|
أحس أني بختنق ..... ساعدوني !!!!
تحياتي لأخواتي العزيزات
أنا لي متزوجه 11 شهر من ثاني يوم بالزواج دق النقال حق زوجي وهو يكلم سمعت صوت بنت تكلمه وهو أرتبك وراح يكلمها على أساس أنه صديقه ومشيتها له ولا سألته .. قلت يمكن غلطانه . بعد ما رجعنا من شهر العسل سمعته يكلمها بس هالمره نسى وجودي وكلمها على أنها بنت ويوم واجهته أنكر وقال هذا خويه بس مدلع علشان كذا يكلمونه كأنه بنت ( هذا كلام يدخل العقل ) . وبعدين لقيت في الكومبيوتر محادثات مع بنات ( علاقات على النت من اللي .... ) وقال هذا أخوي اللي مسويها . والمشكله أني كل ما صارحته أنكر وجاني وقام يحب على رجولي علشان أرضى عليه , وللحين يكذب علي وأنا عارفه أنه يخوني وهو عارف أني داريه بس صابره يمكن ينصلح حاله بس ما أدري الين متى بيطول صبري !! وأنا متأكده الحين أنه كل يوم يكلمها بالمسنجر .... ومدري أيش أسوي . اعذروني طولت عليكم بس من همي وقهري وكل ليله أقعد أفكر بالموضوع وأبكي . أنصحوني أيش أسوي إذا نفذ صبري . |
يمكن زوجك عنده علاقات قبل الزواج ويريد يتخلص منها بس مش قادر لانه تعود عليها ........ لازم تصبرين عليه فتره
لين مايقطع علاقته فيهم وتحسسي حاجاته هل انتي مقصره بشي يجبره انه يدور ويبحثعن غيرك صارحي نفسك بهالشئ لان الرجل اذا حصل كل شي بزوجته يحس بالاشباع التام ومابيكون له نفس يتعرف على بنت او يكون علاقات انتي اقعدي معاه يوم يكون هادي ومزاج اوكي وصارحيه بهدوء بالاشياء اللى يريدها ومش ملاقيها منك بالتوفيق ان شاءلله الله |
مررراحب أختي كثير شباب علي هاذا الوضع وانا كنت مثل زوجك بعد زواجي كنت عازم علي قطع أي علاقه وفعلآ قدرت أصمد كم شهر لكن ما قدرت أصمد أكثر مع أن المبادره مو مني بل من الطرف الآخر المهم شوي شوي وشكت المدام :11: يوم تأكدت حطتني قدام الأمر الواقع :29: طبعآ أنكرت لكن مع زعلها فكرت كثيييير وقررت أني أنهي كل العلاقات ,, والحمدلله مبسوط نصيحه حاولي تتأكدي واذا تأكدتي واجهيه با الحجه والبرهان وأزعلي منه لو تروحي لبيت أهلك بس هاه يعرفوا عن الموضوع قولي سوء تفاهم وبس ,, وبعدها بيجيك طالب السماح ,, تحياتي |
أختي لا تنسي ان بعض الظن أثم
وزوجك ممكن يكون كلامه صحيح واما أذا مسكتي شيء واضح مثل محادثه محفوظه ويتكلم عن الحب والعشق وتاكدتي انه ليس لأخيه لكي حق تنصحيه بانه رجل محصن وعقابه ليس سهل وانتي تستطيعين بذكاء ويتخوفيه من الله بان يترك هذه الامور اما أي حل ثاني فأنصحك نصيحه الاخ لأخته لا تخربي بيتك ممكن ان له علاقه ولكن ممكن تكون مسنجر فقط تخربي بيتك من اجل هذا كوني ذكيه وأستفيدي من نعمه العقل وحاوريه وانصحيه وهددي [انك لا ترضي العيش مع من لا يخاف الله ولا يراعي اعارض الناس ومنها سوف ترجعين زوجك لك وتكسبي الاجر |
يا غالية
ما استشففته من شكواك .. ومبررات زوجــك أن زوجــك يطمح للغاية .. إلا أنه لا يملك الوسيلة زوجــك راغب وربما أكثر منك في الابتعاد وقطع كل العلاقات إلا أنها بقيوده تكبله .. ووسط زنزانتها تسجنه فكونــي عوناً لزوجــك لا عوناً عليه اصبــري .. غضــي الطــرف .. ومــادام هذا حبــه لك .. فامنحيـه حباً يفــوق حبه واملكيــه باللطف واللين .. والتودد وحسن التبعل فإن لم يكن كل ذاك سبيل صلاحه فلن تعدمي أجر تبعلك فقط أخلصي النية لرب العالمين وهو لن يخذلك *** خالص مودتي |
اختي الغاليه
انا مع عبير الاحلام في كلامها حاولي اختي انك تكسبي زوجك وتلهين عن الامور هذي يعني تضيع وقته ويكون معاك طول اليوم او تطلعون وتقولين له يسكر جواله وانتي بعد سكري جوالك وقولي ما نبي ازعاج ومانبي احد يتصل علينا نبي نكون مع بعض ونستانس وبعدين سوي له من الحركات الرومانسيه اللي تشوفينها في المنتدي طبعا اللي يناسبك انتي ويمشي مع ظروفك وازوجك بيفرح ومابيتعداك وراح يقطع علاقته بالامور الثانيه والله ولي التوفيق |
حبيبتي,,,
للأسف انا مثلك ليي سنه متزوجه وكنت شاكه بس ساكته,,وكان عنده رقم قديم ورديف للرقم,, لما تزوجنا طلع رقمين جدد وراحد لي وواحد له,, قلت له ورقمك القديم؟ قال باقطعه وباخلي رديفه,,قلت ليه؟==>وانا شاكه بالموضوع وبالاحرى اعرف شيء.. قال تجيني ازعاجات من بنات ويعرفون اسمي بس مااعرف من عطاهم الرقم!! انا سكتت وخليت بداية الزواج تعدي على خير,, بعد 3 شهور حصلت الفاتوره للرقم الرديف وفيه اتصالات بالساعات,, وكمان حصلت رسالة ايميل بالجهاز وفيها اسم البنت,, وللأسف هو اللي مرسل لها وكاتب اتصلت على رقمك ورد رجال,, ياليت تتصلي علي من رقمك الجديد وهذا رقمي,,,وحاط رقمه,, انا من بعدها ماتحملت,,وقلت له اقطع الرقم قال ليه قلت بس بدون سبب,, قال تشكين اني اكلم غيرك؟او عندي علاقات؟ قلت مايهم بس اقطعه بدون ماتعرف السبب,, والمشكله كل مالمحت له يقول تشكين وانا مااكلم يعني ينكـــــــــر.. صبرت وقطع الرقم لكني لازلت اشوف عليه حركات وحصلت قبل فتره مسج بالنت ,,.. الله يصبرنا ويهديهم,,مشكلتنا مدلعينهم وشايلينهم بعيونا,,.. بس تبغين الصراحه اللي مصبرني اني الحمدلله عارفه نفسي اني محترمه وبنت اصول,, وماارضى على نفسي طريق الحرام حتى لو بالجوال,, غير كذا انا رفيقة دربه وهم هذولي اللي يكلمهم مجرد علاقات عابره "يارب يصدق احساسي"... ربك يهونها علينا ويصبرنا عليهم,, تحملي ياقلبي .. مرده يعرف قيمتك ويندم.. |
ركزي أختي honey semo على كلام عبير الأحـلام...
* * * أختي li8 0f iz الله يكملك بعقلك فعلا عين الصواب.... |
اقتباس:
وعقبالك |
والله اختي مادري شو اقولج .. الخيانه وايد صعبة و مافي وحدة تتحمل انها تعرف او حتى تشك ان زوجها يخونها .. الله يصبرج و يفرج همج
اول شي لازم تتاكدين انه يعرف غيرج حتى لو بس تلفونات او عالمسنجر .. لو تاكدتي مافي الا انج تصارحينه .. تراه لو كان يخونج و حاسس انج عارفه بس ساكته و مطنشه بيتمادى ... لازم تكونين حازمه وياه ... اذا هو من الحين بيخون وانتو ما كملتو سنه ولا بعدين بعد كم سنه يوم بيبدا الملل و الروتين في حياتكم شو بيسوي بالضبط؟؟؟!!!! لازم تفاتحينه و تواجهينه ولا تعطيعنه اي مجال يتهرب .. بس بشرط تكونين متاكدة من كلامج |
| الساعة الآن 02:00 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©