السلام عليكم

انا والحمدالله حملت بعد شهر من زواجي وكانت شهور الحمل خفيفه كنت اروح للشغل واصوم ماكنت اهمل نفسي بكثرة النوم او الكسل
سافرت مع اهلي كنت اجهز لولادتي من اغراض للبيبي وكنت بنفسي اجهز الهدايا لاستقبالي
كانت مراحعتي بالشهر التاسع كل اسبوع من بدايه الشهر وانا كل يوم اشرب دارسين واروح امشي لمده ساعه طبعا غير التمشي في السوق او على البحر
اخر مراجعه لي كانت يوم احد قالت لي الدكتورة اذا ماولدي لغايه يوم الخميس وهو اخر موعد لي تسوي دخول مستشفى يوم الجمعه ونولدك بصراحه اول مره اخاف
ثاني يوم الاثنين شربت لي علبة زيت خروع كاملة مع عصير مانجا طبعا نصيحه الدكتوره ورحت للسوق وتعشيت وكنت مستانسه مافيني اي شي اللي يشوفني يقول عروس من لبسي وماكياجي
كان اييني عوار او مغص خفيف حيل جان تقول الوالده خل نروح للمستشفى نتطمن ومنها نفتح ملف كانت الساعه 12 بالليل شافتني دكتوره الله يسامحها وافحصت قالت حطوا لها تخطيط وبعدين اشوفها
بعد ساعه ونص وانا فيني مغص قالت روحي للبيت انتي مافيج شي وتعالي على موعدج يوم الجمعه نفس ما دكتورتج قالتلج ومانسى كلمهتها (دي تفاسيح مافيكسش حاجه) وطلعت وانا معصبه اقول لامي انا فيني عوار والم وهذه تقول لي تفاسيح انا احس ان تماسيح في بطني ورجعت للبيت الساعه 3

وفتحت الكمبيوتر والانترنت لغايه ماصارت الساعه 5 وتوضيت وضليت ونمت

احس اني حلمانه في عوار والم فتحت عيوني والا بقعه ماي بصراحه ماهمني الماي كثر ماكنت احاتي الوقت الساعه كانت 7 الصبح ووقت ذروة المدارس والشغل فشلون راح اوصل للمستشفى
ناديت على امي قلت لها قالت لي تحممي ولبسي ونزلي انا نزلت اكلت لي تمر وعلبة روب بعدها انفجر كليس الماي وصار الطلق كل 20 - 15 دقيقه

رحت المستشفى الدكتوره قالت ولاده اتصلوا على دكتورتها وانا احوس في الممر
كانت الساعه 9 تقريبا صعدت للغرفه بدلت ملابسي حطولي جهاز قياس نبض البيبي وسرعه الطلق طبعا العوار في زياده على اوقات متقاربه
قريت فيهم قران لغايه الساعه 11 الا ربع نزلوني الولاده انا بصراحه من دخلت الغرفه ماحسيت بشي
لان مجرد ما يت تبي تحط ابره المغذي صرخت من الالم عطوتي الكمام
كنت احس بس 2%
ماحسيت الا وانا مفتحه عيوني وزوجي يبوس راسي يقول لي مبروك ولدت تقريبا الساعه 1 الظهر وكان ولد و نمت يمكن ساعه بعدها صعدت لغرفتي وشفت البيبي اول مره

بس بصراحه ألم الولاده يهون عن ألم ما بعد الولاده

سامحوني على الإطالة