زوجي ...يريدني كسولة ...فما الحل
 

السلام عليكم و رحمة الله

عندي مشكلة يمكن تكون غريبة شوي .. بس والله متعبتني ... مع إن بعض الحريم ممكن يحسدوني عليها

انا بعد ما تزوجت سكنت مع زوجي في بيت أهلي .. مع ان بيتنا الخاص جاهز بس لانه في منطقة بعيدة و انا بعدني ادرس اهلي طلبوا من زوجي اننا نسكن عندهم

طبعا في بيت اهلي في خدامتين و هم تقريبا المسؤولات عن كل امور البيت .. من طبخ و غسيل و تنظيف و إلى آخره

أنا قبل ما اتزوج ما كنت اعرف اطبخ و لا نظفت غرفتي و لو مرة وحدة في حياتي .. يعني حالي حال كل اللي في البيت .. اعتمادنا في كل شي على الخدم

لكن يوم اتزوجت .. حبيت احس بالمسؤولية ... و البي حاجات زوجي كلها دون الاستعانه بالخدم .. لدرجة ان زوجي عرض على يجيبلي خدامة خاصة بس انا رفضت .. و قلتله اني ما احتاجها

و شوي شوي بديت اتعلم الطبخ .. وصرت انا اللي انظف غرفتي و اغسل ثيابي و ثياب زوجي (و بنتي يوم يت) و الخدامة مستحيل تدخل غرفتي لاي سبب سواء زوجي موجود او لاء ... و مع اني ادرس في الكلية .. لكني كل يوم اقوم من الفجر عشان اجهز لزوجي ملابسه و فطوره لاني اطلع للكلية قبل ما هو يقوم .. ووالله حاسة براحة و رضا عن نفسي لاني قايمة باحتياجات زوجي مو معتمدة على الخدامة

المشكلة ان زوجي مو عاجبه الوضع .. لدرجة انه لين اليوم .. (صارلنا اكثر من ثلاث سنين متزوجين) ما ياكل اي شي اطبخه .. ولا يرضا يجربه حتى ... و اذا يوم طبخت و هو ما يدري ان الاكل هذا انا سويته عادي ياكله .. بس لو درا اني انا اللي طبخت ما ياكل ....

هو ما يقول بصراحة انه مو عاجبه اكلي ... يعني يخليني اطبخ بس ما يجرب الاكل حتى ... و انا صرت واااااااااااايد اضايق لدرجة ان صارلي فترة الحين ما قمت اطبخ ... و نسيت حتى معظم الوصفات اللي تعلمتها ... و ما عاد لي ثقة في نفسي ... فيوم اجرب و اطبخ شي ..اذا زوجي ما كلاه ارميه بسرعة عشان اهلي ما ياكلون لاني اخاف ما يعجبهم


حتى بالنسبة للتنظيف ... دايما يعلق و يقولي خلي الخدامة تسوي ... حتى لو هو مو موجود بس درا بعدين اني انا اللي نظفت يقولي ليش ما خليتي الخدامة ... وملابسه يوديها اللاندري حتى لو كانت نظيفة بس يبالها شوية كوي ما يرضى يخليني يقول بلبس شي ثاني وودي هالملابس اللاندري !!!!

حاولت اكثر من مرة اكلمه و ابينله ان تصرفاته هذي تهز ثقتي بنفسي .. قالي انه مايقصد و انه مو متعمد ... و ان كل هالاشياء تصير صدفة ... يعني انه في كل المرات اللي طبخت فيها مثلا صادف انه مو يوعان !!!!

نحن وااااااااااااايد مرتاحين مع بعض في كل النواحي ولله الحمد .. بس هالسالفة صارت تضايقني .. لاني انا حابة اعتمد على نفسي بس هو مايعطيني مجال .. بعدين انا قريب بتخرج ان شاء الله و بننتقل بيتنا البعيد عن اهلي و انا مو حابة اجيب خدامة .. لكن لو استمر زوجي على هالحالة اكيد باضطر اييب وحدة تطبخ على الاقل عشان ما يموت جوع :(


انا لو كان طباخي مو زين مثلا كنت قلت برايه معذور .. بس المشكلة ان مثل ما قلتلكم يوم اسوي شي و هو مايدري اني انا اللي طبخت ياكله عادي و يمدحه جدامي مرات خاصة لو طبخة جديدة


شو رايكم؟؟؟؟ شو الحل معاه؟؟؟ اخليه على راحته و اخلي الخدامة هي اللي تسوي كل شي؟؟ والله انا نسيت كل الوصفات اللي تعلمتها تدرون واحد يوم يتم فترة طويلة مايسوي شي خلاص ينساه و انا من زمان ماعدت اسويله شي؟؟؟ شو الحل ؟؟ والله غربلني هالريال مو عارفة ارضيه

المشكلة بسيطة
أهم شيء ترضين زوجك

صحيح زوجك يبي راحتك ومايبي يتعبك

بس بصراحة زوجك غريب شوي

كل الرجال يحبون أكل زوجاتهم

ويحبون كل شيء يجي من زوجاتهم واهتمام زوجته فيه

لكن الغريب في الموضوع

يمكن عشان إنك تدرسين والحين بتخرجين أكيد مايبيلك التعب ويبيكي تنتبهي من على دراستك شوي

وبعدين عاد تسوين الأكل وإن شاء الله بياكل

وحاولي القيام بمجهودك العام في المنزل ووضحي له نقطة مهمة ‘نك إنتي اللي بتطبخين له الأكل دائماً
وإنك إنتي اللي راح تسوين كل شيء بدل الخدمات

ترى هذه نقطة مهمة وأحب أن ايكونوا النساء أكثر تجربة من أختنا

والله الموفق

الحل ان تفعلي ما يطلبه منك مع تركيز العناية بنفسك واناقتك وحركات الدلع وأن تتفرغي له ، هو يبدو انه يحاول ان يلفت نظرك الى ذلك بطريقة غير مباشرة او انه يشعر ان انشغالك بتلك الامور تكون على حساب اهتمامك به . فتداركي الامر .

فيه رجال كذا سبحان الله يحبون زوجاتهم مثل العرايس لا شغله ولا مشغله
ويخلون كل شي للخدم
استمتعي بوقتك حبيبتي وسوي مثل ما هو يبي
والله يسعدكم

الصراحة زوجك غريب اللي يحب زوجته اتوقع يحب كل شي من ايدها بس يمكن يبيج متفرغة له و متفغرغة للدراسة و عالعموم سوي اللي يبي وشوفي ردت فعله و بالتوفيق

حبيبتي كبري الوساده الله يسعدك

احمدي ربك انها جت منه

اختي يمكن انتي لمن تشتغلين تنسين نفسك من ناحيه الزينه واتوقع هو لاحظ الشغله هذي

ارق التحاااااااااايا

أؤيد هذا الرأي تماما

اخواني و اخواتي مشكورين عالردود ... جزاكم الله خير

و الله انا مو مقصرة معاه في شي (على حسب علمي يعني ) ولا مقصرة من ناحية الزينه و التكشخ ... بالعكس اللي يشوفني يقول تها عروس ما صار لها اسبوع .. ما كون في البيت الا بكامل زينتي و مكياجي .. لاني ما احب اقصر في حق زوجي في اي شي

و من ناحية الدلع و الاهتمام ... والله طول الوقت عنده .. حتى بنتي الصغيرة من يرد البيت احطها عند اهلي عشان اتم انا وياه بروحنا في جو رومانسي هادي ما يعكره شي (مع اني عارفه اني في الحاله اكون مقصرة مع بنتي بس شو اسوي انا عندي ابوها اهم)

حتى دراستي .. من تزوجنا لليوم ما يودت كتاب قدامه عشان ما يفكر لحظه اني ابدي اي شي عليه

بعدين انا يوم اطبخ او انظف طبعا اسوي هالشغلات و هو مو في البيت او و هو مشغول .. و احط بالي اني لازم اخلص و اتسبح و اتزين قبل ما يرد .. فعشان جي انا محتارة من تصرفه .. لان شغلي في البيت ابد مو على حسابه هو

صح اني المفروض اكون مرتاحة لانه مدلعني و مايبغي يتعبني في شي .. بس انا اللي مخوفني اننا لو تمينا معتمدين على الخدم يوم بننتقل بيتنا لازم بيحطلي خدامه و انا ما ابغي هالشي .. والله احترت مادري شو اسوي ... هو يعاملني على اني ياهل ... او زوجة للحب و الدلع و بس .. لكن انا ابغي اكون زوجة تكفي زوجها و بيتها في كل النواحي .. بس هو مو معطيني اي فرصة

الحين سوي اللي يبي وبعدين اذا انتقلتي للبيت الجديد احتمال يتغير

الحين تدلعي وكشخي

واحتمال الثاني اختي انه خايف على مصلحتك ودراستك من جذيه يبقي تتفرغين لدراستك ومستقبلك