الموقف ده لأختي ..
اتخطبت لواحد ما شاء الله كان ملتزم و ذو خلق عالي و كان ما شاء الله كمان أهله ناس ملتزمين و أكثر من ممتازين
أتخطبت لمدة 3 سنوات (خطوبة من غير عقد) و في الأيام الأخيرة اشتروا الشقه و بدأت تجهيزات الفرش و اختاروا الأثاث و السيراميك ... إلخ ، كل شئ كان ماشي على أفضل ما يكون و تقريباً كان باقي شهر على الفرح
و فجأة لقيناه بيتصل باهلي و اعوز يقعد معاهم من غير ما أختي تعرف (رغم إنهم كانوا بيتكلموا عادي قبل الموضوع ده ، و اتخانقوا مع بعض بسبب إنها عاوزة تروح فرح واحده صاحبتها و هو مش موافق) جي و قعد مع أهلي و قالهم إنه مش هينفع يكمل معاها لأنهم غير متوافقين فكرياً ...
بعد 3 سنوات اكتشف فجأة إنهم غير متوافقين فكرياً ...
و كمان لأن أختي بتوافق على أي شئ هو كان بيبقى عاوزة واعتبر ده عيب فيها و هيه كانت بتعمل كده علشان تراضيه و مش يكون زعلان في أي شئ ... و كمان علشان أختي وافقت إنها تلبس النقاب لما طلب منها ده و هو حاسس إنها عملت كده مش علشان ربنا علشانه هوه و بالتالي فمش هينفع يكمل معاها
ربنا يسامحه
إيه رأيكم ؟؟؟ يا ترى عنده حق ؟؟؟ و الله إنه قال كلام كتير جداً مش ليه أي معنى و لا طعم ، لدرجة إن أهله زعلانين منه لغاية دلوقتي بسبب إنه ساب أختي ، و أهله على اتصال دائم بيها للإطمئنان عليها
الكلام ده من حوالي 4 شهور لكن أختي لغاية دلوقتي منهارة خصوصاً إنها كانت بتحبه جداً جداً جداً جداً ،، و الله إني قلبي بيدمي كل ما أشوف أختي أو أشوف دموعها اللي بتحاول تخبيها لما بتكون قاعده لوحدها
أحياناً بتعصب عليها من كتر ما هيه صعبانه عليه و أحياناً أطبطب عليها من كتر الألم اللي هيه فيه
بحاول أواسيها و أخليها تنساه لكن أنا عارفه إنه صعب الواحد ينسى 3 سنين من عمره بسهولة
ربنا يسامحه ،، ياريت تدعولها في الأيام المباركه دي إن ربنا يرفع ما بها من غم و هم و حزن و يرجع الفرح لقلبها و يساعدها إنها تنساه