رجيتكم لاتردوني لان مابيني وبين الجنون الا شعره
 

السلام عليكم ورحمة الله وبركاته اكتب لكم بعد ما احترت وش اسوي وبعد ما ضاقت بي الدنيا واكتب ودموعي تسبق حروفي انا سبق وكتبت مشكلتي ويمكن الاغلبيه عارفينها وللي مايعرفها احب اقولها اني زوجةبس بالاسم او بمعنى اصح خدامة للعيال وبس فزوجي مايخاف الله فيني ولافي عياله عمره ما ركع ركعه لله يشرب ليل ونهار وبخيل مايصرف ريال علينا انا اللي متحمله كل المصاريف وفوق كل ذا عاجز جنسيا لم يقربني من ثمان سنوات هو بجناحه وانا بجناحي مابينا حتى كلمة وانا اصغر منه ب15 سنه وماعلي قصور بشهادة الكل وفوق كل ذا بعد يخوني ويكلم بنات واكثر من مره سمعته يكلم وسويت نفسي ما سمعت ولا دريت عن شي وانا صابره عشان عيالي بس الحين مليت ونفسيتي تعبت حيل ومحد حاس فيني ولا اقدر اشتكي لغير الله ثم لكم انتم وابي حل ابي رايكم لان عندي ثقه فيكم وفي رايكم السديد انا محتاره احيانا اقول ادوس على كرامتي مثل كل مره واراضيه انا بس بعدين اقول ليه انا اللي ابدا مع اني انا المظلومه واخاف من ردة فعله اخاف يردني ويفشلني وخاصه انه فترة الزعل بينا حوالي سبع سنوات لانها صارت اكثر من مره لانه يدري اذا رجعنا لبعض مثل قبل ما بيخلى له الجو مع بناته ونزواته وحتى لو تراضينا فهو بيكون بغرفته وانا بغرفتي يعني ما بيتغير شي بس باموت قهر مابي اعطي الفرصه لبناته انهم ياخذون مكاني ولو اني مالي مكان عنده واحيانا اقول خلاص اعيش لعيالي واهمله مثل الحين واتم على ماانا عليه يعني زوجه بالاسم قدام الناس عشان العيال اما الطلاق فمستحيل اتطلق عشان مااظلم عيالي ارجو الرد علي تكفون وإن شاء الله في ميزان حسناتكم

مالي اختي الا ادعيلك الله يفرج همك ويسر امرك وعليك بالدعاء ثم الدعاء

والي اعرفه اختي انه اذا كان ما يصلي فانتي ماتحلين له وما يجوز تقعدين معه وعشلن تتاكدين ياليت تسألين شيخ

والله يسر امرررررررك يارب

لحظة وداع الله يجزيك الف خير اخوي ويبعد عنك كل مكروه يارب

[CENTER]معقولة اختي 8 سنوات وانتوا متخاصمين ؟

والحين بس حسيتي بالتعب؟

اسمحيلي اقول انك غلطتي بشئين اولا انك سمحتي له يعيش بغرفة بروحه

وثانيا لانك حطيتي كرامتك عائق لسعادتك الزوجية

شوفي اختي الحين لازم ترجع الأمور لنصابها

مو معقولة يكون زوجك عاجز وهو له علاقات مع غيرك يمكن هو ما يحس برغبة بك لانه زعلان منك

وطبيعي يبخل عليك لانه يحس انك مقصرة معاه حتى لو هو ظالمك

الحين الحل بيدك انسي الماضي وابدأي صفحة جديدة هو ما بيتغير فجأة وبيآخذ عنده وقت طويل شهور او سنين ولكن

حاولي عشان سعادتك وعشان العيال

لا تنامي بغرفتك من اليوم ورايح

لا تنقلي اغراضك من اول يوم

روحي له بلبس مثير وتعطري وتبخري وسرحي شعرك تسريحة حلوة وتكشخي ودقي عليه الباب واذا فتح ادخلي بدون

كلمة وقولي انك حابة تنظفي الغرفة ورتبي بحركات اغراء وبعدين اجلسي جنبه واغريه وحاولي بكل الطرق انه

يعاشرك سمعيه كلام حب تحسسيه المهم يصير اللي يصير

كرري زيارتك الليلية لحد ما يتعود ويحب جياتك في هذه الفترة لا تعاتبيه ولا تلزميه باي شي تصرفي وكأنك عشيقة

للفراش وبس لحد ما يتعلق فيك

المرحلة الثانية انك تنتقلي بملابسك واغراضك لعنده وشوي شوي تحاولي تطلبي منه طلعات للعشا طبعا هذا بعد شهور

من العلاقة الجديدة وشوي شوي طلبي سفرة بروحك بدون العيال

ولا تنسي الدعاء مهم طول الفترة هذه وهو شوي شوي بيفضلك على البنات

لا تضغطي عليه لترك العلاقات

طنشي هو بنفسه بعد فترة بيقلل

ولما تحسي انك ملكتي قلبه وحبك بقوة ابدأي بس بلطف ولا تزعلي زعلات طويلة يعني يوم يكفي واذا راضاك حتى لو

بالتلميح ارضي وهو بيحبك بجد وبقوة اكثر

لا تزعلي على انسان ما يحبك لانه ما في فايدة من الزعل وما يهمه انتظري لحد ما يحبك وتتأكدي منه وبيكون

والمعاشرة الدائمة والطلعات

الله يوفقك[/CENTER

اختي الكريمة منبع الاحزان ... والله قصتج احزنتي .. بس في نفس الوقت حسستني بنوع من العصبية و الغضب عليج .. نعم عليج انتي ... انا ما افهم ليش اي حرمة في الدنيا ممكن تتحمل وضع مثل اللي انتي عايشة فيه .. لا تقولين عشان عيالي .. لانج لو فكرتي بطريقة منطقية شوي و فكري في مستقبل هالعيال بتلاقين ان الطلاق ممكن يكون احسن بوايد من انهم يتربون في هالجو اللي انتي عايشه فيه مع زوجج .. لان العيال بياخذون فكرة عامة عن الحياة و عن الزواج و عن العلاقات بين الناس بناء على اللي يشوفونه بينج و بين ابوهم ... بعدين مثل ما انتي عرفتي ان ريلج يخونج و سمعتيه يكلم هالبنات اللي تقولين عنهم .. فشو يضمنلج ان عيالج بعد ما يغرفون او يسمعون ابوهم يكلم غير امهم .. و مهما كانوا صغار فتجربة مثل هذي اكيد بتحطمهم نفسيا و بيتم تاثيرها في حياتهم و بيتعاملون مع زوجاتهم او ازواجهم في المستقبل بنفس الطريقة اللي شافوها منكم

انا ما اقولج اطلبي الطلاق .. بس اذا ما في اي مجال ان الوضع اللي بينكم يتغير ساعتها لا اله الا الله لازم تتطلقين و تبنين حياتج و حياة عيالج بعيد عن هالدمار النفسي اللي عايشين فيه الحين

بس اول شي لازم تحاولين مع ريلج اذا شفتي في قلبج اي ذرة حب او مودة ناحيته .. لو حاسة انج ممكن تغفريله و تسامحينه لو تغير لازم تحاولين معاه .

مافيها شي لو انتي بديتي و راضيتيه .. انا مو عارفة شو سبب الزعل اصلا .. بس لو تفكرين فيها شوي بتحصلين ان الله ما خلق الحرمة بهالطبيعة الانثوية الحنونه الا عشان تقدر تصبر و تتحمل و تكون هي منبع الرحمة في بيتها ... انا ما اقولج ذلي نفسج او الغي كرامتج لا طبعا .. بس حاولي تستوعبين ريلج و تساعدينه يطلع من الغلط اللي هو طايح فيه ... وصدقيني مهما كانت طباعه او اخلاقه سيئة لو انتي عرفتي كيف تتعاملين معاه عدل و كيف تحتوينه بمشاعرج هو في الاخر يوم بيحس بحبج بيتعدل وياج

بعدين ياعزيزتي ... انتي تقولين هو يكلم غيرج .. انزين انتي شو تترين منه دام انكم زعلانين من سبع سنين و انتي في غرفة و هو في غرفة .. و مافي بينكم اي علاقة لانج مثل ما قلتي عايشة معاه عشان عيالج و بس .. شو تتوقعين منه في هالوضع غير انه يسوي علاقات غير شرعية .. خاصة انج قلتي انه مو دين و مايصلي ؟؟

اختي حاولي مرة ثانية مع زوجج .. ابدي انتي و حاولي شوي شوي ... ان شاء الله تنصلح الامور بينكم .. بس لو لا قدر الله ما توفقتي و استمر الوضع بينكم مثل ماهو .. اعتقد الانفصال في هالحالة بيكون احسن لج و له و لعيالكم قبل اي حد ثاني

فكري و الله يهديج للي فيه الخير

تحياتي

اختىمنبع الاحزان00الله يبعد عنك الغم والهم ويرد لك زوجك0لكن لى عتاب ايا ان كان الرجل لايحتمل هجر زوجته له كل هذه السنين

وانت ازاى تحملت بعده كل الفتره دى حتى وان كنتى تعيشين معه فقط من اجل الاولاد فالافضل ان العلاقه كانت تاخذ شكل غير هذاعلى الاقل تعصمى زوجك وتعفيه لوجه الله0

ولا اجد كلام افضل من نصيحه الاخت ام الاسود000 فياليتك تطبقيها حرفيا واتمنى لكى كل السعاده

ام الاسود = بنت الحب = لوف هيرت وفراشه ملونه الله يجزيكم الف خير ويجعله ان شاء الله في ميزان حسناتكم وينولكم اللي ببالكم يارب العالمين بس احب اقول لاختي ام الاسود انه زوجي بخيل من اول ماعرفته لانه اهله معروف عنهم ذا الشي وبعدين هو عمره ماطلعني معه بالسياره نتمشى ولا حتى مستشفى حتى لما يكونون عياله مرضى يقولي تصرفي دقي على هلك يجونك هذا واحنا متراضيين بعد واما اني انقل اغراضي واروح فهو ماراح يرضى بذا الشي لانه يوقل انه مو حلوه نكون بغرفه وحده وعندنا ولد مراهق وادري ذا بس عذر عشان يبعدني عنه وبالنسبه لشهوته فهو عاجز وكنت انام بجنبه وتخيلوا يمارس العاده السريه لحاله وبوجودي ولا انه يجيني مع اني مو مقصره معه من ناحية لبس وتكشخ وتعطر وماعلي قصور جمال وانا جربت من قبل اني انام بغرفته بس صدقيني ما تحملت يدخن على طول ريحة الغرفه كلها كتمة من الدخان وريحة الشراب وربي اقرف حتى من ريحته هو لانه ما يهتم بنظافته ولااذكر انه شرا عطر له دوم كنت انا اللي اهتم باموره ذي وبعد ماكان يتعطر عكسي انا احب العطر والتكشخ ابيكم تعرفون انه اللي تتكلمون عنه انسان مريض نفسيامو صاحي غير طبيعي اما بالنسبه لعلاقته فهو كان بعد يكلم حتى يوم كنا متراضيين الخيانه بدمه وتسلمون على الرد والله يريح بالكم

(إن شاء الله) تكتب كما هو موضح أمامك 00

إنا لله وإنا إليه راجعون ، ولا حول ولا قوة إلا بالله.

ما هذا الزوج؟ وما هذه الحياة؟

يعني لا يوجد عنده ولا ميزة ، كل كله سلبيات فهو لا يصلي ، ويشرب المحرمات ويخون زوجته ويهجرها لسنوات عدة ... الخ


اكيد سيكون مريضا نفسيا ما دام مدمن على الشراب لأنه يذهب العقل.


أختي الكريمة ليس لدي من حل لمثل هذا الزوج وفي التعامل معه سوى حلين فإما الدعاء له ومحاولة إصلاحه من خلال الدخول إلى نفسه اللوامة حيث تلجأين بعد الله إلى من تثقين في رجاحة عقله ويكون مقبولا لدى زوجك في نصحه ومرافقفته للضغط عليه حتى يتوب إلى ربه ويعود إلى رشده .


كما يمكن لك أن تطلبي من أهلك أو أهله محاولة إصلاحه ، وتخبرينهم أنه يصعب عليك العيش مع مثل هذا الرجل الذي اجتمعت فيه صفات لا يقبلها أحد ، أو الطلاق خاصة أنه لا يصلي .


تحياتي،،،

الله يعينك اختي ويصبرك على مصابك
اختي دخلي احد من اهلك او اهله اللي يمون عليه ويكلمه