فتاة تحبني ولا أحبها ساعدوني
 

قبل شهرين من اليوم وذلك 03/04/2006 تلقيت مكالمة من احدى الطالبات اللاتي يدرسن معنا في الجامعة


وفوجئت بانها تعرف عني كل صغيرة وكبيرة وتدعي بانها تحبني وترغب في الزواج مني






لم اقل شيئا حينها اذ كانت الاختبارات على الابواب وتركت الامور تسير على مجراها




وبعد ذلك بدات احس فعلا بان الفتاة جادة في كلامها وحاولت ما اكسر بخاطرها بس بعدين خفت عليها تنصدم اذا صارحتها بالحقيقة متاخر




يا احبابي انا لا اجد بنفسي اي عاطفة ولا اي احساس يشدني تجاه هذي الفتاة فكيف عاد يجمعنا عش الزواج



بس هي الفتاة تحبني وانا متاكد من هذا الكلام 100% وبعض الاحيان تجبرني اقولها احبك وابدلها كلام الغرام وانا اقول كل هذا غصب عني عشان اراعيها بس





وحاولت اخفف من اتصالاتها معي ومراسلتها لي بحجة اني انا الحين طالع اجازة قبل الدراسة الصيفية ومع اهلي



تعرفوا شو تقولي؟؟؟؟؟؟؟


اذا مارديت علي بجيك البيت واتوقع انها تسويها.....


هذي بسيطة بس المصيبة الاكبر في مرة من المرات ماداومت الجامعة وغابت محاضراتها لمدة 3ايام لاني انا ماراضي اكلمها



ايش الحل يا ناس انا ما اريد اكسر بخاطرها وفي نفس الوقت ماريد الامور تكبر وبعدين ماقدر اسيطر على الوضع؟؟؟؟؟؟؟:29:

بين لها انك ميت عليها واذا عرفتهنك تبادلها الشعور هي من نفسها بتترك انا بنت واعرف هالحركات هي شايفه انك عاجبها ولازم تجيبك وانه هي ماينقالها لا

نقل الى عالم المشاكل الإجتماعية


الاخ الكريم اقطع اي صلة بها ولا بد انك تستطيع ذلك حيث يبدو ان معدنك طيب والدليل انك لم تستغل تعلق البنت بك ، انصحها ان ما تفعله البنت حرام وانه لا يجوز وانك لا تريد الزواج حاليا .

ولا تتابع اخبارها بدافع الشفقة عليها فأنت لست مسؤولا عن تهورها .

والله ماأدري مشكلة الشباب هذي الأيام واحد كاتب أنه يكلم وحدة متزوجة عشانها تحبه ولايبغى يكسر بخاطرها ولاهمه الإثم اللي بيلحقه ولا شي وأنت ذحين تقول ماتبغى تكسر بخاطرها ومستمر في المعصية ... ياأخي خلها تولي إن شاء الله عنه خاطرها ماأنجبر يعني هي وحدة ضايعة ماهي لاقية أحد يردها تقوم تماشيها في هبالها وضياعها .

ماأقول غير الله يهديكم بس

يااخي ايش الأختلاط هذا لاوتقول تبغى تجيك البيت.

(ماخلارجل باأمرأه الاوكان الشيطان ثالثهما)

بصراحه أناماعجبني تصرف البنت هذه اللتي تقول انهاتحبك لأن البنت من طبعها خجوله والرجل يحب البنت الخجوله مش اللي تاخذدورالرجل بقي بس تحدديوم الخطوبه.

وأهنئك ياأخي اجتهادك في الدراسه والموضوع هذاماشغل تفكيرك وقت الاختبارات.

والبنت اللي تتجرئ وتكلم رجل هذه المكالمه تجعلهاتكلم ألف رجل غيرك اصرف النظرعنهاوطنش مكالماتها والله بيرزقك ببنت الحلال المحترمه والخجوله.


فعلاشكلك عاطفي وماتبغى تكسربخاطرها ياأميرالعاطفه وتذكران الله يراقبك ليل ونهاروفي السروالعلن.الله يهديكم ويصلحكم.


هذارأيي الخاص.


أختك:فوووووووووز

رأس الحكمة مخافة الله ولكي تتغلب على مشكلتك راقب الله عز وجل فيما تقوم فيه , وكما قالوا اقطع صلتك بها فأنت لست محرم لها ولا يجوز لهذا الكلام أن يدور بينكم , وإذا أتتك تبتغي قلبك و كلام معسول تطيب خاطرها به قل لها :" إني أخاف إن عصيت ربي عذاب يوم عظيم " ستزدجر نفسك بها ,, وتتفهم هي بها موقفك وضعها أمام الأمر الواقع ولا تعذبها بالأمل بالاارتباط بك ,,

وقل لها إنني لا أفكر بالزواج الآن ولدي ظروف لا أستطيع إخبار بها

ولتفعل هي ما تريد فليس ذنبك أن تتغيب هي عن المحاضرات !

احس انها تبي تسوي لك مصيبه وتبلشك بشي معها
طنشها وكلم اهلها
ودخل اهلك وخواتك وهم يتفاهمون معها
وغير ارقامك
وسلامتك

هذي البنت جريئة جداً !!

و آسفة بس هذي الأنواع المفروض ما تخاف انك تكسر بخاطرهم

فإنت ما أتوقع انك راح ترضى تتزوج وحده هي اللي تتلصق فيك ولاّ؟

هددها انك بتكلم أهلها

اعتقد ان ردود بعض الاخوة جافة بلا داعى

انت اخطأت بكلامك معها و لكن الذنب ليس ذنبك ان جامعتك مختلطة
المشكلة حلها هين و لكن واضح انك شخص حساس و تخاف من جرح مشاعر الغير بس صدقنى هذة الفتاة ما ينخاف على مشاعرها لأنها تعانى من قلة رباية (عفوا) انت بمنتهى البساطة خبرها انك لا تشعر بشىء تجاهها و قل لها اتقى الله فى اهلك و عرضك و لا داعى للاتصال بك مرة اخرى
و خلص....