|
طلقني ... و يقول يموت فيني
السلام عليكم و رحمة الله .... اخواني و اخواتي ... انا وايد محتاجتكم .. محتاجة حد يفهمني شو سبب الاشياء اللي تصير في حياتي و شو تفسيرها .. لاني قربت انهار .. و مالي حد يساعدني
ااتزوجت قبل حوالي سنتين من ريال الكل يشهدله بالاخلاق و الاحترام و قبلهم الالتزام بالدين ... عشت معاه احلى ايام حياتي و الله رزقني منه بولد تتمناه كل ام و الحمد لله من ايام الخطوبة اتعلقت واااااااااااايد بزوجي و حبيته حب الوت .. و هو بعد وايد اتعلق فيني و حبني و صرنا تقريبا ما نتفارق .. يعني طول الوقت يا انه عندنا في البيت .. او مع بعض عالتلفون طول الليل و النهار ... بعد الزواج حبينا بعض اكثر و هو كان وايد يدلعني و يريحني .. لدرجة اني كنت في اوقات وايد افكر شو الشي الزين اللي سويته في حياتي و الله جازاني عليه بهالزوج الرائع اللي ما كنت احلم فيه فجاة بعد حوالي سنه و نص تغير زوجي علي و صار ما ييني البيت ... يعني يتم في الدوام او في بيت ربيعه .. تمينا على هالحال اسبوعين و انا احاول اتصل و افهم شو اللي صار بس ما رضى يخبرني .. بس كان واضح انه مجروح جرح كبير بس انا مو عارفه شو اللي سويته و زعلى مني ... بعدين يانا البيت و دخل عندي الحجرة (انا ساكنة مع اهلي) و بدون مقدمات قال ان نحن ما ينفع نكمل مع بعض و انه بيطلقني ... بكيت و اترجيت و شوي كنت بحب ريوله بس ودي افهم ليش؟؟ .. شو اللي سويته؟؟ قال انه ما بيخبرني لانه ما يبغي يجرحني ... وبدون اي تفسير طلقني و روح بعد شهرين تقريبا اتصل فيني ... وقال انه بيتطمن علي و على ولده ..و تكلمنا دقايق و سكر .. بعدها زارنا في البيت اكثر من مرة عشان يشوف ولده و طبعا انا ما كنت اطلع عنده كان يجلس مع اهلي ... بس من بعد اول اتصال صار دوم يتصل فيني ... و شوي شوي رد لكلام الحب و العشق و انه ما يقدر يستغني عني .. لدرجة اني كنت احس بدموعه و هو يتكلم .. بس بعد ما رضى يخبرني ليش طلقني ... بعدها عرفت من اختي عن طريق زوجها ان في ناس تكلمو عني جدام ريلي و قالوله اشياء مو زينه عني .. بصراحه انا قبل 8 سنين تقريبا (كان عمري 16) كلمت واحد بالتلفون بعدها اهلي عرفو و طلعت السالفه من البيت بسبب حريم اخواني الله يسامحهم ... ففتحت الكلام مع زوجي و سالته اذا كان هذا هو السبب و قال ان هذا السبب و انه ما زعل لاني كلمن واحد بالتلفون و انا في اول مراهقتي لان هذي غلطة الكل صار يطيح فيها و انه عاشرني و يعرف اني مستحيل اخونه او حتى افكر بغيره .. لكنه طلقني لانه عرف السالفة من برا و حس اني غشيته يوم ماخبرته ... طبعا انا فهمته ان كان مستحيل اني اقوله عن موضوع مثل هذا و كان لازم استر على عمري خاصة انه شي صار من سنين طويله قبل ما اعرفه بوايد ...هو اقتنع و قال ان اللي جرحه هو انه حس اني استفلته يوم ما خبرته بعدها بكم اسبوع (طول هالفترة نحن متواصلين عالتلفون و طبعا اهلي ما يدرون) قال انه يحبني و ما يقدر يبعد عني اكثر من جي و قال انه بيردني .... بس من يومها ما صار شي .. صارلنا الحين حوالي شهر و نص ... قبل اسبوعين فتحت معاه الكلام قالي قريب بس مادري احسه مطنش ...ما ادري اذا صدق بيردني ولا لاء سوالي لكم ... هل تعتقدون انه صدق بيردني؟؟ لو لاء شو اللي جبره يقول انه بيردني من الاول؟؟؟؟ هل السالفة اللي صارت بتتم تعكر حياتنا ولا بينساها؟؟؟ هو طلب مني انسى الموضوع و ما اتكلم فيه ابد ولا اخبر اهلي انه يدري .. لال اختي طبعا لانها هي اللي خبرتني في الاساس كلامي معاه في التلفون الحين .. هل يعتبر نوع من الزنا؟؟؟؟ انا وايد مضايقة من هالوضع بس ماقدرت اصبر على بعده شو اسوي؟؟ ارجوكم انصحوني ... محتاجة لرايكم واااااااااااااااااايد |
طلاقكم كان بائن؟
اذا كان بائن ما يجوز تكلمينه والله يردكم لبعض ماعندي شي اكثر اتمنى الاخوه والاخوات يفيدونك اكثر |
هلا اختي العزيزة والله انا ما اعرف شقولج بس حبيت اوضح لج نقطة يمكن اللحين يقول انج كلمتيه من ورى بيتكم يعني يمكن رد تعيدينها مرة ثانية لا تكلمينه وااااايد ابعدي عنه فترة واذا سألج قوليله انا صادتني المشكلة القبلية ما ابيها تتكرر اذا تبيني وتبي تردني انت تقدر حاولي قد ماتقدري انه مايهدج بس يمكن اذا بعدتي عنه اكثر يتوله عليج ويردج واللي في الخير الله يسويه ويارب يارب يا رافع السماوات بغير عمدً ويا راسي الجبال ومسخر الأرض ويا خالق ياعليم ياحكيم يا ملين الحديد لداوود وياعلام الغيوب ردها الى زوجها والله يهنيج ويسعدج يارب |
زوجك عرف أنك كنت تكلمي وكانت ردت فعله أنه تركك مع علمه إن هذا أيام مراهقة وسالفه قديمة إن شاء الله ماتتكرر
لكن أختي انت ناقضتي نفسك حرام تكلميه لأنه صار ما يحل لك لما طلقك أنت بكذا تعززي فكرت أنك بنت لعابه وتكلمي من ورا أهلك ...قولي له أن أمك عندها خبر أنك تكلميه ، وعلميه أنك كلمتيه عشان تعرفي السبب وخلاص المكالمات مالها داعي لأنها ماترضي الله إذا في قلبه شيء يبي يقوله يكون عن طريق أهلك أثقلي حبيبتي وبيردك وبيحترمك أكثر ويتأكد أن هذا مو من طبعك وأنك كبرت وصرت أهل أنك تكوني زوجه وأم |
اقتباس:
|
تم النقل الى هذا القسم حيث مكانه المناسب
الله يختار لك الخير اختي وانصحكِ بصلاة الاستخارة |
الله يردكم لبعض ويسعدكم
|
اقتباس:
|
اسأل الله ان يردكم احسن من اول يارب
واختي الكريمة اثقلي شوي حتى يحس بفقدانك ويرجعك بسرعه الله يوفقكم |
لاحول ولاق وه الا بالله
بأذن الله راح يرجعك اختي لكن اكثر ي الدعاء .... والله العظيم شي يقهر منه صراحه ولا تزعلين مني .... قولي له كيف بالله عليك اقول لك على لحظه طيش ومراهقه مرت وانتهت ولا صار فيها شي عظيم .... وانك انت تقول واثق مني .. والله ستر علي ليش اهتك ستار الله عزوجل ستره علي ؟؟؟؟ وحتى لو قلت لك يعني ماراح تطلقني واكون جنيت على نفسي بيدي .... الله يوفقكم ويسعدكم |
| الساعة الآن 10:17 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©