لا حول ولا قوة إلا بالله .. الله يعينك ياخوي و يصلح امورك
والله سالفتك مو هينه .. بس انت الوحيد اللي تقدر توصل فيها لقرار لانك انت ادرى بزوجتك و باخوك و بالناس اللي يتكلمون عنكم ..
لكن نصيحتي لك .. انك تهدى شوي و تحاول تفكر بعقلانية عشان توصل لقرار ما تندم عليه بعدين مهما كانت نتايجه ..

انت فلت انك عارف ان اخوك هو اللي كانت له نوايا سيئة تجاه زوجتك .. و زوجتك انت ما شفت منها شي يخليك تشك فيها او تكرهها ..

شوف .. سكنك مع اهلك شي مو وارد .. لان اخوك في البيت و هالنوعية من البشر ما ينصلح حالهم .. يعني لا تقول برد اسكن عند اهلي و يمكن اخوي ينصلح حاله .. خلك بعيد احن و اشرف

و بالنسبة لاهلك .. اكيد ما بيتقبلون شي عن ولدهم (اخوك) حتى لو كانو عارفين بطبعه و نواياه تجاه زوجتك بيحطون اللوم عليها لان دايما الاهل ما يشوفون في عيالهم اي غلط .. فلا تتريا منهم انهم يساعدونك في هالموضوع.. بالعكس بتزيد المشاكل و بيزيد كرههم لزوجتك ..

اما بالنسبة للكلام اللي طلع عليك و على زوجتك فصدقني الناس يدورون اي شي عشان يتكلمون عن بعض .. و طبعا كل واحد يزيد شوي .. فانت لو كنت واثق في زوجتك و اخلاقها خلاص ما يهمك من حد و مع الوقن الناس بينسون و يسكتون .. لانك لو طلقتها الحين انت بتاكد انها حرمة مو زينه و بتخرب سمعتها و هذا ظلم كبير .. فانت اصبر و انسى .. بعدين ممكن يكون اخوك هو السبب في هالكلام اللي طلع .. لانه ممكن يكون هو اللي حرض جارتكم انها تطلع هالكلام على زوجتك .. وانت مثل ما قلت هي حرمة مو زينه و لها علاقات

فانت فكر بهدوء و شوف الاحسن لك و للي حواليك بدون ما تظلم حد .. و لو قررت تكمل مع زوجتك لازم تسكنون بعيد عن اهلك .. و انت تقدر تزورهم من وقت للثاني لانهم بيتمون اهلك مهما صار وواجبك انك توصلهم

الله يهديك و يرشدك للقرار الصح .. طمنا عليك و خبرنا باللي يصير وياك

تحياتي
اختك بنت الحب