيب بيت ماعرف قهوه ماعرف اصلح والسبب امي يوم تعلمت الطبخ بدل مايمدحني حتى اتحسن حطمني قال طبخ شغاله اهلي احسن من طبخك وش رايك اوديك عندها تعلمك قهوه يقول لي زوجه عمي تصلح قهوة تجنن وهذا غير اذا لبست وكشخت بدال مايقول وش هالزين وش هالكشخه يحطم وشهذا وليش كذا ماعمره بحياته شرا لي هديه انا ادري بتقولون كيف تبينه يشتري لك هديه وانتي مبهذله بعد زواجنا بشهرين راح انتداب شهر داخل البلد قلت بتاخذني معك قال انا فاضي لك وطول هالشهر بدال ما يكون مشتاق لي ينافخ ويصارخ واسلوبه خشن الى ابعد الحدود طبعا لما رجع كان ملهوووف علي بس طبع البخل ماخلاه يشتري حتى وردة وحياته نووووووووووم طول الوقت وغير كذا حارمني من الاطفال وابوي قرر يجيب لي شغاله قال استاذني من زوجك رفض قال لا مو بكيفك طبعا شفت انه بخيل بعت ذهبي وصرت اصرف على نفسي صح اني مهمله بس احترمه واقدره واحترم اهله واحبهم واي مكان استاذن منه حتى وهو مسافر وبعيد عني استاذنه في كل شي وهاديه وماني ملقوفه ولا اسأل فيه يعني مخليته على راحته المشكله اني لما اشوف حالي اتعب واتعب اكثر لما اشوف خواتي الخمس راح يكونون نفس مصيري وكله غلط امي اللي ما علمتنا الطبخ وترتيب امور البيت وغلط ابوي اللي دلعنا دلع اثر في حياتي وغلطي اني ما حاولت اتعلم وافهم امي وابي لغلطهم وغلط زوجي اللي يعاملني معامله زوجين متزوجين من ستين سنه مو سنه وثلاث شهور ابي انبهه كل ام وكل اب وكل زوج وكل زوجه ينتبهووون لنفسهم ولعيالهم ولزوجاتهم ولأزواجهم الام تعلم بنتها والاب لايدلعها دلع زايد والزوجه لازم تعرف تدبر امور زوجها والزوج ضروري يعامل زوجته معامله حلوة ويمدحها ومايكثر انتقاد فيها تراه حساسه هذي رساله واتمنى تقرونها واسفه اذا كثرت بربره وكلام بس صدقوني معناه ما بعدها معناه اختي مراعاه عدم ذكر اسماء الدول،،، بارك الله بيك ،،، ام اثير |
لا تعليق!!!!!
|
الله يجزاك خير الجزاء
انا بعد كنت مثللك في بيت أهلي وهذا الشي تعبني كثير بعد الزواج الله يهدي أهلنا الدور علينا الحين لازم نعلم أخواتنا ونحذرهم عشان ما يشوفو اللي شفناه الله يريح بالك ويسخر لك زوجك |
جزاكِ الله خيرا على هذه الرسالة لكل زوج وزوجة
ونسأل الله تعالى أن تتغير حياتك الزوجية إلى الأحسن عليك اللجوء إلى الله والدعاء لزوجك بأن يهديه وعليه أن يعرف ويعلم ما عليه من التزامات وواجبات تجاه زوجته والعكس بالنسبة لكِ ما عليكِ من حقوق تجاهه إن شاء الله مع مرور تتحول حياتكما إلى الأحسن عليكِ بالصبر وأعانكِ الله تحياتي |
اختي الله يعينك
عندي اقتراح بسيط تروحي عند اهلك سبوعين او شهر وتكوني قبل لا تتطلعين من البيت مرتبته ومزينته وتاركه له رساله طويله فيها كل اللي قلتي واللي بخاطرك ... وتجلسين بها الشهر او الاسبوعين تتعلمي كل شي عن الطبخ والترتيب وووو.......الخ ... او اذا امك ماتساعدك تتعلمي من الشغاله ...المهم تدبري حالك وبذكرك بشي ما اتوقع فيه وحده على طول صارت تعرف تطبخ وتسوي كل شي من اول زواجها.... الا اذا كانت منزوجه كبيره وفاهمه .. وانا كنت مثلك بس على خفيف بصرااحه وهونيها وتهون ... وانا متأكده انك بحاله نفسيه سيئه جدآ اللحين...واضح من كلامك روقي وتذكري حسنات زوجك وحطيها قدام عيونك.... والله يعينك |
الحقيقة شعور جميل منك أختي تجاءه هذا الموضوع احب أن اضم صوتي الى صوتك نداء الى كل أب وأم ابناءكم امانة لديكم لذا أحسن اليهم بتعليمهم مايعود عليهم بالنفع والصلاح في جميع أحوالهم ومراحل حياتهم . . كما أقول لك اختي حاولي أن تصلحي من حالك بان تتعلمي ترتيب وتنظيم بيتك وفنون الطبخ فهذا ليس بعيب ولا تعتمد على أبويكي في كل لحظة
|
اشكركم واشكر بالاخص اختي هاايدي
والصراحه نفسيتي مرة تعبانه واذا على الطبخ حاولت وحاولت بس مايعجبه بدال مايمدح يحطم والمشكله اذا شبع وقال الحمدلله قال لي طبخك شين هذا غير اسلوبه القاسي معي يعاملني كأني ام 60 سنه وانا لسى 18 محتاجه حب ومتاجه حنان ومحتاجه انه يحس فيني واذا جلست معاه جلست مصارحه وفهمته ان الكلام الحلو مع الزوجه ضروري قال انتي تبين تصيرين عروس طول عمرك خلاص الزوج يقول لزوجته حبيبتي وقلبي وحياتي الا ايام الزواج بعدين ارتقي بتفكريك عن كذا خلاص اكبري صيري حرمه والله اني تعبانه نفسيتي محطمه هو ماهو شايب لسى 27 بس مادري ليش اسلوبه قاسي بصراحه انا تحطمت في زواجي تحطيمه محترمه احس اني خلاص سنه ضاعت من عمري بدون فايده تعبت ولا قادره اتكلم ما اقدر اشكي لامي لانها اللي فيها مكفيها ولا عندي خوات كبار فاهمات نفسيتي جدا متدمرة |
وسعــــــي صدرك...
اغلب الرجال كذا ...ويمكن انتي بعض تصرفاتك زادت الطين بلــــه ... لاتزعلي من كلامي ..بس كلـــنا نسوي تصرفات ...تنعكس بردة فعل تصير عنيفه علينا .. <<توااااضعي له >> وحسسيه انك محتاجه له لوحده بهالدنيا ... وانه اهم من ابوك وامك والدنيا كـــــلها... لا تيأسي ...حاولي انك تطبخي معجنات ... وحلويات وقت المغرب ... ومو كل الدنيا اكل وشبعه .... وطبقي هالنصيحه .... اذا طبختي وحطيتي الاكل ...قولي :والله تعبت فيها بس من اتذكر اني اطبخ لحبيبي وروحي <.........> يروح كل التعب واتحمس زياده ... هاااه عيوني وش رايك بالاكــــــل ....؟؟ بيستحي وبياكل وبيمدح لاشعوريآ... والله يسخره لك .. |
يا أخت ريم
في الحقيقة أعتب عليكِ قرأت لكِ رد في أحد المواضيع والخاصة بجمال وغرور المرأة الجميلة واذكر أنكِ قلتِ لزوجك أنا مغرورة وما إلى ذلك .. حتى أنكِ قلتِ اتخذ موقف تجاهك وزعل منكِ على هذا التصرف .. إذن لا تعاتبيه عندما يقول لكِ ذلك علينا أن ننظر لأنفسنا ونقرر أن نغير ما بداخلنا إلى الأحسن والأفضل وفي طريقة وأسلوب تعاملنا بالآخرين لنحظى بنفس المعاملة التي نحبها .. فإذا كنتِ تحبين زوجك فعلاً لا تتغالي عليه وإياكِ تقولين له أني مغرورة أو أي عبارة تجرح المشاعر فمن المؤكد ستؤثر في نفسيته مهما كان وقد يكبت ذلك ولا يبوح بها إنما تظهر من خلال تصرفاته وأفعاله معك كما في شكوتك هذه .. أسأل الله تعالى لكِ التوفيق تحياتي |
ينقل لعالم المقبلين على الزواج ليجد التفاعل المطلوب
|
| الساعة الآن 08:09 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©