ههههههههه حرام عليج شو تبين تخربين بيتها ...؟؟؟!!!!!!!!!

أختي دلوعة مودي ...الله يعينج على وضعج هذا بس والله مافي بيت مافيه هموم ..
احمدي ربج ان بلاج اهون من بلا غيرج .. و حاول تتقبلين ريلج مثل ماهو لان مسألة البرود هذي جزء من طبيعته و شخصيته .. و مثل ما يقولون بو طبيع ما اييوز عن طبعه .. فانتي حاولي اول شي انج تقنعين نفسج ان هالبرود جزء من شخصيته مو شي هو يتعمد يسويه عشان يجرحج أو يضايقج .. والله لو قدرتي تقتنعين بهالشي بترتاحين نفسيا ..
بعدين ابدي شوي شوي تشركينه في امور البيت و الاطفال .. بس خذيها بالتدريج و بدون عصبية او منازع .. و بدون ما تقوليله انت بارد او ما تحس او مرضتني .. لان هالكلمات بيكون لها تاثير سلبي و بتخليه رافض اي شي منج و ممكن تؤدي لمشاكل لكبر بينكم .. فمثل ما قلتلج انتي ابدي السالفة وحدة وحدة و بالتدريج .. يعني مثلا خذيلج فترة خليه هو في دور المستمع .. يعني يوم يرد من شغله و يرتاح و باسلوب هادي (مو اسلوب التطفيش و النكد) خبريه عن امور البيت و الاولاد .. قوليله كل شي يصير .. مو بس المشاكل .. لا قوليله عن الاشياء الحلوة و المواقف الكوميدية اللي ممكن يسوونها الاولاد .. خلي العيال بعد يتعودون انهم يقعدون و ياه و يخبرونه عن امورهم و اللي يصير وياهم سواء في البيت او المدرسة .. بس ارد و انبهج لا تخبرينه بس عن المشاكل .. بالعكس دوري الاشياء الحلوة و خبريه عنها خليه هو يتمنى انه يكون جزء من هالمواقف..

شي ثاني بعد .. خاول انج انتي تتدخلين في اموره و مشاكله .. اسأليه عن شغله عن ربعه عن اهله .. خليه يتعود يتكلم وياج و يخبرج كل شي .. ساعتها مع الوقت بتحصلينه هو بعد يسالج عن امورج و يساعدج فيها .. يعني بيعاملج مثل ما تعاملينه ..

اسمحيلي لو طولت عليج .. بس بصراحة انا اضايق يوم احصل زوجين يشتكون من بعض .. لاني احس ان الزواج نعمة .. ولازم كل وحدة فينا تحاول قد ما تقدر تحافظ على هالنعمة و تحمد ربها عليها .. في لحظات زعلج من ريلج و نرفزتج و ضيقج منها حاولي تتخيلين كيف بتكون حياتج لو لا قدر الله انحرمتي منه لاي سبب .. ساعتها لو كنتي تحبينه بتسامحينه و تتقبلينه مثل ما هو سواء سوا الشي اللي تبينه ولا لاء ..

الله يصلح حالكم و يسخرلج ريلج و يهدي اموركم

اختج
بنت الحب