بنت تعجب النساء ولاتعجب الرجال!!
 

سمعت كلمات عنوان الموضوع من صديقتي.. وكل مامر على موضوع خطبة أسمع صوتها في أذني أحيانا البنت الحلوة تعجب الحريم لكنها ماتعجب الرجال

انا الحمدالله أملك بشهادة الجميع مواصفات شكلية.. لكن مواضيع الخطبة تحطمني كثير..

* اذا تقدم لي أحد دائما أشوف أمه وأخواته في الغالب متحمسات لي.. أشوف نظرات الإعجاب في عيونهم

* أحيانا بعض الناس يكون لهم طلة.. يعني أول مايدخلون بمكان مباشرة تتسلط النظرات عليهم مباشرة صح؟ والله أنا دايم يحصلي كذا خصوصا في الزواجات

ودائما أرفع راسي ونظراتي للأمام لدرجة اللي مايعرفني يتهمني بالغرور!! وانا ماسوي كذا الا لأني أنحرج أحيانا أقول يمكن لأني طويلة والطوال قلال بمجتمعنا

بس سألت صديقتي( بنفس طولي) ولقيتها تختلف عني! ( لاتحسوبني ملكة جمال لالالالا أكيد فيه من يرى اني عادية لكن اتكلم عن اللي يحصلي بشكل عام )

*بدوامي بنات كثار لكن أنا أكثر وحدة يسألوني ليه ماتزوجتي ولما أسألهم وش معنى أنا تسألوني؟ يقولون لأن مواصفاتك أفضل منهم!

* ثنتين من زميلاتي مرة قالو كل ماضاقت صدورنا لأننا ماتزوجنا تذكرناك قلنا شوبارد وهي شوبارد ماتزوجت اجل ليه نتضايق!

* لما اروح لمناسبات اذا مشيت بين الحريم اسمع تعليقات مدح على شكلي ودايم أشوفهم يسألون عني

* في الزواجات لما أمشي مع بنت عمي دايم تقولي شوبارد امشي لحالك اذا مشيت معك احس اني ولاشي!


مجرد مواقف بسيطة من المواقف الكثيرة اللي تمر علي


بعد شوفة اهله وبعد الشوفة الشرعية ثم الخطبة الرسمية.. فترة بسيطة يدق على الوالد : والله انا من البداية انا مارتحت لكن اخواتي يزنون على راسي

محسسيني ان مافيه بنت مثل بنتك على وجه الأرض لكني خايف اظلمها << وش معناته اني ماعجبته صح ولالا؟

سمعت أخوي يقول اكيد شاف شوبارد أفضل منه بكثير وحاس بالنقص وانسحب <<< بالله هذا سبب؟؟


رغبة الرجل في المرأة ورغبة المرأة في الرجل طبيعية واحساس المرأة بأن رجل أعجب بها احساس رائع يحسسها بأنوثتها بأنها ملكة بأن مافيه بنت مثلها بهالدنيا


آآآآه ياقلبي ورب الكعبة أول شوفة شرعية لي كنت على ثقة عميااااااااااااااااااااااااااااااااء بأني راح أعجبه لكني تحطمت تحطمت تحطمت

معقولة الناس تكذب علي معقولة تجاملني؟ طيب أشوف نظراتهم اسمع كلامهم حتى لو مايخاطبوني مباشرة

حسيت اني غير مرغوبة للرجال!!

بعد شوفة شرعية فاشلة لبست نفس اللبس وسويت بشعري نفس ذاك اليوم ورحت لدوامي لقيت الكل يمدح بشكلي بدون والله ماأسألهم

<< متقصدة الحركة هذي عشان اثبت لنفسي ان مافيني عيب وترجع ثقتي بنفسي

صرت دايم أتأمل ملامح البنات واقارن بيني وبينهم صرت احب ادور ورا مواضيع الشباب واقرا بمواصفات زوجات المستقبل وربي القى اغلب مواصفاتي بينهم.

لما أسمع صديقاتي يتكلمون عن الشوفة الشرعية وان محد شافهم غير ازواجهم أتحسسسسسسسسسسسسسسسسسسسسسسسسسسسسسسر

منى عيني محد يشوفني من الرجال الاجانب الا شريك حياتي.. مابي أي رجل يشوفني مابي اي رجل يتذكرني

آآآه يالشوفة الشرعية قبلها صياح ونياح وقبلها بليلة قعدة عالسجادة وصلاة ودعاء وخوف واحلام يقظة مضاعفة

ووضع احتمالات ايجابية وسلبية وبوقتها خووووووووف يكفي الدخول على رجل هذي لحالها تروع!

والأشد من ذلك عند انتهاء الموضوع نفسي اروح لحضن امي وأبكي لكني ماأقدر

أكتم بنفسي ولما اشوفها ضايقة أمثل و اضحك بوجهها واقول يماه أنت مؤمنة؟ ربي ماجاب نصيبي بتعترضين؟

تقول فيك عين فيك سحر أنا متأكدة وتبكيييييي وتتحسر اقول بنفسي يماه لاتحسرين فيني زيادة يماه والله اللي فيني مايقارن بللي فيك

وانتظر الليل عشان ابكي على مخدتي براحتي ...الحمدالله على كل حال


أنا عارفة ان الجمال ماهو أساس الزواج لكنه يلعب دور.. وانا عارفة ومؤمنة بأن الزواج نصيب قضاء وقدر لكن اللي يحصلي يحيرني!

هل فعلا فيه بنت تعجب النساء وماتعجب الرجال؟!

السلام عليكم
يا شوبارد ماقدرت أقرأ الموضوع وما أرد، بس الآن مستعجلة لكن بإذن الله لي عوده

انه النصيب فقط ياشوبارد


اكيد اللى هتعجبيه لم يأتى اوانه بعد00اتمنى لك التوفيق

أختي الكريمه
الله يفرج لك همك ويرزقك ما تتنمين
عندي لك تعليقين على موضوعك :
1 ـ هذا الحال الدنيا فيه نساء يعجبن النساء والرجال وقمه في كل شئ ولكن يتأخرن في الزواج أو يتزوجن رجال أقل منهم ( قسمه ونصيب ) وما ينطبق على هذا ينطبق على كل شئ في الحياة ، مثال فيه موظف ناجح وفاهم ومميز ومعه شهاده ويديره واحد ما يعرف شئ شهادته أقل منه . وقيسي على ذلك .
2 ـ هل فيه بنات يعجبن النساء ولا يعجبن الرجال نعم فيه والعكس صحيح
الرجل له نظره والمراءة لها نظره
المراءة تهتم بالتفاصيل ، والرجل يهتم بالشكل العام
كيف ؟
أحيانا أشوف بنت صغيره أقول لزوجتي حلوه ( أنا شفتها من الناحية النفسيه )
تقول لا (( شف انفها كبير ، شف حواجبها ، شف فمها كبير ) ) يعني تعطيني تفاصيل .

أخيرا أختي الكريمه الرجل يهتم بالانجذاب النفسي أو الميل النفسي ولا يدقق في التفاصيل
مجرد رأي
والله يسعدك ويوفقك

السلام عليكم ورحمة الله و بركاته

الاخت الكريمة - شوبارد -

بداية أقول...

أسأل الله أن تكوني أنت و بقية الأخوات بأفضل حال...

افتقدناكم جميعا في الأيام الماضيه...وما ابتعادنا إلا لكوننا كنا في زيارة للرحاب الطاهرة لأداء العمرة...

نسأل الله أن يرزقنا عودة قريبة إليها...اللهم آمين...

والحمدلله لم ننسكم من دعائنا حين كنا في الحرم الغالي...نسأل الله القبول...وبعد

أما فيما يتعلق بسؤالكم الكريم....

هل فعلا فيه بنت تعجب النساء وماتعجب الرجال؟!

نقول...

نعم يارعاك الله هذا أمر يحدث و يتكرر...وليس معك فقط بل مع الكثيرات...

وقد تعرضت لهذا الأمر مسبقا...وعلى الرغم من الألم الذي يسببه هذا الأمر ...

إلا أن عزاءنا دوما...بأن الرزق ليس رزقنا و النصيب ليس نصيبنا إلا لما ذهب للغير...

نسأل الله أن يوفقنا و إياكم لكل مافيه خير و صلاح في الدارين...

،،

،،

أختكم

حبيبي ليش اتحطمت كل هالقد
اللي خلقه خلق غيره و أحسن منه كمان

حبيبتي لا تتحسري يمكن ربنا رح يعطيك أحسن منه لأنه هذا ما يستاهلك ( أبشري و أنا بكتب هالجملة أذن المغرب يعني صح , فال خير)

شوبارد الغالية

والله ما يمر بكِ يمر بي ولكني أزيد عليك يبعد ربي الشر عنكِ بمرضي

فالجميع دائما عندما يراني يقول صدق لالقالوا الزين ما يكمل حلاه

لا يوجد بنت تعجب النساء ولا تعجب الرجال

ولكن النصيب والقضاء والقدر هو من يرمي بنا من حيث لا نعلم

فوضي أمركِ بالله

واستعيدي ثقتكِ

وبإذن المولى سيأتيك الفرج القريب

عليكِ بالدعاء والإستغفار

أسأل الله العظيم رب العرش العظيم أن يرزقكِ الزوج الصالح ولكل بنات المسلمين عاجلا غير آجل بفضله ورحمته ومنه وكرمه

اختي الحبيبة شوبارد لا تفكرين في الموضوع كثير و انسي و ان شاء الله بيجيك نصيبك. بشكل عام الشوفة مو بس شكل في هناك شي اسمه راحة نفسية و ما تدرين يمكن في اسباب خفية للتراجع (يمكن اهله هونوا او هو تراجع عن فكرة الزواج). هذي امور ما يعلمها الا ربي. خلي ثقة في نفسك كبيرة و في رب العباد اكبر و اكبر.

الله يجزاكم على خير والله فيه ردود أقنعتني.. وكلام اخوي صاحب رأي سديد وقفت عنده كثير

أحب أوضح ان مواقف الشوفة الشرعية اللي مرت فيني للأسف أكثر من موقف




ام حور

هلا بك يالغالية الله يتقبل منكم صالح الأعمال والله يجزاك خير عالدعاوي عسى ربي يستجيبها

عندي احساس ان عندك اخبار حلوة الله يفرجها علي وعليك