بعد فشلي في الحلال ساعدوني على تجاوز التفكير الجاد في الحرام
بسم الله الرحمن الرحيم
( اللهم إنني أشكو إليك ضعف قوتي وقلة حيلتي )
أيها الإخوة / لا أدري لماذا أحس أنني أصبحت عاله عليكم في هذا المنتدى المبارك من مشرفين وأعضاء غير أنني وإزاء ما اشعر به سوف أحدثكم وسأظل أحدثكم حتى يفرج الله همي ويزيل كربتي ..
غبت عنكم لعلي آتيكم بخبر خطبتي وزواجي إلا أنني وللأسف آتيكم في هذه الظهيرة وقد تكالبت عليّ الهموم فلم أعد أتمالك نفسي ، أتمنى أن أتزوج وأن أعف نفسي عن الحرام الذي راودتني نفسي إليه فهو لا يعدو أكثر من ساعة بالطائرة لدولة ترعى الحرام لأقضي بذلك على نفسي فعلاً ..
يا إخوة كنت أعزو سبب تأخري لعدم وجود امرأة مناسبة أما بالأمس وقد وجدتها أجد أمي هي التي تقف في وجهي ، بنت الكل يمتدح أخلاقها ودينها وجمالها وبياضها وشعرها ووالدتي بكل ما أوتيت من سحر البيان تحاول أن تجعلها في عيني مثل الذرة فقط لأن ( وجهها طويل من النحافة ) يايمه أنا استخرت وودي أشوف البنت تقول لي أنا عارفه أنها مب جايزه لك ، يايمه النحيف يسمن ومعروف عن البنت أنها تسمن بعد الزواج قالت أنا أعرف انها مب جايزة لك وأنا والله يا إخوة من غير شعور انطلق على أمي بنهار رمضان الله يعفي عني ويغفر لامي ..
يعني أنتي بالأمس كنتي رافضة زواجي قبل الوظيفة ولا صرحتي بهذا واليوم يوم اتوظفت وفرحت أني لقيت زوجة مناسبة رحتي تعذربين فيها ياربي أنا حقيقة انهرت انهيار كامل وأبوي رايق قاعد ينكت علي ويقول لي والله صرت سالفه أنت وعرسك .. قلت له يبه المشكله أنه اللي يقول هالكلام أبوي ليته واحد من الناس من برى البيت ما اشره عليه لكن ألقى هالتحطيم في بيت أبوي هذي والله اللي ماتنوالى ..
يا إخوة قسم بالله أبي أبعد عن الحرام والله العظيم وربي يعلم ونفسي تدعوني للحرام بشتى الوسائل والله يا إخوة أن الحرام كما تعلمون يسير الوصول له وأنا ما حاولت افهم هلي هالشي لأنهم ناس ماعندهم استعداد يحطون بروسهم أنه أنا إنسان عندي غريزة إنسان عندي ميل للأنثى مثل ما ابوي يميل لامي مثل ما ابو الجيران يميل لأم الجيران يعني أنا بشر من لحم ودم عجزت أفهمهم خلاص ياناس زملاي كلهم اتزوجوا ياناس الكل يطالع فيني يقول ماشاء الله إمام مسجد ومرتب محترم وبيت مسجد يالله وش تنتظر وأنا أموت من القهر وأقول الله ييسر ونفسي والله العظيم تتقطه قهر وحسرة يعني أنا وش منتظر بهالدنيا إذا أهلي يوقفون بوجهي لحاجة تافهة وصغيرة ..
والله يا إخوة إن الحرام حصل لي بأكثر من مرة وأنا أمنع نفسي من السفر والله رحلات مجانية ولأني عارف أنه أنا إنسان ( مضغوط ) ماحبيت أنه أجر على نفسي الشر والله إني أكتب هالكلام من حرقة ومن ألم مايعلمه إلا ربي قسم بالله ..
أي أبو يقرأ كلامي حلفته بالله لا يوقف عائق في زواج ابنه أبناؤكم يا آباء والله العظيم يستحون يصرحون أنه الشهوة ذابحتهم قدامكم لأنكم بأنفسكم صانعين حواجز مع عيالكم ..
حلفتكم بالله كونوا عونا لأبنائكم على طاعة الله لا تخلونهم يلعبون بذيلوهم من وراكم لا تضطرونهم يصيرون منافقين وهم قادرين يصيرون مؤمنين ...
ياربي فرجك ياكريم
ياربي فرجك ياكريم
ياربي فرجك ياكريم