أولاً ربنا يصبر أختك على الابتلاء اللي ربنا ابتلاها بيه
ثانياً: قريت كتير جداً في المواضيع المشابهه في حالات الأخطاء الجسيمة اللي ممكن يعملها الزوج ، و كانت كل آراء المختصين تجمع إن المصارحة في مث هذه الأوقات مش بتجيب غير نتيجة عكسية تماماً
خلينا نشيل جوزها من الموضوع و نتخيل إنه ابنها و له شخصية قوية و عمل أي خطأ و هيه اكتشتفته و راحت تأنبه على اللي عمله ، أي إنسان في مكانه و بالشخصية اللي بتحكي عليها لازم هيتصرف بالطريقة دي و تأخذه العزة بالإثم زي ما بيقولوا
هو مهما كان راجل البيت ، عمل حاجه غلط ، أوك كلنا بنغلط لكن أكيد مش عاوز الخطأ ده ينتقص من هيبته شئ في بيته لكنه في قرارة نفسه متأكد إن هيبته و مكانته اتزعزعت و اللي بيعمله من قساوة و طريقة معاملة قاسية هو زي ما تفضلت و وصفت بيحاول مش يخلي زوجته تاخدها فرصه و تذله باللي حصل أو حتى تبصله بصة احتقار من اللي عمله
كبرياؤه هو اللي مخليه يتصرف التصرفات دي ، و الله أعلم ، مش معنى تصرفاته إنه مش ندمان أو مش مكسوف من اللي حصل بالعكس لكن زي ما بيقولوا عندنا دي حلاوة روح
أختك صح في قرارها إنها مش تقول لأي حد على اللي حصل لأنه فعلاً هيزيد فيها و ممكن -ربنا يكفيها إن شاء الله- يوصل الموضوع للانفصال علشان يروح يدور على بيت تاني يقدر يمارس فيه رجولته من غير ما أي حد ينتقص كرامته فيها
أعتقد إن زوج أختك إنسان مش سئ لهذه الدرجة لكنه محتاج طريقة حكيمة في إرشاده و إرجاعه لطريق الحق
ممكن تساعد في الموضوع ده بمجرد التلميح أو إنك تحكيله على قصص مشابهه و تاخد رأيه فيها
أما عن أختك فربنا يصبرها على ما ابتلاها بيه ،، خليها تعامل الموضوع بحكمة و بلاش إسلوب الهجوم لغاية لما يهدا ، و بلاش كمان تحسسه إنه مش مكان ثقة ، أكيد صعب عليها لكن إن شاء الله يجيب نتيجة و شوية شوية يكون في عتاب رقيق كل ما سمحت لها الوقت و الفرصه
ربنا معاها إن شاء الله