اختي الغالية انا حقيقة مش متزوجة ومابعرف بشغل العزايم بس بعرف اطبخ و حقترح عليكي

انا بتخيل لو انا الي عندي العزومة كنت حعمل التالي :::

1- ممكن تعملي جاج بالطريقة الي تحبيها بحيث الكبار عددهم 11 صح؟؟؟
اعتقد بدهم كل فردين حياكلو دجاجة(طبعا مش الكل بيقدر لكن الرجال بيقدرو ونص انت عموما خلي العدد زايد ولاينقص عليكي) يعني قولي هيك بدك 5او 6دجاجات ، اما الصغار كل 3في دجاجة يعني كمان 3دجاجات بدك يعني بالمجمل 9 او 10 دجاجات تعمليهم بالطريقة الي حاباها ،،، طبعا هادا حيكون اكتر من حاجتهم لكن للاحتياط وبعد العزومة الاكل الزائد بتخليه للايام القادمة تتصرفي فيه وتاكلوه انت وزوجك وولادك ،،، اضافة انو لو كانت الدجاج مش الاكلة الرئيسية فطبعا ماحيكون هادا العدد يعني حتختصري احسبي انو كل شخص حياكل قطعتين دجاج .

2- ممكن تعملي طبق ورق عنب ومحشي

3- صينية مكرونة بالباشاميل
اسهل واروع واسرع بشاميل(في مقلاة جيبي 2 ملعقةكبيرة سمنة او زبدة+2ملعقة طحين كبيرة قلبيهم
ثم اضيفي من 1ونص الى 2 كوب حليب سائل حسب مابدك يكون كثافتو للباشاميل وقلبي جيدا بالمضرب واضيفي شوية ملح وفلفل
وممكن اضافة بيضة بالاخر
وشوووية جبنة مبشورة.

4-سلطات طبعا مثل ( سلطة خضار بالمايونيز - سلطة ذرة بالمايونيز - سلطة خضراء عادية - سلطة ملفوف بالماايونيز- سلطة الاوراق الخضراء(جرجير+ورق فجل+بقدونس+شبت+خس...)
سلطة سيزر - ......) طبعا حسب نوع الاكل بتحطي السلطة فمثلا ماراح تعملي سلطة مايونيز وانت عاملة محشي .

5- شوربة

6- ارز وعندي الك طريقة زر حلوة وهي كالتالي :::
بتجيبي حلة بتحطي فيها زيت و لحمة مفرومة وبصل وبتشوحيهم سوا
ثم بتضيفي جزر مقطع معكبات + بطاطس مقطعة مكعبات وبتقلبيهم سوا لفترة بسيطة لغاية ما يطرو شوي
وبالاخر بتحطي بازيلاء وبتخلطيهم سوا
انتبهي البطاطس والجزر اول عشانهم اقسى من البازيلاء ومحتاجين وقت اكتر للاستواء
لو حطيتي البازيلا بالاول حيتفغصو
المهم بعدين بتحطي رز حبة طويلة وبتقلبي وبتحطي شوربة دجاج بدل الماي وبتملحي وتحطي البهارات اللازمة
وبتخليه مفلفل وحلو زيك.....طبعا المكونات الخضار حسب التقدير والارز حسب حاجتك انت لكن اكثري الخضر واللحم عشان يكون طبق غني ولذيذ

7-ممكن تعملي رز بالفول الاخضر وهادا كتير طيب وشهي وزاكي طريقتو كالاتي
جيبي الفول الاخضر وقشريه والحبات نفسهم كمان قشريهم لانو بكون عليهم قشر سميك مصيبة لو انطبخ بصير قاسي ومبين بالاكل
اوكي هلأ ممكن تنقعي حبات الفول قبل التقشير عشان يطرو ويسهل التقشير(اقصد تقشير الحب نفسو مش قشر القرن)
تحضري حلة وتحطي زيت + لحمة مفرومة+شبت+الفول الاخضر وبتقلبي لغاية ما يتشوحو سوا
ثم بتحضري كمية الارز الطويل الي انت حاباها حسب الحاجة وتقلبي معاهم
ثم تضعي الماء والبهارات والفلفل االاسود و كمية من الكركم بحيث يعطي لون اصفر خفيف
وبس (اكلة زاكية جدا مش طبيعية باللذة)

8-صينية بطاطس بالطحينة
راح اقلك طريقتي السحرية لما اعملها اخواتي كان ياكلوها كلها ومايخلو ولانقطة
جيبي بطاطس قشريها وقطعيها دوائر وسط واقليهم شوي يعني عشان يستوو ربع سوا ما تقليهم زي بطاطس العادية
لا دوب شوي
جيبي صينية وضعي فيها (شرائح بطاطس + شريح بندورة + شرائح بصل + ممكن شرائح فلفل رومي )
وضعي اصابع كفتة .
والان بتجيبي في صحن عميق مستقل بتحطي مية + طيحنة وملح وبهارات وفلفل اسود
مع مراعاة الطحينة تكون كتيرة وثقيلة انت قدري يعني
ثم بتحطيها بالفرن لغاية ماتتسبك عالااااااخر وتنشف الصلصة اغلبها ويضل خلاصة الطحينة
هيك بتكون مسبكة ويمممم بس بتعطش كتير
ممكن تستبدلي الطحينة بالصلصة وبنفس الطريقة بالتسبيك .

9- طبق جانبي معجنات .
اتفضلي هذا العجينة السحرية مش طبيعية بالطراوة اتحداكي ان عملتيها وما ادمنتي عليها لكل المعجنات
عجينة رائعة بكل معنى الكلمة تحسيها من المريخ من كتر ماهي رائعة
2 كوب طحين + 2ملعقة كبيرة خميرة جاهزة + فنجان قهوة سكر + رشة ملح
+ 2 كول ماء دافي .......... يخلطو سوا بالمضرب
تترك 10 دقائق تتخمر
ثم :::: يضاف 3 كوب طحين وتعجن جيدا ويضاف نصف كوب زيت على مرتين (يعني تقسمي نص الكوب عمرتين)
وتعجن جيدا.... في كل مرة بعد اخر اضافة زيت تكون العجينة طرية وتلتصق وعند الاستخدام يوضع طحين عاليدين .
بكل ثقة خدي هالطريقة وراح ترفع راسك فووووووووووووووووووووووووووق.اقسم بالله انها رووعة اختي

10- ممكن تعملي طبق جانبي هاي الصينية الخفيفة :::
تجيبي شرايح بطاطس مقطعة مقشرة ومغسولة والشرايح متوسطة بحيث انها راح تستوي عالفرن وبس
والان احضري لبن زبادي كمية مناسبة ووضعي عليهم ملح وفلفل اسود وكمية صغيرة من الكركم واخلطيها جيدا
وغطي بها البطاطس المصفوفة في صينية مدهونة بالزيت ثم حطيها الفرن وادعيلي

11- طريقة عمل دجاج الكنتاكي ::::
تغمسي الدجاج في طحين ثم تغمسي الدجاج في بيض متبل ومبهر ثم تغمسيه في بقسماط مبهر ومملح وتقلي
نفس الطريقة تعمليها لكن ممكن بفيليه الجاج يعني ستيك وممكن كمان طريقة لزيزة انك
تجيبي الدجاج وتغمسيه في طحين ثم بيض ثم تغطي وجه الستيك الاول بالسمسم والوجه التاني بحبة البركة
اقلي وشوفي الطعم الرهيب

***في طريقة بالكورن فليكس شفتها بمنتدى اخر وها هي ::::
تاخدي صدور الجاج وتدقيها جيدا او تاخديها جاهزة من عند اللحام يعني شبيه الفيليه ثم تغمسيها في طحين ثم بيض ثم كورن فليكس
ثم حطيها بالتلاجة نص ساعة ثم اقلي بزيت غزير
((ممكن تعملي بيها ساندويشات )


12- طبق جانبي خفيف وهو كفتة الخبز(اكلةتركية )
خبز كامل توست تاخدي الجزء الابيض + جبنة بيضاء مبشورة + بيضة + فلفل احمر بودرة او هداك الي يكون للتغيس
وكل هالمقادير حسب الكميية والتقدير
طبعا الملح والفلفل والبهار الخفيف
ثم تخلطي كلو عالخلاط وتعمليهم كرات ثم تقلي
.

كيف عجبتك الاطباق؟طبعا ماراح تتطبخي كل هادا لكن ممكن انتي تختاري اصناف وتعملي من كل نوع كمية مناسبة بحيث
يكون هناك اطباق عدة يعني بوفيه مفتوح

وانتي بدك تحلاية ولا ؟؟؟؟

خبريني عموما شوبيصير معك
شوقتيني اتزوج واطبخ لزوجي ...
شوفي توقيعي وادعيلي
مع حبي ودعواتي بتوفيقك بالعزومة

__________________