|
أتطلق منه وأنا بأول حمل لي؟!! (عدت من جديد)
السلام عليكم ورحمة الله وبركاته أدري اني انقطعت عنكم فجأه وأظن أغلبكم نسى موضوعي لانه صار لي شهرين تقريبا من آخر مره كتبت فيها المهم موضوعي تسكر لانه وصل 12 صفحه وانا ما رديت فتحت موضوع جديد لاني وصلت لمرحلة التشبع من الكلام والنصايح وعطيت نفسي فرصه عشان اراجع نفسي للي يبى يتذكر الموضوع أو اللي يريد متابعة موضوعي من البداية اليكم الرابط أتطلق منه وأنا بأول حمل لي؟!!! ملخص سريع عن الاحداث اللي صارت بعد آخر رد لي كان آخر اسبوع لي بوظبي بالصوالين تعرفون شغل حريم صبغ وقص وبدكير ومنكير وحنه وسمكرة وخرابيط وطبعا ما نسيت قمصان نوم جديده صراحه هو تجديد وفي نفس الوقت اللي قبله تضيق علي لان بطني كبر:d المهم رحنا نفس اليوم جابوا الاثاث عشان نحطه مع بعض على ذوقنا واهله جابوا القبيله كلها عشان يساعدونا وما قصروا مشكورين وممنونين لهم صحيح انهم يبون كل شي على كيفهم تخيلوا حتى مكان سرير غرفتنا يبون يحطون المكان اللي يعجبهم! بس انا كبرت عقلي واسترجعت كل نصايحكم ومشيت عليها والحمدلله صار اللي انا ابيه ادري الموضوع تافهه عند البعض بس هو انجاز عندي لاني قدرت افرض رايي بدون ما انحرج وفي نفس الوقت بدون ما ارجع لزوجي واعوره له راسه بسالفه تافهه اللي جاي كله فضفضه ومو لازم تقرونه تقدرون تنطون لتحت عشان تعرفون مشكلتي اللي ابى حل لها هذي فضفضه من جأنا دبي وزوجي وابوه يحاولون يقربون بيني وبين اهله المهم انا شلت كل اللي بقلبي عليهم وفكرت بكلامكم انه لازم اصفي النيه اذا مو عشانهم عشان زوجي عالاقل.. بس طرق زوجي ما كانت تعجبني .. وانا مثل ما صرتوا تعرفون ما احب حد يفرض علي شي --- قبل كل شي (ترى هذي لين الحين ما قالت شي!!) ابى اقولكم ان انا بآخر اسبوع لي ما كنت نايمه زين يعني باليوم كنت ارقد 2 ولا 3 من التهابات نسائيه كانت فيني وعذبتني موت وجيت له وانا بعدني على هالحاله وأزيد ==> جايتكم بالموضوع اللي يخص هالنقطه بس تحت المهم بذكر المواقف اللي صارت لنا: (( 1 )) بثاني يوم لنا فدبي كنت رايحه العياده العصر عشان اتابع علاجي وعطتني الدكتوره تحاميل أثرت سلبا فيني وما ناسبتني فعشت عذاب فالليل لين الفجر ولين ما طلعت الشمس... وزوجي كان المفروض بثالث يوم الصبح يروح بوظبي لان عنده شغل ومنها يوصل عمه المستشفى ... الساعه 5 ونص تقريبا .. صحيته من النوم قلت له تعبانه وبموت لازم اروح المستشفى.. تخيلوا شو قالي.. انا وراي خط لبوظبي.. وتعرفين لازم اوصل عمي المستشفى!!... يوم برد الظهر بوديج انتي حاولي تنامين!! مجنون هذا!! انا لو جاني نوم كان نمت قبل لا تقولي يا الذكي.. يوم شفته قاعد يهذي اخذت موبايلي ورحت اتصل فابوي وهو يركض وراي عشان يسكر لانه يعرف احراج وما صرلنا ايام بدبي .. بس انا اتصلت وقعدت اصيح واصيح .. ابوي مستغرب من برودته وكلمه وقاله انا اصلا كنت بوديها!! :29: رحنا وخلصنا بس .. الموضوع طبعا ما ينسكت عنه خصوصا اني حامل وهذا فيه خطوره على ولدي صح ولا لاء؟ وبعد لاني شفته انه مو حاس انه مسوي شي غلط.. وانا ما اباه يعيد اللي صار فكلمت امي وشكيت لها لاني اعرف ابوي يمشي الموضوع .. قامت امي باليوم الثاني وكلمت ابوه وعطته من ذاك التهديد اللي تعلمهم الاصول وقالت ترى بنتي امانه واذا انتوا مو قدها بجيبها عندي لين ما تربي.. وخلي ولدك عندك وربيه من جديد .. وابوه موته وحياته ولا اروح من عندهم مو عشاني عشان كلام الناس وصورته جدام اهله .. واتصلت بزوجي بعد وعطته من ذاك الكلام وهو طايح كذب جدامي عشان يطلع نفسه بريء .. ما فشلته ولا تكلمت بس لما سكر قلت له انت كيف تكذب عليها ... قال خلنا نتابع الفيلم .. انا سكت لاني حسيت انه خاف وعرف ان وراي اهل مو عاقيني عليه.. --- (( 2 )) نفس اليوم اللي رحنا فيه المستشفى الفجر .. طلعنا على آذان العشا وقال يبى يمر بيت اهله ياخذ اغراض له.. قال بنزل باخذ عالسريع وبرجع بس لما وصلنا قال نزلي بروح اصلي لان اذا ابوي شافني فالبيت وقت الصلاه بيعصب.. قلت له انزل معاي وبعدين روح .. وكنت معصبه لان انا عرفت انها حركه عشان يوديني بيت اهله يعني اونه يبيني اسوي الواجب وانا ما عندي مانع .. بس طريقته ما عجبتني وانا ما احب حد يحطني جدام الامر الواقع ويفرض علي شي.. المهم رجع واشوف الاخ ماخذ راحته وقعدنا لين الساعه 11ونص انا كنت امشيه الوضع وقلت في نفسي خير ما سويت عشان ما يقولون اني ما اجيهم بعد .. بس اشوف محد مسوي لي سالفه وكل واحد داخل غرفته وانا قاعده بالصاله قلت يلا صرت من اهل البيت ورحت لهم الغرفه عند خواته .. المهم طول اليوم وامه تلمح وتمسك علي اي كلمه عشان تعلق تعليث بايخ مثلا.. زوجي قاعد يتدلع على امه يوم تقوله روح اتعشى يقول ما ابى برد البيت حرمتي بتسوي لي .. هي ما صدقت قالت انتوا كل يوم اكلكم من برى بعد تقول عشا على آخر الليل.. هي تقوله بس الكلام لي يا جاره.. انا طنشت ولا كأن حد يكلمني.. هو صحيح كان اكلنا من برى بس الا هي 4 ولا 5 ايام لاني كنت تعبانه .. بس قلت المهم زوجي يعرف مو لازم هي تعرف... وغير جذي لما زوجي يسألها صح بيبسي ولا شيبس وهالسوالف مب زينه حق الحامل اطالع فيني باحتقار وتقول وانا اش دراني ...عيوز يايبه درزن عيال تقولين ما تعرفين.. بس هي منقهر لان زوجي مهتم فيني.. حتى انه لما كان يضرب اخوانه الصغار تقوله ليش تضرب عيال اذا ايدك تحجك قوم اضرب حرمتك!!!.. انا قهرتني لاني اعرفها ما تمزح وهي قاصده تحرض زوجي على هالشي .. بس انا ما سكت لها عن هالشي .. قلت لها ماله حق انا بنت ناس مو اخته ... وزاد عليها زوجي وقال تعرفين هي حامل حرام تنضرب... وهي قاعده تموت قهر زياده وزياده!!! انا ما كنت راضيه لا اني اقهرها ولا هي تقهرني ... بس هي كانت طايحه فيني مع انه اول يوم اجيهم.. وصار لهم 4 شهور مو شايفيني.. بس شو أقول.... ------ من هالحركات وهالمواقف اللي مرت علي ولاني اول مره ابتعد عن اهلي ... وكتمت كل شي بقلبي ولا فضفضت لاحد حسيت بثقل على صدري .. بس كنت اصبر نفسي.. ويوم كنا طالعين نتمشى ... ما ادري ليش فجأه جاتني حالة صمت وودي ارد البيت .. مع انه يعرفني اموت عالطلعه.. وقريب البيت انفجرت صياح الله لا يراويكم ما قدرت اسكت نفسي وهو خاف .. ويبى يعرف شو فيني وانا ما قدرت اتكلم وما ابى اتكلم ... لاني عرفت اذا تكلمت بجرحه وبرجع اايام النكد.. ورحنا البيت وانا بعدني اصيح وما غير اقوله ابى اروح بيتنا ابى اهلي... هو اصر يعرف فقلت له.. قلت شوف انا مو جايه من بوظبي عشان اتهاوش ويا هذا واقهر ذاك .. انا جايه عشان ريلي وبس وهو مو فاهم .. فقلت له باختصار انا ما ابى اروح بيت اهلك لاني ما احب تلميحاتهم وبعدين هم ما يبوني ولا يسألون عني ولا قالو لي تعالي بس انت ترز وجهي عندهم.. وانا اعرف انهم ما يحبوني ومو مجبورين يحبوني بس ما اباك تفرضني عليهم.. شكلي كسرت خاطره ورد علي كعادته يدافع عنهم قالي كلمتين .. خلاص كيفك لا تروحين عندهم مو مجبوره.. اهني هديت ونمت لاني حسيت واخير من جيت ان حد فاهمني ----- اهني بوقف قرقرتي الزايده اللي مالها داعي ..ادري بنضرب لاني تكلمت وايد تعرفون اسلوبي طويل ومفصل وكله فضفضه هذي مشكلتي هي احد المشاكل اللي ذكرته بموضوعي القديم... كل يوم قاعد يأكد لي انه زوجي مو حريص ولا هو ما عنده هو باختصار بخيل مثل ما قلت لكم اتفقنا انه يمشي لي مصروف شهري ووصلنا او اللي قدرت اسحبه منه هو 1000 درهم وهو راتبه 8آلاف واشوي بس يستلم منهم 5آلالاف واشوي والباقي على قرض.. المهم الفتره اللي كنت فيها بوظبي وهي شهرين كان مصروفي يروح عالعياده ولما اطلب منه كان يتحجج بان ما عنده .. هذا ونحن ما كان عندنا بيت ولا مصرف بذاك الوقت يعني وين يودي فلوسه ما اعرف!!! وبعدين لما جيت اهني وصارت عندنا ملجه سريعه لبنت خالتي محد لحق يجهز له فستان فانا قلت باخذ جاهز بس طلعت من بين الفساتين القديمه شي يناسبني بعد ما بدا بطني يبان... المهم وفرت عليه سعر فستان وعطاني 500 اجهز به باقي اغراضي وحق الصالون .. وانتوا يا الحريم ادرى بان 500 ما تسوي شي بس انا مشيت نفسي وما اشتكيت وغير جذي فصلت لي كم كندوره (جلابيه) حق فتره الحمل وقالي هو راح يدفع بس الحين اشوفه ما يبى يدفع ويقول ما عنده.. ويباني احط من مصروفي وانا اذا حطيت بيروح كله واقعد مفلسه من اول الشهر.. هو الا يبى يطير اللي عندي ويفلسني بعدين يفكر اذا بيعطيني ولا لاء بس انا ادري ما بيعطيني فخليت كناديري فالخياط.. والحين اقوله ابى فستان حق عرس بنت خالتي لانه قريب بعد شهر ونص يقولي اصبري بعدين!!! ويوم رحنا الجمعيه ناخذ اغراض البيت انا قلت له ترى يبالنا ميزانيه 1000 درهم تقريبا وهو حاط بباله 400 ولا 500 وانا ما قصرت وخذت كل اللي نباه مره وحده لاني اعرفه بيقص علي يقول خذي اشوي والباقي بعدين!!! المهم وقت الحساب هو كان ضامن انه بيدفع 1000 وشي بس سبحان الله كيف طلع 500 ما ادري مع اننا خذنا وايد اغراض تقريبا عربانتين!!! حتى هو استغرب.. المهم قلت له انت كنت حاط فبالك بيروح 1000 درهم وكنت رضخت يعني للامر والحين وفرت على نفسك 500 ليش ما تزيد فوقهم حبتين وتجيب كناديري قال لا!!! نبى نوفرهم يمكن نحتاجهم!!! وسبحان الله كل هالبخل وآخر شي الله يبليه بشي تافهه ولا بخراب بسيارته اطيره كل فلوسه اللي كان موفرها وانا اقوله لما كنت ابى ما عطيتني وهالسخافات ما استخسرت عليها.. بس هو شايف انه حط بشي اهم .. الله يسامحه يستخسر فيني دايما وانا ادري هالطبع جايبه من ابوه لانهم متعودين بيتهم يستخسرون الفلوس عالحرمه تصدقون حتى لو كنا متفقين على شي معين ونعرف سعره اقوله عطيني فلوس لاني رايحه مع اهلي بآخذه بالمره يقول لاء لما انا وانتي نروح بروحنا بناخذ.. تدرون ليش؟ لانه حرام عنده الفلوس تنحط بايد حرمه!!! وآخر شي صار انه تم وبمكرمه من الشيخ خليفه الله يحفظه .. صرف مبلغ صندوق الزواج بسرعه لكل اللي تزوجوا بـ 2005 وقبله وهو بمقدار 70 ألف درهم مثل ما انتوا عارفين لكل المتزوجين مع ان ناس متزوجه من 3 سنين وما حصلت لين الحين المهم حط 40 ألف على ايجار الشقه و3500 على التأمين و1500 انسحب من البنك على فيزا كارت.. باقي 25 ألف خمسه حطهم بالبنك و20 جاء اخوه وتسلفهم منه بكل برود وهو طبعا ما رفض لانه اخوه اونه محتاج يعني الحين يا الدب ما لقيت تتسلف الا من اخوك اللي متزوج ووراه بيت ومسؤوليات .. عنده اخوه الثاني ولا ابوه .. وهو ريلي قالي كلمه زعلتني وخذت على خاطري بس سكت قلت له تعرف هالمبلغ يعطون اللي يتزوج يعني حقي وحقك الزبده عطيني منهم شي او خذ لي مو بايل جديد (لاني اعرف فلوس ما بيطلع منه) قال بس انا ابى اسلف اخوي ولا تبينه يزعل مني ..انا قلت فنفسي يعني انا ازعل بالطقاق الا 1000 واشوي حق موبايل شو بيستوي!! بس البخيل بيتم بخيل وانا ناويه افتح معاه السالفه جديا لاني من جيت دبي وانا ساكته عنه وايد واشوفه اذا ما انعطى العين الحمرا يكبر راسه زياده وابى ابدى معاه من سالفة 20 الف اللي سلفهم حق اخوه لانه كان مبلغ مكمل للي عنده عشان ياخذ بهم سياره بس اشوف لا سياره ولا شي ولا البارحه يقولي انه يبى يتسلف منه بعد لانه يبى يسافر مع ربعه الحين بذمتكم في حد يتسلف قبل ليحصل السياره ولا هي نكايه فيني يعني!!! يعني خذ الفلوس وحط عنده!!! ليش ان شاء الله!! حد يعطيني سبب قبل ما انفجر على ريلي بهالموضوع وأخير ادري بتقولون لي لا تخلين الفلوس تخرب بينكم بس لا تنسون ان انا حرمه بالنهايه واحب سوالف الللبس والكشخه مع ان صارلي 5 شهور تقريبا ماخذت لي بدله جديده ولا نعال جديد ولا حتى شنطه ... وهذي مب حاله مو انتوا قلتوا لي لا تشكين لحد من اهلج هذاني جيتكم :d |
بصراحه أنا مصدومه....
معقول إنت تتكلمين من كل عقلك؟؟ يا شيخه حرام عليك زوجك... ما غلط فيك ولا شوي.. بالعكس.. هو جدا محترمك ويخاف عليك.. وأنا ما شفت من أسلوبك كلللللللللللللللللله غير.. العصبيه.. والجمود.. والنفتره... حرام عليك يا شيخه... راعي زوجك أكثر شوي... إنتوا شخصين.. ورايحه تشتري لوازم البيت بألف ريال؟؟ ليش إن شاء الله؟؟؟ إنت لما تزوجتي هل إشتريتي أغراض ولبس وفساتين أشكال وألوان؟؟؟ لسا هاللبس ما مر عليه 5 شهور على حد قولك... وتتذمرين لأنك ما اشتريتي شي جديد ؟؟؟ سبحان الله.. زوجك لو رح يرد عليك بكل طلباتك ما رح يخلص يا حبيبتي.. وأنا عارفه طبع النساء جيدا... كل وحده منا تحب يكون عندها كل يوم فستان جديد وموبايل آخر موديل.. وسياره آخر موديل وخادمه وسائق و و و و .. بس لازم يكون في حدود لتصرفاتنا.. الرجل دايما يفكر بالعقل... ويعمل حساب الأيام اللي جايه... يعني مو غلط لو قالك بنوفر شوي... الرجل ما بخل ب شي عليك.. إحمدي ربك... ودللي زوجك.. وواضح إنك مثلنا كلنا في بيت أهلك كنت عايشه ملكه وطلباتك أوامر.. بس الوضع شوي بيتغير لما الوحده تتزوج.. وفي وراها مسؤليااااات لازم تراعيها.. وآخر شي أحب أقولك " إن كان حبيبك عسل.. ما تلحسوش كله" على رأي أخواننا المصريين.. دمتي بخير,, |
بصراحة دندون شييييييي رهيب
وحتى شوفي توقيعها يحل لك المشكلة |
|
ييييييييييييييييييييييييييياه جد انهه دمك خفيف
حبيبتي والله انه باين زوجك طيب عاملك كل اللي بدك اياه لاتشكيلي لبكيلك ياحبيبتي لو تشوفي اللي عندي من زوج واهل بطقي بس لاني بحب زوجي بستحمل كل شي وكمان عشان ولادي اما اهله صدقيني تعلمت برود الاعصاب منهم لانه لو بلاحقهم بنجن لكني بالاخر قلت والله كل شي بوكله لربي هو العالم اني مااسأت لحدا بشي والله على الظالم حبيبتي هدي اعصاب لانه كنك معصبه اذا بدك الصراحه شكله حملك منكدك ومخليك مو طايقه حدا يمكن فيك بنوته لاني في حملي ببنتي كنت مستعده اطلب الطلاق من زوجي من كتر مكرهته وعرفت بعدين انه حمل البنات هيك . اما بالنسبه للفلوس قولي بس الله يعيني انا لانه حالتي مأساوية اكتر منك بكتتتتتتتير تخيلي انه في حملي ببنتي وابني التنين مع بعض ماشتريت غير 4 فصاتين حمل لاغير واول اتنين لما كنت حامل ببنتي ابوي اشترالي اياهم لما زوجي رفض تخيلي!!!!!!! وغيره كتير لكني قلت بحالي انه سيئات زوجي مقابل حسناته ولا شي وكلنا فينا عيوب مثلا انا زنانه وشكايه بطبعي وكسسسسسسسسسسوله وهدا اهم عيب فيه انا وباين عليك انت انك عصبيه وروحك بمنخيرك عزيزتي خففي عصبيتك وتحكمي بحالك كوني حكيمة لاتخربي بيتك لانك دلعتي شويتين ببيت ابوك كلنا ادلعنا حاولي ابدا ابدا ماتذكري عيوب زوجك لاهلك ابدا الله يوفقك انت وزوجك |
انا عارفه ان الموضوع عندك مهم وما اخذ جل تفكيرك,,,,,,,,, بس اسمحي لي ,, باقولك شي لاحظته في
كلامك وشكلك مومنتبهه له وهو ** انك تتكلمين كانك في معركه لازم يطلع فيها هازم و مهزوم والحياه يا حبيبتي ماهي كذا الحياه اذا انتي تبين نصيحتي الحياه ((حب وحبيب حب لله وفي الله وحبيب زوج وطفل واهل )) اختي هدي شوي وفكري في حياتك زين بهدوء ولا تخلين من الحبه قبه ,,, صدقيني انت اللي بتخسرين في الاخر اختك // لي مشاعر |
والله ما اعرف شنو اكتب لان بصراحة صعب جدا تفكيرك صعببببببببببببببببببببببببب وللاسف اهلك مشجعيك على هل تفكير
الاخت دندون اعطتك لب الجواب وما راح ازيد لان بصراحة ما ممكن ينردلك بألطف من هل طريقة بس اريد اعرف زوجك ليش وشلون متحمل حطي بعيونك واذا اهلك لهل درجة خايفين عليك خلي يعطوك مصروف الرجل معطيك خمس مرتبه شتبين اكثر ؟؟؟؟؟؟؟؟؟؟؟؟ اختي مرة وحدة افتحي قناة الجزيرة وشوفي مآسي الناس وبلاويهم شوفي النساء في فلسطين و العراق واندنوسيا ووووووو وتعالي كولي 500 درهم ما تكفي حق صالون |
اهئ اهئ محد فاهمني ياناس زوجي انا احبه واموت فيه واباه حقي وبس ما ابى حد يهتم فيه غيري وما ابى حد يسويله سالفه غيري وانا والله العظيم من مووضوعي الاول لين الحين تغير وااااااااااااايد وعصبيتي بانت فالموضوع لاني صرت اكتم وامشي على مبدأ طنش تعش بس مازال بداخلي زعل ما ابى افرغه على زوجي مثل قبل لاني فعلا مليت من المشاكل واللي كتبته فوق كله اشياء منرفزتني وحبيت افضفض اغلبه اشياء ما قلت له ولا جبت له سيره يعني لما اقول ما عطاني حق الصالون ولا فستان ما تضاربت معاه بالعكس قعدنا نتفاهم وعرفت انه ما يبى يعطيني لانه على قولته ما عنده انا ما شكيت له عن اهله بس لما صحت تكلمت وقلت راس الموضوع وما فصلت له لاني عرفت اني حساسه زياده عن اللزوم خاصه ان هذا اسلوبهم وهم بطبعهم دفشين مع بعض.. وامي اول من نبهتني على هالشيء وقالت لي طنشي ما عليج منهم dand00n انا عارفه انه وايد لان خالتي عندها 4 عيال واغراضهم يجي 1000 تقريبا بس نحن تونا منتقلين ما صارلنا 3 اسابيع وجيت على اخر الشهر وما اخذنا الا الضروريات فطبيعي باخذ اشياء وايد هالشهر لان البيت فاضي.. ولا العاده كنا ناخذ 500 ولا 600 اذا زاد انا صارلي متزوجه سنه تقريبا الا اسبوعين مو 5 شهور ولبسي هو هو من يوم العرس ما زدت عليه بعد ما تزوجت الا 4 يمكن 2 لعيد الفطر و2 لعيد الاضحى!!! وبعدين اللي صدق يخليني احسه بخيل هو ان خالتي تزوجت بعدي بشهرين وعايشه مع زوجها بشقه ومعاش ما يزيد عن 3 آلالاف درهم مع هذا اشوفها عايشه احسن عني ... مغيره موبايلها يمكن 4 ولا 5 مرات وكل اسبوعين ولا 3 رحت عندها شفت شي جديد وبيتها ما شاء الله كامل مو ناقصه شي.. ونحن اللي عيشتنا ومستوانا احسن خلاطه لين الحين ما عندنا!!! وانا راضيه انه يوفر بس ما يجي على آخر هالتوفير ويفر فلوسه على سخافه الا مسلف لي اخوه ولا عقه عالسياره ولا سوا طلعه محترمه مع ربعه طير نصهم انا اولى صح ولا لاء؟ الباقين برد عليكم |
الفارس26 شو أقولك !!! ما فهمتني:( Eman007 انا كنت سابقا اذكر عيوب زوجي بس الحين لالالالالالا اما سالفة المستشفى فهذا مو عيب فيه هذي نذاله وحقاره ولا احد يشوف زوجته تناقز جدامه من الالم وتصيح وما يحس!! لي مشاعر الحمدلله وحده تفهمني وتحس ان هالشيء كبير عندي.. وانا والله احاول اصبر نفسي بس ما في فايده... الفلوجة انا ما ادري شو سويت له عشان تقولين لي كيف متحملك!!! يا ناس انا قاعده اقول ان هالكلام كله بيني وبينكم وافكار قاعده ادور براسي ما طلع منها شيء لزوجي .. صح انا قلت له عن سالفه الفستان والصالون بس كان مجرد نقاش وانتهى ما تضاربنا عليه... وبعدين حبيبتي اهلي كانوا بيعطوني 3000 مصروف شهر وابوي كان راضي بس ما اضارب مع زوجي لانه خايف علي لكن زوجي رفض مو لانه يقدر يوفر لي لا لالان هالشيء يجرح كرامته ... يا سلام يفكر بكرامته ولا همه اتعذب وانحرم !!! وبعدين انا احمد ربي مليون مره عالنعمه اللي انا فيها والمصايب واللي قاعد يستوي بالدنيا انا اشوفها بس هذا مو معناته احرم نفسي واقطع عمري عشان احس فيهم دام اني عايشه بنعمه ليش احرم نفسي!!! والصالون شر لابد منه في عرس بنت خالتي والعالم كلها تروح صوالين وهذي اسعارهم انا شو اسوي ؟!!.. ما احط شي لان العالم عايشه بمصايب!!! الحمدلله بس على عالنعمه |
والله ماكو شي
السلام عليكم ورحمة الله وبركاته
حبيبتي انتي كم عمرك؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ لان من كلامك يدل انك ياااااااااااهل:15: :15: :15: وحرام اهلك زوجوك وانتي بهالتفكيييير حرام عليك الريال يا شيخه اقري مشاكل المتزوجين وقولي الحمدلله على حالك تبين كل شي على مزاجك وهو الريال تبينه طرطوووووور ولا تقولين لأ لأن هذا اللي تبينه ردي لزوجك قبل لا يلقى الحكمه والعقل عند غيرك |
| الساعة الآن 08:06 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©