عندما ينعدم الكلام بين الزوجين ؟؟؟
 

السلام عليكم و رحمة الله و بركاته
اخواني و اخواتي اعضاء المنتدى ليس لي غير الله ثم غيركم اشتكي له حالي
لازم افرغ و لا بنفجر
ما اقدر اكلم احد غيركم كل اللي حوالي اما ما يقدرون ينصحون بحكم القرابة المشتركة بيني و بين زوجي و لا ما عندهم خبرة فالصمت يكون افضل لي
المهم انا كتبت موضوع قبل كذا اشتكي فيه زوجي الذي يفضل اصدقائه علي ( اللي يشتغل بعيد 6 ايام و يجي يومين و يسهر مع ربعة في الليل و ينام النهار )
المهم هو لحد الحين ما تغير و مع اني الحين في الشهر الاخير المفروض يهتم فيني اكثر و يجلس معاي خصوصا في الوقت المتأخر من الليل اضل لحالي انتضره و الكل ينام وراهم مدارس يعني اذا صار لي شي ما حد بيدري عني
و خصوصا اذا كان في ازمة مالية يكثر الطلعة بزيادة يعني ما اشوفه الا و هو نايم و هو من النوع اللي كلامه قليل و اذا كان في ازمة بالغصب تتطلع منه كلمة و اذا سألته عن شي يتم ساكته مده و يمكن يمكن يرد علي
تصوروا ان هذا الاسبوع يوم ما جى من الديوانية الا متأخر سهر على النت الى الصبح و بعدين نام الى المغرب و طلع من خمس المغرب ولا اتصل ولا شي اطالع الساعة و انا انتضر اخاف اتصل و يكون في الديوانية و يعرفون ربعه اني المتصلة و لا يرجع الا متأخر و فعلا اتصلت تسع الا هو عندهم المهم ان جاني الم في بطني من 9 و نص و انا لحالي في الشقة قلت اصبر شوي يمكن مو ولادة ما يصير ازعج عمي ولا اهلي و هو موجود يمكن يرجع مبكر اصبر نفسي و منقهره في نفس الوقت منه المفروض ما يفارقني وانا في التاسع و صارت الساعة 11 و هو ما شرف و انا اتلوى من الالم ووجهي احمر و دموعي اربع اربع :( :(
شلت روحي بالغصب و رحت جنب التليفون و اتصلت عليه و سألته متى بترجع حس ان صوتي متغير و قال الحين بس ما جى الا عقب نص ساعة فكر ان صوتي متغير لاني زعلانه انه طول الغيبة بره
و بعد ما وصل قام يتشاني و يقول اش فيك ( يعني مايدري ) المهم قلت له اني اتألم فرح و قال يالله نروح المستشفى بس انا قلت ننتظر شوي يمكن مو ولادة و الساعة 12 خفيت شوي و كلمت الوالدة و قلت لها ان عندي آلام جابت العود و بخرتني و الحمد لله اشوي اشوي راح الالم مشت الوالدة بعد ما وصت الخالة علي
جلست شوي يم زوجي وهو على النت الا اتصل عليه واحد من الشله بيمره و يأخذه البيت يضبط له المكبيوتر و الساعة 2 و قاله يالله انا طالع على الباب ( ما اعتذر و جلس جنبي و انا تعبانه )
مع اني قلت له هالوقت هذا ما يستحي ، خليها لبكرة ( طبعا هو ما يرد طلب لهم ) راح انقهرت و رحت نمت
انا اصبر نفسي لاني اذا كلمته يزعل ما يرضى عليهم و اذا اصريت عليه انه يجلس يجلس وهو مبوز و لا كلمة يعني ما تسوي علي هالجلسة
انا اصبر نفسي اقول بكرة بيزهق منهم بكرة يستقر بكرة بيجي البيبي و ينشغل ابه و يجلس عشانه و لا انا انشغل بالبيبي و اطنشه على طول
معليش طولت عليكم حيل بس وش اسوي طقت عيشتيه
بس اللي عنده اسلوب معامله ينفع مع هالزوج لا يبخل علي ابه
مع تحياتي
ام النوري

يا بنت الحلال معليش

في كثيرين ما بقول عليهم ما عندهم إحساس لأنها كبيرة شوي .. لكن ذي ما تقولي خصالهم كده عندهم عدم تقدير للمواقف ومن النوع الملول ( الطبع غلاب ) .. ويوجد بعض الأزواج بيهربوا من زوجاتهم عند الحمل خاصة عندما يحدث تغيير للزوجة من شكل وانتفاخ بطن وانتفاخات أخرى .. وده مش معناة إنو إعجابه بزوجته قل وإنما ظروف مؤقته سرعان ما تمر .. ويرجع كل شيء لطبيعته .. والمرأة عند حملها حساسة جداً وده شيء طبيعي .. وعندما تضع مولودها بالسلامة صدقيني تكون أكثر إثارة من قبل ..

ربنا يهدي سركم .. ويرزقكم الزرية الصالحة ... آمين

حاولي معه التالي :

في احدى المرات القادمة وعندما يسهر بجنبك .. اشكريه في الصباح مع قبلة حارة وكم حركة دلع (انتي اشطر في هذه الأمور) لأنه سهر معك .. ويرجع كلامي هذا من قولك انه لا يرفض لأصدقائه طلب .. اي انه يريد منك ان تطلبي منه ما تريدين (باسلوب لطيف) ثم تشكريه على ما قام به من جهد .

اقرأي موضوعي لتتفهمي وجهة نظري أكثر :
http://www.raf7.com/vb/showthread.php?t=8605

والله الموفق ؛؛؛

ام النوري
عزيزتي اسمعي كلامي
كثير من الازواج هذي حالتهم والله العظيم انك بالف نعمه لوتشوفين مصيبة غيرك تهون عليك مصيبتك طيب وش رايك بالي طقها زوجها الين ولدت وبعد ولادتها بساعين بس طلقها والسبب انها سالته وين راح
حبيبتي اهم شي الحين تحافظين على نفسك وعلى الي في بطنك واهم شي نفسيتك لازم تكون مرتاحه على الاخر اذا تقدرين روحي لاهلك واقعدي عندهم كم يوم الين تولدين صد\قيني بعد الولادة راح يتغير 100% صحيح ما عندي اطفال بس حالات كثير شفتها وعايشتها بنفسي
صدقيني اذا شاف ولدة او بنته راح ينسى اسمه راح يطير من الفرح عاد هذيك الحزة الي تشوفينه مروق ومبسوط خذيه بالاسلوب الي مايزعله يعني اشتكي له بدلع مع كلام حلو لاتصارخين وتضاربين ترا اقلها بيرميك عند اهلك كم يوم وماراح يسال فيك الين تتصلين فيه يعني تفادي هالاسلوب ترا ماينفع مع الرجال ابد (الكلمة الحلوة تلين الحجر)
بس صبرك الي تولدين وادعي له بالهداية وان ربي يسخره لك وينزل عليكم الهدوء والطمانينة
عزيزتي خلي في بال الحين ان نفسيتك راح تنعكس على مولودك يعني اذا كنتي هادءة ومرتاحه راح يرزقك ربي ان شاء الله بمولود هادي الطباع واذا متعصبة وكله مكشرة وزعلانه الله يعينك يعني لا ارتحتي قبل الولادة ولا بعدها
حبيبتي خلي اهتمامك كله بنفسك الحين واتركي زوجك عشان ماتعصبين وتزعلين وبعد الولادة بتشوفين الفرق
ما اقول الا الله يسخره ويهديه ويكتب لكم السعاده دنيا واخرة

الأخت أم النوري

كان الله في عونك وعليك بالدعا له بالهداية ترى الدعاء هو سلاح المؤمن كان الله في عونك

الأخت طماطم معقولة الكلام الي تقولينه
زوج يطق زوجته لين تولد وبعدها يطلقها ؟؟؟
فيه ازواج بالحيوانية الي تقولينه هذي مافيه قلوبهم رحمة ابد الصراحة انا مو مصدق اننا في هالزمان تصير الأمور هذي
لاحول ولا قوة الا بالله

السلام عليكم ورحمة الله

أحيي أخوي ( دكتور القلوب ) وألأخت ( طماطم )

ولست أزيد على ما ذكروه قولا ، سوى أني أتمنى أن تأخذي بكلامهم بجد الأخذ


أشكركم أحبتنا

أخوكم / سايكاتريست

السلام عليكم و رحمة الله و بركاته
 

مشكورين اخواني و اخواتي على ردودكم
والله يهدي الجميع و يوفقهم .... آمين
و انشاء الله ىخذ بكلامكم اخواني انا مندهش و دكتور القلوب و سعودي 2000 و سايكاتريست و طماطم
وان شاء الله ما نسيت احد
مع تحياتي
ام النوري