آسفه أختي ملك شادي على التأخير بس عشان بأجهز لشبكتي وأفكاري عامله سلطه شويه
ماشاءالله عليكي ما بقيتي شي شكلك شطوره بالكرافت والتطريز وبما انك شطوره
اسمعي هدي الفكره :
جيبي ورق مقوى وقصي على شكل قلب متوسط الحجم بحيث إنه يكون منطبق على بعضه زي الكتاب فهمتي عليه
دحين جيبي فلين وقصي قلبين بنفس حجم الورق المقوى ولصقي كل قلب فلين على قلب الورق المقوى عشان يعطيلو دعامه ( يفضل غراء مسدس أو أي نوع تاني قوي )
جيبي قطن ولصقيه فوق الفلين
جيبي قماش ساتان أو جوخ باللون إلي تحبيه وقصيه بشكل قلب بنفس طريقة الورق المقوي يعني زي الكتاب بس يكون حجمه أكبر بشويه من الفلين والورق المقوى عشان تلصقيه فوق القطن بس قبل ما تلصقيه طرزي اسمك واسمه أو أحبك على واحد من القلبين
دحين سار عندنا كتاب على شكل قلب تقدري تجيبي ورق مقوى وبرضه تقصيه على شكل قلب وتلصقيه من جوا القلب عشان يخفي عيوب تلصيق القماش من جوا
ممكن تكتبي دايركتلي على نفس الورق المقوى رساله حلوه أو تجيبي ورق عادي مزين وتقصيه على شكل قلب وتكتبي فوقه الرساله
انشاالله تكون عجبتك الفكره
عارفه انها مو قد كدا بس والله بسبب الظروف إلا بأمر فيها أكيد عارفه كد إيش صعب التجهيز للشبكه
